“Omọvo Ahwo Buobu nọ Who Duobọ te Uzuazọ Riẹ”

EVAỌ January 1996, Carol ọ jẹ mọ ẹyao ẹvori. Ọ kpako te ikpe 60 no yọ oke yena kpobi ọ jọ aye nọ ọ rẹ wereva, nọ oma riẹ o jọ bọbọbọ avọ eme ezi nọ ọ rẹ ta kẹ ahwo kpobi. Rekọ obọnana edọkita na e be dao oma re a siwi ẹyao na. Evaọ udevie uye riẹ na, ileta nana i te te Carol obọ:

“Carol Oyoyou Mẹ:

“O d’omẹ gaga nọ whọ rọ ẹyao. U woma nọ ma wo uvi ẹruore onọ Ebaibol na i fiobọhọ k’omai riẹ je you. Ẹruore ọnana ọ rrọ kẹ Uvie Jihova onọ u ti su otọakpọ na re ma sae rria eyero aparadase, onọ mai kpobi ma bi rẹro riẹ na.

“Mẹ gwọlọ j’owhẹ riẹ nọ iruo usiuwoma ota ra u siwi ahwo buobu no uwhu ebẹdẹ bẹdẹ no. Mẹ yọ omọvo ahwo nana jọ. Mẹ riẹ hẹ sọ whọ sae gbẹ kareghẹhọ oke ọsosuọ nọ ma ro zere oma. Evaọ oke yena, yọ mẹ rọ ikpe 20. Me wo eto ithethe, mẹ jẹ zẹ imu, yọ mẹ avọ otu igbulegbu mẹ ma dikihẹ kugbe. Ma jẹ wha igbeke lele oma yọ ma wo uyoyou kẹ ohwo ọvo ho ajokpa rọ kẹ oma mai ọvo.

“Whẹ avọ Osẹri ọfa wha te kporo ẹthẹ mẹ wha tẹ rehọ Uwou-Eroro Na gbe Awake! rọ k’omẹ. Mẹ gwọlọ nọ mẹ rẹ k’owhẹ edọla jẹ ta nọ mẹ gwọlọ emagazini na ha. Whọ j’omẹ riẹ nọ orọnikọ whọ be ta usiuwoma fiki ugho ho. Whọ ta k’omẹ nọ who bi ru iruo nọ who re ro fi obọ họ kẹ amọfa wo otoriẹ Ebaibol na. Mẹ sae kareghẹhọ họ sọ mẹ rehọ emagazini na hayo me se rai. Ghele, whọ kọ ubi uzẹme na fihọ uzuazọ mẹ.

“Ikpe buobu e vrẹ no Osẹri ọfa, Gary, ọ tẹ nya ze uwou oni mẹ okenọ mẹ jọ uwou. Mẹ ta kẹe kpahe iweze ra evaọ ikpe jọ nọ e vrẹ no. Gary o te wuhrẹ Ebaibol na kugbe omẹ evaọ oke thethei bẹsenọ mẹ rọ họ-ame evaọ 1984. Enẹna me bi wuhrẹ emọ mẹ uzẹme Uvie Ọghẹnẹ.

“U mu omẹ ẹro nọ mẹ yọ omọvo ahwo buobu nọ who duobọ te uzuazọ riẹ no evaọ ikpe iruo ẹrọwọ ra. Ghele na, ẹkwoma uyoyou ẹwo ọnana, who fi obọ họ k’omẹ avọ uviuwou mẹ te riẹ Ọghẹnẹ Ologbo na no, Jihova, gbe Ọmọ riẹ, Kristi Jesu. Me bi rẹro ẹdẹ nọ mẹ te ruẹ owhẹ evaọ eyero akpọ ọkpokpọ na okenọ Jihova o re ti ririe irui oviẹ kpobi no aro mai, uwhu o gbẹ te jọ họ.—Eviavia 21:4.

“Rọ k’omẹ avọ uviuwou mẹ, eva e were omai inọ ma wo uvẹ nọ ma rọ riẹ owhẹ jẹ rọ abọ iruo isẹri ise ra. Ma yere owhẹ.

“Avọ uyoyou oniọvo,

Peter”

Nọ ọ mọ te emerae ezeza no, Carol o te whu evaọ March 1996, nọ ọ kọ ibi uzẹme buobu no evaọ etoke ikpe 35 odibọgba ọwhọ riẹ. O wuhrẹ nọ ohwo ọ rẹ riẹ okenọ ubi o rẹ rọ mọ họ, makọ nọ ikpe buobu e tẹ vrẹ no.—Matiu 13:23.