Daniẹl Evaọ Ọgọdọ Ikpohrokpo

Ovie ọfa nọ o su Babilọn họ Dariọs ohwo Midia na. Dariọs o muẹrohọ nọ Daniẹl yọ emamọ ohwo. Fikiere ọ tẹ rọ Daniẹl mu ọnọ o wuzou ezae nọ e mai wo areghẹ evaọ ẹkwotọ na soso. Ezae nana a tẹ jẹ re Daniẹl ihri, jẹ gwọlọ epanọ a re ro kpei no. Fikinọ a riẹ nọ Daniẹl ọ rẹ lẹ se Jihova isiasa evaọ okpẹdẹ, a tẹ ta kẹ Dariọs nọ: ‘O ovie, fi uzi họ inọ ohwo ọvuọvo ọ rẹ lẹ se ọghẹnẹ jọ hayo ohwo ọfa jọ họ u te no owhẹ no. Ohwo kpobi nọ o kie uzi na, a re gbolo iei fihọ ọgọdọ ikpohrokpo na.’ Ẹme nọ a ta na ọ were Dariọs, fikiere ọ tẹ whobọhọ uzi na.

Nọ Daniẹl o yo kpahe uzi nọ a fihọ na, ọ tẹ nya kpobọ uwou riẹ. O te kigwẹ fihọ aro unwido riẹ nọ u rovie fihọ, ọ tẹ lẹ se Jihova. Ezae nọ e be re ẹe ihri na, a tẹ họrọ ruọ eva uwou Daniẹl, a tẹ ruẹ nọ ọ be lẹ. A tẹ nwane dhẹ bru Dariọs a tẹ ta kẹe nọ: ‘Daniẹl ọ rọwo koko uzi nọ who fihọ na ha. Ọ be lẹ se Ọghẹnẹ riẹ isiasa okpẹdoke.’ Whaọ Dariọs o you Daniẹl gaga, yọ ọ gwọlọ nọ Daniẹl o whu hu. Ọ tẹ rehọ okikpo soso je roro kpahe epanọ ọ sae rọ thọ Daniẹl. Rekọ ohwo ọvo ọ rẹ sai nwene uzi nọ a fihọ họ, makọ ovie na dede. Fikiere ọ tẹ ta kẹ isoja riẹ inọ a gbolo Daniẹl fihọ ọgọdọ ikpohrokpo na.

Evaọ aso yena, Dariọs ọ jẹ ruawa kpahe Daniẹl gaga fikiere ọ sae wezẹ hẹ. Nọ oke o nwane ke, Dariọs ọ tẹ dhẹ kpobọ ọgọdọ na, o te se Daniẹl: ‘Kọ Ọghẹnẹ ra o siwi owhẹ?’

Dariọs o te yo urru Daniẹl! Daniẹl ọ tẹ ta kẹ Dariọs nọ: ‘Jihova o vi ukọ-odhiwu riẹ ze ti ruru unu ikpohrokpo na. A nwa omẹ oma vievie he.’ Eva e tẹ were Dariọs gaga! O te jie uzi nọ a si Daniẹl no eva ọgọdọ na ze. Whọ rẹ jọ oma Daniẹl ruẹ oka ọvuọvo ho. Kẹsena ovie na o te jie uzi nọ: ‘Wha gbolo ezae nọ e gba ẹgwae omuomu na fihọ evaọ ọgọdọ na.’ Nọ a gine gbolo ezae na fihọ eva ọgọdọ na, a kie te otọ taure ikpohrokpo na e tẹ te va ai no ho.

Dariọs o te jie uzi nana kẹ ahwo na kpobi inọ: ‘Jọ ohwo kpobi ọ dhozọ Ọghẹnẹ Daniẹl. Keme ọye ọ thọ Daniẹl no abọ ikpohrokpo na.’

Kọ whọ rẹ lẹ se Jihova kẹdẹ kẹdẹ wọhọ Daniẹl?