Ẹsta O Siwi Ahwo Riẹ

Ẹsta yọ ọmọtẹ Ju nọ ọ jẹ rria okpẹwho Shushan evaọ Pasia. Evaọ ikpe buobu nọ e vrẹ, ahwo uviuwou riẹ a jọ usu ahwo nọ Nebukadneza o mu no Jerusalẹm kpohọ igbo evaọ obọ Babilọn. Mọdekae nọ aimava a rrọ emọ inievo ivẹ, ọye ọ yọrọ e riẹ. Yọ Mọdekae o je ru iruo evaọ uwou Ahasuirọs ovie Pasia.

Whaọ Ahasuirọs ọ gwọlọ aye ọkpokpọ. Fikiere idibo riẹ a tẹ rehọ emetẹ nọ e mai wo erru ro sei re ọ salọ, yọ Ẹsta ọ jọ usu rai. Evaọ usu emetẹ na kpobi, ovie na ọ tẹ salọ Ẹsta re ọ jọ aye riẹ. Mọdekae ọ tẹ vẹvẹ Ẹsta unu nọ ọ ta kẹ ohwo ọvo ho inọ ọyomariẹ ohwo Ju.

Ọzae jọ nọ a re se Heman o wo omorro gaga, yọ ọye họ ọnọ o wuzou ikpahwo-esuo na kpobi. Ọ gwọlọ nọ ohwo kpobi o re guzou kpotọ kẹe. Fikinọ Mọdekae ọ rọwo guzou kpotọ kẹe he, eva e tẹ dhae gaga te epanọ ọ rọ gwọlọ nọ o re kpe Mọdekae no. Nọ Heman ọ riẹ nọ Mọdekae ohwo Ju, ọ tẹ gba ẹgwae epanọ a re ro kpe ahwo Ju kpobi no. Heman ọ tẹ vuẹ ovie na nọ: ‘Ahwo Ju na a yoma gaga; kpe ai kpobi no.’ Ahasuirọs ovie na ọ tẹ ta kẹe nọ: ‘Ru ai epanọ who roro nọ u fo.’ Kẹsena ovie na ọ tẹ kẹe ogaga nọ o re ro fi uzi họ. Heman o te fi uzi họ inọ a kpe ahwo Ju kpobi no evaọ edẹ ikpegbesa (13) amara nọ a re se Edar. Jihova ọ jẹ ruẹ oware nọ o jẹ via na.

Ẹsta ọ riẹ nọ a fi uzi utioye họ họ. Fikiere Mọdekae ọ tẹ rehọ obe uzi na jọ sei, jẹ ta kẹe nọ: ‘Nyae ta ẹme kẹ ovie na.’ Ẹsta ọ tẹ ta nọ: ‘A gbe se ohwo taure ọ tẹ nyabru ovie na ha, a re kpei no. Anwọ edẹ ọgba (30) soso ena, ovie na o ri se omẹ hẹ! Rekọ mẹ te nya ghele. Ọ tẹ riẹ ọkpọ riẹ rri omẹ, mẹ te zọ, rekọ ọ gbẹ riẹe rri omẹ hẹ, yọ me whu no.’

Ẹsta ọ tẹ nya kpobọ ọgwa ovie na. Nọ ovie na ọ ruẹ e riẹ, ọ tẹ riẹ ọkpọ riẹ na rri Ẹsta. Ẹsta ọ tẹ nyabru ovie na, kẹsena ovie na ọ tẹ nọe nọ: ‘Eme whọ gwọlọ nọ me ru kẹ owhẹ, Ẹsta?’ Ọ tẹ ta kẹ ovie na nọ: ‘Mẹ gwọlọ nọ whẹ avọ Heman wha ziọ obọ uwou mẹ te re emu.’ Nọ a jẹ re emu na, Ẹsta ọ tẹ wariẹ zizie ai orọ avivẹ. Evaọ ẹdẹ nọ a jẹ rọ re emu avọ ivẹ na, ovie na ọ tẹ wariẹ nọ Ẹsta nọ: ‘Eme whọ gwọlọ nọ me ru kẹ owhẹ?’ Ẹsta ọ tẹ ta nọ: ‘Ohwo jọ ọ gwọlọ kpe omẹ avọ ahwo mẹ no. Ivie siwi omai.’ Ovie na ọ tẹ nọe nọ: ‘Ono ọ gwọlọ kpe owhẹ no?’ Ẹsta ọ tẹ ta nọ: ‘Heman oyoma nana.’ Eva e dha Ahasuirọs ga te epanọ ọ rọ ta nọ a kpe Heman no.

Rekọ ohwo ọvo ọ rẹ sai nwene uzi Heman na ha, makọ ovie na dede. Fikiere ovie na ọ tẹ rehọ Mọdekae mu ọnọ o wuzou ikpahwo-esuo na kpobi, jẹ kẹe ogaga nọ o re ro fi uzi ofa họ. Mọdekae o te fi uzi họ nọ o rẹ kẹ ahwo Ju uvẹ re a sai lele ewegrẹ rai họre, nọ ewegrẹ rai a tẹ wọ ohọre ze. Evaọ edẹ ikpegbesa (13) amara Edar, ahwo Ju a te lele ewegrẹ rai họre je fi ai kparobọ. No umuo oke oyena vrẹ, ahwo Ju a jẹ hai ru ehaa obokparọ na kukpe kukpe.