Etadhesẹ Hayo Iriruo nọ A rẹ Sai Wuhrẹ No Ze

Matiu 13:34, 35

OWARE NỌ O GWỌLỌ: Ru oghẹrẹ nọ who bi ro wuhrẹ ahwo woma ziezi ẹkwoma etadhesẹ hayo iriruo elọlọhọ nọ who re ro kugbe wuhrẹ, e rẹ jọ enọ a rẹ sai wuhrẹ emamọ eware no ze, nọ i re duobọte udu ahwo nọ a be gaviezọ kẹ owhẹ.

EPANỌ A RE RO RU EI:

• Salọ etadhesẹ hayo iriruo elọlọhọ. Rọ aro kele Jesu ẹkwoma eware esese nọ who re ro ru eware ilogbo vẹ gbe eware elọlọhọ nọ who re ro ru eware egaga vẹ. Who fi eware nọ e roja ha ba etadhesẹ hayo iriruo ra ha keme u re ru ei bẹbẹ kẹ ahwo wo otoriẹ oware nọ whọ gwọlọ wuhrẹ. Ruẹ nọ eware nọ whọ fodẹ evaọ ọtadhesẹ ra e rọwokugbe oware nọ whọ gwọlọ wuhrẹ na re enọ e be gaviezọ kẹ owhẹ na a gbe reghe no ho fikinọ eware ivẹ na e rọwokugbe he.

• Roro kpahe ahwo nọ a te gaviezọ kẹ owhẹ. Salọ etadhesẹ nọ i kiekpahe eware nọ ahwo nọ a be gaviezọ kẹ owhẹ na a re ru hayo nọ e rẹ were ae. Yọroma re etadhesẹ ra i gbe kpomovuọ họ ahwo na oma hayo ru eva dhae he.

• Wuhrẹ ahwo ugogo oware na. Tẹrovi eware nọ e mai wuzou evaọ ọtadhesẹ na nọ ahwo a ti wuhrẹ ugogo eware jọ no ze orọnikọ eware nọ e roja tere he evaọ ọtadhesẹ na ha. Daoma ru re ahwo nọ a be gaviezọ kẹ owhẹ na a sae kareghẹhọ oware nọ whọ rehọ ọtadhesẹ na wuhrẹ ai orọnikọ ọtadhesẹ na ọvo ho.