FIOBỌHỌ KẸ AHWO ZIHE RUỌ ILELE
UWUHRẸ AVỌ 10
Gbaemu nọ Who re Ru Ahwo Jọ Ilele
Oware nọ Ebaibol ọ ta: “Ma gba riẹ mu nọ orọnikọ usi uwoma Ọghẹnẹ ọvo ma rẹ ta kẹ owhai hi rekọ te uzuazọ mai nọ ma re siobọno fiki rai keme wha rrọ ghaghae kẹ omai gaga.”—1 Tẹs. 2:8.
Oware nọ Jesu O Ru
1. Rri IVIDIO na, hayo se Jọn 3:1, 2. Kẹsena whọ vẹ kẹ iyo enọ nọ e rrọ obotọ na:
Eme who roro nọ o lẹliẹ Nikodimọs nyabru Jesu evaọ aso?—Rri Jọn 12:42, 43.
Ẹvẹ Jesu o ro dhesẹ nọ ọ gba riẹ mu nọ o re fiobọhọ kẹ ahwo zihe ruọ ilele?
Eme Ma Wuhrẹ Mi Jesu?
2. Ma re dhesẹ nọ ma you ahwo nọ ma tẹ gbaemu nọ ma re fiobọhọ kẹ ae zihe ruọ ilele.
Rọ Aro Kele Jesu
3. Wuhrẹ kugbe ohwo na evaọ oke gbe oria nọ u kiehọ iẹe oma. O sae jọ nọ ohwo na ọ gwọlọ nọ o re wuhrẹ evaọ ẹdẹ jọ oka na, hayo ugogo oke jọ evaọ okpẹdẹ. Kọ o sae jọ nọ obọ iruo riẹ, uwou riẹ, hayo oria ọfa jọ ọ jọ gwọlọ wuhrẹ? O tẹ lọhọ daoma nwene oke ra, re whọ hae nyabru ohwo na evaọ oke gbe oria nọ o mae were iẹe.
4. Hai wuhrẹ kugbe ohwo na kẹse kẹse. Jọ ewuhrẹ na o vo owhai hi o tẹ make rọnọ whọ te jariẹ hẹ. Ukpoye, roro sọ whọ sai ru eware nana:
Kọ whọ sai wuhrẹ ohwo na evaọ oke ofa jọ evaọ oka yena?
Kọ whọ sae rọ ifonu hayo ividio kọlo wuhrẹ kugbe ohwo na?
Kọ whọ sae ta kẹ owhowho-uvie ọfa jọ re o wuhrẹ ohwo na?
5. Lẹ se Ọghẹnẹ re o fiobọhọ kẹ owhẹ rri eware epanọ u fo nọ who re rri rai. Lẹ se Jihova re o fiobọhọ kẹ owhẹ gbẹ hai wuhrẹ ohwo na o tẹ make rọnọ o be bẹe re o wuhrẹ ẹsikpobi, hayo re o ru lele ehrẹ Ebaibol nọ o bi wuhrẹ na. (Fil. 2:13) O sae jọ nọ ohwo nọ who bi wuhrẹ na o wo emamọ iruemu buobu, lẹ se Jihova re o fiobọhọ kẹ owhẹ fiẹrohọ emamọ iruemu yena.