Kọ A Ruẹrẹ Elẹ Ra Họ “Wọhọ Insẹnse”?
“Jọ a ruẹrẹ elẹ mẹ họ wọhọ insẹnse eva aro ra.”—OLEZI 141:2, NW.
1, 2. Eme ẹmahe insẹnse u dhesẹ?
JIHOVA ỌGHẸNẸ o juzi kẹ Mosis ọruẹaro riẹ re ọ ruẹrẹ insẹnse ọrẹri họ nọ a rẹ mahe evaọ uwou-udhu egagọ Izrẹl. Eware ore-awere ene Ọghẹnẹ ọ gwọlọ nọ a gua kugbe. (Ọnyano 30:34-38) Ore riẹ u re ghine gbo were gaga.
2 Ọvọ Uzi nọ emọ Izrẹl e jọ otọ riẹ na o gwọlọ ẹmahe insẹnse kẹdẹ kẹdẹ. (Ọnyano 30:7, 8) Kọ ẹmahe insẹnse u wo obọdẹ otofa jọ? E, keme ọso-ilezi na ọ so nọ: “Jọ a ruẹrẹ elẹ mẹ họ wọhọ insẹnse eva aro ra [Jihova Ọghẹnẹ], abọ kpare mẹ wọhọ idhe eka owọwọ.” (Olezi 141:2, NW ) Evaọ obe Eviavia, Jọn ukọ na o dhesẹ enọ e wariẹ agbara-uvie odhiwu Ọghẹnẹ họ wọhọ enọ i wo idhe igoru avọ insẹnse. Wọhọ epanọ ikere efuafo na e ta: ‘Insẹnse na họ elẹ erezi na.’ (Eviavia 5:8) Fikiere ẹmahe insẹnse nọ i re gbo ore-awere na i dhesẹ elẹ ọjẹrehọ nọ idibo Jihova a be lẹ t’uvo t’aso.—1 Ahwo Tẹsalonika 3:10; Ahwo Hibru 5:7.
3. Eme o re fiobọhọ k’omai ‘ruẹrẹ elẹ mai họ wọhọ insẹnse kẹ Ọghẹnẹ’?
3 Otẹrọnọ Ọghẹnẹ ọ rẹ jẹ elẹ mai rehọ, ma rẹ lẹ sei hrọ evaọ odẹ Jesu Kristi. (Jọn 16:23, 24) Rekọ ẹvẹ ma sai ro ru elẹ mai woma viere? Whaọ, eroro kpahe iriruo Ikereakere jọ i ti fiobọhọ k’omai ruẹrẹ elẹ mai họ wọhọ insẹnse kẹ Jihova.—Itẹ 15:8.
Lẹ Elẹ Evaọ Ẹrọwọ
4. Ẹvẹ ẹrọwọ o ro w’obọ kugbe olẹ nọ a rẹ jẹ rehọ?
4 Ma tẹ gwọlọ nọ elẹ mai i bru Ọghẹnẹ wọhọ insẹnse ore-awere, ma rẹ lẹ evaọ ẹrọwọ hrọ. (Ahwo Hibru 11:6) Okenọ ekpako Ileleikristi a tẹ ruẹ nọ ohwo nọ ọ be mọ ẹyao abọ-ẹzi ọ kezọ kẹ obufihọ Ikereakere rai, “olẹ orọwọ [rai] u re siwẹ ohwo nọ ọ rẹ mọ.” (Jemis 5:15) Elẹ nọ a lẹ evaọ ẹrọwọ e rẹ were Ọsẹ obọ odhiwu mai, yọ ere o rọ otẹrọnọ ohwo ọ rọ oma olẹ wuhrẹ Ẹme Ọghẹnẹ. Ọso-ilezi na o dhesẹ uvi iroro nọ ọ so nọ: “Mẹ rẹ rehọ adhẹẹ rọ kẹ ijaje ra, [nọ me] you, mẹ vẹ jọ eva mẹ roro ijaje ra. Wuhrẹ omẹ oziẹobro gbe ẹriẹ, keme izi ra mẹ rọo.” (Olezi 119:48, 66) Joma ‘riabọ kpehru’ evaọ olẹ omarokpotọ je wo ẹrọwọ ẹkwoma ẹmeoyo kẹ ijaje Ọghẹnẹ.
5. Eme ma re ru otẹrọnọ ma kare areghẹ?
5 Kọ otẹrọnọ ma kare areghẹ nọ a re ro thihakọ ẹdawọ. Ẹsejọhọ u mu omai ẹro ho sọ eruẹaruẹ Ebaibol jọ i bi rugba obọnana. Ukpenọ ma rẹ kẹ onana uvẹ re u whrehe omai evaọ abọ-ẹzi, joma lẹ kẹ areghẹ. (Ahwo Galesha 5:7, 8; Jemis 1:5-8) Dede na, ma re rẹro nọ Ọghẹnẹ ọ te k’omai uyo evaọ edhere urirẹ jọ họ. U fo re ma dhesẹ oruọzewọ elẹ mai ẹkwoma eruo eware nọ ọ gwọlọ nọ ahwo riẹ kpobi a re ru. U wuzou k’omai re ma ru uwuhrẹ Ikereakere na nọ o rẹ bọ ẹrọwọ ga ẹkwoma obufihọ ebe nọ ‘ọrigbo nọ o wo ẹrọwọ avọ areghẹ’ na o bi kporo. (Matiu 24:45-47; Joshua 1:7, 8) U te je fo re ma ru ẹnyaharo evaọ eriariẹ ẹkwoma abọ nọ ma re wo ẹsikpobi evaọ iwuhrẹ ahwo Ọghẹnẹ.—Ahwo Hibru 10:24, 25.
6. (a) Eme mai kpobi ma re vuhumu kpahe edẹ mai na gbe orugba eruẹaruẹ Ebaibol? (b) Fiba olẹ kẹ erufuọ odẹ Jihova, eme ma re ru?
6 Nẹnẹ na, Ileleikristi jọ a bi le isiuru gbe iruo nọ i dhesẹ nọ o wọhọ nọ o thọrọ e rae ẹro no inọ ma nya kodo ruọ “oke urere” na no. (Daniẹl 12:4) Enọ ma gbẹ rọ ukoko na a rẹ sae lẹ nnọ ahwo otiọye na a bọ ẹrọwọ rai fihọ imuẹro Ikereakere na gaga inọ ọzino Kristi o muhọ evaọ 1914 okenọ Jihova ọ rehọ iẹe mu wọhọ Ovie obọ odhiwu gbe nnọ o bi su evaọ udevie ewegrẹ riẹ enẹna. (Olezi 110:1, 2; Matiu 24:3) Mai kpobi ma re vuhumu nnọ eware nọ a ruẹaro rai wọhọ ọraha egagọ erue—“Babilọn ologbo” na—ohọre nọ Setan, Gọg obọ Magọg ọ te họre ahwo Jihova, gbe epanọ Ọghẹnẹ Erumeru na o ti ro siwi ai eva ẹmo ọ Amagẹdọn e te via kpregede evaọ ubroke. (Eviavia 16:14, 16; 18:1-5; Izikiẹl 38:18-23) Fikiere joma lẹ kẹ obufihọ Ọghẹnẹ re ma jaja aro vi evaọ abọ-ẹzi. J’omai kpobi ma lẹ kẹ orufuọ odẹ Jihova gaga, re Uvie riẹ o ze, re a jọ otọakpọ na ru oreva riẹ wọhọ epanọ a rọ obọ odhiwu ruẹ. Ẹhẹ, joma wo ẹrọwọ jẹ kẹ imuẹro nnọ elẹ mai i nevaze. (Matiu 6:9, 10) Evaọ uzẹme, j’omai kpobi nọ i you Jihova ma kake gwọlọ Uvie na gbe ẹrẹreokie riẹ je w’abọ ziezi evaọ ewhowho emamọ usi na bẹsenọ urere na o rẹ ze.—Matiu 6:33; 24:14.
Jiri je Yere Jihova
7. Eme ọ were owhẹ evaọ olẹ Devidi nọ a kere abọ riẹ jọ fihọ 1 Iruẹru-Ivie 29:10-13 na?
7 Obọdẹ edhere jọ nọ ma rẹ rọ ‘ruẹrẹ elẹ mai họ wọhọ insẹnse’ họ udu kpobi nọ ma re ro jiri Ọghẹnẹ je yere iei. Devidi ovie na ọ lẹ olẹ utioye na okenọ tei te ahwo Izrẹl a ru unevaze kẹ ebabọ etẹmpol Jihova. Devidi ọ lẹ nọ: “Ujiro u te owhẹ, O ỌNOWO, Ọghẹnẹ ahwo Izrẹl ọsẹ mai, bẹdẹ bẹdẹ. O ra, O ỌNOWO, oruaro, ogaga, gbe oro gbe obokparọ gbe udu-ogaga; keme e nọ e rọ obọ idhiwu gbe evaọ akpọ na e ra; uvie na o ra, O ỌNOWO, jọ a kpare owhẹ kpehru wọhọ ọnọ o wuzou vi ai kpobi. Efe gbe oro, obọ ra i noze, who bi su ai kpobi. Obọ ra ogaga gbe ẹgba; gbe evaọ obọ ra a je ru ai ro, a ve je wo eri. Whaọ enẹna ma yere owhẹ, Ọghẹnẹ mai, ma te je jiri odẹ oruaro ra.”—1 Iruẹru-Ivie 29:10-13.
8. (a) Didi eme ujiro nọ e rọ Ilezi 148 rite 150 e mai duobọ t’owhẹ udu? (b) Ma tẹ rọwo kugbe eme nọ e rọ Olezi 27:4, eme ma re ru?
8 Ẹvẹ eme ujiro gbe uyere enana i w’erru te! Ẹsejọhọ elẹ mai e rẹ sae nwani woma enẹ hẹ, rekọ e rẹ sai n’udu ze wọhọ onana. Obe Ilezi o vọ avọ elẹ uyere gbe ujiro. Eme urirẹ erọ ujiro e rọ Ilezi 148 rite 150. A jọ ilezi buobu kẹ Ọghẹnẹ uyere. Devidi ọ so nọ: “Oware ovo mẹ jọ obọ ỌNOWO guọlọ, onọ mẹ rẹ te nọ e na; re mẹ jọ uwou ỌNOWO bẹdẹ nọ me re whuẹ, re me riwi eru ỌNOWO, re me he kpohọ uwou egagọ-ode riẹ.” (Olezi 27:4) Joma j’owọ lele elẹ itieye na ẹkwoma abọ nọ ma re wo avọ ọwhọ evaọ iruẹru ogbotu ukoko Jihova kpobi. (Olezi 26:12) Onana uruo gbe Ẹme Ọghẹnẹ nọ ma re roro kpahe kẹdẹ kẹdẹ o rẹ k’omai ẹjiroro buobu nọ ma rẹ rọ rehọ ujiro gbe uyere udu kpobi nyabru Jihova.
Roma Kpotọ Gwọlọ Obufihọ Jihova
9. Ẹvẹ Asa ovie na ọ lẹ, kọ eme o no rie ze?
9 Otẹrọnọ ma be rọ udu kpobi gọ Jihova wọhọ Isẹri riẹ, u re mu omai ẹro nọ o re yo elẹ mai kẹ obufihọ. (Aizaya 43:10-12) Roro kpahe Asa ovie Juda. Ikpe 10 ọsosuọ ọrọ esuo ikpe 41 riẹ (977-937 B.C.E.) e jọ etoke udhedhẹ. Kẹsena Zira ohwo Ẹtiopia na ọ tẹ rọ egbaẹmo ima ahwo riẹ wọ ohọre ziọ Juda. Dede nọ a bu vi ae gaga, Asa avọ ahwo riẹ a tẹ w’owọ ẹmo nya bru ai. Rekọ, taure ohọre na u te ti muhọ, Asa ọ rehọ eva riẹ kpobi lẹ. O dhesẹ nọ o vuhu ogaga nọ Jihova o re ro siwi mu. Avọ ubo kẹ obufihọ, ovie na ọ tẹ ta nọ: “Ma rọ ẹro suọ owhẹ, eva odẹ ra ma be rọ wọ ẹmo bru ogbotu nana. O ỌNOWO, whẹ họ Ọghẹnẹ mai; a jọ ohwo ọvo ọ kparobọ vi owhẹ hẹ.” A fi ahwo na kparobọ riẹriẹriẹ keme Jihova ọ thọ Juda fiki odẹ ulogbo riẹ. (2 Iruẹru-Ivie 14:1-15) Makọ Ọghẹnẹ ọ th’omai no ẹdawọ hayo ọ k’omai ẹgba re ma thihakọ riẹ, avro ọ riẹ hẹ inọ o re yo ayare mai kẹ obufihọ riẹ.
10. Ma gbẹ riẹ epanọ ma re ro yeri kugbe ẹbẹbẹ jọ họ, ẹvẹ olẹ Jehoshafat ovie na u re ro fiobọhọ k’omai?
10 Ma gbẹ riẹ epanọ ma re ro yeri kugbe ẹbẹbẹ jọ họ, ma rẹ sai wo evaifihọ nọ Jihova o ti yo ayare mai kẹ obufihọ. A dhesẹ onana evaọ edẹ Jehoshafat ovie Juda, ọnọ esuo ikpe 25 riẹ o muhọ evaọ 936 B.C.E. Okenọ egbaẹmo Moab, Ammọn, gbe igbehru ẹkwotọ Seia a wọ ẹmo ziọ Juda, Jehoshafat ọ tẹ lẹ nọ: “O [Ọghẹnẹ] mai, whọ gbẹ rehọ ae gu ẹdhọ? Keme ma wo ogaga nọ ma rẹ sae ti ro lele ogbotu nana nọ ọ be wọ ẹmo bru omai tha na te họre he. Ma riẹ onọ ma re ruẹ hẹ, rekọ ma rẹro kpahe owhẹ.” Jihova ọ kuyo kẹ olẹ omarokpotọ oyena, họre kẹ Juda ẹkwoma ozighi nọ o fihọ udevie ewegrẹ na nọ a ro kpe ohwohwo. Fikiere, ozọ u te mu erẹwho nọ e wariẹ e rai họ, udhedhẹ o tẹ ruọ Juda. (2 Iruẹru-Ivie 20:1-30) Ma tẹ kare areghẹ nọ ma re ro yeri kugbe ẹbẹbẹ, wọhọ Jehoshafat ma rẹ sae lẹ nọ: ‘Ma riẹ onọ ma re ru hu, rekọ ma rọ ẹro kpahe owhẹ, Jihova.’ Ẹzi ọfuafo na ọ sai ru omai kareghẹhọ eme Ikereakere jọ nọ i re fiobọhọ k’omai ku ẹbẹbẹ na họ, hayo Ọghẹnẹ ọ sai fiobọhọ k’omai evaọ edhere nọ o kpehru vi iroro ohwo-akpọ.—Ahwo Rom 8:26, 27.
11. Eme ma rẹ sai wuhrẹ kpahe olẹ no owojẹ Nehemaya ze kpahe ugbẹhẹ Jerusalẹm?
11 Ẹsejọ u re fo re ma thihakọ evaọ olẹ kẹ obufihọ Ọghẹnẹ. Nehemaya o weri, viẹ, siọ emuore ba, jẹ lẹ edẹ buobu kpahe igbẹhẹ Jerusalẹm nọ e raha no gbe uyero obẹbẹ nọ ahwo Juda a jọ. (Nehemaya 1:1-11) Ababọ avro, elẹ riẹ i bru Ọghẹnẹ wọhọ insẹnse ore-awere. Ẹdẹ jọ Atag-za-zis ovie Pasia ọ nọ Nehemaya nọ ọ jọ ọkora nnọ: “Eme whọ gwọlọ yare?” Nehemaya ọ tẹ niyẹrẹ nọ: “Fikiere mẹ tẹ lẹ Ọghẹnẹ obọ odhiwu.” A kuyo olẹ okpẹkpẹ urirẹ oyena keme a kẹ Nehemaya uvẹ re o ru oreva riẹ ẹkwoma ekpohọ Jerusalẹm re ọ wariẹ bọ ugbẹhẹ riẹ nọ u kie no.—Nehemaya 2:1-8.
Jọ Jesu O Wuhrẹ Owhẹ Epanọ A rẹ Lẹ
12. Evaọ eme obọra, ẹvẹ who re dhesẹ ugogo eme olẹ oriruo Jesu na?
12 Evaọ usu elẹ nọ a kere fihọ Ikereakere na kpobi, onọ o mae kẹ uwuhrẹ họ olẹ oriruo na nọ Jesu Kristi ọ lẹ wọhọ insẹnse ore-awere. Enẹ Usiuwoma Luk o ta: “Omọvo ilele [Jesu] jọ ọ tẹ ta kẹ e nọ, ‘Olori, wuhrẹ omai epanọ a rẹ lẹ, wọhọ epanọ Jọn o wuhrẹ ilele riẹ na.’ Ọ tẹ ta kẹ ae nọ: ‘Wha tẹ be lẹ, wha ta nọ, “Ọsẹ, jọ odẹ ra o jọ fuafo. Jọ uvie ra o ze. Rehọ emuore okpẹdẹ inẹnẹ kẹ omai. Jẹ rehọ izieraha mai vrẹ omai, keme ma be rọ vrẹ enọ i ru omai thọ; whọ rehọ omai ziọ ẹdawọ họ.” ’ ” (Luk 11:1-4, NW; Matiu 6:9-13) Joma roro kpahe olẹ onana, orọnikọ a re sei no uzou ze he rekọ o rẹ kpọ omai.
13. Ẹvẹ who re dhesẹ otofa eme na, “Ọsẹ, jọ odẹ ra o jọ fuafo”?
13 “Ọsẹ, jọ odẹ ra o jọ fuafo.” Re a se Jihova Ọsẹ yọ obọdẹ uvẹ-ọghọ kẹ idibo riẹ nọ e roma kẹ. Wọhọ epanọ emọ e rẹ wha ẹme kpobi bru ọsẹ ohrọ ẹsikpobi na, u fo re ma raha oke evaọ olẹ adhẹẹ se Ọghẹnẹ. (Olezi 103:13, 14) Elẹ mai i re dhesẹ awaọruọ mai kpahe orufuọ odẹ Jihova keme ma be hẹrẹ re a ru odẹ na fo no eka nọ a be lae anwẹdẹ. Ẹhẹ, ma gwọlọ re a hẹriẹ odẹ Jihova re a je ru ei fuafo.—Olezi 5:11; 63:3, 4; 148:12, 13; Izikiẹl 38:23.
14. Eme u dhesẹ re a lẹ nọ, “Jọ uvie ra o ze”?
14 “Jọ uvie ra o ze.” Uvie na họ esuo Jihova ẹkwoma egọmeti Mesaya obọ odhiwu riẹ nọ o rọ obọ Ọmọ riẹ gbe ibe “erezi” Jesu. (Daniẹl 7:13, 14, 18, 27; Eviavia 20:6) Kẹle na u ti “bru” enọ e jọ otọakpọ wọso esuo Ọghẹnẹ kpobi ze, u ve kpe ai no otọ na. (Daniẹl 2:44) Kẹsena a ve ti ru oreva Jihova evaọ otọakpọ, wọhọ epanọ a rọ obọ odhiwu ru na. (Matiu 6:10) Ẹvẹ oghọghọ nọ oyena o te wha ze o te rro te kẹ emama nọ e rọ omarokpotọ gọ Osu Ehrugbakpọ na kpobi!
15. Eme u dhesẹ re ma yare Jihova kẹ ‘emuore okpẹdẹ mai’?
15 “Rehọ emuore okpẹdẹ inẹnẹ kẹ omai.” Ẹyare Jihova kẹ emuore “okpẹdẹ” u dhesẹ nọ orọnikọ ma rẹ yare ekwakwa buobu hu rekọ kẹ ẹgwọlọ okpẹdẹ mai ọvo. Dede nọ ma fievahọ Ọghẹnẹ re ọ ko omai, ma re ruiruo jẹ gwọlọ emamọ edhere nọ o fo kpobi rọ gwọlọ emuore gbe ẹgwọlọ efa. (2 Ahwo Tẹsalonika 3:7-10) Dede na, ma re yere Ọkokẹ odhiwu mai keme uyoyou, areghẹ, gbe ogaga riẹ e rọ emu ekwakwa enana.—Iruẹru 14:15-17.
16. Ẹvẹ ma sai ro wo erọvrẹ Ọghẹnẹ?
16 “Rehọ izieraha mai vrẹ omai, keme ma be rọ vrẹ enọ i ru omai thọ.” Nọ ma gba ha na, ma rẹ sae nya te ute ogbagba Jihova vọvọ họ. Fikiere, u fo re ma lẹ kẹ erọvrẹ riẹ fiki idhe ẹtanigbo Jesu. Rekọ ma tẹ gwọlọ nọ ‘Oyo elẹ na’ ọ rehọ aghare idhe yena rọ vrẹ izieraha mai, ma re kurẹriẹ jẹ roma totọ jẹ ọwhọkuo nọ a k’omai kpobi rehọ. (Olezi 65:2; Ahwo Rom 5:8; 6:23; Ahwo Hibru 12:4-11) Ofariẹ, ma re rẹro nọ Ọghẹnẹ ọ rẹ rọ vrẹ omai thakpinọ ma be rọ “vrẹ enọ i ru omai thọ.”—Matiu 6:12, 14, 15.
17. Eme eme enana i dhesẹ, “Whọ rehọ omai ziọ ẹdawọ họ”?
17 “Whọ rehọ omai ziọ ẹdawọ họ.” Ẹsejọ Ebaibol na ọ rẹ ta nọ Jihova o ru eware evaọ okenọ ọ kẹ uvẹ rai ọvo. (Rut 1:20, 21) Ọghẹnẹ ọ rẹ dawo omai re ma raha uzi hi. (Jemis 1:13) Edawọ eyoma oruo i re no obọ Ẹdhọ ze, oma ọ esebaẹgba mai, gbe akpọ ọnana. Setan họ Ọdawo-Ahwo na ọnọ ọ be daoma gele omai raha uzi Ọghẹnẹ. (Matiu 4:3; 1 Ahwo Tẹsalonika 3:5) Okenọ ma tẹ yare nọ, “Whọ rehọ omai ziọ ẹdawọ họ,” yọ ma be yare Ọghẹnẹ nnọ ọ k’omai uvẹ re ma kie he evaọ okenọ a tẹ dawo omai re ma ghẹmeeyo kẹe. Ọ rẹ sae kpọ omai re ma seba ekie kẹ ẹdawọ na re Setan, ‘oyoma na,’ ọ se omai ba egele kie.—Matiu 6:13; 1 Ahwo Kọrint 10:13.
Ru Lele Elẹ Ra
18. Ẹvẹ ma sai ro ruiruo lele elẹ mai kẹ orọo gbe uzuazọ uviuwou evawere?
18 Olẹ oriruo Jesu u duobọ te igogo eme, rekọ ma rẹ sae lẹ kpahe oware kpobi. Wọhọ oriruo, ma rẹ sae lẹ kpahe isiuru mai kẹ orọo evawere. Re ma jọ kọkọ bẹsenọ ma rẹ rọo, ma rẹ sae lẹ kẹ oma-oriẹsuo. Rekọ ma re ruiruo kugbe elẹ mai ẹkwoma ẹwhaha ebe gbe ighe igberẹ-ibro. Ma re je ru ei fihọ ọtamuo mai re ma ‘rọo evaọ Ọnowo na ọvo.’ (1 Ahwo Kọrint 7:39; Iziewariẹ 7:3, 4) Nọ ma tẹ rọo no, u re fo re ma ruiruo lele elẹ mai kẹ evawere ẹkwoma efihiruo ohrẹ Ọghẹnẹ. Yọ otẹrọnọ ma wo emọ, u te he re ma lẹ ọvo inọ a jọ idibo ẹrọwọ Jihova. Ma rẹ dawo utho ẹgba mai re ma kọ uzẹme Ọghẹnẹ họ iroro rai ẹkwoma uwuhrẹ Ebaibol gbe emọ na nọ ma re se gb’oma kpohọ iwuhrẹ Ileleikristi ẹsikpobi.—Iziewariẹ 6:5-9; 31:12; Itẹ 22:6.
19. Eme ma re ru otẹrọnọ ma be lẹ kpahe odibọgba mai?
19 Kọ ma be lẹ kẹ eghale evaọ odibọgba na? Koyehọ ma rẹ j’owọ lele elẹ eyena ẹkwoma abọ nọ ma re wo ziezi evaọ iruo usiuwoma ota Uvie na. Ma tẹ be lẹ kẹ uvẹ nọ ma re ro fiobọhọ kẹ amọfa ziọ edhere uzuazọ ebẹdẹ bẹdẹ, ma rẹ roma totọ kere edẹ enọ i wo isiuru fihọ obe, u ve je n’omai eva ze re ma ku uwuhrẹ Ebaibol uviuwou kugbe omaa mai. Kọ ẹvẹ otẹrọnọ ma gwọlọ ruiruo usiuwoma ota oke-kpobi wọhọ ọkobaro? Koyehọ ma rẹ j’owọ lele elẹ mai ẹkwoma ẹnyaharo nọ ma rẹ jọ usiuwoma ota mai ru je w’abọ evaọ odibọgba na kugbe ekobaro. Owojẹ na u re dhesẹ nọ ma bi ruiruo lele elẹ mai.
20. Eme uzoẹme n’otha na u ti duobọ te?
20 Otẹrọnọ ma be rọ ẹrọwọ gọ Jihova, ma rẹ sai wo evaifihọ nnọ ọ te kuyo elẹ mai nọ e rọwo kugbe oreva riẹ. (1 Jọn 5:14, 15) Evaọ uzẹme, ma wo erere gaga no ọkiẹriwo elẹ jọ nọ a kere fihọ Ebaibol na ze no. Uzoẹme n’otha mai u ti duobọte ekpọvio Ikereakere efa rọ kẹ enọ e be gwọlọ ‘ruẹrẹ elẹ rai họ wọhọ insẹnse kẹ Jihova.’
Ẹvẹ Whọ te k’Uyo?
◻ Ẹvẹ ma rẹ rọ lẹ evaọ ẹrọwọ?
◻ Didi abọ ujiro gbe uyere u wo evaọ elẹ mai?
◻ Fikieme ma jẹ rọ evaifihọ gwọlọ obufihọ Jihova evaọ olẹ?
◻ Eme họ igogo eme jọ evaọ olẹ oriruo na?
◻ Ẹvẹ ma sai ro ru lele elẹ mai?
[Picture on page 10]
Wọhọ Jehoshafat ovie na, ẹsejọ u re fo re ma lẹ nọ: ‘Ma riẹ onọ ma re ru hu, rekọ ma rọ ẹro kpahe owhẹ, Jihova’
[Picture on page 11]
Kọ whọ be lẹ rọwo kugbe olẹ oriruo Jesu?