Oma Ọsese, Ibiudu Aruọwha

ẸVẸ o rẹ jọ re whọ t’ẹme kpahọ Uvie Ọghẹnẹ rọkẹ erara otẹrọnọ who theri te centimeter 76 ọvo? Laura ọ sae vuẹ owhẹ. Ọ kpako te ikpe 33 no, yọ oyena họ uthethei riẹ, centimeter 76 ọvo. Tei te oniọvo riẹ, María, ọnọ ọ rọ ikpe 24 je theri te centimeter 86, a be rria ẹwho nọ a re se Quito, evaọ Ecuador. Jọ a gbiku ezadhe nọ a be nyaku evaọ odibọgba Ileleikristi rai na.

“Re ma kpohọ usiuwoma ota gbe iwuhrẹ Ileleikristi mai, ma rẹ nya ole ubro ikilomita re ma tẹ ruọ omoto. Omoto na o te fi omai h’otọ no, ma vẹ jẹ nya ubro ikilomita ọfa re ma tẹ ruọ omoto ọfa. Tube yoma na, erakọ isoi nọ e geva gaga e rọ edhere nana. Erakọ i re mu omai ozọ gaga keme e rẹ wọhọ enyenya ilogbo k’omai. Re ma sai le ai no nọ u te fo, ma rẹ wha ọkpọ lele oma, onọ ma re sino họ oria jọ taure ma tẹ te ruọ omoto re o sae jariẹ okenọ ma tẹ be nya zihe kpo.

“Re ma sae ruọ omoto na yọ ẹbẹbẹ kẹ omai. Ma re dikihẹ ehru ugbehru jọ eva oria nọ a rẹ jọ ruọ omoto na re ma sae ruọ omoto na lọlọhọ. Edraiva jọ a rẹ dhẹ kẹle ugbehru na, rekọ efa a re ru ere he. Okioye na, ọnọ o dina theri evaọ usu mai na o ve fiobọhọ kẹ ọnọ ọ mae kpẹre na rueva. Re ma sae ruọ omoto avivẹ na o rẹ gwọlọ re ma fa edhere-ologbo nọ o bi zurie vrẹ—ẹbẹbẹ ologbo fiki awọ ekpẹkpẹe mai. Fiki oma ọsese mai, ẹkpa ebe ọgbẹgbẹdẹ yọ use-abọ ọfa. Re ma ru ẹkpa na vori, Ebaibol ọsese gbe umutho ebe ọvo ma rẹ wha.

“No oke emaha ze, ma re kuomagbe ahwo ho. Erivẹ mai a riẹ nọ ẹmeọta kugbe erara yọ oware igwegwe k’omai. Fikiere u re gbe ae unu jẹ were ae eva nọ a tẹ ruẹ omai nọ ma bi kporo ẹthẹ rai, yọ a rẹ gaviezọ ziezi. Rekọ oria nọ a jọ riẹ omai ziezi hi ahwo a re rri omai ẹsibuobu wọhọ emaha; fikiere, ẹsibuobu a re se ovuẹ mai na gboja wọhọ epanọ u fo ho. Ghele na, ovuhumuo uyoyou Jihova o rẹ kẹ omai udu aruọwha nọ ma rẹ rọ nyaharo evaọ iruo usiuwoma ota na. Eroro kpahe Itẹ 3:5, 6 o rẹ kẹ omai udu aruọwha re.”

Wọhọ epanọ Laura gbe María a dhesẹ na, akothiwo ghelọ ẹwhaha ugboma o rẹ kẹ Ọghẹnẹ orro. Pọl ukọ na ọ lẹ nọ a si “edada eva oma” riẹ, ẹsejọhọ uye ugboma, na no kẹe. Rekọ Ọghẹnẹ ọ tẹ ta kẹe nọ: “Aruoriwo mẹ o te kẹ owhẹ, keme eva okuako ogaga mẹ o jẹ gbunu.” Ẹhẹ, o gwọlọ esino edada ugboma mai re ma tẹ gọ Ọghẹnẹ hẹ. Ẹrorọsuọ Ọghẹnẹ riẹriẹriẹ o rẹ sai fiobọhọ k’omai ru utho ẹgba ma kpobi. Fikinọ Pọl o riwi “edada eva oma” riẹ evaọ edhere ọnana, ọ tẹ sae ta nọ: “Nọ omẹ rẹ kuako, kpakiyọ ẹsiẹe mẹ gae.” (2 Ahwo Kọrint 12:7, 9, 10) Ikpe jọ evaọ uwhremu na Pọl o te kere nọ: “Mẹ rẹ sai ru eware kpobi eva ọnọ ọbe kẹ omẹ eri.”—Ahwo Filipai 4:13.

Evaọ oke onana, Ọghẹnẹ o bi ru iruo ilogbo ẹkwoma ezae, eyae, gbe emọ nọ e rọ omarai mudhe vọvọ rọ kẹe. Ibuobu rai a wo edada ugboma evaọ edhere jọ. Dede nọ aikpobi a bi rẹro usiwo evaọ otọ Uvie Ọghẹnẹ, a be hẹrẹ re Ọghẹnẹ o si ebẹbẹ rai no re a te ti ru iruo evaọ egagọ riẹ hẹ.

Kọ whọ be ruẹ-uye oyẹlẹ ugboma jọ? Kru udu ga! Ẹkwoma ẹrọwọ ra whọ sae jọ usu ahwo wọhọ Pọl, Laura, gbe María. A sae ta kpahọ ae, wọhọ ezae gbe eyae ẹrọwọ oke anwae nọ: “A . . . rẹriẹ oyẹlẹ rai ruọ ogaga.”—Ahwo Hibru 11:34.

[Uwoho nọ o rrọ ẹwẹ-obe avọ 30]

María

Laura

[Uwoho nọ o rrọ ẹwẹ-obe avọ 31]

María o bi fiobọhọ kẹ Laura ruọ omoto

[Iwoho nọ e rrọ ẹwẹ-obe avọ 31]

“Erakọ i re mu omai ozọ gaga keme e rẹ wọhọ enyenya ilogbo k’omai”

Evaọ obotọ: Laura avọ María gbe enọ i wuhrẹ Ebaibol kugbe ae