Oware Nọ O Soriẹ Nọ Egagọ Uzẹme I Je Wo Oghale Ọghẹnẹ

“Aliluya! Usiwo avọ oruaro gbe [adhẹẹ gbe] ogaga i te Ọnowo Ọghẹnẹ mai na, keme uzẹme gbe ẹrẹreokie ọye họ iziẹbro riẹ.”—EVIAVIA 19:1, 2.

1. Ẹvẹ Babilọn Ologbo na o ti ro te oba riẹ?

“BABILỌN OLOGBO NA” o kie no evaọ aro Ọghẹnẹ yọ enẹna ọ rẹriẹ ova ku ọraha no. Eruẹaruẹ Ebaibol i dhesẹ nọ egagọ ogberẹ akpọ soso ọnana ọ te nya ku ikpakpe evaọ obọ egbẹnyusu isuisuẹsu riẹ; urere riẹ o te jọ kpregede ababọ oke oraha. Eviavia Jesu rọ kẹ Jọn o wo eme eruẹaruẹ enana: “Kẹsena ukọ-odhiwu oride jọ ọ tẹ rehọ utho ulogbo o te gbolo ei fihọ eva abade na, ọ tẹ ta nọ, ‘Whaọ ere a rẹ te rehọ ogaga whọlọ Babilọn okpẹwho ologbo na fihọ otọ.’ ”—Eviavia 18:2, 21.

2. Oghẹrẹ vẹ idibo Jihova a ti ru evaọ oke ọraha Babilọn?

² Ahwo akpọ Setan jọ a re ti weri ọraha Babilọn Ologbo na rekọ orọnikọ idibo Ọghẹnẹ vievie he, te enọ e make rọ odhiwu hayo otọakpọ dede. Ubo oghọghọ rai kẹ Ọghẹnẹ o rẹ te jọ: “Aliluya! Usiwo avọ oruaro gbe [adhẹẹ gbe] ogaga i te Ọnowo Ọghẹnẹ mai na, keme uzẹme gbe ẹrẹreokie ọye họ iziẹbro riẹ; keme o bruoziẹ ogberẹ ologbo na no ọ nọ ọ rehọ igberedha raha akpọ kpobi, o tẹ gbaehọ re ọ hwosa azẹ erigbo riẹ nọ o kpe i.”—Eviavia 18:9, 10; 19:1, 2.

Ibi vẹ Egagọ Uzẹme E rẹ Mọ Hrọ?

3. Didi enọ e gwọlọ uyo?

³ Nọ a bi ti hwere otọakpọ na fo no egagọ erue na, didi oghẹrẹ egagọ o re ti kiọkọ? Ẹvẹ ma sae rọ riẹ nẹnẹ ẹko egagọ nọ ọ te zọ no ọraha isuẹsu egagọ erue akpọ Setan? Eme họ ubi ukiẹrẹe nọ ẹko ọnana ọ rẹ mọ? O tẹ make kao eka ovuhumuo no i bu te ikpe e riẹ nọ a rẹ rọ hẹriẹ egagọ uzẹme Jihova.—Malakae 3:18; Matiu 13:43.

4. Eme họ ẹgwọlọ ọsosuọ egagọ uzẹme, kọ ẹvẹ Jesu ọ rọ kẹ oriruo evaọ onana?

⁴ Onọ o mae rro kpobi họ, Ileleikristi uzẹme a re kru esuo okpehru nọ Jesu o whu kẹ na hrọ—esuo okpehru Ọsẹ riẹ. Jesu ọ rehọ uzuazọ riẹ kẹ fiki isuẹsu jọ, uyẹ jọ, ovioma jọ, hayo uyerakpọ jọ họ. O fi Uvie Ọsẹ riẹ haro vi esuo hayo iroro enwene ahwo Ju. Ọ rehọ eme enana kuyo kẹ ogaga akpọ nọ Setan ọ kẹ riẹ: “Setan, nyawa; keme a kere nọ, ‘Whọ rẹ gọ Ọnowo na Ọghẹnẹ ra, iruo riẹ eye evo who re ruẹ.’ ” Ọ riẹ no Ikereakere Hibru na ze inọ Jihova họ Osu okpehru uzẹme akpọ na soso. Ẹko egagọ vẹ e roma rai kpobi rọ kẹ esuo Jihova viukpọ eyero esuo akpọ na?—Matiu 4:10; Olezi 83:18.

5. (a) Ẹvẹ egegagọ uzẹme a re rri odẹ Ọghẹnẹ fihọ? (b) Eme u dhesẹ nọ Isẹri Jihova a be rọ adhẹẹ kẹ odẹ oyena?

⁵ Ẹgwọlọ avivẹ na họ egagọ uzẹme a rẹ kpare je ru odẹ Ọghẹnẹ fo. Erumeru na o dhesẹ odẹ riẹ, Jihova (Yahweh evaọ efafa Ebaibol jọ), rọ kẹ ahwo riẹ Izrẹl, yọ a rehọ e riẹ ruiruo asia idu buobu evaọ Ikereakere Hibru na. Taure oke oyena u te zi te, Adamu, Ivi, gbe efa a riẹ odẹ na, dede nọ a make rehọ adhẹẹ kẹe oke kpobi hi. (Emuhọ 4:1; 9:26; 22:14; Ọnyano 6:2) Nọ Kristẹndọm gbe efefafa ahwo Ju a si odẹ ọfuafo na no Ebaibol rai no, Isẹri Jihova a fi odẹ na họ oria nọ i fo rie jẹ rọ adhẹẹ kẹe evaọ New World Translation of the Holy Scriptures. A be rọ adhẹẹ kẹ odẹ oyena, nwane wọhọ epanọ Ileleikristi ọsosuọ a ru. Jemis ọ kẹ imuẹro na nọ: “Simiọn o dhesẹ epanọ Ọghẹnẹ ọ rọ jọ oke ọsosuọ weze bru ahwo Egedhọ, re ọ jọ udevie rai ha ahwo ro mu kẹ isẹri ise kẹ odẹ riẹ. Whaọ onana avọ ẹme nọ eruẹaro e ta na ẹme ọvo na, . . . Re itu ahwo nọ i kiọkọ a ruẹse te guọlọ [Jihova, NW ], jegbe ahwo Egedhọ kpobi nọ a rọ odẹ mẹ ese.”—Iruẹru 15:14-17, ẹjẹlẹ ibieme na ọmai; Emọs 9:11, 12.

6. (a) Eme họ ẹgwọlọ avesa egagọ uzẹme? (b) Ẹvẹ Jesu avọ Daniẹl a ro fi ẹgba họ isuẹsu Uvie? (Luk 17:20, 21)

⁶ Ẹgwọlọ avesa rọ kẹ egagọ uzẹme họ ọ rẹ kpare Uvie Ọghẹnẹ kpehru wọhọ uvi ifue nọ o rẹ tọ kẹ ebẹbẹ esuo ohwo-akpọ. Jesu o wuhrẹ ilele riẹ vevẹ re a lẹ nọ Uvie oyena o ze, re esuo Ọghẹnẹ o rehọ esuo otọakpọ na. A kẹ Daniẹl ẹgba rọ ruẹaro kpahe edẹ urere na: “Ọghẹnẹ obọ odhiwu na ọ rẹte rehọ uvie nọ a rẹ raha ha muẹ . . . Ọ rẹte whọlọ ivie [akpọ, isuẹsu] na kpobi ọ vẹte rehọ ai ze oba, ọ vẹte jọ bẹdẹ.” Amono a rọ owojẹ rai dhesẹ no evaọ ikpe udhusoi avọ 20 na inọ Uvie oyena ovo a be thuke—egagọ Babilọn Ologbo na manikọ Isẹri Jihova?—Daniel 2:44; Matiu 6:10; 24:14.

7. Ẹvẹ egegagọ uzẹme a re rri Ebaibol na?

⁷ Ẹgwọlọ avene rọ kẹ ọjẹrehọ Ọghẹnẹ họ idibo uzẹme Ọghẹnẹ a re kru Ebaibol na wọhọ Ẹme ogaga Ọghẹnẹ. Fikiere a rẹ jọ egbavro ho, nọ e rẹ gwọlọ kporo Ebaibol na fihọ otọ wọhọ obe nọ ohwo-akpọ gheghe o kere, jegbe nọ ẹthọthọ buobu e riẹe eva. Isẹri Jihova a rọwo inọ Ebaibol na yọ Ẹme ogaga Ọghẹnẹ, nwane wọhọ epanọ Pọl o kere se Timoti: “Ọghẹnẹ o gie ẹwolo ku ikerakere na kpobi, re e jọ erere rọ kẹ ewuhrẹ gbe ozọ-usio, avọ ọkpọvio gbe odhesẹkẹ eva ẹrẹreokie. Re ohwo Ọghẹnẹ na ọ ruẹse gba kiete, ọ vẹ jẹ thomavẹre kẹ iruo iwoma i ruo kpobi.”a Fikiere, Isẹri Jihova a rehọ Ebaibol na wọhọ ọkpọvio rai, obe uzi rai kẹ ẹria kẹdẹ kẹdẹ, gbe eyeri rai kẹ ẹruore obaro.—2 Timoti 3:16, 17.

Egagọ Uyoyou, Orọnikọ ọrọ Omukpahọ Họ

8. Eme họ ẹgwọlọ avọ isoi rọ kẹ egagọ uzẹme?

⁸ Ẹvẹ Jesu ọ rọ hẹriẹ ilele uzẹme riẹ? Uyo riẹ o rehọ oma hwa oka ovuhumuo obọdẹ avọ isoi ọrọ egagọ uzẹme. Jesu ọ ta nọ: “Mẹ kẹ owhai uzi okpokpọ, nọ, whai ohwo o you ohwo wọhọ epanọ me you owhai, re whai ohwo o you ohwo. Fiki onana ahwo kpobi a jẹ riẹ nọ whai ilele mẹ re whai ohwo o te you ohwo.” (Jọn 13:34, 35, ẹjẹlẹ ibieme na ọmai.) Ẹvẹ Jesu o ro dhesẹ uyoyou riẹ? Ẹkwoma uzuazọ riẹ nọ ọ rọ kẹ wọhọ idhe ẹtanigbo. (Matiu 20:28; Jọn 3:16) Fikieme uvi uyoyou o jẹ rọ okwakwa obọdẹ kẹ Ileleikristi uzẹme? Jọn o ru rie vevẹ nọ: “Iyoyou, wha je omai ohwo o you ohwo, keme uyoyou họ o rọ Ọghẹnẹ . . . Ohwo nọ o wo uyoyou hu, ọ riẹ Ọghẹnẹ hẹ; keme Ọghẹnẹ họ uyoyou.”—1 Jọn 4:7, 8.

9. Amono a dhesẹ uvi uyoyou no, kọ evaọ oghẹrẹ vẹ?

⁹ Amono evaọ oke mai na a dhesẹ oghẹrẹ uyoyou utiona no, makọ evaọ iraro omukpahe uyẹ, orẹwho, hayo ovioma? Amono a riase ẹdawọ ologbo na no, makọ rite uwhu, re uyoyou rai o ruẹse kparobọ? Kọ ma rẹ sae ta nọ izerẹ Kathọlik gbe enyukọ rai enọ e feva nọ a wo abọ evaọ ikpakpe nọ e roma via evaọ Rwanda evaọ ukpe 1994 na? Kọ a rọ ahwo Orthodox obọ Serbia hayo Kathọlik obọ Croatia enọ i dhomahọ “okpemuotọ uyẹ” gbe iruẹru egedhọ efa evaọ ẹmo omoma evaọ obọ Balkan? Hayo kọ isu ichọche Kathọlik hayo erọ Protẹstant enọ e be wha omohẹriẹ haro gbe omukpahe evaọ Ẹkpẹlobọ-Ọre Ireland evaọ umutho ikpe ikpe nọ i kpemu na? Eva uzẹme a rẹ sae bọo Isẹri Jihova ota nọ a dhomahọ iruemu ozighi itieye na ha. A ruẹ uye no evaọ iwou-odi gbe ega, makọ rite uwhu dede, ukpenọ a re vivie uyoyou Oleleikristi rai.—Jọn 15:17.

10. Fikieme Ileleikristi uzẹme a gbẹ jọ abọ ọvo ho?

¹⁰ Ẹgwọlọ avọ ezeza ọrọ egagọ nọ Ọghẹnẹ ọ rẹ jẹ rehọ họ a rẹ jọ abọ ọvo ho evaọ iruẹru esuo akpọ ọnana. Fikieme Ileleikristi a gbẹ jọ abọ ọvo ho evaọ esuo? Pọl, Jemis, avọ Jọn a k’omai ẹjiroro egaga rọ kẹ edikihẹ ọyena. Pọl ukọ na o kere nọ Setan họ “ọghẹnẹ akpọ nana,” ọnọ o tu ahwo nọ e rọwo ho aro evaọ edhere kpobi nọ u te rie obọ, nọ u kugbe ohẹriẹ esuo. Jemis olele na ọ ta nọ “ogbẹnyusu akpọ na yọ avọ Ọghẹnẹ a rọ egrẹ,” yọ Jọn ukọ na ọ ta nọ “akpọ na ọsoso ọ rọ obọ ogaga oyoma na.” Fikiere, Oleleikristi uzẹme ọ rẹ sai gbolo omarọkẹ Ọghẹnẹ riẹ fihọ otọ họ ẹkwoma abọ nọ o re wo evaọ isuẹsu gbe ogaga akpọ ofruriọ Setan.—2 Ahwo Kọrint 4:4; Jemis 4:4; 1 Jọn 5:19.

11. (a) Ẹvẹ Ileleikristi a re rri ẹmo fihọ? (b) Ehri Ikereakere vẹ ọ riẹ kẹ edikihẹ ọnana? (2 Ahwo Kọrint 10:3-5)

¹¹ Ma te roro kpahe ẹgwọlọ ivẹ urere na, orọ avọ ihrẹ o tẹ roma via, inọ, egagọ Oleleikristi uzẹme o re wo abọ evaọ emo ho. Nọ o rọ nọ egagọ uzẹme o rọ eyero inievo akpọ soso nọ u wo ehri no uyoyou ze na, koyehọ oware ovo o rẹ hẹriẹ hayo raha “imoni . . . akpọ na soso” mai oyena ha. Jesu o wuhrẹ uyoyou, orọnikọ omukpahe he; udhedhẹ, orọnikọ ẹmo ho. (1 Pita 5:9; Matiu 26:51, 52) “Oyoma” ọvo na, Setan, ọnọ ọ viẹ Keni họ re o kpe Ebẹle na ọ gbẹ be kọ ẹzi omukpahe evaọ udevie ahwo-akpọ jẹ be kpakpa ozighi gbe azẹ-okpe evaọ odẹ esuo, egagọ, gbe ohẹriẹ uyẹ. Ileleikristi uzẹme a re ‘wuhrẹ ẹmo ho,’ makọ oware kpobi nọ a re ru ai dede. Evaọ edhere ẹwoho, a “duwu egbọdọ rai zihe ruọ etọẹkpẹ [no] gbe izuẹ rai zihe ruọ ubru-ebe” no. A rẹ mọ ibi udhedhẹ erọ ẹzi Ọghẹnẹ.—1 Jọn 3:10-12; Aizaya 2:2-4; Ahwo Galesha 5:22, 23.

Ọghẹnẹ Ọ rẹ Ghale Ẹfuọ Uruemu gbe Iwuhrẹ

12. (a) Eme họ ẹgwọlọ avọ eree na, rekọ ẹhẹriẹ egagọ vẹ whọ rẹ sae fodẹ? (b) Ẹvẹ Pọl o ro fi ẹgba họ ẹgwọlọ avọ eree ọnana?

¹² Okugbe Oleleikristi oye họ ẹgwọlọ avọ eree ọrọ egagọ uzẹme. Dede, ohẹriẹ egagọ Kristẹndọm u ri fiobọhọ họ. Eko sa-sa egagọ e hẹriẹ kẹghẹ kẹghẹ fihọ ẹkuẹko buobu no, yọ ozighi ọvo e be wha ze. Wọhọ oriruo, rehọ egagọ Baptist evaọ obọ United States, onọ o hẹriẹ fihọ udevie Baptist Ẹkpẹlobọ-Ọre (Ichọche American Baptist Evaọ Obọ U.S.A.) gbe Baptists Obọze-Ọre (Southern Baptist Convention), jegbe ẹkuẹko Baptist efa nọ e roma via no fikinọ a kare okugbe. (World Christian Encyclopedia, ẹwẹ-obe 714) Ehẹriẹ buobu e roma via no fiki iwuhrẹ sa-sa hayo isuẹsu ichọche (wọhọ oriruo, Presbyterian, Episcopalian, Congregational). Ehẹriẹ nọ e rọ Kristẹndọm e nwane rọ ẹrẹrẹe kugbe egagọ nọ e rọ otafe Kristẹndọm—e make rọ erọ egagọ Buddha, Islam, hayo Hindu. Didi ohrẹ Pọl ukọ na ọ rọ kẹ Ileleikristi ọsosuọ na? “Inievo, mẹ rehọ odẹ Ọnowo mai Jesu Kristi na bose owhai re wha jọ ọvuọvo se oma ohẹriẹ ba udevie rai, re wha ruẹse jọ iroro gbe oziẹ-obro ọvo.”—1 Ahwo Kọrint 1:10; 2 Ahwo Kọrint 13:11.

13, 14. (a) Eme u dhesẹ re a jọ “ọrẹri”? (b) Ẹvẹ a re ro ru egagọ uzẹme fihọ fuafo?

¹³ Eme họ ẹgwọlọ avọ izii nọ Ọghẹnẹ ọ rẹ rọ jẹ egagọ rehọ? A fodẹ uzi Ebaibol jọ evaọ Iruo-Izerẹ 11:45: “Wha rẹ jọ ọrẹri, keme mẹ rọ ọrẹri.” Pita ukọ na ọ wariẹ onana nọ o kere nọ: “Epanọ ohwo nọ o se owhai ọ rọ fuafo na, whai omarai wha jọ eva uruemu rai kpobi jọ fuafo re.”—1 Pita 1:15, ẹjẹlẹ ibieme na ọmai.

¹⁴ Eme ẹgwọlọ ẹfuọ ọnana u dhesẹ? Inọ egegagọ Jihova a rẹ jọ fuafo evaọ ẹzi gbe uruemu. (2 Pita 3:14) Uvẹ ovuovo o riẹ kẹ erahaizi nọ i re kurẹriẹ hẹ hẹ, erahaizi aro koko, enọ e be rọ uruemu rai dhesẹ orivo kẹ idhe ẹtanigbo Kristi. (Ahwo Hibru 6:4-6) Jihova ọ gwọlọ nọ a ru ukoko Oleleikristi na fuafo, ọrẹri. Ẹvẹ a sae rọ nyate oyena? Evaọ abọ jọ ẹkwoma esino-ukoko ahwo nọ a ti fi epe họ ukoko na.—1 Ahwo Kọrint 5:9-13.

15, 16. Didi inwene Ileleikristi buobu a ru no evaọ izuazọ rai?

¹⁵ Taure a tẹ te riẹ uzẹme Oleleikristi, ahwo buobu a jẹ rria izuazọ ọfariẹ, isiuru omobọ-ohwo. Rekọ ẹme kpahe Kristi o te nwene ai, a te ti wo erọvrẹ izieraha rai. Pọl ọ rehọ ẹgba tae nọ o kere nọ: “Wha gbẹ riẹ nọ e nọ ikierẹe he e rẹ sae reuku uvie Ọghẹnẹ hẹ? Wha viẹ oma obọ rai họ họ; hayo eva egbegbe, hayo e nọ e rọ edhọ ẹgọ, hayo ibruẹnwae, hayo igberedha, hayo iji, hayo imuọwhọ, hayo egbidi, hayo elahwo-eka, hayo igbulegbu, e rẹ sae reuku uvie Ọghẹnẹ hẹ. Ere otu rai jọ ọ jọ. Rekọ a họ owhai, je ru owhai fo.”—1 Ahwo Kọrint 6:9-11, ẹjẹlẹ ibieme na ọmai.

¹⁶ O rọ vevẹ inọ Jihova ọ rẹ jẹ ahwo nọ i kurẹriẹ no iruemu nọ e rọwo kugbe Ikere na ha rehọ, enọ i kuomarẹriẹ, je zihe ruọ ilele Kristi gbe iwuhrẹ riẹ. A re ghine you erivẹ rai wọhọ omobọ rai je dhesẹ iẹe evaọ idhere buobu, wọhọ abọ nọ a re wo evaọ odibọgba nọ o rẹ kẹ ovuẹ uzuazọ ro se ahwo kpobi nọ i re yo.—2 Timoti 4:5.

“Uzẹme na U re ti ru Owhai Emuyẹ”

17. Eme họ ẹgwọlọ avọ ikpe egagọ uzẹme? Kẹ iriruo.

¹⁷ Ẹgwọlọ avọ ikpe o riẹ onọ Jihova o wo kẹ ahwo nọ e be gọe evaọ ẹzi gbe uzẹme—ewuhrẹ ọ fuafo. (Jọn 4:23, 24) Jesu ọ ta kẹ ilele riẹ nọ: “Wha rẹ te riẹ uzẹme na, uzẹme na u re ti ru owhai emuyẹ.” (Jọn 8:32) Uzẹme Ebaibol na o re ru omai emuyẹ no iwuhrẹ nọ i re si ọghọ no Ọghẹnẹ oma, iwuhrẹ wọhọ ẹwẹ nọ o re whu hu, erae ehẹle, gbe pọgatri. (Okokahwohọ 9:5, 6, 10; Izikiẹl 18:4, 20) O re ru omai emuyẹ no Babilọn ogbunu na ọrọ “Esanerọvo Ọrẹri Kpobi” Kristẹndọm. (Iziewariẹ 4:35; 6:4; 1 Ahwo Kọrint 15:27, 28) Ẹmeoyo kẹ uzẹme Ebaibol o rẹ wha ahwo iyoyou, ọdawẹ, iwowou, gbe ohrọ ze. Egagọ-Ahwo-Ikristi uzẹme o rẹ wha ẹmo orukele ze vievie he, enọ i re dede amọfa rehọ họ, wọhọ Tomás de Torquemada, hayo a rẹ wha uruemu omukpahe ẹmuofio ze he, wọhọ ogba ipopu nọ e wha Krusedi haro. Ghele, Babilọn Ologbo na ọ mọ oghẹrẹ ibi enana no evaọ ikuigbe kpobi, no anwọ oke Nimrọd rite inẹnẹ.—Emuhọ 10:8, 9.

Odẹ nọ U wo Ohẹriẹ

18. (a) Amono họ enọ i bi ru ẹgwọlọ ikpe egagọ uzẹme na gba, kọ evaọ oghẹrẹ vẹ? (b) Eme mai omomọvo o re ru hrọ re ma ruẹse reuku oghale nọ o rọ obaro mai na?

¹⁸ Amono nẹnẹ a bi ghine ru ẹgwọlọ ikpe egagọ uzẹme enana gba? Amono amọfa a vuhumu kẹ uruemu ekiete gbe udhedhẹ rai? Evaọ akpọ na kpobi a riẹ Isẹri Jihova inọ “a rọ e rọ akpọ na ha.” (Jọn 15:19; 17:14, 16; 18:36) Ahwo Jihova a wo ọghọ nọ a re ro yo odẹ riẹ jẹ jọ Isẹri riẹ, nwane wọhọ epanọ Jesu Kristi ọ jọ osẹri ẹrọwọ kẹ Ọsẹ riẹ na. Ma wo odẹ ọrẹri ọyena, ma tẹ jẹ riẹ owha-iruo mai re ma rria te oware nọ u dikihẹ kẹ. Yọ, wọhọ Isẹri riẹ, didi ẹruore oruaro o rọ obaro be hẹrẹ omai! Re ma jọ omọvo uviuwou ahwo-akpọ ẹmeoyo, okugbe, nọ e be gọ Osu Ehrugbakpọ na evaọ aparadase nọ a zihe ze no evaọ obọ otọakpọ obonẹ. Re ma wo oghale otiọye na, joma gbẹ hae dhesẹ omobọ mai vevẹ kugbe egagọ uzẹme, nyusu kpekpekpe jẹ wha odẹ Isẹri Jihova homa avọ ọghọ “keme uzẹme gbe ẹrẹreokie ọye họ iziẹbro riẹ.”—Eviavia 19:2; Aizaya 43:10-12; Izikiẹl 3:11.

[Footnotes]

Ẹvẹ Whọ te k’Uyo?

◻ Ẹvẹ idibo Jihova a rri ọraha Babilọn Ologbo na fihọ?

◻ Eme họ igogo ẹgwọlọ egagọ uzẹme?

◻ Ẹvẹ uzẹme na o re ro ru owhẹ họ ọmuyẹ?

◻ Didi obọdẹ ọghọ ma wo wọhọ Isẹri Jihova?

[Pictures on page 11]

Isẹri Jihova a be ta usiuwoma je wuhrẹ emamọ usi Uvie Ọghẹnẹ

[Pictures on page 12]

Ẹsikpobi Ileleikristi uzẹme a rẹ jọ abọ ọvo ho evaọ esuo-ohrowo gbe emo

[Credit Line]

Ẹrupre: Udu-ekere ọ Ministry of Defense, London