Iyẹrẹ Ọ Iwhowho Uvie

“Lo Wọhọ Ikpẹ eva Akpọ Na”

ISẸRI JIHOVA a wo ohẹriẹ yọ ẹsibuobu ahwo a rẹ raha odẹ rai evaọ ẹgbede fikinọ a rọwo nnọ a re se azẹ fihọ oma ha. Ghele na, edikihẹ ọnana o wo ehri kothi no Ebaibol na ze. U dhesẹ nọ Ọghẹnẹ ọ ghọ azẹ nọ a re ro ru ugberuo, keme azẹ ọ rẹ ghaghae evaọ aro riẹ. (Emuhọ 9:3, 4; Iruo-Izerẹ 17:14) Fikinọ a kiẹ Ikereakere na no kpahe ẹme ọnana, Isẹri Jihova a ku rie họ no nọ ujaje Ebaibol na re a ‘si oma no azẹ’ u re kugbe uruemu oke onana ọrọ azẹ o sefihọ oma na.—Iruẹru 15:19, 20, 28, 29.

Evaọ umutho ikpe nọ e vrẹ ahwo nọ e rọ ẹko eria imu, je kugbe ekọto evaọ erẹwho jọ, a nyaze te rọwo kugbe Isẹri Jihova no evaọ avro ọnana. Wọhọ oriruo, evaọ Denmark oni ọsese jọ nọ ọ riẹ kpahe eriwo Ebaibol na kpahe azẹ o te whu fiki asidẹnte omoto. Fikinọ ọ se nọ a re se azẹ fihiẹe oma ha, edọkita riẹ ọ tẹ rọ evedha rehọ amara soso whowho eva eria nọ a jẹ rehọ ebe whowho usi mukpahe Isẹri Jihova.

Ọsẹ gbe oni ọ uvovo aye na a tẹ gwọlọ nọ a rẹ kiẹ ẹme na, fikiere evaọ amara April 1994 Ogbẹgua Inoma ọrọ Enọ e be Mọ obọ Denmark a tẹ t’eva rai. A ta nọ uvovo aye na o whu, orọnikọ fikinọ ọ siọ azẹ hẹ, rekọ fiki ugberuo eria imu. Ẹjiroro rai u wo ehri no ọkiẹriwo nọ Ogbẹgua Avro Imu gbe idu-esuo omokpokpọ a kiẹ via. Evaọ omobe jọ nọ a vi se eria imu obọ Denmark kpobi, Ogbẹgua Omokpokpọ Orẹwho na o ta nọ edọkita a wo owha-iruo nọ a rẹ rọ kẹ Isẹri Jihova usiwo obọdẹ nọ o mai woma kpobi, avọ eroro kpahe ẹsiọ azẹ rai.

Ẹdhọ ọfa o kpomahọ Dan, Osẹri ikpe 15 jọ nọ ẹyao leukemia o kpe. Evaọ onana edọkita na a rehọ adhẹẹ kẹ ẹjiroro aruọwha Dan inọ a re se azẹ fihiẹe oma ha. Onana o tẹ whae ze nọ a je whowho usi nọ ahwo a jọ fo edọkita na kẹ uwhu Dan. Ghele na, ibuobu a rọwo kpahe ogbẹta ethọthọ eyena ha.

Wọhọ oriruo, ọnọ o wuzou isukulu nọ Dan ọ jọ ọ nyaze Ọgwa Uvie na okenọ a jẹ kẹ ovuẹ ogbotu uwhu riẹ. O da riẹ gaga kpahe iyẹrẹ ethọthọ nọ o yo kpahe uwhu Dan. Nọ ọ nya bru ibe oruiruo riẹ nọ ọ rọ Osẹri jẹ nọe enọ buobu kpahe Isẹri Jihova, ọ tẹ rọwo nọ ọ rẹ rehọ ividio ọ Jehovah’s Witnesses—The Organization Behind the Name. Ividio na e were riẹ te epanọ o ro zizie iwuhrẹ isukulu na kpobi re a rri rie. Uwhremu na, a te dhesẹ ividio na kẹ emọ isukulu na kpobi, a dhesẹ i rie kẹ eklase ọvuọvo.

Ọsẹro omokpokpọ Denmark ọ rọwo kpahe iyẹrẹ iyoma nọ a vi se edọkita Dan he. Ọ ta nọ emamọ oware edọkita na o ru nọ ọ rọ kẹ uvi ẹjiroro Dan adhẹẹ gbe ẹrọwọ ọgaga riẹ.

Ima iwhowho Uvie e riẹ enọ i bi yoẹme kẹ izi Ọghẹnẹ. Fiki ẹmeoyo rai, a te wo ohẹriẹ, bi “lo wọhọ ikpẹ eva akpọ na.”—Ahwo Filipai 2:12, 15.