Irere Nọ I Re No Eyou Ẹme Ọghẹnẹ Ze
“[You areghẹ], ọ vẹ te rọ ẹro te owhẹ. . . . Ọ te kẹ owhẹ adhẹ otẹrọnọ whọ gbalọ eriẹ.”—ITẸ 4:6, 8.
1. Eme Ẹme Ọghẹnẹ nọ a re ghine you o gwọlọ?
ISASE Ebaibol na u wuzou kẹ Oleleikristi. Rekọ, ese riẹ ọvo o re dhesẹ uyoyou kẹ Ẹme Ọghẹnẹ hẹ. Kọ ẹvẹ otẹrọnọ ohwo jọ o bi se Ebaibol na rekọ o bi ru eware nọ Ebaibol na ọ ghọ? U re vevẹ, o you Ẹme Ọghẹnẹ hẹ evaọ edhere nọ okere ọ Olezi avọ 119 na o you rie. Eyou Ẹme Ọghẹnẹ o wọ riẹ re ọ rria lele ẹgwọlọ riẹ.—Olezi 119:97, 101, 105.
2. Didi irere i re no areghẹ nọ a wo no Ẹme Ọghẹnẹ ze?
2 Ẹrria lele Ẹme Ọghẹnẹ o gwọlọ enwene ẹsikpobi evaọ iroro gbe edhere ẹrria uzuazọ ohwo. Uzuazọ utioye na u re dhesẹ areghẹ Ọghẹnẹ, onọ u dhesẹ efihiruo eriariẹ gbe otoriẹ nọ a wo no ewuhrẹ Ebaibol na ze. “[You areghẹ], ọ vẹ te rọ ẹro te owhẹ. Ri ye ghaghae, o ve ti ru owhẹ kpehru; ọ te kẹ owhẹ adhẹ otẹrọnọ whọ gbalọ eriẹ. Ọ te rehọ etu owoma tuwu uzou ra, ọ vẹ te rehọ emamọ etu uvie tuwu owhẹ.” (Itẹ 4:6, 8, 9) Ẹvẹ onana o rọ emamọ uduotahawọ te re ma wo uyoyou kẹ Ẹme Ọghẹnẹ re o jẹ kpọ omai! Ono ọ gwọlọ nọ a thọe, kpare iẹe kpehru, jẹ kẹe orro ho?
Uketha no Enwoma Okrẹkri
3. Vi epaọ anwẹdẹ, fikieme Ileleikristi a jẹ gwọlọ uketha, kọ no obọ ono?
3 Ẹvẹ ohwo o re ro wo uketha ẹkwoma areghẹ nọ a re wo no ewuhrẹ gbe efihiruo Ẹme Ọghẹnẹ ze? Orọ ọsosuọ, a rẹ thọe no obọ Setan Ẹdhọ na. Jesu o wuhrẹ ilele riẹ re a lẹ kẹ ẹthọ no obọ oyoma na, Setan. (Matiu 6:13) Nẹnẹ, ẹgwọlọ nọ ma re ro fi ayare nana ba elẹ mai o ghinẹ rọ kpata kpata. A gbolo Setan gbe idhivẹri riẹ no odhiwu ze nọ 1914 o vrẹ no, fikiere Setan o wo “ofu ọgaga . . . keme ọ riẹ nọ oke riẹ o re kpẹkpẹre.” (Eviavia 12:9, 10, 12) Evaọ oke urere nana, eva e dha riẹ t’uke no nọ ọ be daoma bẹ re o fiẹmo kugbe “enọ i [bi] koko izi Ọghẹnẹ, enọ i se isẹi kẹ Jesu.”—Eviavia 12:17.
4. Ẹvẹ a be rọ thọ Ileleikristi no otunyẹ gbe egbefẹ Setan?
4 Setan evaọ evedha riẹ ọ be wha ẹbẹbẹ se egbodibo Ileleikristi enana jẹ be wha ukpokpoma ogaga se ai hayo fi ezadhe efa họ iruẹru rai. Ọ be jẹ gwọlọ bẹbẹ iwhowho Uvie họ re a rẹriẹ ovao ku eware wọhọ omorro akpọ, uyoyou akpọriọ, ewo ekwakwa efe, gbe ilale isiuru, viukpọ iruo usiuwoma ota Uvie na. Eme ọ rẹ thọ idibo ẹrọwọ Ọghẹnẹ no ekie kẹ otunyẹ Setan hayo ekie ro ẹta riẹ? Ẹhẹ, olẹ, usu okpekpe kugbe Jihova, gbe ẹrọwọ fihọ imuẹro eyaa riẹ e r’oja. Rekọ enana kpobi i w’obọ kugbe eriariẹ gbe ọtamuo nọ a re ro yo ekareghẹhọ Ẹme Ọghẹnẹ. Ekareghẹhọ nana i re no isase Ebaibol gbe ebe nọ a kere no Ebaibol ze, ekpohọ iwuhrẹ Ileleikristi, eyo ohrẹ Ikereakere no obọ ibe enọ e rọwo ze, hayo ẹkwoma oma olẹ nọ a re ro roro kpahe ehri-izi Ebaibol nọ ẹzi Ọghẹnẹ o re si ziọ iroro na.—Aizaya 30:21; Jọn 14:26; 1 Jọn 2:15-17.
5. Idhere vẹ areghẹ nọ o no Ẹme Ọghẹnẹ ze ọ be rọ thọ omai?
5 Ahwo nọ a you Ẹme Ọghẹnẹ a bi je wo ọthọwẹ evaọ idhere efa. Wọhọ oriruo, a rẹ whaha uye iroro gbe eyao nọ i re no eware wọhọ ogbẹlọ imu, ese itaba, gbe ọfariẹ-ogbe ze. (1 Ahwo Kọrint 5:11; 2 Ahwo Kọrint 7:1) A rẹ rọ iguẹgu hayo eme iyoma raha usu hu. (Ahwo Ẹfẹsọs 4:31) Hayo kie ro avro ho ẹkwoma ewuhrẹ ereghẹ-ididi eviẹhọ ọrọ ereghẹ akpọ na. (1 Ahwo Kọrint 3:19) Ẹkwoma eyou Ẹme Ọghẹnẹ, a rẹ thọ ae no eware nọ e rẹ sae raha usu rai kugbe Ọghẹnẹ gbe ẹruore uzuazọ ebẹdẹ bẹdẹ. A re ruiruo gaga re a fiobọhọ kẹ erivẹ rai fi ẹrọwọ họ eyaa igbunu nọ e rọ Ebaibol na, keme a riẹ nọ a rẹ rọ enẹ ‘siwi oma rai gbe enọ e be kezọ kẹ ae.’—1 Timoti 4:16.
6. Ẹvẹ areghẹ nọ o no Ẹme Ọghẹnẹ ze ọ rẹ rọ thọ omai makọ evaọ otọ iyero ebẹbẹ?
6 Uzẹme, ohwo kpobi—makọ enọ i you Ẹme Ọghẹnẹ—ọ rọ otọ ‘oke gbe eware idudhe.’ (Ọtausiuwoma Na 9:11) O rọ ọgbahọ inọ otu mai jọ i ti kie ruọ okpẹtu, ẹyao ọgaga, asidẹte, hayo uwhu idudhe. Ghele na, a be thọ omai. Uvumọ okpẹtu ọ sae wha enwoma ebẹdẹ bẹdẹ se ohwo nọ o ghine you Ẹme Ọghẹnẹ hẹ. Fikiere, ma rẹ ruawa hrọ họ kpahe oware nọ o sae via evaọ obaro. Ma tẹ dawo uthoma mai no, o rẹ mai woma re ma nyasiọ ẹme na ba Jihova obọ orọnikọ ma rẹ kẹ idabolo uzuazọ inẹnẹ na uvẹ re i mi omai udhedhẹ hẹ. (Matiu 6:33, 34; Ahwo Filipai 4:6, 7) Kareghẹhọ imuẹro ẹruore ẹkparomatha na gbe orọ uzuazọ uwowoma na evaọ okenọ Ọghẹnẹ ‘o te ru eware kpobi fihọ ekpokpọ no.’—Eviavia 21:5; Jọn 11:25.
Dhesẹ Oma Ra Wọhọ “Emamọ Ẹkpẹ”
7. Didi ọtadhesẹ Jesu ọ kẹ ogbotu nọ e nyaze ti yo eme riẹ?
7 Epanọ u wuzou te re a wo emamọ eriwo Ẹme Ọghẹnẹ u dhesẹ oma via evaọ ọtadhesẹ Jesu jọ. Nọ Jesu o bi whowho emamọ usi na nya Palẹstain kpobi wariẹ na, ogbotu o te si koko re a yo eme riẹ. (Luk 8:1, 4) Rekọ orọnikọ aikpobi a you Ẹme Ọghẹnẹ hẹ. Ababọ avro, ibuobu e nyaze ti yo eme riẹ keme a gwọlọ ruẹ eware igbunu riẹ hayo fikinọ edhere igbunu nọ o bi ro wuhrẹ o be were ae oma. Fikiere, Jesu ọ tẹ kẹ ogbotu na ọtadhesẹ jọ: “Ọkibi ọ tẹ nya re ọye kọ; nọ ọ jẹ kọ, e jọ i te kie akotọ edhere, a tẹ rọ evawọ thihi ai, emevra ehru e tẹ re ae. E jọ i te kie ehru utho, nọ o ro, o tẹ nwane ya, fiki epanọ u wo ame he. E jọ i te kie udevie inwe; inwe avọ iẹ e tẹ ro, i te duyei. Edekọ i te kie emamọ ẹkpẹ, e tẹ ro, e tẹ mọ ibi udhusoi.”—Luk 8:5-8.
8. Evaọ ọtadhesẹ Jesu, eme họ ubi na?
8 Ohrẹ Jesu na u dhesẹ nọ ahwo a te kuyo oghẹrẹ sa-sa rọ kẹ ewhowho emamọ usi na, wọhọ epanọ uyero udu ọnọ o bi yo ẹme na o rọ. Ubi nọ a be kọ na họ “ẹme Ọghẹnẹ.” (Luk 8:11) Hayo, wọhọ epanọ ekere ọfa ohare na o ta, ubi na họ “ẹme uvie na.” (Matiu 13:19) Jesu ọ rẹ sae ta eme ivẹ na, keme uzoẹme Ẹme Ọghẹnẹ họ Uvie obọ odhiwu evaọ otọ Jesu Kristi wọhọ Ovie ẹkwoma onọ Jihova ọ te rọ kpare esuo-okpehru riẹ kpehru je ru odẹ riẹ fo na. (Matiu 6:9, 10) Koyehọ, ubi na họ ovuẹ usiuwoma Ẹme Ọghẹnẹ, Ebaibol na. Isẹri Jihova a bi fiẹgbahọ ovuẹ Uvie na nọ a be kọ ubi evaọ aruorokele Ọkibi ọsosuọ na, Jesu Kristi. Didi uyo a be ruẹ?
9. Eme a rehọ ubi nọ u kie fihọ (a) akotọ edhere (b) ehru itho (c) otọ inwe, na dhesẹ?
9 Jesu ọ ta nọ ibi jọ i kie fihọ akotọ edhere, a te thihi ai. Onana u bi dhesẹ ahwo nọ iruo i bu obọ hrọ te epanọ ubi Uvie na o be sae rọ ta owọ evaọ idu rai hi. Taure a te ti wo uyoyou kẹ Ẹme Ọghẹnẹ, “ukumuomu na ọ tẹ nyaze, ọ tẹ rehọ eme na no eva rai, re a [seba ẹrọwo jẹ] se ai ba esiwo.” (Luk 8:12) Ibi jọ i kie fihọ ehru itho. Onana u dhesẹ ahwo nọ ovuẹ Ebaibol na u si urru rekọ a kẹ riẹ uvẹ re u kpomahọ idu rai hi. Okenọ ukpokpoma o nyaze hayo okenọ a ruẹ nọ o re bẹbẹ re a koko ohrẹ Ebiabol, a “te kie” keme a wo owọ họ. (Luk 8:13) Ma te je wo enọ i yo ẹme na rekọ nọ “iroro efe gbe awere e rọ eyero ọnana” e da oma fia. Uwhremu na, wọhọ ekakọ nọ inwe i thuru wariẹ, “i te duwu ai.”—Luk 8:14.
10, 11. (a) Amono a rehọ emamọ otọ na dhesẹ? (b) Eme ma re ru hrọ re ma “kru” Ẹme Ọghẹnẹ evaọ idu mai?
10 Orọ urere họ ibi nọ i kie fihọ emamọ otọ. Onana u te dhesẹ ahwo nọ a yo ovuẹ na avọ “eva oruọzewọ gbe ewoma.” Ohwo kpobi ọ rẹ gwọlọ nọ otọ onana o re kie fihọ. Rekọ, evaọ ekuhọ riẹ, eriwo Ọghẹnẹ họ onọ u muẹme. (Itẹ 17:3; 1 Ahwo Kọrint 4:4, 5) Ẹme riẹ ọ ta nọ ewo “eva oruọzewọ gbe ewoma” yọ oware nọ ma rẹ rọ owojẹ mai dhesẹ no umuo enẹna rite ẹdẹ uwhu mai hayo bọwo okenọ Ọghẹnẹ ọ rẹ rehọ uyerakpọ oyoma nana t’oba. Otẹrọnọ ma kake j’owọ kẹ ovuẹ Uvie na, u woma. Rekọ enọ i wo udu oruọzewọ avọ ewoma a rẹ jẹ Ẹme Ọghẹnẹ rehọ je “kru ei whawha, a [vẹ] rehọ odiri mọ ibi.”—Luk 8:15.
11 Edhere ọvuọvo nọ ma rẹ rọ yọrọ Ẹme Ọghẹnẹ evaọ udu mai họ ma re sei je wuhrẹ iẹe kẹ omobọ mai je kugbe ibe enọ e rọwo. Onana u kugbe efihiruo vọvọ emu abọ-ẹzi nọ a be rọ k’omai ẹkwoma edhere nọ a fihọ re o rẹro te isiuru abọ-ẹzi ilele uzẹme Jesu na. (Matiu 24:45-47) Ẹkwoma ere oruo, uyoyou o rẹ wọ enọ e be yọrọ Ẹme Ọghẹnẹ evaọ idu rai re a “rehọ odiri mọ ibi.”
12. Eme họ ubi nọ ma rẹ mọ avọ ithihakọ?
12 Didi ibi emamọ otọ na o mọ? N’otọ ze, ibi e rẹ rro te ekakọ nọ e rẹ mọ ibi-ure nọ i wo oghẹrẹ ubi ovo na, enọ a rẹ sae kọ re e mọ ibi efa. Epọvo na, rọ kẹ enọ i wo emamọ udu oruọzewọ, ubi ẹme na o rẹ jọ eva rai rro, u ve ru ai wo ẹnyaharo evaọ abọ-ẹzi bẹsenọ a rẹ rọ kọ ibi na fihọ idu amọfa re. (Matiu 28:19, 20) Yọ iruo ekakọ rai u wo obọ kugbe ithihakọ. Jesu o dhesẹ epanọ ithihakọ u wuzou te evaọ ekakọ nọ ọ ta nọ: “Rekọ ọnọ o kiakọ te urere ọye a re ti siwẹ. A rẹ te vuẹ ovuẹ usiuwoma uvie na kẹ akpọ na kpobi, re o jọ isẹi kẹ erẹwho akpọ na kpobi; kẹsena urere u te zi te.”—Matiu 24:13, 14.
“[Ẹmọ] Ibi Evaọ Iruo Iwoma Kpobi”
13. Didi olẹ Pọl ọ lẹ nọ o jẹ ẹmọ-ubi họ eriariẹ Ẹme Ọghẹnẹ?
13 Pọl ukọ na ọ ta kpahe ẹgwọlọ ẹmọ ibi re, ọ tẹ rọ ẹmọ ibi jẹhọ Ẹme Ọghẹnẹ. Ọ lẹ nnọ ibe ẹrọwọ riẹ a “vọ avọ ẹriẹ oreva [Ọghẹnẹ] evaọ areghẹ ẹzi gbe otọ-oriẹ, re wha yeri uzuazọ nọ u fo rọ kẹ Ọnowo na, onọ o rẹ weriẹe, re wha mọ ibi evaọ iruo iwoma kpobi.”—Ahwo Kọlọsi 1:9, 10; Ahwo Filipai 1:9-11.
14-16. Rọwo kugbe olẹ Pọl, didi ubi enọ i you Ẹme Ọghẹnẹ a rẹ mọ?
14 Fikiere Pọl o dhesẹ nọ ewo eriariẹ Ebaibol họ ekuhọ edhere na ha. Ukpoye, uyoyou kẹ Ẹme Ọghẹnẹ o rẹ wọ omai “yeri uzuazọ nọ u fo kẹ Ọnowo na” ẹkwoma oma nọ ma re kruga “mọ ibi evaọ iruo iwoma kpobi.” Didi iruo iwoma? Ewhowho emamọ usi Uvie na yọ obọdẹ iruo kẹ Ileleikristi evaọ edẹ urere nana. (Mak 13:10) Fibae, enọ i you Ẹme Ọghẹnẹ a rẹ dao utho oma rai re a rọ ugho fiobọhọ kẹ iruo nana. Uvẹ-ọghọ nana o be were ae oma, keme a riẹ nọ “Ọghẹnẹ o re you ohwo nọ ọ rẹ kẹ okẹ-evawere.” (2 Ahwo Kọrint 9:7) A be raha unevaze rai fihọ iruo nọ a bi ru evaọ iwou Ebẹtẹle nọ i bu vi udhusoi nọ a be jọ kpọ iruo ewhowho Uvie na gbe ejọ nọ a bi jo kporo Ebaibol gbe ebe nọ a kere no Ebaibol ze na. Unevaze rai o be jẹ rẹrote araha ikokohọ Ileleikristi ilogbo gbe evi esẹro ọnyawariẹ, imishọnare, gbe iwhowho-uvie oke-kpobi efa.
15 Iruo iwoma efa i kugbe ẹbọ gbe ẹruorote eria egagọ uzẹme. Uyoyou kẹ Ẹme Ọghẹnẹ o rẹ wọ egegagọ riẹ re a ruẹ nọ a gbabọkẹ Egwa Okokohọ gbe Egwa Uvie he. (Wawo Nehemaya 10:39.) Nọ odẹ Ọghẹnẹ o roma via evaọ aro iwou itieye na, u wuzou re a ru t’obọ eva gbe otafe rai fuafo je siuru gbe nnọ uruemu enọ e be jọ eva egwa itieye na gọ e kare afuẹwẹ. (2 Ahwo Kọrint 6:3) Ileleikristi jọ e rẹ sai ru viere. Uyoyou kẹ Ẹme Ọghẹnẹ o rẹ wọ ae kp’erẹ ugbothabọ re a w’abọ evaọ ebabọ eria egagọ ekpokpọ evaọ abọ otọakpọ na nọ ẹgwọlọ ọ rọ fiki uvuhu hayo ababọ ona.—2 Ahwo Kọrint 8:14.
16 “[Ẹmọ] ibi evaọ iruo iwoma kpobi” u te je kugbe ẹruorote ewha-iruo uviuwou gbe edhesẹ ọdawẹ rọkẹ ibe Ileleikristi. Uyoyou kẹ Ẹme Ọghẹnẹ o rẹ w’omai kpakpa oma kpahe ẹgwọlọ “otu nọ ọrọ ẹgba orọwọ na” je ‘wuhrẹ iruo egagọ mai nọ i te omai erukẹ uviuwou mai.’ (Ahwo Galesha 6:10; 1 Timoti 5:4, 8) Evaọ abọ nana, o rọ emamọ iruo re ma weze bru enọ e be mọ jẹ sa-sa enọ e rọ uweri oma. Yọ dai roro iruo ezi nọ ekpako ukoko gbe Ogbẹgwae Uruẹme Kugbe Iwou-imu evaọ obufihọ kẹ ahwo nọ e rẹriẹ ovao ku ẹbẹbẹ imu a bi ru! (Iruẹru 15:29) Eware okpẹtu e be jẹ via gaga—ejọ rai i mu via efa ugheghẹ ahwo o be wha ai ze. Avọ obufihọ ẹzi Ọghẹnẹ, Isẹri Jihova a wo emamọ odẹ no evaọ abọ akpọ na buobu ọrọ ogbo inievo rai gbe erọ amọfa nọ a rẹ dhẹ evaọ oke okpẹtu gbe asidẹte. Enana kpobi yọ ibi iwoma nọ enọ i you Ẹme Ọghẹnẹ a bi dhesẹ.
Irere Eruaro Obaro
17, 18. (a) Eme ẹkọ ubi Uvie na u bi rugba? (b) Didi eware nọ i ti nuhu akpọ enọ i you Ẹme Ọghẹnẹ a te ruẹ kẹle?
17 Ẹkọ ibi Uvie o gbẹ be wha irere ilogbo se ahwo-akpọ. Evaọ ikpe jọ kẹle na, bu vi ahwo 300,000 e be kẹ ovuẹ Ebaibol na uvẹ re u w’owọ evaọ idu rai te epanọ a rọ rehọ izuazọ rai mudhe kẹ Jihova jẹ rehọ ame-ọhọ dhesẹ iẹe via. Ẹvẹ obaro nọ o be hẹrẹ ae u wo oruaro te!
18 Kẹle na, enọ i you Ẹme Ọghẹnẹ a riẹ nọ Jihova Ọghẹnẹ o ti tovrẹ ru odẹ riẹ fo. A te raha “Babilọn ologbo,” isuẹsu egagọ ọrue akpọ na no. (Eviavia 18:2, 8) A ve ti kpe enọ e se nọ a rẹ rria lele Ẹme Ọghẹnẹ na no ẹkwoma Ovie na, Jesu Kristi. (Olezi 2:9-11; Daniẹl 2:44) Kẹsena, Uvie Ọghẹnẹ o vẹ te rehọ ifue ebẹdẹ no ethube, ẹmo, gbe okpẹtu efa ze. Ẹgwọlọ ọ gbẹ te jariẹ hẹ re a sasa ahwo oma fiki edada, ẹyao, gbe uwhu.—Eviavia 21:3, 4.
19, 20. Didi obaro oruaro o be hẹrẹ enọ i ghine you Ẹme Ọghẹnẹ?
19 Emamọ iruo oruaro nọ enọ i you Ẹme Ọghẹnẹ a ti ru gba e te rro kẹhẹ! Enọ e zọ vrẹ Amagẹdọn a te rọ iruo oghọghọ nọ a ti ro nwene otọakpọ na fihọ aparadase muhọ. A ti wo uvẹ-ọghọ isiuru ọrọ ẹruẹrẹhọ ẹgwọlọ enọ i whu no nọ i bi serihọ evaọ uki jẹ rrọ ekareghẹhọ Ọghẹnẹ avọ irẹro ẹkparomatha no uwhu ze. (Jọn 5:28, 29) Eva oke oyena, ọkpọvio ọgbagba o ti no obọ Olori Osu na, Jihova, te enọ e be rria otọakpọ, ẹkwoma Ọmọ riẹ nọ a kpare kpehru no na, Jesu Kristi. ‘A ti rovie iko-ebe,’ nọ i ti dhesẹ ithubro Jihova kẹ ẹrria akpọ ọkpokpọ na.—Eviavia 20:12.
20 Evaọ ẹruoke Jihova, Ileleikristi ẹrọwọ kpobi nọ a wholo na e rẹ te kparoma kpohọ osohwa obọ odhiwu rai wọhọ “ereuku kugbe Kristi.” (Ahwo Rom 8:17) Evaọ etoke Esuo Odu-Ikpe Kristi na, a te kpare ahwo-akpọ kpobi nọ i you Ẹme Ọghẹnẹ kpohọ ẹgbagba iroro gbe ugboma. Nọ a te dhesẹ ẹrọwọ evaọ otọ ẹdawọ urere na no, a te rehọ uzuazọ ebẹdẹ bẹdẹ hwae osa a vẹ te reawere “uvẹ oruaro emọ Ọghẹnẹ.” (Ahwo Rom 8:21; Eviavia 20:1-3, 7-10) Ẹvẹ oke oyena u ti gbunu te! Evaọ uzẹme, makọ Jihova ọ k’omai ẹruore odhiwu hayo ọrọ otọakpọ, uyoyou ithihakọ kẹ Ẹme riẹ gbe ọtamuo re ma rria lele areghẹ Ọghẹnẹ o te th’omai. Yọ evaọ obaro ‘o te kẹ omai adhẹẹ keme ma gbalọ e riẹ.’—Itẹ 4:6, 8.
Kọ Whọ Sae k’Iyo Nana Vevẹ?
◻ Ẹvẹ uyoyou kẹ Ẹme Ọghẹnẹ o rẹ rọ thọ omai?
◻ Eme họ ubi ọtadhesẹ Jesu na, kọ ẹvẹ a be rọ kọe?
◻ Ẹvẹ ma re ro dhesẹ nọ mai yọ “emamọ ẹkpẹ”?
◻ Didi irere enọ i you Ẹme Ọghẹnẹ a re rẹro rai?
[Picture on page 28]
Ubi ọtadhesẹ Jesu na u dhesẹ ovuẹ emamọ usi nọ o rọ Ẹme Ọghẹnẹ na
[Credit Line]
Garo Nalbandian
[Picture on page 29]
Isẹri Jihova a be raro kele Ọkibi Ologbo na
[Pictures on page 30]
Enọ e zọ vrẹ Amagẹdọn a te reawere ibi otọakpọ na