Dhesẹ Uruemu Ithihakọ!
“Mẹ rẹ hẹrẹ Ọghẹnẹ usiwo mẹ; Ọghẹnẹ mẹ o ti yo kẹ omẹ.”—MAEKA 7:7.
1, 2. (a) Ẹvẹ uruemu othọthọ o rọ nwa emọ Izrẹl oma evaọ igbrẹwọ na? (b) Eme ọ rẹ sae via kẹ Oleleikristi ọnọ o wo uvi uruemu hu?
EWARE buobu e rọ uzuazọ nọ a re rri wowoma hayo yoyoma, wọhọ epanọ uruemu mai o rọ. Okenọ emọ Izrẹl a jọ igbrẹwọ na, a rọ edhere igbunu kẹ ae mana. O hai fo re a rri otọ oyaya na wariẹ re a kẹ Jihova uyere nọ ọ rọ kẹ ae emuore. Oyena o hai dhesẹ uruemu ezi. Ukpoye, a tẹ jẹ kareghẹhọ emuore sa-sa nọ a jẹ re evaọ Ijipti a te gu unoma nọ mana na o wo uvumọ awere he evaọ unu. Ẹvẹ uruemu oyena o thọ te!—Ikelakele 11:4-6.
2 Nẹnẹ uruemu Oleleikristi o rẹ sai ru eware jọ jajaja hayo dokpodokpo kẹe. Ababọ uvi uruemu, Oleleikristi o re ku oghọghọ riẹ fiẹ lọlọhọ, yọ oyena u re yoma gaga keme, wọhọ epanọ Nehemaya ọ ta: “Evawere ỌNOWO na họ ogaga [mai].” (Nehemaya 8:10) Uvi uruemu ọrọ oghọghọ u re fiobọhọ ru omai ga jẹ wha udhedhẹ avọ okugbe haro evaọ ukoko na.—Ahwo Rom 15:13; Ahwo Filipai 1:25.
3. Ẹvẹ uvi uruemu u ro fiobọhọ kẹ Jerimaya evaọ etoke okpokpoho?
3 Dede nọ ọ jẹ rria etoke ọbẹbẹ, Jerimaya o dhesẹ uvi uruemu. Makọ okenọ ọ rọ ẹro ruẹ idudu ekie Jerusalẹm evaọ 607 B.C.E., ọ sae ruẹ abọ ewoma eware. Izrẹl ọ rẹ sae thọrọ Jihova ẹro ho, yọ orẹwho na o te zọ. Enẹ Jerimaya o kere evaọ obe Enuobruo: “Uyoyou owhawha ỌNOWO na u re serihọ họ, ehrọ riẹ i re wo urere he; kohiohiẹ kohiohiẹ e rẹ jọ okpokpọ; ọtẹruo ra ọ rẹ ruaro.” (Enuobro 3:22, 23) Evaọ ikuigbe kpobi, idibo Ọghẹnẹ evaọ otọ iyero nọ e mae bẹ kpobi a daoma no re a wo uvi uruemu, makọ ọrọ oghọghọ.—2 Ahwo Kọrint 7:4; 1 Ahwo Tẹsalonika 1:6; Jemis 1:2.
4. Didi uruemu Jesu o dhesẹ, kọ ẹvẹ u ro fiobọhọ kẹe?
4 Ikpe egba ezeza nọ oke Jerimaya o vrẹ no, uvi uruemu u fiobọhọ kẹ Jesu thihakọ. Ma se nọ: “[Jesu] ọ rehọ fiki oghọghọ nọ a kẹ riẹ ro thihakọ [ure oja, NW ], ọ daozọ omovuọ họ, ọ tẹ keria obọze akaba uvie Ọghẹnẹ.” (Ahwo Hibru 12:2) Makọ ọwọsuọ hayo ukpokpoma nọ Jesu ọ rẹriẹ ovao ku—makọ akọriọ ure oja na—o fi iroro riẹ họ “oghọghọ nọ a kẹ riẹ.” Oghọghọ oyena họ uvẹ-ọghọ ọrọ ẹkpare kpehru esuo Jihova gbe orufuọ odẹ riẹ gbe irẹro eghale ilogbo nọ ọ te wha se ahwo-akpọ ẹmeoyo evaọ obaro.
Wo Uruemu Ithihakọ
5. Ovẹ họ uyero oriruo jọ nọ uruemu ithihakọ u re jo fiobọhọ k’omai rri eware owowa?
5 Ma te wo oghẹrẹ uruemu Jesu na, ma ti ku oghọghọ Jihova fiẹ hẹ eware e gbẹ make via evaọ edhere gbe oke nọ ma rẹro rai hi. Maeka ọruẹaro na ọ ta nọ: “Rekọ mẹ hai, me re riwi ỌNOWO na, mẹ rẹ hẹrẹ Ọghẹnẹ usiwo mẹ.” (Maeka 7:7; Enuobro 3:21) Ma rẹ sai dhesẹ uruemu ithihakọ re. Oghẹrẹ vẹ? Evaọ idhere buobu. Ojọ họ, ma rẹ sai roro nọ oniọvo jọ nọ ọ rọ ọkwa o ruthọ yọ ma gwọlọ nọ a kpọ ẹthọthọ na vi vẹrẹ vẹrẹ. Uruemu ithihakọ o rẹ lẹliẹ omai roro nọ, ‘Kọ o ghine ruthọ, hayo kọ me bi roro ẹme na thọ? Otẹrọnọ o ruthọ, kọ o sae jọ nọ Jihova ọ kẹ ẹme na uvẹ fikinọ o roro nọ ohwo na o ti ru ẹnyaharo gbe nnọ enwene ologbo ọvuọvo ọ r’oja ha?’
6. Ẹvẹ uruemu ithihakọ u re ro fiobọhọ kẹ ohwo nọ ọ be họre kugbe ẹbẹbẹ omobọ ohwo?
6 Ma rẹ sae gwọlọ uruemu ithihakọ otẹrọnọ ẹbẹbẹ jọ ọ be k’omai uye hayo ma te bi lele ewhrehe jọ muabọ. Kọ otẹrọnọ ma yare obufihọ Jihova no yọ ẹbẹbẹ na ọ gbẹ r’otọ? Eme ma re ru? Ma rẹ hai ru utho ẹgba mai kpobi re ma ku ẹbẹbẹ na họ ma ve je fi ẹrọwọ họ eme Jesu na: “[Hae] yare, a rẹ te kẹ owhai; guọlọ wha rẹ te ruẹ; kporo, a reti rovie kẹ owhai.” (Luk 11:9) Ruabọhọ olẹ, jẹ hẹrẹ Jihova. Evaọ ẹruoke gbe evaọ edhere riẹ, Jihova ọ te kuyo elẹ ra.—1 Ahwo Tẹsalonika 5:17.
7. Edhere vẹ uruemu ithihakọ u re ro fiobọhọ kẹ eriwo mai ọrọ otoriẹ othotha Ebaibol na?
7 Nọ eruẹaruẹ Ebaibol i bi rugba na, otoriẹ mai ọrọ Ikereakere na o bi vẹ viere. Rekọ ẹsejọ ma rẹ sai roro nọ oruvẹ jọ o lehie ga hrọ. Otẹrọnọ o via evaọ okenọ ma rẹro riẹ hẹ, ma te sae hẹrẹ? Kareghẹhọ, Jihova ọ rue riẹ nọ u fo re o rovie “eware ididi Kristi na” ẹmẹrera evaọ etoke ikpe 4,000. (Ahwo Ẹfẹsọs 3:3-6) Kọ ma wo ẹjiroro jọ nọ ma rẹ rọ varioma? Kọ ma be vro nọ a rehọ ‘ọrigbo nọ o wo ẹrọwọ avọ areghẹ’ mu “re nọ oke u te ọ rehọ emu kẹ” ahwo Jihova? (Matiu 24:45, ẹjẹlẹ ibieme na ọmai.) Fikieme ma jẹ gbọ oma mai oghọghọ Ọghẹnẹ fikinọ ma wo otoriẹ eware kpobi vọvọ họ? Kareghẹhọ, Jihova ọ rẹ jiroro oke gbe oghẹrẹ nọ o re ro dhesẹ ‘eme idhere’ riẹ via.—Emọs 3:7.
8. Ẹvẹ odiri Jihova ọ rọ wha erere se ibuobu no?
8 Oma o rẹ sae lọhọ otujọ keme a roro nọ ẹsejọhọ, nnọ a gọ avọ ẹrọwọ evaọ ikpe buobu no na, a sae te rria te epanọ a rẹ rọ ruẹ “ẹdẹ ologbo avọ idudu ỌNOWO na” ha. (Joẹl 2:30, 31) Ghele na, a rẹ sai kru udu ga nọ a te riwi abọ ewoma riẹ. Pita ọ hrẹ nọ: “Wha kele akothiho Ọnowo mai gbe usiwo.” (2 Pita 3:15) Odiri Jihova o lẹliẹ ima amọfa buobu wuhrẹ uzẹme na no. Kọ oyena u gbe gbunu? Ofariẹ, epanọ Jihova o wo odiri kri te, ere ma re wo oke bu te rọ “rehọ ozọ-odhẹ avọ enuho ru iruo usiwo [mai] via.”—Ahwo Filipai 2:12; 2 Pita 3:11, 12.
9. Otẹrọnọ eware i bru omai abọ dhe evaọ oware nọ ma rẹ sai ru evaọ iruo Jihova, ẹvẹ uruemu ithihakọ u re ro fiobọhọ k’omai thihakọ uyero na?
9 Uruemu ithihakọ u re fiobọhọ k’omai nọ udu u gbe n’omai awọ họ okenọ ọwọsuọ, ẹyao, owho, hayo ebẹbẹ e tẹ be whaha omai iruo Uvie na. Jihova o rẹro nọ ma rọ eva kpobi gọe. (Ahwo Rom 12:1) Dedena, Ọmọ Ọghẹnẹ, ọnọ “ọ be re ohrọ eyẹlẹ gbe iruori,” ọ be yare eware nọ i vi ẹgba mai hi; yọ Jihova ọ rrọ ere gbe he. (Olezi 72:13) Fikiere, ma re kru udu ga ru uthoma mai, rọ odiri hẹrẹ bẹsenọ iyero i re nwene—evaọ uyerakpọ nana hayo evaọ ọnọ ọ be tha na. Kareghẹhọ: “Ọghẹnẹ ọ kare ọ rọ ẹrẹreokie he nọ iruo rai i re vẹro ho gbe uyoyou nọ owha be rehọ fiki riẹ ruẹ gbe epanọ wha be ga erezi na, wọhọ epa o nọ wha ruẹabọhọ na.”—Ahwo Hibru 6:10.
10. Didi uruemu othọthọ ohwo nọ o wo uruemu ithihakọ ọ rẹ sae whaha? Ru ei vẹ.
10 Uruemu ithihakọ u re je fiobọhọ k’omai whaha omorro. Ejọ nọ i zihe ruọ ikọ-erue na a gwọlọ hẹrẹ hẹ. Ẹsejọhọ oma rai o ta kẹ ae nnọ u fo re a ru inwene, evaọ otoriẹ Ebaibol na hayo evaọ eme ukoko na jọ. Ghele na a kareghẹhọ họ inọ ẹzi Jihova ọ rẹ wọ ọrigbo ẹrọwọ avọ areghẹ na ru inwene evaọ ẹruoke Riẹ, orọnikọ okenọ ma roro nọ o rẹ jọ họ. Yọ enwene kpobi ọ rẹ rọwo kugbe oreva Jihova hrọ, orọnikọ iroro obọ mai hi. Ikọ-erue a kẹ uruemu omorro uvẹ re o raha iroro rai je ru ai zoruẹ. Rekọ o hae jọ nọ a wo oghẹrẹ uruemu Kristi, a hae yọrọ oghọghọ rai jẹ daji usu ahwo Jihova.—Ahwo Filipai 2:5-8.
11. Oghẹrẹ vẹ ma re ro fi oke nọ ma be rọ hẹrẹ na họ iruo ziezi, kọ iriruo amono ma re lele?
11 Dede na, ẹyọrọ uruemu ithihakọ orọnikọ u dhesẹ nọ ma rẹ jọ eyẹlẹ hayo jọ dokpodokpo ho. Ma wo iruo nọ ma re ru. Wọhọ oriruo, u fo re ma fiomahọ uwuhrẹ Ebaibol omobọ mai, ma vẹ rọ ere dhesẹ ọwhọ nọ eruẹaro ẹrọwọ gbe enjẹle na a dhesẹ kẹ eware abọ-ẹzi na. Nọ ọ jẹ t’ẹme kpahe isiuru itieye na, Pita ọ ta nọ: “Eruẹaro na . . . ae guọlọ jẹ nọ ekpẹ kpahe usiwo nana: . . . eware nọ ikọ-odhiwu i rẹrobẹ re a ruẹ.” (1 Pita 1:10-12) Orọnikọ uwuhrẹ omobọ ohwo o rọ ọgbahọ ọvo ho rekọ ere o rọ re kpahe iwuhrẹ nọ a re kpohọ ẹsikpobi gbe olẹ. (Jemis 4:8) Ahwo nọ a se ẹgwọlọ abọ-ẹzi rai gboja ẹkwoma emu abọ-ẹzi nọ a rẹ re ẹsikpobi jẹ be nyusu kugbe ibe Ileleikristi a bi dhesẹ nọ a bọ oghẹrẹ uruemu Kristi no.—Matiu 5:3.
Wo Uvi Eriwo
12. (a) Didi mẹrẹjọomẹsa Adamu avọ Ivi a gwọlọ? (b) Eme u no edhere Adamu avọ Ivi nọ ahwo-akpọ a lele ze no?
12 Okenọ Ọghẹnẹ ọ ma ọzae avọ aye ọsosuọ na, ọ rehọ udu efihọ ute oware nọ u woma gbe onọ u yoma kẹ omobọ riẹ. (Emuhọ 2:16, 17) Adamu avọ Ivi a gwọlọ no otọ esuo Ọghẹnẹ, yọ onana o tẹ wha akpọ nọ ma be ruẹ nọ ọ wariẹ omai họ nẹnẹ na ze. Pọl ukọ na ọ ta nọ: “Epanọ umuomu orọ fiki omọvo vaha ruọ akpọ na, gbe uwhu fiki izieraha, fikiere uwhu u te zite ahwo kpobi: keme fiki onana uwhu u ro te ahwo kpobi, keme ahwo kpobi a raha uzi.” (Ahwo Rom 5:12) Ikuigbe ohwo-akpọ ọrọ ikpe udhusoi akuakpe eko ezeza no oke Adamu ze u dhesẹ ẹgbagba eme Jerimaya na no: “O ỌNOWO mẹ riẹ nọ ohwo o wo iroro obọ riẹ hẹ, ohwo o wo ogaga nọ o ro su oma obọ riẹ hẹ.” (Jerimaya 10:23) Re ma ta nọ eme Jerimaya na yọ uzẹme orọnikọ ma be ta oyẹlẹ họ oma mai hi. Uzẹme na oye. Oye o soriẹ ze nọ evaọ ikpe-udhusoi buobu nọ e vrẹ no na “ohwo ọ [rọ] rehọ obọ ogaga su ọrivẹ riẹ nwa oma riẹ” no na keme ahwo-akpọ a bi su omobọ rai ababọ Ọghẹnẹ.—Ọtausiwoma Na 8:9.
13. Didi eriwo owowa Isẹri Jihova a wo kpahe oware nọ ahwo-akpọ a rẹ sai rugba?
13 Evaọ eroro kpahe uyero ohwo-akpọ, Isẹri Jihova a vuhumu nnọ umuo o riẹ evaọ eware nọ ohwo ọ rẹ sai le t’obọ evaọ uyerakpọ nana. Uvi uruemu o rẹ sai fiobọhọ sẹro oghọghọ mai, rekọ o rọ ifue kẹ eware kpobi hi. Evaọ etoke emuhọ 1950 na, osu-ichọche America jọ o kporo obe jọ nọ o zẹ gaga onọ uzoẹme riẹ o rọ The Power of Positive Thinking. Obe na u dhesẹ nọ a rẹ sae rọ uvi uruemu fi ezadhe buobu kparobọ. Uvi uruemu u ghine kiehọ. Rekọ iriruo i dhesẹ no nnọ eriariẹ, ona, ewo ekwakwa, gbe eware efa buobu i re bru ahwo-akpọ abọ dhe evaọ eware nọ a re le t’obọ. Yọ who te rri akpọ na, ebẹbẹ na e rro vi ahwo-akpọ abọ—makọ epanọ a re roro liọ te kẹhẹ!
14. Kọ Isẹri Jihova a wo uruemu othọthọ? Ru ei vẹ.
14 Fiki eriwo owowa rai ọrọ eme itieye na, ẹsejọ a rẹ bọwo Isẹri Jihova ota nnọ a wo uruemu othọthọ. Ukpoye, a wo ọwhọ re a ta kẹ amọfa kpahe Ọnọ ọ rẹ sai furie ebẹbẹ ohwo-akpọ bẹdẹ bẹdẹ. Evaọ abọ nana re a be raro kele oghẹrẹ uruemu Kristi. (Ahwo Rom 15:2) Yọ a bi ruiruo gaga bi fiobọhọ kẹ ahwo wo emamọ usu kugbe Ọghẹnẹ. A riẹ nnọ evaọ ekuhọ riẹ, onana o te wha ewoma nọ o mae rro kpobi ze.—Matiu 28:19, 20; 1 Timoti 4:16.
15. Ẹvẹ iruo Isẹri Jihova i ro nwene ahwo kpohọ abọ ewoma no?
15 Isẹri Jihova a be f’aro kẹ ebẹbẹ okegbe na ha—maero kọ iruemu nọ e wọso Ikereakere na—nọ e wariẹ e rai họ na. Taure ohwo nọ o wo isiuru o te ti zihe ruọ omọvo Isẹri Jihova, o re ru inwene, o re fi ekpehre uruemu nọ e reria obọ no nọ e rẹ dha Ọghẹnẹ eva kparobọ. (1 Ahwo Kọrint 6:9-11) Fikiere, Isẹri Jihova a fiobọhọ kẹ ahwo nọ u no eva ze no fi idieda, ogbẹlọ imu, ọfariẹ-ogbe, gbe edhọfi kparobọ no. Ahwo nana nọ a nwene no na a wuhrẹ no re a rọ edhere owoma ọrọ oruọzewọ ko iviuwou rai. (1 Timoti 5:8) Nọ a te fiobọhọ kẹ ahwo gbe iviuwou enẹ, ebẹbẹ nọ e rẹ jọ ẹwho na e rẹ kawo—ahwo nọ e be lọ imu egaga, ozighi uviuwou, gbe efa i re kpotọ. Ẹkwoma izi nọ a bi koko gbe amọfa nọ a bi fiobọhọ kẹ nwene izuazọ rai kpohọ ewoma, Isẹri Jihova a bi ru iruo ahwo nọ e be rẹrote ebẹbẹ okegbe vori.
16. Fikieme Isẹri Jihova a gbe bi ro dhomahọ ẹgwae ẹkpọhọ ọrọ akpọ na ha?
16 Kọ Isẹri Jihova a nwene uruemu ẹfuọ ahwo evaọ akpọ na no? Whaọ, evaọ oware wọhọ ikpe ikpe nọ e vrẹ na, unu Isẹri ajọwha a bu no omojọ u no 3,800,000 rite enwenọ 6,000,000 no. Koyehọ enwenọ ẹvi 2,200,000, enọ ibuobu rai i siobọno iruemu ethọthọ nọ a zihe ruọ Ileleikristi no. Izuazọ buobu i nwene no! Ghele na, unu nana o kawo gaga ma tẹ rehọ iẹe wawo ẹvi unu ahwo akpọ na evaọ etoke ovo na—875,000,000! Isẹri Jihova a rueriẹ no wọhọ ehri oghọghọ re a fiobọhọ kẹ enọ e rẹ kezọ, dede nọ a vuhumu nnọ ahwo kakao gheghe a te ruọ edhere uzuazọ na. (Matiu 7:13, 14) Nọ Isẹri na a be hẹrẹ inwene akpọ-soso kpohọ ewoma nọ Ọghẹnẹ ọvo o ti ru na, a re dhomahọ ẹgwae ẹkpọhọ ọrọ akpọ na ha, enọ i re muhọ ziezi rekọ e vẹ rọ ẹwhọ hayo ozighi kuhọ na.—2 Pita 3:13.
17. Eme Jesu o ru ro fiobọhọ kẹ enọ e wariẹ e riẹ họ, rekọ eme o ru hu?
17 Evaọ owojẹ nana, Isẹri Jihova a bi dhesẹ ọkpọ eva nọ Jesu o fihọ Jihova evaọ okenọ ọ jọ otọakpọ. Evaọ ikpe-udhusoi ọsosuọ na, Jesu o je siwi ahwo. (Luk 6:17-19) Ọ tubẹ kpare iwhuowhu na dede. (Luk 7:11-15; 8:49-56) Rekọ o si ẹbẹbẹ ẹyao hayo fi uwhu kparobọ họ. Ọ riẹ nọ ẹruoke Ọghẹnẹ o ri te he kẹ onana. Avọ ẹgba okpehru nọ o wo wọhọ ọzae ọgbagba, Jesu ọ hai ti ru viere re o si ebẹbẹ isuẹsu avọ erọ uyerakpọ no. O wọhọ nọ ahwo oke riẹ jọ a gwọlọ re o mi ogaga re o ru ere, rekọ Jesu ọ se. Ma se nọ: “Nọ ahwo a ruẹ oka nọ o ru, a tẹ ta nọ, ‘Uzẹme, ọnana họ ọruẹaro nọ ọ te tha akpọ na!’ Fikiere nọ Jesu ọ ruẹ nọ a re ti mu ei idudhe ro mu ovie, o te sioma no kpobọ ugbehru nọ o ye ovo o rọ ogbe.”—Jọn 6:14, 15.
18. (a) Ẹvẹ Jesu o ro dhesẹ uruemu ithihakọ ẹsikpobi? (b) Ẹvẹ iruo Jesu i ro nwene no anwọ 1914?
18 Jesu ọ se nọ o re dhomahọ isuẹsu hayo rọ oke riẹ kpobi fiobọhọ kẹ ahwo keme ọ riẹ nọ oke u ri te kẹe he re ọ rehọ ogaga uvie je siwi ahwo kpobi evaọ oria kpobi. Makọ okenọ ọ kparoma kpohọ uzuazọ ẹzi sebaewhu no evaọ obọ idhiwu, u no rie eva ze re ọ hẹrẹ oke nọ Jihova o ve fihọ re ọ tẹ te j’owọ. (Olezi 110:1; Iruẹru 2:34, 35) Rekọ, anwẹnọ a rọ rehọ iẹe mu Ovie Uvie Ọghẹnẹ evaọ 1914 no, ọ be nyaharo “avọ obọ-okparọ.” (Eviavia 6:2; 12:10) Ẹvẹ eva e rẹ were omai te re ma roma kpotọ kẹ ọkwa-ovie riẹ, nọ amọfa nọ i se oma rai Ileleikristi na a be faro kẹ iwuhrẹ Ebaibol kpahe Uvie na!
Ohẹrẹ—Oware Idhọvẹ Manikọ orọ Oghọghọ?
19. Okevẹ ohẹrẹ ‘o rẹ rọ kẹ idhọvẹ,’ kọ okevẹ o rẹ rọ wha oghọghọ ze?
19 Solomọn ọ riẹ nọ ohẹrẹ o sae kẹ idhọvẹ. O kere nọ: “Oware nọ ohwo o rẹro riẹ nọ u te rie ei obọ họ o rẹ kẹ ẹe idhọvẹ.” (Itẹ 13:12) Uzẹme, ohwo o te bi rẹro oware nọ u muẹro ho, ekuhọ omovuọ riẹ o rẹ sae kẹ idhọvẹ. Rekọ, ẹhẹrẹ iyero evawere—ẹsejọhọ eha-orọo, eyẹ ọmọ, hayo erẹ bru ahwo nọ ma you—o rẹ sai ru omai duola ghọghọ taure ẹdẹ na o te ti te. Oghọghọ na o rẹ rro viere otẹrọnọ ma rehọ oke ohẹrẹ na ro ruiruo ziezi, be ruẹrẹ oma họ kẹ etoke na.
20. (a) Didi eware igbunu ma be rọ evaifihọ rẹro nọ ma te ruẹ? (b) Ẹvẹ ma sae rọ ruẹ oghọghọ nọ ma be hẹrẹ ẹjiroro Jihova re o rugba na?
20 Ma te wo evaifihọ evọvọ inọ irẹro mai i ti rugba—ma gbẹ make riẹ okenọ i ti ro rugba ha—oke ohẹrẹ na o rẹ wha “idhọvẹ” ze he. Egegagọ ẹrọwọ Ọghẹnẹ a riẹ nọ Esuo Odu-Ikpe Kristi ọ kẹlino. A fievahọ nọ a te ruẹ ekuhọ uwhu gbe ẹyao. Avọ ajọwha a be rọ oghọghọ hẹrẹ okenọ a ti ro dede ima-idu no iwhuowhu ze, kugbe iyoyou rai nọ i whu no. (Eviavia 20:1-3, 6; 21:3, 4) Evaọ oke nana nọ okegbe na ọ be raha kpobi no na, a wo isiuru irẹro uzẹme ọrọ ẹruẹ Aparadase nọ o ti zihe ziọ otọakpọ na. (Aizaya 35:1, 2, 7) Fikiere ẹvẹ o rọ oware areghẹ te re ma rehọ oke ohẹrẹ na ruiruo ziezi, “jọ owhreze iruo Ọnowo na”! (1 Ahwo Kọrint 15:58) Gbẹ hae re emu abọ-ẹzi. Bọ usu nọ o kpekpe viere kugbe Jihova. Gwọlọ amọfa enọ udu o be wọ re a gọ Jihova. Tuduhọ ibe enọ e rọwo awọ. Rehọ oke nọ Jihova ọ te gbẹ kuvẹ riẹ kpobi ruiruo vọvọ ziezi. Kẹsena ẹhẹrẹ Jihova o gbẹ jọ “idhọvẹ” kẹ owhẹ hẹ. Ukpoye, o te kẹ owhẹ oghọghọ!
Kọ Whọ Sae k’Iyo Nana Vevẹ?
• Ẹvẹ Jesu o ro dhesẹ uruemu ithihakọ?
• Otọ iyero vẹ Ileleikristi a jọ gwọlọ uruemu ithihakọ?
• Fikieme o jẹ da Isẹri Jihova ẹro fia re a hẹrẹ Jihova?
• Ẹvẹ a re ru re ẹhẹrẹ Jihova o jọ oware nọ o rẹ kẹ oghọghọ?
[Iwoho nọ e rrọ ẹwẹ-obe avọ 22]
Jesu o thihakọ fiki oghọghọ nọ a fihọ aro riẹ
[Uwoho nọ o rrọ ẹwẹ-obe avọ 23]
Ma tẹ make gọ te ikpe buobu no, ma rẹ sae yọrọ oghọghọ mai
[Iwoho nọ e rrọ ẹwẹ-obe avọ 25]
Ima ahwo buobu a nwene izuazọ rai no ẹkwoma Isẹri Jihova nọ a zihe ro