Enọ Ahwo Nọ A S’ebe
Kọ a gbẹ sae tae nọ otoriẹ okpokpọ mai ọrọ ubiẹme “oge” eva Matiu 24:34 na o dina kuvẹ kẹ iroro na nọ urere eyero-akpọ nana o ti lehie omojọ?
Oyena o rọ ere vievie he. Ukpoye, otoriẹ okpokpọ mai na kpahe ẹme ọnana u re fiobọhọ k’omai re ma rẹro ekuhọ na ẹsikpobi. Evaọ oghẹrẹvẹ?
Whaọ, wọhọ epanọ Uwou-Eroro Na ọrọ November 1, 1995 (ọrọ Oyibo), u dhesẹ, Jesu ọ rehọ ẹme na “oge ọnana” ro dhesẹ etoke ahwo omuomu. (Matiu 11:7, 16-19; 12:39, 45; 17:14-17; Iruẹru 2:5, 6, 14, 40) Orọnikọ o rọ edhesẹ emuhọ etoke jọ avọ uzedhe ẹdẹ jọ nọ a fihọ họ.
Evaọ uzẹme, “Enọ Ahwo nọ A s’Ebe” evaọ Uwou-Eroro ọvo na o fodẹ igogo eme ivẹ: “A rẹ sae rri oge ahwo wọhọ etoke unuikpe nọ a ve fihọ họ” gbe nọ, “Ahwo oge ọvo a rẹ rria evaọ umuo ubroke kpẹkpẹe.”
Ma rẹ t’ẹme kpahe “oge” evaọ edhere ọnana. Wọhọ oriruo, ma rẹ sae ta nọ, ‘Isoja oge Napoléon a riẹ oware ovo kpahe irupre gbe egbọudu enua ha.’ Kọ onana u dhesẹ nọ ma be t’ẹme kpahe isoja nọ a yẹ evaọ ukpe ovona kugbe Napoléon? Kọ ma be ta kpahe isoja French ọvo nọ i whu taure Napoléon o te ti whu? O rọ ere he; hayo kọ “oge” ọ rọ t’ẹme evaọ erei yọ ma be gwọlọ fi unuikpe jọ họ họ. Rekọ, yọ ma be t’ẹme kpahe umuo etoke kpẹkpẹe, orọnikọ ikpe udhusoi buobu no oke Napoléon kpohọ obaro ho.
Orọ oghẹrẹ ovo na kugbe otoriẹ mai kpahe ẹme nọ Jesu ọ ta evaọ eruaruẹ riẹ nọ ọ kẹ evaọ Ugbehru Olivi. Orugba abọ sa-sa ọrọ eruẹaruẹ na u dhesẹ nọ urere eyero ọnana ọ kẹle no. (Matiu 24:32, 33) Kareghẹhọ nọ wọhọ epanọ Eviavia 12:9, 10 o ta, nọ a rehọ Uvie Ọghẹnẹ obọ odhiwu riẹ mu no evaọ 1914, a te gbolo Setan ze otọakpọ. Eviavia o te fibae nọ Setan o wo ofu ọgaga. Fikieme? Keme ọ riẹ nọ ‘oke riẹ o re kpẹkpẹre.’—Eviavia 12:12.
Fikiere u te fo nọ Uwou-Eroro Na ọrọ November 1 (ọrọ Oyibo) o wo uzoẹme nọ o ta nọ: “Wha gbẹ hae Roro!” Edhe-ẹme nọ u lele i rie o ta gbagba nọ: “U du gwọlọ re ma riẹ uzedhe oke nọ eware e te rọ via ha. Ukpoye, ma rẹ tẹro mai vi eroro, ewo ẹrọwọ ọgaga, je wo abọ buobu evaọ iruo Jihova—orọnikọ kpahe ekele edẹ hẹ.” O tẹ wariẹ eme Jesu anọ: “Wha yọrọ oma, wha roro; keme wha riẹ ezi nọ oke na u re ti te he. Ẹme nọ mẹ ta kẹ owhai na, ahwo kpobi mẹ ta kẹ: Wha roro.”—Mak 13:33, 37.