Fikieme Ofruriọ O je Bu Enẹ?

“Whọ reudi hi, keme udioriọ u re tuaro otu iruiruo, [o rẹ] rẹriẹ edhere ikiẹrẹe.”—Ọnyano 23:8.

IKPE udhusoi-akuakpe akuasa gbe egba isoi nọ e vrẹ, Uzi Mosis na u brukpe udioriọ. No okioye ze, izi nọ e ghọ ofruriọ i bi dhe ebuebu. Ghele na, izi e re sae whaha ofruriọ họ. Udioriọ ekẹdẹ kẹdẹ i bu te ima buobu, yọ ahwo idu-ima buobu a be ruẹ-uye fiki udioriọ na.

Ofruriọ ọ rro kẹre je bu ona gaga no te epanọ o be gwọlọ rọ raha oyerekugbe no dede. Evaọ erẹwho jọ enwene oware kpobi a rẹ jọ thuẹthuẹ oware họ ohwo jọ obọ no taure a te ti ru oware kẹ ohwo. Whọ tẹ j’udi kẹ ohwo nọ ọ rọ ọkwa whọ rẹ sae pase ẹdawọ, wo elasisi edraiva, wo iruo, hayo kparobọ evaọ ẹdhoguo. “Ofruriọ ọ wọhọ enua egaga nọ e rẹ lẹliẹ ahwo jọ ọkora,” ere Arnaud Montebourg, elọya Paris jọ, o bruenu.

Udioriọ o be mai titi evaọ iruẹru ekiọthuọ. Ekọmpeni jọ a rẹ rehọ abọvo abasa erere rai kpobi rọ j’udi kẹ ahwo ofruriọ nọ i wuzou evaọ egọmeti. Wọhọ epanọ emagazini Britain jọ The Economist, o ta, abọ 10 evaọ udhusoi ọrọ edọla idu-ima 25 nọ a be raha k’ukpe k’ukpe rọ dẹ ekwakwa ẹmo na a be rehọ ae j’udi kẹ ehreki. Nọ abọ ofruriọ ọnana o bi kpehru kẹse kẹse na, idabolo buobu i no rie ze no. A ta nọ evaọ etoke ikpe ikpe nọ e vrẹ na, “ova-urio” ekiọthuọ—iruemu ofruriọ ekiọthuọ nọ a re ro rri ahwo nọ a riẹ aro—e raha ẹgbẹdẹ ugho erẹwho jọ soso no.

Ukuhọ riẹ, ahwo nọ a be mae ruẹ-uye ofruriọ gbe araha ekọ nọ o be wha ze họ iyogbere na—ahwo nọ a wo ugho nọ a rẹ rọ j’udi kẹ uvumọ ohwo ho. Wọhọ epanọ emagazini na The Economist o fi rie họ kpẹkpẹe, “ofruriọ yọ abọjọ okienyẹ.” Kọ a sai ti fi oghẹrẹ okienyẹ ọnana kparobọ, hayo kọ ofruriọ yọ oware nọ a sae dhẹvabọ no ho? Re ma k’uyo onọ oyena, o gwọlọ nọ ma kake kiẹ igogo eware jọ nọ e be wha ofruriọ ze riwi.

Eme Ọ be Wha Ofruriọ Ze?

Fikieme ahwo a be rọ gwọlọ fru ahwo ria ukpenọ a rẹ jọ oruọzewọ? Rọkẹ ahwo jọ, ofruriọ họ edhere nọ ọ mae lọhọ—hayo edhere ọvuọvo nọ ọ riẹ—nọ a re ro wo oware nọ a gwọlọ. Ẹsejọ, a rẹ sae rehọ udioriọ whaha uye. Ibuobu nọ a muẹrohọ nnọ ahwo esuo, iporisi, gbe iguẹdhọ a be faro kẹ ofruriọ hayo a tube wo uruemu na dede a te bi lele oriruo rai.

Nọ ofruriọ o bi titi na, a tẹ be jẹe rehọ viere bẹsenọ o be rọ reria ahwo na oma no. Ahwo nọ akpọ ọ rẹ bẹ a tẹ te ruẹ nọ onọ a re ru ona. A tẹ gwọlọ wo ugho nọ a re ro yeri uzuazọ koyehọ a rẹ reudi. Yọ nọ a be rọ uye kẹ ahwo nọ a be yare udioriọ hayo enọ e be j’udi re oware jọ u te ai obọ họ na, ahwo kpobi a vẹ gwọlọ su lele ẹkẹ na. “Fiki epanọ uye oziẹobro oware uyoma o be kake via ha, eva emọ ahwo e tẹ vọ kẹ oware uyoma uruo,” ere Solomọn Ovie na o muẹrohọ.—Ọtausiwoma Na 8:11.

Egba egaga ivẹ i bi koko erae họ ofruriọ: oriobọ gbe uvo-uthe. Fiki oriobọ, otu ofruriọ a vẹ faro kẹ uye-oruẹ nọ u bi te amọfa fiki ofruriọ rai, a vẹ ta nọ udioriọ u woma fikinọ a bi wo erere noi ze. Epanọ a koko efe họ te, ere uvo-uthe otu ofruriọ na o rẹ ga te. Solomọn o muẹrohọ nọ: “Ohwo nọ o you ugho ugho o rẹ dae ẹro [ho], ọnọ o you efe avọ erere o rẹ dae ẹro gbehe.” (Ọtausiwoma Na 5:10) Uzẹme, uvo-uthei o sae jọ ziezi evaọ ewo igho, rekọ ukuhọ riẹ họ o rẹ faro kẹ ofruriọ gbe uzi-olavrẹ.

Okwakwa ofa jọ nọ a re rivo ho họ abọ nọ osu akpọ nana nọ a rẹ ruẹ hẹ na o bi wo, ọnọ Ebaibol na o dhesẹ wọhọ Setan Ẹdhọ na. (1 Jọn 5:19; Eviavia 12:9) Setan ọ be wha ofruriọ haro kitikiti. Udioriọ nọ o mae rro kpobi evaọ ikuigbe họ onọ Setan ọ jẹ rọ kẹ Kristi. “Who te diguẹ gọ omẹ, mẹ rẹ kẹ owhẹ [ivie akpọ] nana kpobi.”—Matiu 4:8, 9.

Rekọ Jesu ọ kare ofruriọ, yọ o wuhrẹ ilele riẹ re a jọ epọvo na re. Kọ iwuhrẹ Kristi e sae jọ okwakwa nọ a rẹ rọ họre ofruriọ nẹnẹ? Uzoẹme n’otha na u ti duobọte onọ onana.