Uwuhrẹ 36

Eruvẹ Uzoẹme

Eme o gwọlọ nọ who re ru?

Hae fodẹ uzoẹme ra je ru ei vẹ evaọ idhere sa-sa nya ẹme ra na du.

FIKIEME U JE WUZOU?

U re koko ẹme ra họ je fiobọhọ kẹ ogbotu na wo otoriẹ eme nọ whọ be ta a vẹ jẹ kareghẹhọ ae.

IRUẸME nọ i wo ona a riẹ epanọ uzoẹme nọ a re wo u wuzou te. A tẹ be ruẹrẹ oma kpahe kẹ ẹme, uzoẹme na u re fiobọhọ kẹ ae tẹrovi uzedhe ofẹ nọ a rẹ rehọ ovuẹ na no ze je roro kpahe iẹe didi viere. Oware nọ u re noi ze họ ukpenọ a re dhobọte eware buobu ehruehru gheghe, a re ru ẹme na evaọ edhere nọ ọ rẹ mae kẹ ogbotu rai erere. Nọ igogo eme na ọvuọvo e tẹ jẹhọ uzoẹme na je fiobọhọ ru ẹme na vẹ, u re fiobọhọ kẹ ogbotu na kareghẹhọ igogo eme na je wo otofa rai ziezi.

Dede nọ a rẹ sae tae nọ uzoẹme ra họ ogha-ẹme nọ whọ be te t’ẹme kpahe na, whọ te ruẹ nọ ẹme ra o ti woma viere nọ whọ tẹ rehọ iẹe nnọ uzoẹme ra họ uzedhe ofẹ nọ whọ be te rehọ ogha-ẹme ra na no ze. Uvie na, Ebaibol na, gbe ẹkparomatha na yọ egha-ẹme ekẹkẹe. A rẹ sai wo izoẹme sa-sa no egha-ẹme eyena ze. Iriruo jọ ena: “Uvie na, Uvi Egọmeti,” “Uvie Ọghẹnẹ U Ti Ru Otọakpọ Fihọ Aparadase,” “Ọghẹnẹ O Gie Ẹwolo ku Ebaibol Na,” “Ebaibol na Yọ Uvi Ọthuke kẹ Edẹ Mai Na,” “Ẹkparomatha Ọ rẹ Kẹ Enọ I bi Weri Ẹruore,” gbe “Ẹruore Ẹkparomatha na O re Fiobọhọ k’Omai Dikihẹ Ga Nọ Ma tẹ Rẹriẹ Ovao ku Ukpokpoma.” Izoeme nana kpobi e gwọlọ nọ whọ rẹ t’ẹme na rri ofẹ sa-sa.

Rọwokugbe ugogo uzoẹme Ebaibol na, usiuwoma ota Jesu Kristi evaọ etoke odibọgba otọakpọ riẹ u fielo họ uzoẹme na: “Uvie odhiwu o kẹle ino.” (Mat. 4:17) Ẹvẹ o ro fielo họ uzoẹme oyena? A jọ ikere Usiuwoma ene na t’ẹme fodẹ Uvie na bu vi asia 110. Rekọ Jesu o ru vi ubiẹme na “uvie” nọ o dhe ẹfẹfodẹ ọvo. Ẹkwoma eware nọ o wuhrẹ gbe eware igbunu nọ o ru, Jesu o ru rie vevẹ inọ ọye omariẹ, ọnọ ọ rrọ etẹe na, họ Ọmọ Ọghẹnẹ, Mesaya na, ọnọ Jihova ọ be te kẹ Uvie na. Jesu o te je dhesẹ nọ ẹkwoma riẹ a bi rovie edhere na fihọ kẹ amọfa re a w’obọ evaọ Uvie oyena. O dhesẹ ekwakwa nọ ahwo nọ a be te kẹ uvẹ-ọghọ oyena a re dhesẹ. Ẹkwoma iwuhrẹ riẹ gbe iruo igbunu nọ o ru, o dhesẹ otofa nọ Uvie Ọghẹnẹ o te jọ izuazọ ahwo wo vevẹ je dhesẹ inọ idhivẹri nọ o bi le no ẹkwoma ẹzi Ọghẹnẹ na yọ imuẹro inọ ‘uvie Ọghẹnẹ o kparobọ vi’ enọ e be gaviezọ kẹe na no. (Luk 11:20) Uvie oyena Jesu o vi ilele riẹ re a se isẹri kpahe na.—Mat. 10:7; 24:14.

Eroruiruo Uzoẹme nọ U Fo. Orọnikọ o gwọlọ re whọ t’ẹme kpahe uzoẹme na te epanọ Ebaibol ọ ta kpahe iẹe kpobi hi, rekọ ewo uzoẹme nọ u fo u wuzou gaga.

Otẹrọnọ a vu ẹsalọ uzoẹme na ba k’owhẹ, kaki roro kpahe ẹjiroro ẹme ra na. Kẹsena nọ whọ be te salọ igogo eme nọ i ti ru omaa-ẹmeọta ra via na, ruẹ nọ enana e ghinẹ rọwokugbe uzoẹme nọ whọ salọ no na.

A tẹ k’owhẹ uzoẹme na, muẹrohọ epanọ a dhesẹ nọ whọ rẹ rọ t’ẹme na. O gwọlọ omodawọ re ohwo o wo ovuhumuo kpahe aghare gbe ewoma uzoẹme na. Otẹrọnọ whẹ ọvo ọ be te salọ obe nọ who ti ro ru uzoẹme nọ a k’owhẹ na vẹ, riẹ salọ re whọ sae tẹrovi uzoẹme na evaọ oma ẹme na kpobi. Evaọ abọdekọ riẹ, otẹrọnọ a fodẹ obe nọ who re ru ẹme na no ze, u fo nọ whọ rẹ kiẹ epanọ whọ te rehọ iẹe ruiruo riwi re u kiehọ uzoẹme na. Who re je roro kpahe oware nọ ẹme na o je wuzou kẹ ogbotu ra gbe oware nọ o rẹ jọ ute ra evaọ eruo ẹme na. Onana u ti fiobọhọ k’owhẹ riẹ eme nọ who re fiẹgba họ evaọ eruo ẹme ra.

Epanọ Who re Ro Fiẹgba Họ Uzoẹme Na. Re who fiẹgba họ uzoẹme na ziezi, who re fi otọhotọ na họ evaọ ẹsalọ gbe ekokohọ ẹme ra. Whọ tẹ salọ eme nọ e rọwo kugbe uzoẹme ra ọvo je lele ehri-izi nọ i re fiobọhọ k’owhẹ ruẹrẹ emamọ omaa-ẹmeọta họ, o te jọ lọlọhọ k’owhẹ re who fiẹgba họ uzoẹme na.

Ẹme-ọwariẹ ọ sai fiobọhọ fiẹgba họ uzoẹme na. Evaọ ile, a rẹ wariẹ uzoẹme ole na te epanọ o rẹ rọ dhẹ oma ole na kpobi du. Orọnikọ oghẹrẹ eme evona ọvo a rẹ rọ wariẹe he. Ẹsejọ umutho eme jọ ọvo e rẹ roma via, ẹsejọ a sae wariẹ eme nọ i tho uzoẹme na, rekọ evaọ oghẹrẹ jọ, ọnọ o kere ole na ọ rẹ rọ ona rehọ eme na lahwe bẹsenọ e rẹ dhẹ oma ole na kpobi duwu. Ere o rẹ jọ kpahe uzoẹme ẹme re. Ẹwariẹ igogo ibieme nọ e rọ uzoẹme na o rẹ wọhọ epaọ eme ole nọ e be roma via ẹsikpobi. Eme nọ i wo otofa ovona hayo uzoẹme na dẹẹ nọ a rọ oghẹrẹ ofa ta yọ edhere ọfa nọ whọ rẹ rọ rehọ uzoẹme na lahwe. Whọ tẹ rọ uzoẹme na ruiruo enẹ o rẹ lẹliẹ igogo eme uzoẹme na jọ iroro enọ e rọ ogbotu ra.

Orọnikọ okenọ who bi ru ẹme no eplatfọmo ze ọvo eme nana i je w’iruo ho, rekọ te evaọ iruo odibọgba na. A rẹ kareghẹhọ ẹme ọkpẹkpẹe viere otẹrọnọ a rehọ uzoẹme na lahwe ziezi. A rẹ mae kareghẹhọ uthubro nọ a jọ uwuhrẹ Ebaibol kẹ otẹrọnọ a fiẹgba họ uzoẹme na. Omodawọ nọ whọ rọ salọ jẹ ta kpahe izoeme nọ i fo i re fiba ona ra wọhọ oruẹme gbe owuhrẹ Ẹme Ọghẹnẹ.

EPANỌ A RE RO RU EI

Whọ tẹ be ruẹrẹ oma kpahe kẹ ẹme ra, salọ igogo eme gbe eme nọ whọ te rọ thae uke nọ i ti ghine fiba eruvẹ uzoẹme ra.

Whọ tẹ be jọ obọ uwou wuhrẹ ẹme ra, roro kpahe oria gbe oghẹrẹ nọ who ti ro fiẹgba họ uzoẹme na. Whọ sae tubẹ jọ omaa-ẹmeọta ra kpoka họ eria nọ whọ jọ gwọlọ ru onana.

N’oke ruoke evaọ ẹme ra, wariẹ igogo eme hayo ẹjiroro ẹme na no uzoẹme ra ze.

ORIA IRUO: Rọkẹ usiuwoma ota, salọ uzoẹme jọ nọ u kie kpahe ugogo uzoẹme jọ nọ o rrọ Uwou-Eroro hayo Awake! ọkpokpọ jọ. Daoma rọ eme emuhọ ra bọ isiuru fihọ iẹe, rọ ugogo ẹme ọvo hayo ivẹ ta kpahe iẹe evaọ ẹmeọta ra, je fielo họ aghare riẹ evaọ ekuhọ ra.

[Ẹkpẹti nọ o rrọ ẹwẹ-obe avọ 211]

UZOẸME ULOGBO NỌ O DHẸ OBE OBỌDẸ JỌ DUWU

Re a wo otoriẹ eroruiruo uzoẹme, u re fiobọhọ re ma wuhrẹ epanọ Jihova Ọghẹnẹ, dede nọ ikere-ebe ahwo-akpọ o ro ruiruo, ọ rọ rehọ uzoẹme ulogbo ovo rọ nya ebe 66 nọ e rrọ Ebaibol na duwu. Uzoẹme oyena họ ẹkpare kpehru udu nọ Jihova o re ro su ahwo-akpọ gbe ẹnyate ẹjiroro oyoyou riẹ ẹkwoma Uvie riẹ.

Uzoẹme onana u mu oma họ ẹrọvia evaọ izou ọsosuọ Emuhọ, a tẹ jọ oma Ebaibol na soso ta kpahe iẹe. A t’ẹme fodẹ odẹ Ọghẹnẹ unuẹse buobu, bu vi asia 7,000. Ewoma esuo Jihova o dhesẹ oma via evaọ ikuigbe emama na. A niyẹrẹ ọkparesuọ esuo riẹ, gbe okpẹtu nọ aghẹmeeyo ọ wha ze. Uyoyou ulogbo Jihova, areghẹ riẹ, uvi-ẹdhoguo riẹ, gbe ogaga erumeru riẹ i dhesẹ oma via evaọ usu riẹ kugbe emama riẹ. A rehọ iriruo buobu dhesẹ irere ẹmeoyo kẹ Ọghẹnẹ gbe okpẹtu nọ o re no aghẹmeeyo ze. Ọruẹrẹfihotọ Jihova ẹkwoma Jesu Kristi re o si uzioraha gbe uwhu no a ru rie vẹ je dhesẹ iẹe. A dhesẹ egọmeti obọ odhiwu nọ ọ te raha emama izi imuomu no gbe ahwo-akpọ nọ a se nọ a re vuhu udu nọ Jihova o re ro su emama riẹ mu. A ru rie vevẹ nọ Uvie na u ti ru ẹjiroro Jihova gba re otọakpọ na o jọ aparadase nọ o vọ avọ ahwo nọ a you jẹ be gọ Ọghẹnẹ uzẹme ọvo na je you ohwohwo.