Kọ Ute Uruemu Ebaibol Họ Onọ O Mai Woma?

“OOKOGHO-AHWO o gwọlọ itee uruemu nọ o rẹ kẹ ahwo riẹ omofọwẹ gbe ọkpọvio.” Ere ọgba okere-obe Germany jọ nọ ọ rẹ jọ etẹlivisiọne t’ẹme ọ ta. Evaọ uzẹme areghẹ ọ rọ ẹme ọyena. Re okogho-ahwo ọ sae jọ ọvo je wo ẹvi, ahwo na a re wo ute nọ a jẹrehọ onọ u re dhesẹ oware nọ u kiehọ hayo onọ o thọ, uwoma hayo uyoma. Onọ na họ: Itee vẹ e mai woma, kẹ okegbe na gbe ahwo riẹ?

Otẹrọnọ a lele itee uruemu Ebaibol na, i re fiobọhọ kẹ ahwo rria uzuazọ evawere nọ o kpomamu. Oyena u re ru okogho-ahwo nọ i bi koko itee eyena wereva viere jẹ kpomamu. Kọ ere o rọ? Joma kiẹ oware nọ Ebaibol na ọ ta kpahe itee iruemu ivẹ jọ: ẹrotọvi ọrivẹ ohwo evaọ orọo gbe oruọzewọ evaọ uzuazọ ekẹdẹ kẹdẹ.

Tẹrovi Ọrivẹ-Orọo Ra

Ọnọma omai ọ ma Adamu kẹsena ọ tẹ ma Ivi re ọ jọ ọrivẹ riẹ. Ọwhẹgbe rai na họ orọo ọsosuọ evaọ ikuigbe, yọ o rẹ jọ usu nọ o rẹ tọ. Ọghẹnẹ ọ ta nọ: “Ọzae ọ rẹ se ọsẹ gbe oni riẹ ba, ọ vẹ gbalọ aye riẹ.” Nọ enwene ikpe 4,000 e ruemu no, Jesu Kristi ọ tẹ wariẹ ute orọo nana kẹ ilele riẹ kpobi. Ofariẹ, o brukpe owezẹ ezaveyae evaọ otafe orọo.—Emuhọ 1:27, 28; 2:24; Matiu 5:27-30; 19:5.

Wọhọ epanọ Ebaibol na ọ ta, obọdẹ isiavẹ ivẹ erọ orọo evawere họ uyoyou gbe adhẹẹ n’obọ imava na ze. Ọzae na, ọnọ o wuzou uviuwou na, o re dhesẹ uyoyou ọ ababọ-oriobọ ẹkwoma ẹgwọlọ ewoma aye riẹ. Ọ rẹ rehọ “iroro” ria kugbei orọnikọ o re ‘kpokpo’ ei hi. Aye na ọ rẹ rehọ ‘adhẹẹ odidi’ kẹ ọzae riẹ. Otẹrọnọ imava orọo na a lele ehri-izi enana, a rẹ sae whaha hayo fi ebẹbẹ orọo buobu kparobọ. Ọzae na ọ te gwọlọ dhẹgbalọ aye riẹ, aye na ọ vẹ jẹ gwọlọ dhẹgbalọ ọzae riẹ.—1 Pita 3:1-7; Ahwo Kọlọsi 3:18, 19; Ahwo Ẹfẹsọs 5:22-33.

Kọ ute Ebaibol na orọ ẹdhẹgbalọ ọrivẹ-orọo ohwo u re fiba orọo evawere? Whaọ, roro kpahe iyẹrẹ ọkiẹriwo jọ nọ a jọ Germany ru. A nọ ahwo ekwakwa nọ e r’oja kẹ emamọ orọo. Oware nọ ahwo a mae fodẹ họ re a tẹrovi ohwohwo. Kọ whọ gbẹ rọwo nọ ahwo nọ a rọo no a rẹ wereva viere nọ a tẹ riẹ nọ ọrivẹ rai o bi rri obọ otafe he?

Kọ Ebẹbẹ E tẹ Roma Via?

Kọ ẹvẹ o rẹ jọ otẹrọnọ ọzae avọ aye na a wo ẹwhọ ologbo? Kọ ẹvẹ o rẹ jọ otẹrọnọ uyoyou rai o hiẹ no? Kọ o mai woma evaọ otọ iyero itieye na re a fa orọo na? Hayo kọ ute Ebaibol na orọ ẹdhẹgbalọ ọrivẹ ohwo na u re gbe w’iruo?

Enọ i kere Ebaibol na a vuhumu nnọ ezae avọ eyae kpobi nọ e rọo no a ti wo ebẹbẹ fiki sebaẹgba ohwo-akpọ. (1 Ahwo Kọrint 7:28) Ghele na, imava-orọo nọ i bi koko ute uruemu Ebaibol na a rẹ daoma rọvrẹ a ve je ruiruo rọ kpọ ebẹbẹ rai vi. Dede na, iyero jọ e riẹ—wọhọ ẹnwae-obro hayo ukpe ugbobọ—nọ Oleleikristi ọ rẹ rọ jiroro ẹhẹriẹ hayo orọo-ofa. (Matiu 5:32; 19:9) Rekọ ugidi nọ a rẹ rọ fa orọo ababọ oware ulogbo jọ hayo re a ruẹse rehọ omọfa yọ ababọ-ororokẹ ọrọ oriobọ kẹ amọfa. O rẹ wha omakpọmu hayo evawere ziọ uzuazọ ohwo ho. Joma rehọ oriruo jọ.

Peter o muẹrohọ nnọ orọo riẹ u gbe wo awere nọ o wo vẹre he.a Fikiere, ọ tẹ dhẹ siọ aye riẹ ba ọ tẹ kwa bru Monika, ọnọ ọ dhẹ siọ ọzae riẹ ba. Ẹvẹ eware i ro kuhọ? Evaọ umutho emera jọ ọvo, Peter ọ feva nnọ ẹria kugbe Monika “o lọhọ te epanọ me roro nọ o te jọ họ.” Eme jabọ? Sebaẹgba ohwo-akpọ o jọ usu okpokpọ riẹ na dhesẹ oma via wọhọ epanọ o jọ orọ ọsosuọ na. Tubẹ mai yoma dede, ẹjiroro ọkpuakpua oriobọ riẹ o tẹ lẹliẹe riesa. Ofariẹ, eva e were emọ Monika ha fiki enwene ologbo nọ ọ ruọ uzuazọ uviuwou rai.

Wọhọ epanọ oware nana nọ o via na u dhesẹ, okenọ orọo o tẹ nyaku ẹkporo, re a la no okọ na họ ifue na ha. Evaọ abọdekọ riẹ, evaọ oke ẹkporo, ẹria lele uruemu nọ o rọ Ẹme Ọghẹnẹ, Ebaibol na, o rẹ lẹliẹ orọo na vori o vẹ rehọ iẹe ziọ ame nọ ọ fọ. Onana họ oware nọ o via kẹ Thomas avọ Doris.

Thomas avọ Doris a rọo te ikpe 30 no nọ Thomas o ro muọ idi họ ẹda. Doris ọ tẹ jọ ọkọkora, aimava a tẹ t’ẹme orọo-ofa. Doris ọ tẹ rọ ẹme na kpọ omọvo Isẹri Jihova jọ ozọ. Osẹri na o te dhesẹ kẹ Doris oware nọ Ebaibol na ọ ta kpahe orọo, jẹ tuduhọ iẹe awọ nọ ọ varioma ruọ ẹhẹriẹ hẹ rekọ ọ kaki lele ọzae riẹ daoma gwọlọ ifue. Ere Doris o ru. Emerae jọ e ruọ emu no, ẹme orọo-ofa ọ tẹ thọrọ ai ẹro. Thomas avọ Doris a je kuobọgbe họre ebẹbẹ rai. Elele ohrẹ Ebaibol o bọ orọo rai ga o tẹ kẹ ae oke nọ a rẹ rọ gwọlọ ifue.

Oruọzewọ Evaọ Eware Kpobi

Ẹdhẹgbalọ ọrivẹ orọo o gwọlọ omodawọ gbe uvi uyoyou. Ekwakwa evo nana o gwọlọ re ohwo ọ jọ oruọzewọ evaọ akpọ ofruriọ. Ebaibol na ọ ta eme buobu kpahe oruọzewọ. Pọl ukọ na o kere se Ileleikristi ikpe-udhusoi ọsosuọ evaọ Judia nọ: ‘Ma gwọlọ ru eware kpobi avọ oruọzewọ.’ (Ahwo Hibru 13:18) Eme oyena u dhesẹ?

Ohwo oruọzewọ ọ rẹ ta uzẹme jẹ kare ofruriọ. Ọ rẹ jọ kpatiẹ evaọ usu riẹ kugbe amọfa—liọliọ, avọ ọghọ, orọnikọ avọ eviẹhọ hayo osuthọ họ. Ofariẹ, ohwo oruọzewọ yọ ohwo nọ o kiete nọ ọ rẹ wha ọrivẹ riẹ re he. Ahwo oruọzewọ a rẹ kẹ amọfa evaifihọ gbe udu, onọ u re su kpohọ uruemu omokpokpọ jẹ lẹliẹ ahwo ria tou.

Kọ ahwo oruọzewọ a rẹ wereva? Whaọ, a wo ẹjiroro nọ a rẹ rọ wereva. Ghelọ ogbekuo gbe ewhariọ nọ e da oria kpobi fia na—hayo ẹsejọhọ fikinọ e da akpọ fia—ahwo a rẹ kẹ ahwo oruọzewọ adhẹẹ. Evaọ ekiakiẹ jọ nọ a jọ udevie emoha ru, evaọ usu ahwo udhusoi nọ a nọ, oruọzewọ họ uruemu nọ ahwo 70 a rri nọ o mae ghae. Ofariẹ, epanọ ma kpako te kpobi, oruọzewọ yọ uruemu nọ ma rẹ jọ oma enọ ma re se egbẹnyusu gwọlọ.

A wuhrẹ Christine epanọ a re ro thuji rono okenọ ọ jọ ikpe 12 ze. Nọ ikpe e be nyaharo na ọ tẹ te riẹ epanọ a rẹ tọlobọ ziezi. Ọ ta nọ: “Edẹjọ ugho nọ mẹ rẹ wha kpozi u re bu te ₦220,000.” Rekọ a mu Christine ẹsibuobu, yọ ọ jẹ ria avọ ozọ nnọ o ti kpohọ uwou-odi. Okenọ Isẹri Jihova a ta kẹe kpahe oware nọ Ebaibol na ọ ta kpahe oruọzewọ, itee uruemu Ebaibol na i te si Christine urru. O te wuhrẹ epanọ o re ro yoẹme kẹ uthubro na: “Jọ ọnọ o re tho uji na o gbe tho ofa ha.”—Ahwo Ẹfẹsọs 4:28.

Evaọ okenọ Christine ọ rọ họ-ame wọhọ omọvo Isẹri Jihova, ọ gbẹ jọ oji hi. Ọ jẹ daoma jọ oruọzewọ evaọ eware kpobi, keme Isẹri na a rẹ rehọ oruọzewọ gbe ekwakwa Ileleikristi efa zaro ho. Obe-usi na Lausitzer Rundschau o niyẹrẹ nọ: “Isẹri na a jọ ukoko rai rri izi uruemu wọhọ oruọzewọ, owowa, gbe uyoyou ọrivẹ kpehru gaga.” Ẹvẹ Christine o roro kpahe enwene nọ ọ jọ uzuazọ riẹ ru na? “Eva e be mae were omẹ enẹna nọ mẹ siọ uji-utho ba no na. Oma o rọ omẹ wọhọ ohwo nọ o wo ọghọ evaọ ẹwho na.”

Okogho-Ahwo na Kpobi A re Wo Erere

Ahwo nọ a tẹrovi erivẹ orọo rai ọvo gbe enọ e rọ oruọzewọ orọnikọ a rẹ mai wo evawere ọvo ho rekọ a re w’iruo kẹ ẹwho rai soso. Enọ i re fi ahwo họ iruo a rẹ gwọlọ iruiruo nọ i wo uruemu ọwhariọ họ. Mai kpobi ma gwọlọ wo erivẹ nọ a re fievahọ, yọ ma rẹ gwọlọ eware dẹ evaọ obọ ọthueki oruọzewọ. Kọ ma gbe wo adhẹẹ kẹ isu, iporisi, gbe iguẹdhọ nọ e kare ofruriọ? Irere buobu i re te ẹwho otẹrọnọ ahwo riẹ a wo oruọzewọ wọhọ uzi, orọnikọ okenọ eware e tẹ be riẹ nya ọvo ho.

Ofariẹ, imava-orọo nọ e tẹrovi ohwohwo họ ehri iviuwou egaga. Yọ ahwo buobu a rẹ rọwo kugbe osu Europe na ọnọ o whowho nọ: “Rite inẹnẹ, uviuwou nọ ma riẹ n’otọ ze na o gbẹ rọ adhẹzọ nọ ọ mai wuzou ọrọ ufuoma gbe okugbe ohwo-akpọ.” Ọriakugbe udhedhẹ uviuwou na họ oria nọ ekpako gbe emaha a jo wo uvẹ nọ o mae rro nọ a rẹ rọ jọ ovo. Fikiere enọ e be tẹrovi ohwohwo evaọ orọo a bi fiobọhọ bọ okogho-ahwo nọ ọ doma mu.

Dai roro irere nọ ahwo kpobi a re wo otẹrọnọ ahwo nọ ezae gbe eyae a dhẹ seba, erọo nọ ekọto e fa, hayo ẹdhoguo emọ nọ esẹ gbe ini i bi hrowo e riẹ hẹ. Kọ ẹvẹ o rẹ jọ otẹrọnọ enọ e rẹ tọlobọ, ẹji, enọ e rẹ whariẹ igho, ahwo egọmeti ogbekuo, hayo ekiotọ-eriariẹ ofruriọ e gbẹ riẹ hẹ? Kọ oyena o wọhọ ewezẹ gheghe? O rọ ere he rọkẹ enọ i wo uvi isiuru kpahe Ebaibol na gbe oware nọ o ta kpahe obaro mai. Ẹme Ọghẹnẹ ọ yaa nnọ kẹle na Uvie Mesaya Jihova o te rehọ esuo okogho ahwo-akpọ kpobi evaọ otọakpọ na. Evaọ otọ Uvie oyena, a ti wuhrẹ ahwo riẹ kpobi re a ria lele izi Ebaibol na. Eva oke oyena, “ikiẹrẹe e rẹ te rehọ otọ na reuku, a vẹ jẹ ria ae bẹdẹ.”—Olezi 37:29.

Itee Uruemu Ebaibol na Họ Enọ E Mai Woma

Ima ahwo buobu nọ e kiẹ Ikereakere Efuafo na riwi no a wo ovuhumu no nnọ ohrẹ Ebaibol u no ereghẹ Ọghẹnẹ ze, onọ u kpehru gaga vi iroro ohwo-akpọ. Ahwo otiọye na a rehọ Ebaibol na wọhọ obe evaifihọ nọ o r’oja kẹ uzuazọ evaọ akpọ ọgbọna. A riẹ nọ o rọ kẹ erere rai re a yo ohrẹ Ẹme Ọghẹnẹ.

Fikiere, ahwo otiọye na a re yo ohrẹ Ebaibol na: “Rehọ ẹroọrọsuọ ra kpobi kpahe ỌNOWO na whọ rehọ eva kpahe ẹriẹ omobọ ra ha. Eva idhere ra kpobi ọ thọrọ owhẹ ẹro ho, o ve ti ruọ idhere ra kpọvi.” (Itẹ 3:5, 6) Evaọ ere oruo, a ru izuazọ rai nyaharo viere gaga no, a tẹ jẹ wha erere se izuazọ ahwo nọ a wariẹ e rai họ no. Yọ a fieva rai kpobi họ ‘uzuazọ nọ o be tha na,’ okenọ ahwo-akpọ kpobi a ti ro lele itee uruemu Ebaibol.—1 Timoti 4:8.

[Oruve-oboto]

[Eme no a fi egba ho no o rro ewe-obe avo 5]

Evaọ etoke ẹkporo orọo, ẹria lele ute Ebaibol o rẹ lẹliẹ orọo vori o vẹ jẹ rehọ iẹe ziọ ame nọ ọ fọ

[Eme no a fi egba ho no o rro ewe-obe avo 6]

Ghelọ ofruriọ nọ ọ da oria kpobi fia—hayo ẹsejọhọ fikinọ ofruriọ ọ da akpọ fia—ahwo a rẹ kẹ ahwo oruọzewọ adhẹẹ