UWUHRẸ AVỌ 14

Igogo Eware nọ A re Ru Vẹ

Ahwo Hibru 8:1

OWARE NỌ O GWỌLỌ: Fiobọhọ kẹ ogbotu na re a sai lele ẹme ra owowa, je ru re a ruẹ epanọ ugogo oware ovuovo u ro wobọ kugbe ẹjiroro ẹme na gbe uzoẹme na.

EPANỌ A RE RO RU EI:

Riẹ ẹjiroro ẹme na. Daoma riẹ sọ ẹjiroro ẹme na họ re whọ vuẹ ogbotu na oware jọ, kẹ ai imuẹro, hayo ru ai wo isiuru nọ a re ro ru oware jọ, re whọ ruẹrẹ ẹme ra na họ lele ẹjiroro yena. Ruẹ nọ igogo eware nọ i wuzou kpobi nọ whọ te ta ẹme kpahe i ti fiobọhọ kẹ owhẹ ru ẹjiroro ra gba.

Nọ omara nọ: ‘Enọ hayo avro sa-sa vẹ o rẹ sae jọnọ ogbotu nọ ọ te gaviezọ kẹ ẹme na a wo kpahe uzoẹme nana? Ẹvẹ u fo nọ a rẹ rọ kẹ iyo enọ hayo eme avro itieye na unọjọ utọjọ?’ Kẹsena whọ vẹ ruẹrẹ eme ra họ unọjọ utọjọ evaọ oghẹrẹ nọ o rẹ rọ lọhọ kẹ ogbotu na re a riẹ obonọ whọ be ta ẹme na rri, wo otoriẹ oware nọ whọ be ta na, jẹ rọwo eware nọ whọ ta.
Fiẹgba họ uzoẹme ẹme ra na. Hae fodẹ uzoẹme ovuẹ na evaọ etoke ẹme ra na kpobi ẹkwoma igogo eme uzoẹme na hayo eme efa nọ i wo otofa ovona nọ whọ rẹ wariẹ.
Ru igogo eware nọ i wuzou na vevẹ lọlọhọ. Salọ eware nọ i wuzou nọ i wobọ kugbe uzoẹme ra na ọvo, nọ whọ rẹ sae rehọ oke nọ a kẹ owhẹ na ta ẹme kpahe ziezi. Salọ umutho eware jọ ọvo nọ whọ rẹ ta kpahe, kake fodẹ ae ọvuọvo, whọ tẹ fodẹ ọjọ no, dhizu omojọ re whọ tẹ te fodẹ ọfa, kẹsena whọ vẹ ta ẹme kpahe ae unọjọ utọjọ evaọ edhere nọ e rẹ rọ jẹhọ ohwohwo lọlọhọ.

Whọ sae fodẹ igogo eware nọ whọ te ta ẹme kpahe na evaọ emuhọ ẹme ra re u fiobọhọ kẹ ogbotu na riẹ oghẹrẹ nọ ẹme na ọ be nya, hayo ta ẹme kpahe ae kpẹkpẹe evaọ ekuhọ ẹme ra.