‘Ru Uvẹ Kẹe’
1 Okejọ nọ ọ jẹ ta ẹme kugbe ilele riẹ kpahe orọo, Jesu ọ ta kpahe seba-ẹrọo wọhọ ‘okẹ.’ Kẹsena ọ tẹ ta nọ: ‘Ọnọ ọ rẹ sai ru uvẹ kẹe, jọ o ru uvẹ kẹe.’ (Mat. 19:10-12) Nọ ikpe jọ e vrẹ no, Pọl ukọ na o te kere kpahe ewoma seba-ẹrọo jẹ ta udu họ amọfa awọ re a lele oriruo riẹ re a seba-ẹrọo. (1 Kọr. 7:7, 38) Nẹnẹ, ibuobu i ‘ru uvẹ’ kẹ seba-ẹrọo no, yọ a be reawere irere riẹ. Evẹ họ irere enana jọ?
2 Ẹgọ ‘Avọ Iroro Nọ E Hẹriẹ Hẹ’: Pọl o vuhumu inọ seba-ẹrọo o kẹ riẹ uvẹ nọ ọ rẹ rọ gọ Jihova ‘avọ iroro nọ e hẹriẹ hẹ.’ Epọvo na nẹnẹ re, oniọvo ọmọzae nọ ọ re rọo ho ọ rẹ sai le ute ọ Isukulu Ewuhrẹ Odibọgba na, yọ ohwo nọ ọ re rọo ho ọ mai wo uvẹ nọ ọ rẹ rọ ruọ iruo ọkobaro, wuhrẹ ẹvẹrẹ ọfa, kpohọ oria nọ ẹgwọlọ ọ jẹ mae rro, ru iruo eva Ebẹtẹle, hayo wo uvẹ kẹ iruo obọdẹ efa kpobi. Ọ rẹ sai wo oke gbe uvẹ ziezi nọ o re ro ru uwuhrẹ omobọ-ohwo gbe eroro, jẹ t’ẹme se Jihova evaọ olẹ nọ u no udu ze. Ohwo nọ ọ rọo ho, ọ rẹ mai wo oke kẹ omariẹ ziezi nọ o re ro fi obọ họ kẹ amọfa. Iruo itieye na kpobi e rrọ kẹ ‘erere omobọ-ohwo.’—1 Kọr. 7:32-35; Iruẹru 20:35.
3 Iruẹru egagọ itieye nọ a rẹ rọ kẹ Ọghẹnẹ ababọ iroro nọ e hẹriẹ e rẹ wha osaohwa ulogbo ze. Nọ ọ rria Kẹnya vrẹ ikpe 27 no, oniọvo ọmọtẹ jọ nọ ọ rọo ho o kere nnọ: “Me wo egbẹnyusu buobu gbe iruo buobu! Ma re ru eware kugbe [je] weze bru ohwohwo. . . . Mẹ sae rehọ uvẹ ulogbo nọ seba-ẹrọo o k’omẹ na ro ru iruo ziezi evaọ odibọgba na, yọ onana o wha oghọghọ ulogbo se omẹ no.” O fibae nnọ: “Anwọ ikpe nana kpobi, usu mẹ kugbe Jihova o ga viere no.”
4 Eruo Uvẹ Na: Jesu ọ ta nnọ oware nọ a re wo họ iroro ro ru uvẹ kẹ okẹ ọ seba-ẹrọo o rẹ jọ “fiki uvie odhiwu.” (Mat. 19:12) Wọhọ epaọ okẹ ofa kpobi, a rẹ rehọ seba-ẹrọo ru iruo ziezi re o wha oghọghọ gbe irere ze. Ẹkwoma eroruiruo uvẹ nọ seba-ẹrọo o rẹ wha ze gbe ẹkwoma eva nọ a re fihọ Jihova kẹ areghẹ gbe ẹgba, ahwo buobu nọ a rọo ho a vuhu ewoma ọrọ uvẹ nọ a re ru kẹ okẹ na mu no.