Oriruo kẹ Ekohrẹ Ileleikristi

“FIKIEME whọ jẹ rọ ofu emuo avọ ovao usihọ?” Ẹkwoma onọ onana, Jihova ọ tẹ rehọ ẹwo jiroro kugbe Keni. Orọnikọ ọ gba Keni họ re o nwene he, keme Keni yọ omama nọ o rẹ sai ru onọ u je rie. (Wawo Iziewariẹ 30:19.) Ghele na, Jihova ọ raha oke he re ọ tẹ fodẹ oware nọ u ti no edhere ọthọthọ Keni ze. Ọ vẹvẹ Keni unu nọ: “Nọ whọ gbẹ riẹ ru ha na, umuomu o kpahe ẹta be hẹrẹ owhẹ eva unu-ẹthẹ, o be gwọlọ owhẹ.”—Emuhọ 4:6, 7.

O rọ oware nọ a re muẹrohọ inọ ghelọ ọwhọkuo ọgaga ọnana, Jihova o ru Keni wọhọ ‘ohwo nọ ọ ruọ ẹwọ no ho.’ Ukpoye, ọ ta kẹ Keni kpahe eghale nọ e rọ obaro riẹ otẹrọnọ o nwene idhere riẹ, yọ o dhesẹ imuẹro nnọ Keni ọ sai fi ẹbẹbẹ ọnana kparobọ ọ tẹ gwọlọ ru ere. Jihova ọ ta nọ: “Orọnikọ whọ riẹ ru-oyo, a gbe he mi akpẹwẹ ra?” Ọ tẹ jẹ nọ Keni kpahe ofu ojihẹ riẹ nọ: ‘Rekọ whọ gbẹ daoma re whọ va ae abọ?’

Nẹnẹ, ekpako ukoko Ileleikristi a rẹ raro kele oriruo Jihova. Wọhọ epanọ ma muẹrohọ eva 2 Timoti 4:2, ẹsejọ a rẹ “whọku,” dhesẹ oware nọ u re no edhere ọthọthọ ze vevẹ kẹ ọnọ ọ nya thọ na. Eva okiovo na, u fo nọ ekpako e rẹ ‘sasa oma.’ Ubiẹme Griki na pa·ra·ka·leʹo u dhesẹ re a “tuduhọ awọ.” “Uthubro na orọnikọ ẹme ọdada, evega, onọ a rẹ rọ fa ohwo ovao ho,” ere Theological Dictionary of the New Testament o muẹrohọ. “Omosasọ o sae jẹ jọ edhere ọfa nọ a rẹ rọ fa ẹme na.”

Avọ isiuru, ẹme Griki ọfa, pa·raʹkle·tos, o rẹ sai dhesẹ ofiobọhọ hayo ohwo nọ o re dikihẹ kẹ omọfa evaọ ẹdhoguo. Fikiere, makọ okenọ ekpako a tẹ kẹ ọwhọkuo ovevẹ, a rẹ kareghẹhọ nọ ifiobọhọ a rọ—orọnikọ ewegrẹ hẹ—rọkẹ ohwo nọ ọ gwọlọ ohrẹ na. Wọhọ Jihova, ekpako na a re rẹro ewoma, dhesẹ evaifihọ nnọ ohwo nọ a be hrẹ na o ti no ẹbẹbẹ na.—Wawo Ahwo Galesha 6:1.

Rekọ, evaọ ukuhọ riẹ, o rọ obọ ohwo na re o fi ohrẹ na h’iruo. (Ahwo Galesha 6:5; Ahwo Filipai 2:12) Ekohrẹ a sae ruẹ nọ ahwo jọ a re yo unuovẹvẹ rai hi, wọhọ epanọ Keni ọ se ọwhọkuo Ọnọma na omariẹ. Ghele na, okenọ ekpako a tẹ raro kele Jihova, Oriwiruo ọgbagba kẹ ekohrẹ Ileleikristi, u re mu ai ẹro nọ a ru ẹkabọ rai no.