Uruemu Ezi U bi Kiekpo

“EWARE itieye na e jẹ hae via vẹre he,” ere Helmut Schmidt, okere-obe Germany vẹre, ọ ta. O je bruenu fikiọ ofruriọ ahwo egọmeti jọ kẹle nọ a kporo fihọ obe-usi. Ọ ta nọ: “A ku uruemu ezi fiẹ no fiki oriobọ.”

Ibuobu e rẹ rọwo kugbei. Ute uruemu ezi nọ ma riẹ no Ẹme Ọghẹnẹ ze, Ebaibol na, gbe enọ ahwo buobu a jẹrehọ notọ ze wọhọ ọkpọvio ọrọ oware nọ u woma gbe onọ u yoma a bi go ai họ akotọ. Onana o rọ uzẹme makọ evaọ ekwotọ nọ Egagọ-Ileleikristi i bi jo titi dede.

Kọ Ute Uruemu Ezi Ebaibol na U w’Iruo?

Ute uruemu ezi nọ u no iwuhrẹ Ebaibol ze i kugbe oruọzewọ gbe ekiete.Ghele na, ewhariọ, ogbekuo, gbe ofruriọ i bi titi. Emagazini na The Times ọrọ London o niyẹrẹ nnọ otu nọ o re mu igbulegbu a “fe no ẹkwoma imu-egaga nọ iporisi i mi igbulegbu jọ nọ a rẹ whariẹ rọkẹ igbulegbu efa re a wariẹ zẹ ae hayo ẹkwoma erueta nnọ a ruẹ imuẹro nọ a re ro kru igbulegbu na ha.” Evaọ Austria, a ta nọ ofruriọ isiọranse o da oria kpobi fia. Yọ evaọ Germany, akpọ o gbe utu otokiẹ-eriariẹ na unu nọ ekiotọ a ruẹ “ofruriọ nọ ọ mae rro kpobi evaọ otokiẹ-eriariẹ Germany” kẹle na. A ta nọ profẹsọ jọ, “ọnọ ọ viodẹ gaga evaọ udevie ekiotọ

egẹgẹ-uzuazọ erọ Germany,” o je mu kere jẹ gbaviẹ iyẹrẹ iruo riẹ gaga.

Uruemu ezi orọ Ebaibol u te je kugbe ẹrotọvi ọrivẹ ohwo evaọ orọo, onọ o gwọlọ nọ o rẹ jọ usu ebẹdẹ bẹdẹ. Rekọ ezae avọ eyae buobu a be jọ ekọto fa erọo rai. Obe-usi Kathọlik na, Christ in der Gegenwart (Oleleikristi Ọgbọna) o niyẹrẹ nọ “makọ evaọ Switzerland nọ a jọ ‘rovie aro tere he,’ erọo i bi dhe ẹfẹfa.” Evaọ obọ Netherlands, erọo 33 evaọ udhusoi e be fa. Uvovo aye jọ nọ o muẹrohọ inwene uyerakpọ evaọ Germany evaọ ikpe jọ nọ e vrẹ na o kere kpahe awaọruọ riẹ: “Enẹna a bi rri orọo fihọ oware anwae gbe onọ u no otọ no. Ahwo a gbẹ be rehọ ohwo nọ a re gbe lele rria bọwo ẹdẹ uwhu rai hi.”

Evaọ abọdekọ riẹ, ima ahwo buobu a rehọ ute uruemu nọ a jọ Ebaibol na wuhrẹ na wọhọ oware evaifihọ nọ o r’oja kẹ uzuazọ evaọ akpọ ọgbọna. Imava jọ nọ e rọo nọ e be rria uwhru Switzerland avọ Germany a ruẹ nọ ẹrria lele uruemu ezi Ebaibol na u ru rai wereva viere. Rọkẹ ae, “ọkpọvio ọvuọvo ọ rọ kẹ k’abọ k’abọ uzuazọ. Ọkpọvio ọyena họ Ebaibol na.”

Ẹvẹ who roro? Kọ Ebaibol na ọ sae jọ uvi ọkpọvio? Kọ ute uruemu nọ Ebaibol na o wuhrẹ na u w’iruo nẹnẹ?