Enọ E Be Họre Ọghẹnẹ A Te Kparobọ Họ!

“A reti lele owhẹ họre; rekọ a rẹte kpare-obọ vi owhẹ hẹ.”—JERIMAYA 1:19.

1. Didi uwou a vi Jerimaya, kọ ẹvẹ iruo riẹ i kri te?

JIHOVA o vi Jerimaya ọmoha na uwou re ọ jọ ọruẹaro kẹ erẹwho na. (Jerimaya 1:5) Onana o jọ etoke esuo Josaya Ovie owoma Juda na. Odibọgba eruẹaruẹ Jerimaya o lehie te etoke okpokpoho na taure Babilọn o te ti fi Jerusalẹm kparobọ jẹ rehọ ahwo Ọghẹnẹ kpohọ igbo.—Jerimaya 1:1-3.

2. Ẹvẹ Jihova ọ rọ kẹ Jerimaya ẹgba, yọ re a họre ọruẹaro ọyena u dhesẹ eme?

² Evuẹ ẹdhoguo nọ Jerimaya o bi ti whowho na e te wha ọkparesuọ ze. Fikiere, Ọghẹnẹ ọ tẹ kẹ e ẹgba rọkẹ oware nọ o rọ obaro na. (Jerimaya 1:8-10) Wọhọ oriruo, eme enana e kẹ ọruẹaro na udu whawha: “A reti lele owhẹ họre; rekọ a rẹte kpare-obọ vi owhẹ hẹ, keme mẹ avọ owhẹ a gbẹrọ, mẹ rẹ te thọ owhẹ, ere ỌNOWO na ọ tae.” (Jerimaya 1:19) Re a họre Jerimaya u dhesẹ nọ a be họre Ọghẹnẹ. Nẹnẹ na, Jihova o wo ẹko idibo riẹ nọ iruo rai i tho erọ Jerimaya. Wọhọ e riẹ, a be rọ aruọwha whowho ẹme eruẹaruẹ Ọghẹnẹ. Yọ ovuẹ nana u bi kpomahọ ahwo gbe erẹwho kpobi rọkẹ ewoma hayo rọkẹ eyoma, wọhọ epaọ oghẹrẹ owọ nọ a jẹ. Wọhọ epanọ o jọ evaọ oke Jerimaya, ahwo jọ a riẹ nọ a be họre Ọghẹnẹ ẹkwoma ẹwọso idibo riẹ gbe iruo nọ Ọghẹnẹ ọ kẹ rae na.

A be Họre Idibo Jihova

3. Fikieme a be rọ họre idibo Jihova?

³ No emuhọ ikpe-udhusoi avọ 20 na ze ahwo a be rọ họre ahwo Jihova. Evaọ ekwotọ buobu, ahwo eva iyoma a daoma no re a whaha—ẹhẹ, furie—ewhowho emamọ usi Uvie Ọghẹnẹ na. Ohwo nọ o bi gele ai uzou haro họ Ọwegrẹ ologbo mai na, Ẹdhọ, ọnọ ọ be nya wọhọ “okpohrokpo nọ obi do enu, be guọlọ ọjọ nọ ọ rẹ ria.” (1 Pita 5:8) Nọ “oke ahwo Egedhọ na” u kuhọ no evaọ 1914, Ọghẹnẹ ọ tẹ rehọ Ọmọ riẹ mu wọhọ Ovie ọkpokpọ otọakpọ, avọ ujaje re ‘o su eva udevie ewegrẹ riẹ.’ (Luk 21:24; Olezi 110:2) Bi dhesẹ ogaga riẹ, Kristi o te gbolo Setan no idhiwu ziọ okegbe otọakpọ na. Nọ ọ riẹ nọ oke riẹ o re kpẹkpẹe na, Ẹdhọ o te ku ofu riẹ ku Ileleikristi nọ a wholo na gbe egbẹnyusu rai. (Eviavia 12:9, 17) Eme ọwọsuọ enọ e be họre Ọghẹnẹ o wha ze no?

4. Didi edawọ ahwo Jihova a nyaku evaọ etoke Ẹmo Akpọ I, rekọ eme ọ via evaọ 1919 gbe 1922?

⁴ Idibo Jihova nọ a wholo na a rẹriẹ ovao ku edawọ ẹrọwọ buobu evaọ etoke Ẹmo Akpọ I. A se rai ẹkoko jẹ raha odẹ rai, otu ugbarugba a le rai, a te je kpe ai. Wọhọ epanọ Jesu ọ ruẹaro, “erẹwho na kpobi i [te] mukpahe” ae. (Matiu 24:9) Evaọ oke ozighi ẹmo na, ewegrẹ Uvie Ọghẹnẹ a tẹ rehọ ẹghẹ nọ a dhesẹ kẹ Jesu Kristi ẹdẹ na ro ruiruo. A gba eku ọwọsuọ egọmeti họ ahwo Jihova uzou, a te duobọte uzedhọ udu ukoko Ọghẹnẹ nọ a rẹ ruẹ na. Evaọ May 1918, egọmeti ọ tẹ k’udu re a mu prẹsidẹnte ọ Watch Tower Society na, J. F. Rutherford, gbe egbẹnyusu ekpekpe ihrẹ riẹ. A te ti bruoziẹ uwou-odi ikpe buobu kpe ezae eree nana a te vi ai kpohọ uwou-odi egọmeti evaọ Atlanta, Georgia, U.S.A. Emerae izii nọ i lele i rie a te siobọno ae. Evaọ May 1919 okọto okogho nọ a rẹ kpare ẹdhọ kpohọ u te bruoziẹ nnọ a guẹdhọ na thọ, fikiere a tẹ rẹriẹ ẹdhoguo na. A te zihe ẹdhọ na re a wariẹ gu ei, rekọ uwhremu na egọmeti o te ku ẹdhọ na rẹriẹ, a te fiore ku Brọda Rutherford avọ egbẹnyusu riẹ. A tẹ wariẹ muọ iruo rai họ, ikokohọ nọ a ru evaọ Cedar Point, Ohio, evaọ 1919 gbe evaọ 1922 e tẹ wariẹ fi ọwhọ họ iruo ovuẹ-Uvie na oma.

5. Ẹvẹ uyero na o jọ kẹ Isẹri Jihova evaọ otọ Nazi Germany?

⁵ Evaọ ikpe 1930, esuo-udu ọ tẹ roma via, Germany, Itali, gbe Japan a te kuobọgbe re a ru egaga Esuo via. Evaọ emuhọ ikpe eyena, ukpokpoma ugbarugba mukpahe ahwo Ọghẹnẹ u te du lahwe, maero evaọ Nazi Germany. A te mu ai imuẹwho. A kiẹ iwou, a te mu ahwo nọ e rọ iwou na. A gbolo idu buobu fihọ ega uye keme a se nọ a rẹ vro ẹrọwọ rai. Ẹjiroro nọ a jẹ rọ họre Ọghẹnẹ gbe ahwo riẹ họ re a si Isẹri Jihova no otọ esuo ọgbahọ na no. Okenọ Isẹri na a kpohọ okọto evaọ Germany re a họre kẹ ẹkẹ-uvẹ rai, Ogbẹgwae Ẹdhoguo-Okiẹrẹe Reich o tẹ wọ eme buobu fihọ otọ re ọ ruẹ nnọ a kparobọ họ. Usu eme na họ: “Okọto na u re kie he fikiọ izi jọ nọ a fihọ otọ gheghe; rekọ o rẹ gwọlọ idhere nọ o re ro ruiruo ilogbo riẹ gba, makọ ebẹbẹ nọ e rọ otọ.” Onana u te dhesẹ nọ a te sai wo uvi ẹdhoguo ho. Ahwo Nazi a s’owọ viotọ nnọ iruẹru Isẹri Jihova e be wha egrẹ hayo ukpokpoma ze e tẹ jẹ rọ ‘ukpokpoma kẹ ewoma Orẹwho gbe Uyerakpọ.’

6. Didi oma a dawo re a whaha iruo mai evaọ etoke Ẹmo Akpọ II gbe evaọ obaro riẹ?

⁶ Evaọ etoke Ẹmo Akpọ II, a fi awhaha họ kẹ ahwo Ọghẹnẹ je mu ai imuẹwho evaọ Australia, Canada, gbe ekwotọ efa nọ i w’obọ kugbe British Commonwealth—evaọ Africa, Esia, gbe ikoliko Caribbean gbe Pacific. Evaọ United States, ewegrẹ nọ e rrọ ikpahwo gbe enọ a raha omai kẹ no a te muọ ukpokpoma họ ẹwhaze ‘ẹkwoma uzi.’ (Olezi 94:20) A jọ ekọto họre ohọre eyero eflage gbe izi okegbe nọ e ghọ usiuwoma ota ọ n’uwou ruọ uwou, yọ oziẹ nọ a bru k’omai evaọ United States na i te diogba wariẹ ufuoma egagọ mai họ. Uyere u te Jihova, omodawọ ewegrẹ o kparobọ họ. Okenọ ẹmo na o serihọ no evaọ Europe, a te si imuẹwho na no. A te siobọno idu Isẹri nọ a kare fihọ ega uye, rekọ ohọre na u ti kuhọ họ. Nọ Ẹmo Akpọ II ọ nwani kuhọ no, Ẹmo Imimẹ na o te muhọ. Erẹwho Ovatha-Ọre Europe efa e tẹ wha otunyẹ efa se ahwo Jihova. Egọmeti ọ j’owọ re o dhomahọ jẹ whaha iruo isẹri-ise mai, whaha ekporo ebe nọ i no Ebaibol ze, voro ikokohọ ẹgbede mai kpobi no. A fi ibuobu họ uwou-odi je vi ejọ kpohọ ivuẹ olahiẹ.

Etunye Haro Evaọ Iruo Usiuwoma Ota Na!

7. Eme Isẹri Jihova a rọ ẹro ruẹ no evaọ Poland, Russia, gbe ekwotọ efa kẹle na?

⁷ Nọ ikpe na e be nyaharo na, iruo usiuwoma ota Uvie na u te rovie. Poland, dede nọ ọ gbẹ jọ otọ Esuo-Ewokugbe na, ọ kuvẹ kẹ eruo ikokohọ ẹdọvo evaọ 1982. A jọ obei ru ikokohọ akpọ-soso evaọ 1985. Ikokohọ ilogbo akpọ-soso i te lele iei evaọ 1989, avọ idu buobu nọ i no Russia gbe Ukraine ze. Ukpe oyena, Hungary avọ Poland a te siobọno iruo Isẹri Jihova. Evaọ uvewhru 1989 Ugbẹhẹ Berlin na u ro kie. Emerae jọ e vrẹ no, a te siobọno iruo mai evaọ Ovatha-Ọre Germany, u kri hi a te ru okokohọ akpọ-soso evaọ Berlin. Yọ evaọ emuhọ ikpe ikpe urere ọ ikpe-udhusoi avọ 20 na, omodawọ o j’otọ re a gbẹgwae kugbe inievo na evaọ Russia. A nyabru isu jọ evaọ Moscow, yọ evaọ 1991, a te kere odẹ Isẹri Jihova fihọ otọ. No anwọ oke oyena ze, iruo na i kparo gaga no evaọ Russia jegbe ewho nọ e jọ abọ Soviet Union vẹre na.

8. Eme ọ via kẹ ahwo Jihova evaọ ikpe 45 nọ i lele ekuhọ Ẹmo Akpọ II na?

⁸ Nọ ukpokpoma u te kpotọ no evaọ eria jọ, o vẹ ga evaọ eria efa. Evaọ ikpe 45 anwẹnọ ẹmo akpọ avivẹ na o ro kuhọ na, ekwotọ buobu a se nọ a re siobọno iruo Isẹri Jihova. Fibae, a mu omai hayo iruo mai imuẹwho evaọ ekwotọ 23 evaọ Africa, ekwotọ 9 evaọ Esia, ekwotọ 8 evaọ Europe, ekwotọ 3 evaọ Latin America, gbe ekwotọ 4 evaọ erẹwho ikoliko jọ.

9. Eme idibo Jihova a nyaku no evaọ Malawi?

⁹ Isẹri Jihova evaọ Malawi a nyaku ukpokpoma ugbarugba nọ u muhọ evaọ 1967. Fiki edikihẹ seomaba-edhehọ rai wọhọ Ileleikristi uzẹme, inievo mai evaọ obei a se nọ a rẹ dẹ ekade esuo. (Jọn 17:16) Okenọ a gbẹgwae jọ ọrọ Malawi Congress Party evaọ 1972, olahiẹ na o tẹ ga viere. A le inievo na no iwou rai je le ai no iruo. Idu ahwo buobu e dhẹ no orẹwho na re a se ae ba ekpe. Kọ enọ e jẹ họre Ọghẹnẹ gbe ahwo riẹ na a kparobọ? Vievie! Nọ ẹkẹ o kurẹriẹ, eta-usiuwoma 43,767 erọ Uvie na e tẹ jọ Malawi niyẹrẹ evaọ 1999, yọ bu vi 120,000 e jọ obei kpohọ ikokohọ ubrotọ. A bọ uwou-ogha okpokpọ fihọ okpẹwho na no.

A Gwọlọ Oware nọ A re Kru Dhobọ

10. Wọhọ epanọ o via kẹ Daniẹl, eme enọ e be wọso ahwo Ọghẹnẹ nẹnẹ a ru no?

¹⁰ Ovuẹ mai nọ u no Ẹme Ọghẹnẹ ze o be nyawo ikọ-erue, isu-egagọ, gbe amọfa oma. Evaọ otọ otunyẹ no obọ egagọ Kristẹndọm jọ ze, otu ọwọsuọ na a tẹ be gwọlọ edhere nọ a be ta nọ o rọwo kugbe uzi be rọ họre omai. Didi ẹghẹ a ru no ẹsejọ? Kọ eme otu ẹgwae oyoma a ru rọ họre Daniẹl ọruẹaro na? Eva Daniẹl 6:4, 5, ma se nọ: “Koyehọ ahwo-agbara na gbe eba na a tẹ jẹ gwọlọ epanọ a rẹ rọ ruẹ ethobọ jọ re a ro gu ei kpahọ uvie na; rekọ a ruẹ oruthọ hayo eyoma ọvo ho, keme ọ vọ avọ uzẹme. Kẹsena ahwo ọnana a tẹ ta nọ, ‘Ma reti du kuọ oware ovo nọ ma re ro gu e Daniẹl ọnana ha, ajokpa oware nọ o kpahe uzi Ọghẹnẹ riẹ ọvo.’ ” Nẹnẹ, otu ọwọsuọ a rẹ gwọlọ oware nọ a re kru dhobọ. A re d’edo kpahe “ikoko-idhere imuozọ” a vẹ bọwo Isẹri Jihova ota wọhọ abọjọ ikoko eyena. Ẹkwoma ọtaraha, ororo-thọ, gbe erue koikoi, a be họre edhere egagọ mai gbe omarokpotọ mai kẹ ehri-izi Ọghẹnẹ.

11. Didi ota ahwo jọ nọ e wọso Isẹri Jihova a bọwo omai no?

¹¹ Evaọ ekwotọ jọ, ahwo egagọ gbe egọmeti buobu a se re a vuhumu nnọ ma wo “egagọ efuafo nọ a rẹ jọ zue-oma obaro Ọghẹnẹ . . . ha.” (Jemis 1:27) Dede nọ iruẹru Ileleikristi mai e be nyaharo evaọ ekwotọ 234, otu ọwọsuọ a be ta nọ ma rọ “egagọ nọ a riẹ” hẹ. Emedẹ jọ taure ma te ti kpohọ okokohọ akpọ-soso mai jọ evaọ 1998, obe-usi Athẹns jọ o wariẹ eme osu-egagọ Ọtọdọks ọ Griki jọ nọ ọ ta nọ “[Isẹri Jihova] a rọ ‘egagọ nọ a riẹ’ hẹ,” dede nọ Okọto Europe ọrọ Ẹkẹ-Uvẹ Ohwo o bruoziẹ nọ u wo ohẹriẹ no oyena. Emedẹ jọ e vrẹ no, obe-usi ofa evaọ okpẹwho ovo na o niyẹrẹ kpahe ohwo ichọche jọ nọ ọ ta nọ: “[Isẹri Jihova] a sae jọ ‘ukoko Ileleikristi’ hi, keme uruemu rai u tho onọ Jesu Kristi ọ seba kẹ ẹrọwọ Ileleikristi na ha.” Onana u gbunu kẹhẹ, keme ẹko egagọ ọfa nọ o bi fiẹgbahọ aruorokele Jesu te epanọ Isẹri Jihova a bi ru ọ riẹ hẹ!

12. Evaọ ẹmuofio abọ-ẹzi mai, eme ma re ru hrọ?

¹² Ma rẹ rehọ edhere uzi thọ usiuwoma na uke jẹ rehọ iẹe vi. (Ahwo Filipai 1:7) Ofariẹ, ma rẹ sai siobọno ekruga ute ẹrẹreokie Ọghẹnẹ mai, hayo kru rai jeve jeve he. (Taitọs 2:10, 12) Wọhọ Jerimaya, ma re thuru ‘umueku mai ga jẹ vuẹ ai eware kpobi nọ ỌNOWO na o j’uzi rai k’omai,’ ma rẹ kuvẹ re enọ e be họre Ọghẹnẹ e whẹ ozọ họ omai ẹro ho. (Jerimaya 1:17, 18) Ẹme Ọfuafo Jihova o dhesẹ edhere ovevẹ nọ ma rẹ nya k’omai no. Ma gwọlọ roma rẹrẹ “ugbobọ ohwo gheghe” nọ o rọ deghedeghe hayo gwọlọ rọ oma “da Ijipti” hi, koyehọ, akpọ nana. (2 Iruẹru-Ivie 32:8; Aizaya 30:3; 31:1-3) Evaọ ẹmuofio abọ-ẹzi, ma rẹ gbẹ rọ idu mai kpobi fievahọ Jihova, kẹe uvẹ re ọ kpọ ithihi mai, orọnikọ ma rẹ rọ ẹro so otoriẹ obọ mai hi. (Itẹ 3:5-7) Ajokpanọ ma re wo uketha Jihova jẹ kẹe uvẹ re ọ sẹro mai, iruo mai kpobi “ọvọvẹ.”—Olezi 127:1.

Ukpokpoma Rekọ Ma bi Fioma h’Otọ Họ

13. Fikieme a jẹ sae ta nọ ohọre Setan mukpahe Jesu u kie?

¹³ Obọdẹ oriruo ọnọ ọ rehọ oma kpobi kẹ ẹgọ Jihova họ Jesu, ọnọ a bọwo ota ọwọsuọ egọmeti gbe ekpokpo udhedhẹ ahwo. Nọ ọ gwọlọ otọ ẹdhọ Jesu na no, u no Pailet eva ze re o siobọnoi. Rekọ ogbotu na, fikinọ isu egagọ na e ba rai họ no, a te bo nọ a kare Jesu, dede nọ ọvowa ọ rọ. A rehọ e riẹ nwene uzou ọ Barabas—ohwo nọ a gbolo fihọ uwou-odi fikinọ ọ be wọso egọmeti je kpe ahwo! Pailet ọ tẹ wariẹ daoma ku iroro otu ọwọsuọ igheghẹ na rẹriẹ, rekọ o te ti kie kẹ ubo gbe ẹjiroro ogbotu na. (Luk 23:2, 5, 14, 18-25) Dede nọ Jesu o whu evaọ ehru ure, ohọre Setan oyena mukpahe Ọmọ Ọghẹnẹ na u kie riẹriẹriẹ, keme Jihova ọ kpare Jesu o te je ru ei kpehru kpohọ obọze Riẹ. Yọ evaọ ẹdẹ Pẹntikọst 33 C.E., ẹkwoma Jesu nọ a ru rro no na, a tẹ kẹ ẹzi ọfuafo, nọ o rehọ ukoko Ileleikristi na mu—‘omama okpokpọ.’—2 Ahwo Kọrint 5:17; Iruẹru 2:1-4.

14. Eme ọ via okenọ ahwo egagọ Ju a wọso ilele Jesu?

¹⁴ U kri hi ahwo egagọ na a te je guegue ikọ na, rekọ ilele Kristi enana a siọ ẹme ba ẹta ha kpahe eware nọ a ruẹ je yo na. Ilele Jesu a lẹ nọ: “Ọnowo who je riwi eha nọ arese enẹna, whaọ ru kẹ idibo ra re a wo aruọwha nọ a rẹ rọ ta ẹme ra.” (Iruẹru 4:29) Jihova ọ kuyo kẹ ayare rai ẹkwoma ẹzi ọfuafo nọ ọ kẹ rai ọ tẹ jẹ kẹ ai ẹgba re a ruabọhọ ewhowho aruọwha rai. U kri hi a tẹ wariẹ ta kẹ ikọ na nọ a siọ usiuwoma ota rai ba, rekọ Pita gbe ikọ edekọ na a te yo nọ: “Ma re yo ẹme Ọghẹnẹ vi o rọ ahwo.” (Iruẹru 5:29) Eguegue, imu, gbe eviaviẹ-efa e whaha e rai ẹvaha iruo Uvie rai hi.

15. Ono họ Gamaliẹl, kọ didi ohrẹ ọ kẹ ahwo egagọ nọ e jẹ wọso ilele Jesu?

¹⁵ Didi owọ isu egagọ na a jẹ? “Eva etẹ gbẹre ae, a jẹ jiroro epanọ a re ro kpe [ikọ na].” Rekọ, owuhrẹ Uzi na jọ nọ a re se Gamaliẹl, ohwo Farisi, ọ jariẹ, yọ ahwo na kpobi a rẹ kẹe adhẹẹ. Nọ ọ ta nnọ a rehọ ikọ na ruọ otafe ọ Sanhẹdrin omojọ, ọ tẹ hrẹ otu ọwọsuọ egagọ na nọ: “Whai ahwo Izrẹl, wha yọrọ oma kẹ ahwo nana, epanọ wha re ti ruo na. . . . Mẹ ta kẹ owhai nọ, ahwo ọnana, wha vu ai wa tou; keme re ẹjiroro hayo iruẹru enana etẹrọ erọ ahwo, e rẹte galuzouviẹ; rekọ e tẹrọ erọ Ọghẹnẹ, wha rẹ sae kpare ai no ho. Hayo wha rẹ te ruẹ nọ Ọghẹnẹ wha rẹ họrọ.”—Iruẹru 5:33-39.

Uvumọ Okwakwa Ẹmo nọ A Gali Vi Owhai O rẹ Kparobọ Họ

16. Evaọ eme obọ ra, ẹvẹ whọ rẹ sai dhesẹ imuẹro nọ Jihova ọ kẹ ahwo riẹ?

¹⁶ Ohrẹ Gamaliẹl na o jọ gbẹgbẹdẹ, yọ o rẹ were omai nọ ohwo jọ ọ tẹ ta ẹme ezi mai. Ma te je vuhumu nnọ a kuvẹ ufuoma egagọ no fiki oziẹ-obro ekọto ọ iguẹdhọ oruọzewọ. Dede na, ẹmeoyo mai kẹ Ẹme Ọghẹnẹ o rọ evedha kẹ isu Kristẹndọm gbe isu efa erọ Babilọn Ologbo na, isuẹsu egagọ ọrue akpọ na. (Eviavia 18:1-3) Dede nọ te ai te enọ a lẹliẹhọ no a be họre omai, ma wo imuẹro nana: “Ekuakua ẹmo ọvo nọ a gali vi owhai nọ i re wo iruo e [rọ] họ, yọ wha rẹte kparobọ vi ọnọ ọ kpare edhọ bru owhai ze kpobi. Onana họ ukuoriọ idibo ỌNOWO na, gbe imuẹro nọ a wo no obọ mẹ ze,—ere ỌNOWO na ọ tae.”—Aizaya 54:17.

17. Dede nọ otu ọwọsuọ a be họre omai, fikieme ma je wo udu?

¹⁷ Ewegrẹ mai a bi mu họre omai, rekọ udu u re du no omai awọ họ. (Olezi 109:1-3) Ma rẹ kuvẹ vievie he re enọ i mukpahe ovuẹ Ebaibol mai a guegue omai re ma vro ẹrọwọ mai. Dede nọ ma rẹro nọ ohọre abọ-ẹzi mai na o te ga viere, ma riẹ ekuhọ riẹ. Wọhọ Jerimaya, ma te ruẹ orugba eme eruẹaruẹ na: “A reti lele owhẹ họre; rekọ a rẹte kpare-obọ vi owhẹ hẹ, keme mẹ avọ owhẹ a gbẹrọ, mẹ rẹ te thọ owhẹ, ere ỌNOWO na ọ tae.” (Jerimaya 1:19) Ẹhẹ, ma riẹ nọ enọ e be họre Ọghẹnẹ a te kparobọ họ!

Didi Uyo Whọ Te Kẹ?

• Fikieme a be rọ họre idibo Jihova?

• Idhere vẹ otu ọwọsuọ a rọ họre ahwo Jihova no?

• Fikieme o sai ro mu omai ẹro inọ enọ e be họre Ọghẹnẹ a te kparobọ họ?

[Uwoho nọ o rrọ ẹwẹ-obe avọ 24]

A kẹ Jerimaya imuẹro nnọ Jihova ọ te jọ kugbei

[Uwoho nọ o rrọ ẹwẹ-obe avọ 25]

Enọ e zọ vrẹ ega uye

[Uwoho nọ o rrọ ẹwẹ-obe avọ 25]

Otu ugbarugba nọ e rọ so Isẹri Jihova

[Uwoho nọ o rrọ ẹwẹ-obe avọ 25]

J. F. Rutherford avọ egbẹnya riẹ

[Uwoho nọ o rrọ ẹwẹ-obe avọ 28]

Evaọ onọ o via kẹ Jesu, enọ e jẹ họre Ọghẹnẹ a kparobọ họ