Kọ Ẹwẹ Na Yọ Oware Nọ O Re Whuẹ Hẹ?
ABABỌ edo, egbẹnyusu gbe uviuwou na a tẹ be nya wariẹ etehe nọ a rovie fihọ na. A te bi rri ori na, ọrọ ọmọzae ikpe 17 na. Udugaga egbẹnyusu isukulu riẹ a ro vuhu iei. Eto-uzou riẹ e fa kpobi no fiki oma-usiwo na; ẹyao-ọta ọ lẹle riẹ dọ kpobi no. Kọ ghinọ ogbẹnyusu rai na ọna? Eka jọ kakao nọ i kpemu, ọ jọ dhidhidhi, avọ enanọ, jajaja—ọ jọ dhikẹe! Oni ọmọzae na avọ irui oviẹ o bi dhe ẹwẹwariẹ nọ: “Enẹna eva o te mae were Tommy. Ọghẹnẹ ọ gwọlọ Tommy evaọ obọ odhiwu kugbei.”
Oni ọnana nọ ọ vọ avọ uweri na ọ ruẹ ẹruore gbe omosasọ jọ evaọ iroro inọ ọmọzae riẹ ọ gbẹ rọ uzuazọ. Evaọ ichọche na a wuhrẹ i riẹ nọ ẹwẹ o re whuẹ hẹ, inọ ọye họ ehri ohwo na, iroro riẹ, ekareghẹhọ riẹ—“ohwo na omariẹ.” Ọ rọwo inọ ẹwẹ ọmọzae riẹ o ri whu vievie he; keme ẹwẹ na yọ ẹzi nọ ọ rọ uzuazọ, o no ugboma riẹ evaọ oke uwhu o te kpohọ obọ odhiwu re ọ jọ kugbe Ọghẹnẹ gbe enjẹle na.
Evaọ oke okpẹtu, udu ohwo-akpọ o rẹ tẹrovi oria kpobi nọ ẹruore ọ rọ, fikiere o gbẹ rọ oware ugbunu hu nọ orọwọ onana u je wo isiuru ga tere. Wọhọ oriruo, dai roro kpahe edhere nọ J. Paterson-Smyth owuhrẹ egagọ ọ t’eva riẹ evaọ obe na The Gospel of the Hereafter: “Uwhu yọ oware osese gheghe nọ a tẹ rehiẹe wawo eware nọ e rọ obaro riẹ—akpọ igbunu, igbunu, igbunu nọ Uwhu u re gele omai kpohọ.”
Nya akpọ na wariẹ gbe evaọ egagọ gbe iruemu buobu, ahwo a rọwo nọ ohwo o wo ẹwẹ nọ o re whuẹ hẹ nọ ọ rọ oma riẹ, ẹzi nọ ọ rọ uzuazọ nọ ọ rẹ gbẹ rria okenọ ugboma na o te whu no. Ichọche gbe eko egagọ Kristẹndọm kpobi a wo orọwọ onana. O rọ uwuhrẹ ulogbo re evaọ egagọ ahwo Ju. Egagọ Hindu a rọwo inọ atman, hayo ẹwẹ na, a ma riẹ no emuhọ ze, a te si ei gbe oma na evaọ oke eyẹ, o re no ugboma ruọ ugboma nọ ohwo o te whu no evaọ ọwariẹyẹ. Ahwo Muslim a rọwo inọ ẹwẹ na ọ ze uzuazọ kugbe ugboma na yọ ọ rẹ gbẹ jọ uzuazọ nọ ugboma na o te whu no. Erọwọ efa—ahwo nọ a rẹ gọ erao evaọ Africa, Shinto, makọ erọ Buda evaọ edhere jọ—a wo iwuhrẹ sa-sa evaọ uzoẹme ọvo na.
Enọ Idhọvẹ Jọ
Nọ iroro ẹwẹ nọ o re whuẹ hẹ ọ rọ oware isiuru gbe onọ akpọ na soso a be vro ho na, ghele o kpare enọ idhọvẹ jọ ze. Wọhọ oriruo, u re gbe ahwo jọ unu kpahe oria nọ ẹwẹ ọnọ a you ọ rẹ nya otẹrọnọ ohwo na o yere emamọ uzuazọ họ. Kọ a te wariẹ yẹe kpotọ vi epanọ ọ jọ vẹre? Hayo kọ a ti viei kpohọ pọgatri, oria nọ erri-ọroro jọ o ti jo ru ei fo bẹsenọ o ti fo kẹ ekpohọ obọ odhiwu? Mai yoma dede, kọ a te lahiẹe bẹdẹ bẹdẹ evaọ ehẹle nọ ọ be to? Hayo, wọhọ epanọ ibuobu nọ e be gọ erao a rehe riẹ, kọ ọ rọ ẹzi jọ nọ a re kiofu?
Iroro eyena e rẹ wha uduama se ahwo nọ e rọ uzuazọ. Kọ ma re kiofu izi iyoyou mai nọ i whu no re e se omai ba erukele? Hayo kọ ma re fiobọhọ kẹ ai dhẹ no pọgatri oyoma jọ? Hayo kọ ma re brudu avọ ozodhẹ evaọ iroro nọ a be ruẹ uye evaọ ehẹle? Hayo kọ ma rẹ gọ erao jọ epaọ ẹsenọ a wo ẹwẹ ahwo-akpọ nọ i whu no?
Enọ nọ e roma via kpahe Ọghẹnẹ omariẹ e mae tubẹ rọ idhọvẹ. Wọhọ oriruo, esẹ gbe ini buobu, wọhọ oni nọ ma jọ emuhọ fodẹ na, a kaki wo omosasọ no orọwọ na ze inọ Ọghẹnẹ ọ “rehọ” ẹwẹ ọmọ rai nọ o re whu hu kpohọ obọ odhiwu re ọ jọ kugbei. Rọ kẹ ahwo buobu u re kri hi re a te muhọ eroro kpahe oghẹrẹ Ọghẹnẹ nọ ọ rẹ rehọ ẹyao oyoma otiọye tehe ọmọ ọvowa na, nọ ọ rẹ tatabọ họ ọmọ ọghaghae na mi ọsẹ gbe oni riẹ nọ a bi weri fikinọ ọ gwọlọ rehọ ọmọ na kpohọ odhiwu idudhe. Diẹse ẹdhoguo-okiẹrẹe, oyoyou, ohrọoriọ, o rọ evaọ Ọghẹnẹ otiọye na? Ahwo jọ a tubẹ vro oghẹrẹ areghẹ nọ Ọghẹnẹ otiọye o wo dede. A rẹ nọ inọ, Fikieme Ọghẹnẹ nọ o wo areghẹ o je fi ewẹ enana kpobi họ otọakpọ evaọ oke ọsosuọ otẹrọnọ obọ odhiwu a ti ro ku uzuazọ rai họ? Kọ oyena u gbe dhesẹ nọ ẹma otọakpọ na yọ oware uvrẹvru gheghe?—Wawo Iziewariẹ 32:4; Olezi 103:8; Aizaya 45:18; 1 Jọn 4:8.
Fikiere o rọ vevẹ inọ ewuhrẹ ẹwẹ ohwo-akpọ nọ o re whu hu na, makọ oghẹrẹ nọ a bi ro wuhriẹe kpobi, o wha enọ idhọvẹ ze, gbe avro buobu. Fikieme? Idhọvẹ na buobu e roma hwa emuhọ ewuhrẹ ọnana. O te were owhẹ re whọ kiẹ emuhọ enana kpobi riwi kpẹkpẹe; yọ u re ti gb’owhẹ unu re who wuhrẹ oware nọ Ebaibol na omariẹ ọ ta kpahe ẹwẹ na. O kẹ emamọ ẹruore nọ u woma gaga nọ ohwo o te whu no vi onọ egagọ akpọ ọnana a bi wuhrẹ odode na.