Uzuazọ Seba-Ẹrọo—Ẹthẹ Kpohọ Iruo Iroro Ọvo
“Mẹ rọ iroro rai nọ e hẹriẹ hẹ ro bru Ọnowo.”—1 AHWO KỌRINT 7:35.
1. Didi iyẹrẹ nọ u re bru ohwo udu u te Pọl obọ kpahe Ileleikristi evaọ Kọrint?
PỌL ukọ na o wo ọdawẹ kpahe inievo Ileleikristi riẹ evaọ Kọrint, Grisi. Ole ikpe isoi nọ i kpemu, ọ rọ rehọ ukoko na mu evaọ okpẹwho ọyena nọ a riẹ gaga kẹ ọfariẹ-ogbe riẹ na. Enẹna, ole 55 C.E., nọ ọ jọ Ẹfẹsọs, evaọ Esia Minor, o te yo iyẹrẹ nọ u re bru ohwo udu no Kọrint ze kpahe ohẹriẹ evaọ ukoko na ọrọ ahwo jọ nọ i bi kie lele ahwo gbe uvẹ nọ a be kẹ ọfariẹ-ogbe. Ofariẹ, Ileleikristi ahwo Kọrint a te kere ileta se Pọl, be nọ kẹ ọkpọvio kpahe owezẹ ezaveyae, uzuazọ seba-ẹrọo, orọo, ẹhẹriẹ, gbe ọwariẹ-rọo.
2. Ẹvẹ ọfariẹ-ogbe nọ o jọ odode evaọ Kọrint u ro kpomahọ Ileleikristi okpẹwho ọyena?
2 Ọfariẹ-ogbe ologbo nọ o jọ odode evaọ Kọrint o tẹ wọhọ nọ u bi kpomahọ ukoko na evaọ idhere ivẹ. Ileleikristi jọ a je kie ro uruemu ọfariẹ odode gbe uvẹ nọ a jẹ kẹ ọfariẹ-ogbe. (1 Ahwo Kọrint 5:1; 6:15-17) U ri vevẹ nọ amọfa, fikinọ oma u bi tu ai rọ kẹ ahwo nọ a roma kẹ isiuru ẹnwae-obro nọ o rọ odede evaọ okpẹwho na, a te si uzi vrẹ oma nọ a be rọ ta nọ a re sioma no oghẹrẹ owezẹ ezaveyae kpobi, makọ orọ imava nọ e rọo no dede.—1 Ahwo Kọrint 7:5.
3. Didi eme Pọl ọ kake rẹriẹ ova ku evaọ ileta ọsosuọ riẹ se ahwo Kọrint?
3 Evaọ ileta thethei nọ Pọl o kere se ahwo Kọrint, ọ kake rẹriẹ ova ku ẹbẹbẹ oma-ohẹriẹ. (1 Ahwo Kọrint, izou 1-4) Ọ tudu họ ai awọ nọ a siọ ahwo ba elele, onọ o rẹ sai su ai kpohọ enwoma ohẹriẹ. A rẹ jọ okugbe wọhọ ‘ibe iruiruo’ erọ Ọghẹnẹ. Ọ tẹ kẹ ai ehrẹ kpahe oghẹrẹ nọ a re ro ru ukoko na fihọ fuafo evaọ uruemu. (Izou 5, 6) Ofariẹ, ukọ na ọ tẹ rẹriẹ ova ku ileta rai.
A Dhesẹ Ewoma Uzuazọ Seba-Ẹrọo
4. Eme Pọl o je dhesẹ nọ ọ ta nọ “ufo re ọzae ọ rọ obọ te aye he”?
4 O muhọ nọ: “Whaọ kpahe eme nọ wha kere se omẹ. Ufo re ọzae ọ rọ obọ te aye he.” (1 Ahwo Kọrint 7:1) Ẹme na ‘a rọ obọ te aye he’ evaọ etenẹ u dhesẹ ẹwhaha obọ u ro te aye fiki isiuru ẹnwae. Nọ Pọl ọ kaki brukpe igberedha no na, ọ be jọ etenẹ t’ẹme kpahe owezẹ ezaveyae evaọ ọruẹrẹfihotọ orọo na. Fikiere, Pọl ọ be ta kpahe ewoma nọ o rọ uzuazọ seba-ẹrọo. (1 Ahwo Kọrint 6:9, 16, 18; wawo Emuhọ 20:6; Itẹ 6:29.) Gbẹ dina kpobaro, o te kere nọ: “Rọ kẹ e nọ i wo ezae he gbe eyae uku, mẹ ta nọ uwoma kẹ ae re a jọ wọhọ epanọ mẹ rọ.” (1 Ahwo Kọrint 7:8) Pọl o wo aye he, ẹsejọhọ aye o whu siẹe ba.—1 Ahwo Kọrint 9:5.
5, 6. (a) Fikieme o jẹ rọ vevẹ inọ Pọl o je dhesẹ uzuazọ omakodhere he? (b) Fikieme Pọl ọ jẹ fodẹ seba-ẹrọo?
5 Ẹsejọhọ Ileleikristi evaọ Kọrint a nyaku eriariẹ-ifofe Grik no, oria nọ a re jo jiri omausino riẹriẹriẹ, hayo omolahiẹ omobọ ohwo. Kọ o sae jọ nọ oye jabọ nọ ahwo Kọrint a rọ nọ Pọl sọ u re ‘fo’ kẹ Ileleikristi re a whaha owezẹ ezaveyae kpobi na? Uyo Pọl u dhesẹ eriariẹ-ifofe Grik hi. (Ahwo Kọlọsi 2:8) Wo ohẹriẹ no iwuhrẹ Kathọlik, ọ jọ oria ovo fodẹ uzuazọ omolahiẹ seba-ẹrọo evaọ uwou-omakodhere hayo iwou-egagọ jọ họ, epaọ ẹsejọ nọ ahwo nọ a rọo ho a mae fo gbe nọ a te zọhọ kugbe esiwo rai ẹkwoma eyero uzuazọ gbe elẹ rai.
6 Pọl o dhesẹ ewoma uzuazọ seba-ẹrọo “fiki uye obẹbẹ nọ o rọ obọ aro.” (1 Ahwo Kọrint 7:26) Ẹsejọhọ ọ be ta kpahe oke obẹbẹ nọ Ileleikristi a be ruẹ, nọ orọo u re ru ga viere. (1 Ahwo Kọrint 7:28) Ohrẹ riẹ se Ileleikristi nọ e rọo ho họ: “Uwoma kẹ ae re a jọ wọhọ epanọ mẹ rọ.” Rọ kẹ ezae nọ eyae i whu seba, ọ ta nọ: “Wha hẹriẹ no? Wha gbẹ guọlọ orọwo ofa ha.” Rọ kẹ aye-uku Oleleikristi, o kere nọ: “Rekọ o rọ eva mẹ, uwoma re aye na ọvo ọ jọ, keme etẹe o je wo evawere. Me roro nọ me wo Ẹzi Ọghẹnẹ na.”—1 Ahwo Kọrint 7:8, 27, 40.
O rọ Ọgbahọ re A Seba-Ẹrọo Ho
7, 8. Eme u dhesẹ nọ Pọl ọ jẹ gba Oleleikristi ọvo họ họ re ọ seba ẹrọo?
7 Ababọ avro, ẹzi ọfuafo Jihova ọ jẹ kpọ Pọl nọ ọ kẹ ohrẹ onana. Ẹme riẹ kpobi kpahe seba-ẹrọo gbe orọo i dhesẹ owowa gbe oma-oyọrọ. O ru rie wọhọ oware ẹrọwọ hayo ababọ ẹrọwọ họ. Ukpoye, o rọ ẹme onọ u je, avọ owowa nọ ọ rọ ta ewoma nọ o rọ uzuazọ seba-ẹrọo kẹ ahwo nọ a rẹ sai kru oma rai evaọ eyero ọyena.
8 Nọ ọ nwane ta no nọ “ufo re ọzae ọ rọ obọ te aye he,” Pọl o te fibae nọ: “Rekọ re a whahọ ẹdawọ ẹnwae-obro, ufo re kọzae kọzae o wo aye obọ riẹ gbe kaye kaye o wo ọzae obọ riẹ.” (1 Ahwo Kọrint 7:1, 2) Nọ ọ ta kẹ ahwo nọ a rọo ho jẹ kẹ eyae-uku uthubro no inọ “a jọ wọhọ epanọ [ọ] rọ” no, o te fibae vẹrẹ vẹrẹ nọ: “Rekọ otẹrọnọ a sae gba oma rai hi, jọ a rọwo. Keme u fo re wha rọwo vi ikpenọ, wha re gbe ọfariẹ.” (1 Ahwo Kọrint 7:8, 9) Ofariẹ, ohrẹ riẹ se ezae nọ eyae i whu seba họ: “Wha gbẹ guọlọ orọwo ofa ha. Rekọ otẹrọnọ wha ruọ orọwo no, wha raha uzi hi.” (1 Ahwo Kọrint 7:27, 28) Ohrẹ owowa onana u dhesẹ ufuoma ẹsalọ onọ u je rie.
9. Wọhọ epanọ Jesu avọ Pọl a ta, ẹvẹ te orọo gbe uzuazọ seba-ẹrọo e jẹ rọ ekẹ no obọ Ọghẹnẹ ze?
9 Pọl o dhesẹ nọ te orọo gbe uzuazọ seba-ẹrọo yọ ekẹ no obọ Ọghẹnẹ ze. “Mẹ guọlọ re ahwo kpobi a jọ wọhọ epanọ mẹ rọ. Rekọ kohwo kohwo o wo ọvuọ okẹ riẹ no obọ Ọghẹnẹ ze, ọ jọ oghẹrẹ riẹ, ọdekọ oghẹrẹ ofa.” (1 Ahwo Kọrint 7:7) Ababọ avro, o wo oware nọ Jesu ọ ta họ iroro. Nọ ọ ta no nọ obọ Ọghẹnẹ orọo u no ze, Jesu o te dhesẹ nọ unevaze ọ seba-ẹrọo fiki isiuru Uvie na yọ obọdẹ okẹ: “Ahwo kpobi a sae rehọ ẹme ọnana ha, ajokpa enọ a rehọ e riẹ kẹ ọvo. Keme ewharọ jọ e rọ nọ ini rai i yẹ no eva ze ere, ewharọ jọ e rọ nọ ahwo a whare, e jọ e rọ nọ e whare oma rai fiki uvie odhiwu. Ọnọ ọ sae rehọ iẹ e, ọ rehọ.”—Matiu 19:4-6, 11, 12.
Uvẹ Uruo kẹ Okẹ ọ Seba-Ẹrọo
10. Ẹvẹ ohwo ọ sai ro ‘ru uvẹ’ kẹ okẹ uzuazọ seba-ẹrọo?
10 Nọ te Jesu gbe Pọl a ta kpahe seba-ẹrọo wọhọ “okẹ” na, ọvuọvo ọ jọ usu rai ta nọ o rọ okẹ igbunu nọ ejọ vo a wo ho. Jesu ọ ta nọ ‘ohwo kpobi ọ rẹ sai ru uvẹ kẹ okẹ ọyena ha,’ ọ tẹ jẹ tudu họ ahwo nọ a sai ru ei re a ‘ru uvẹ kẹe,’ yọ oyena Jesu gbe Pọl a ru. Uzẹme, Pọl o kere nọ: “U fo re wha rọwo vi ikpenọ, wha re gbe ọfariẹ,” rekọ ọ be t’ẹme kpahe ahwo nọ “a sae gba oma rai hi.” (1 Ahwo Kọrint 7:9) Evaọ ikere ọsosuọ, Pọl o dhesẹ nọ Ileleikristi a rẹ sae whaha ọfariẹ. (Ahwo Galesha 5:16, 22-24) Re a nya evaọ ẹzi u dhesẹ nọ a rẹ kuvẹ re ẹzi Jihova ọ kpọ ithihi mai kpobi. Kọ Ileleikristi eboba a sai ru onana re? Ẹhẹ, otẹrọnọ a re ghine lele Ẹme Jihova. Ọnọ ọ so ilezi na o kere nọ: “Ẹvẹ edhere ọmoha ọ rẹ rọ fo kẹ e? Ajokpa eme ra nọ ọ rẹ rọ ta họ oma riẹ obọ.”—Olezi 119:9.
11. Eme u dhesẹ re a ‘nya rọwo-kugbe ẹzi na’?
11 Onana u w’obọ kpahe oma-oyọrọ mukpahe iroro onuje nọ a re wo no ighe TV ze, isinima, izoeme emagazini, ebe, gbe eme ile. Iroro itieye na yọ erọ iwo. Oleleikristi ọboba kpobi nọ ọ gwọlọ uzuazọ seba-ẹrọo ọ rẹ “nya kpahe uwo ho rekọ Ẹzi na. Keme enọ ibi lele uwo e rẹ kezọ eware iwo, rekọ enọ ibi lele Ẹzi e rẹ kezọ eware Ẹzi re.” (Ahwo Rom 8:4, 5, ẹjẹlẹ ibieme na ọmai.) Eware ẹzi na i kiẹrẹe, fuafo, kpatiẹ, avọ uyoyou. U fo re Ileleikristi, te emaha te ekpako, a hae “kareghẹhọ eware nana.”—Ahwo Filipai 4:8, 9.
12. Eme o mae gwọlọ re a ru uvẹ kẹ okẹ uzuazọ seba-ẹrọo?
12 Re a ru uvẹ kẹ okẹ uzuazọ seba-ẹrọo evaọ abọ buobu o rẹ rehọ udu fihọ ute oyena jẹ lẹ se Jihova kẹ obufihọ re a lei. (Ahwo Filipai 4:6, 7) Pọl o kere nọ: “Otẹrọnọ ohwo jọ o te ku ei họ no evaọ udu riẹ, o gbe wo ẹgwọlọ họ, rekọ o wo udu kpahe oma obọ riẹ ọ tẹ jẹ jọ udu riẹ jiroro na no, re ọye ọvo ọ jọ, u re woma kẹe. Ohwo nọ o kiọghọ riẹ evaọ orọo ọ riẹ ru, rekọ ọnọ ọ rọo ho o te mai woma kẹ.”—1 Ahwo Kọrint 7:37, 38, NW.
Uzuazọ Seba-Ẹrọo avọ Ẹjiroro
13, 14. (a) Didi owawọ Pọl ukọ na ọ wawo evaọ udevie Ileleikristi nọ e rọo ho gbe enọ e rọo no? (b) Edhere vẹ ọvo Oleleikristi nọ ọ rọo ho ọ rẹ sae ‘mae rọ riẹ ru’ vi enọ e rọo no?
13 Uzuazọ seba-ẹrọo ọvo yọ oware ọghọ họ. Kọ evaọ edhere ọ vẹ o sae rọ “mai woma”? O roma hwa edhere nọ ohwo na ọ rehọ ufuoma nọ o rẹ whaze ruiruo. Pọl o kere nọ: “Mẹ guọlọ re wha se awa ba ẹruọ. Ọ nọ o wo aye he ọ rẹ rọ ẹro te iruo Ọnowo, iroro riẹ kpobi epanọ o re ro ru Ọnowo eva wera. Rekọ ọzae nọ o wo aye i no, ọ rẹ ruawa eware akpọ na, epanọ o re ro ru aye riẹ eva wera, o te je wo iroro ivẹ. Aye nọ o wo ọzae he, hayo ọmọtẹ nọ ọ riẹ ọzae he, ọ rẹ ruawa iruo Ọnowo Ọghẹnẹ epanọ o re ro ru oma gbe ẹzi riẹ ọrẹri; rekọ aye nọ o wo ọzae no, ọ rẹ ruawa eware akpọ na epanọ o re ro ru ọzae riẹ eva wera. Mẹ ta onana fiki erere nọ o re te owhai, orọnọ re o jọ idhọvẹ kẹ owhai hi, rekọ me bi roro onana fiki ewoma rai, re mẹ rọ iroro rai nọ e hẹriẹ hẹ ro bru Ọnowo.”—1 Ahwo Kọrint 7:32-35.
14 Oleleikristi nọ ọ rọo ho nọ ọ be rehọ eyero seba-ẹrọo riẹ le ute oriobọ o bi ru “woma” vi Ileleikristi nọ e rọo ho. Ọ seba-ẹrọo, orọnikọ “fiki uvie” na ha, rekọ fiki ẹjiroro obọ riẹ. (Matiu 19:12) Ọzae hayo aye nọ ọ rọo ho ọ “rẹ rọ ẹro te iruo Ọnowo” na, ọ rẹ ruawa “epanọ o re ro ru Ọnowo eva wera,” jẹ “rọ iroro rai nọ e hẹriẹ hẹ ro bru Ọnowo na.” Onana u te dhesẹ iroro ohwo kpobi nọ ọ rẹ rọ kẹ egagọ Jihova gbe Kristi Jesu. Evaọ ere oruo ọvo ezae gbe eyae Ileleikristi nọ e rọwo ho a rẹ rọ ‘mai ru woma’ vi Ileleikristi nọ e rọo.
Iruo nọ E Hẹriẹ Hẹ
15. Eme họ ugogo avro Pọl na evaọ 1 Ahwo Kọrint uzou 7?
15 Avro Pọl kpobi evaọ uzou ọnana ọna: Nọ orọo o rọ oware ezi na yọ, evaọ otọ iyero jọ, u fo kẹ ahwo jọ na, ababọ avro uzuazọ seba-ẹrọo o mai woma kẹ ọzae hayo aye Oleleikristi ọnọ ọ gwọlọ gọ Jihova avọ iroro ọvo. Nọ o rọnọ ohwo nọ ọ rọo no o wo “iroro ivẹ” na, Oleleikristi nọ ọ rọo ho o wo ufuoma nọ ọ rẹ rọ rehọ ovao dhe “iruo Ọnowo” na.
16, 17. Ẹvẹ Oleleikristi nọ ọ rọo ho ọ mae rọ rehọ ovao hwa “iruo Ọnowo” na?
16 Eme họ eware Olori na nọ Oleleikristi nọ ọ rọo ho ọ rẹ sae rẹriẹ ova ku ziezi vi ahwo nọ e rọo no? Evaọ ofẹ ọfa, Jesu ọ t’ẹme kpahe “eware Ọghẹnẹ”—eware nọ Oleleikristi ọ rẹ sae rọ kẹ Siza ha. (Matiu 22:21) Eware enana e mai kpomahọ uzuazọ Oleleikristi, egagọ riẹ, odibọgba riẹ.—Matiu 4:10; Ahwo Rom 14:8; 2 Ahwo Kọrint 2:17; 3:5, 6; 4:1.
17 Ahwo nọ e rọo ho a mai wo ufuoma nọ a rẹ rọ raha oke rai evaọ iruo Jihova, onọ o rẹ sae jọ erere kẹ edikihẹ ẹzi rai je ru odibọgba rai kẹre. A rẹ sae raha oke buobu evaọ ewuhrẹ gbe eroro omobọ rai. Ileleikristi nọ e rọo ho a rẹ sae fi isase Ebaibol kugbe oma rai lọlọhọ vi enọ e rọo no. A rẹ sae ruẹrẹ oma họ ziezi kẹ iwuhrẹ na gbe usiuwoma ota. Enana kpobi e rọ kẹ “erere nọ o re te” ai.—1 Ahwo Kọrint 7:35.
18. Ẹvẹ inievo emezae buobu nọ e rọo ho a sai ro dhesẹ nọ a gwọlọ gọ Jihova ababọ “iroro ivẹ”?
18 Inievo emezae buobu nọ e rọo ho nọ e be gọ wọhọ idibo iruiruo a rẹ sae ta kẹ Jihova lọlọhọ nọ: “Mẹ na! Vi omẹ.” (Aizaya 6:8) A rẹ sai fi obe họ re a kpohọ Isukulu Ewuhrẹ Odibọgba na, onọ a seba kẹ ekpako gbe idibo iruiruo nọ e re rọo ho enọ oma o k’uvẹ re a gọ evaọ oria nọ ẹgwọlọ ọ jẹ mae rro. Makọ inievo nọ oma o k’uvẹ re a nyase ukoko rai ba ha a rẹ sae fialoma rai via re a gọ inievo rai wọhọ idibo iruiruo hayo ekpako.—Ahwo Filipai 2:20-23.
19. Ẹvẹ inievo emetẹ buobu nọ e rọo ho a ro wo oghale no, kọ didi edhere jọ a sae rọ jọ oghale kẹ ikoko na?
19 Inievo emetẹ nọ e rọo ho, enọ i wo ezae nọ a rẹ nyabru kẹ iroro-jẹ hayo wọ ẹme bru hu, a rẹ mai ‘gbolo owha rai se Jihova.’ (Olezi 55:22; 1 Ahwo Kọrint 11:3) Onana o mae rọ oja kẹ inievo emetẹ enọ, fiki uyoyou kẹ Jihova, a wo ezae he. Otẹrọnọ a rọo evaọ obaro, o rẹ jọ “evaọ Ọnowo na” ọvo, koyehọ, a rẹ rọo ohwo nọ ọ roma mudhe kẹ Jihova no. (1 Ahwo Kọrint 7:39) O rẹ were ekpako na re a wo inievo emetẹ nọ e rọo ho evaọ ikoko rai; enana i re weze je fiobọhọ kẹ enọ e be mọ gbe enọ e who no. Onana o rẹ wha evawere se ahwo na kpobi.—Iruẹru 20:35.
20. Ẹvẹ Ileleikristi buobu a bi ro dhesẹ nọ a be “rọ iroro rai nọ e hẹriẹ hẹ ro bru Ọnowo” na?
20 Emoha Ileleikristi buobu a ruẹrẹ iruo rai họ no re a ‘ruiruo kẹ Olori na ababọ iroro ivẹ.’ (1 Ahwo Kọrint 7:35) A be gọ Jihova wọhọ egbodibo ekobaro oke kpobi, imishọnare, hayo evaọ uwou ogha Watch Tower Society na jọ. Yọ ẹvẹ a rọ ahwo evawere te! Ẹvẹ usu rai o rẹ sasa oma te! Whaọ, evaọ aro Jihova gbe Jesu, a “wọhọ igrigri.”—Olezi 110:3.
A re Duwu Iyeri Ebẹdẹ Bẹdẹ Seba-Ẹrọo Ho
21. (a) Fikieme o jẹ rọ vevẹ inọ Pọl ọ tudu họ iyeri-duwu seba-ẹrọo ho? (b) Eme o dhesẹ nọ ọ ta kpahe ẹvrẹ “udhudhu ọmoha”?
21 Ugogo ẹme evaọ ohrẹ Pọl na họ u re “woma” kẹ Ileleikristi re a ru uvẹ kẹ uzuazọ seba-ẹrọo. (1 Ahwo Kọrint 7:1, 8, 26, 37) Rekọ ọ rehọ edhere ọvo ta kẹ ai nọ a re duwu iyeri seba-ẹrọo ho. Wo ohẹriẹ, o kere nọ: “Otẹrọnọ ohwo nọ ọ rọo ho ọ be sae gba oma riẹ hẹ, ọ tẹ vrẹ udhudhu ọmoha no, yọ enẹ o rọ kẹe, jọ o ru epanọ ọ gwọlọ; ọ thuzi hi. Jọ a rọo.” (1 Ahwo Kọrint 7:36, NW ) Ubiẹme ọvo Grik (hy·peʹra·kmos) nọ a fa wọhọ “vrẹ udhudhu ọmoha” u dhesẹ nọ “vrẹ oria nọ o mai kpehru kpobi” yọ u dhesẹ ẹnyavrẹ oke nọ isiuru ẹnwae e rẹ mae jọ ga. Fikiere ahwo nọ a raha ikpe buobu no evaọ eyero seba-ẹrọo nọ a je roro uwhremu na nọ a rẹ rọo a wo ufuoma vọvọ nọ a rẹ rọ rọo ohwo nọ ọ rọ ukoko na.—2 Ahwo Kọrint 6:14.
22. Fikieme o jẹ rọ oware ezi no kabọ kabọ ze kẹ Oleleikristi re ọ seba-ẹrọo evaọ emaha?
22 Ikpe nọ Oleleikristi ọmoha ọ raha be rọ gọ Jihova ababọ iroro ivẹ yọ ekoko efe areghẹ. O rẹ lẹliẹe wo areghẹ, orimuo, gbe otoriẹ. (Itẹ 1:3, 4) Ohwo nọ ọ rọo ho fiki Uvie na o rẹ mai woma kẹe, otẹrọnọ ọ jiroro na uwhremu na, re ọ rọo je yẹ emọ.
23. Eme ahwo jọ nọ a be jiroro orọo a wo họ iroro, rekọ didi enọ a te t’ẹme kpahe evaọ uwuhrẹ notha na?
23 Ileleikristi jọ nọ e raha ikpe buobu no be gọ Jihova oke kpobi evaọ eyero seba-ẹrọo a rẹ roma totọ salọ ọrivẹ-orọo obaro rai avọ eriwo ẹnyaharo evaọ abọjọ iruo oke kpobi. Onana u woma kẹhẹ. Ahwo jọ dede a be jiroro inọ a tẹ rọo a rẹ kuvẹ re orọo rai u si egagọ rai kpemu evaọ edhere ọvuọvo ho. Rekọ Oleleikristi nọ ọ rọo no o re roro nọ o wo ufuoma nọ ọ rẹ rọ roma totọ ruiruo Jihova wọhọ okenọ ọ re rọo ho? Ma te kuyo nana evaọ uwuhrẹ notha na.
Evaọ Edhere ọ Ọkiẹkpemu
◻ Fikieme oma o jẹ wọ Pọl ukọ na re o kere se ukoko obọ Kọrint?
◻ Fikieme ma jẹ riẹ nọ Pọl ọ jẹ fodẹ uzuazọ omakodhere he?
◻ Ẹvẹ ohwo ọ sai ro ‘ru uvẹ’ kẹ uzuazọ seba-ẹrọo?
◻ Ẹvẹ inievo emetẹ nọ e rọo ho a sai ro wo erere no eyero rai na ze?
◻ Evaọ idhere vẹ inievo emezae nọ e rọo ho a sae rọ rehọ uvẹ ufuoma rai rọ gọ Jihova ababọ “iroro ivẹ”?