Emamọ Usi Uvie Na—Eme O Rọ?

UKPE n’ukpo evaọ ekwotọ 235 nya akpọ na wariẹ, ahwo 6,035,564, t’emaha t’ekpako, a raha euwa 1,171,270,425 rọ t’ẹme kẹ amọfa kpahe iẹe. U te no ẹmeunu nọ a rọ tae no, a fi ebe ima 700 nọ a kporo họ ada kẹ ahwo ro whowho iei je ru ei vẹ. A tẹ jẹ ghale ekasẹte itepu gbe erọ ividio idu buobu ro whowho iei. Didi “oware” ma be ta kpahe na?

“OWARE” na họ emamọ usi Uvie Ọghẹnẹ. Evaọ uzẹme, a re jọ oke ofa ovuọvo evaọ ikuigbe ohwo-akpọ whowho “ovuẹ usiuwoma uvie na” kẹre te epanọ ma be rue riẹ nẹnẹ na ha.—Matiu 24:14.

Enọ i bi ru iruo ewhowho gbe ewuhrẹ akpọ-soso nana yọ ahwo unevaze. Rono eriwo akpọ na ze, a rẹ sai rri rai wọhọ ahwo nọ a te kẹ iruo na ha. Fikiere, kọ eme ọ be wha aruọwha gbe obokparọ rai na ze? Ẹgba emamọ usi Uvie na yọ ugogo oware jọ, keme o rọ usi kpahe eghale nọ i ti te ahwo-akpọ obọ. Enana yọ eghale nọ ahwo kpobi a bi siuru rai—evawere, ufuoma rono ọbẹwẹ ugho, emamọ egọmeti, udhedhẹ gbe omofọwẹ, gbe oware ofa jọ nọ ibuobu a re roro nọ o lọhọ họ—uzuazọ ebẹdẹ bẹdẹ! Evaọ uzẹme, onana yọ emamọ usi kẹ ahwo nọ a be gwọlọ otofa gbe ẹjiroro uzuazọ. Ẹhẹ, whọ sai wo eghale enana kpobi gbe efa buobu whọ tẹ jẹ emamọ owọ kpahe ewhowho emamọ usi Uvie na.

Eme Họ Uvie Na?

Kọ, eme họ Uvie nọ a bi whowho wọhọ emamọ usi na? Oye họ Uvie nọ a wuhrẹ ima ahwo buobu no re a lẹ kẹ evaọ eme nana nọ ma riẹ ziezi na: “Ọsẹ mai nọ ọ rọ obọ odhiwu, odẹ ra ojọ ọrẹri. Uvie ra oze, epanọ a rọ obọ odhiwu ru orọ eva ra, ru re a jọ akpọ na ru ere re.”—Matiu 6:9, 10.

Oye họ Uvie nọ Daniẹl ọruẹaro Hibru na ọ ta kpahe ikpe-udhusoi ẹko 25 nọ e vrẹ na evaọ okenọ o kere nọ: “Ọghẹnẹ obọ odhiwu na ọ rẹte rehọ uvie nọ a rẹ raha ha muẹ, hayo a rẹte se isuẹsu riẹ ba kẹ amọfa ha. Ọ rẹte whọlọ ivie na kpobi ọ vẹte rehọ ai ze oba, ọ vẹte jọ bẹdẹ.”—Daniẹl 2:44.

Fikiere, emamọ usi na u kie kpahe Uvie, hayo egọmeti, ọrọ Ọghẹnẹ nọ o ti si emuemu kpobi no o vẹ rehọ udhedhẹ su otọakpọ na. O ti ru ẹjiroro ọsosuọ Ọnọma na kẹ ahwo-akpọ gbe otọakpọ na gba.—Emuhọ 1:28.

“Uvie Odhiwu O Kẹle Ino”

Enwenọ ikpe 2,000 nọ e vrẹ, ọzae omarọkẹ jọ nọ ẹgọ gbe uruemu riẹ u si iroro ahwo rehọ ọ kaki whowho emamọ usi Uvie na evaọ ẹgbede. Ọzae ọyena họ Jọn Ọhọahwo-Ame na, ọmọzae ozerẹ Ju na Zekaraya, avọ aye riẹ, Ẹlizabẹt. Jọn ọ whẹ ẹgọ eto-kamẹl họ, avọ umueku oviẹ-arao wariẹ eku riẹ, wọhọ epaọ Elaeja ọruẹaro na, ọnọ ọ jọ uwoho riẹ. Rekọ ovuẹ riẹ họ oware nọ u si iroro ibuobu rehọ. O whowho nọ: “Wha kuevarẹriẹ, keme uvie odhiwu o kẹle ino.”—Matiu 3:1-6.

Ahwo nọ a jẹ gaviezọ kẹ Jọn na yọ ahwo Ju, enọ e ta nọ ae yọ egegagọ Ọghẹnẹ uzẹme na, Jihova. Wọhọ orẹwho, a wo ọvọ Uzi na ẹkwoma Mosis oware wọhọ ikpe 1,500 nọ e vrẹ. Etẹmpol oride na ọ gbẹ jọ Jerusalẹm, oria nọ a je jo dheidhe wọhọ epanọ a jọ Uzi na ta. U mu ahwo Ju na ẹro nọ egagọ rai i kiehọ evaọ aro Ọghẹnẹ.

Rekọ, nọ a jẹ gaviezọ kẹ Jọn, ahwo jọ a te muhọ evuhumu nnọ egagọ rai e rọ epanọ a bi roro iei anwẹdẹ hẹ. Uruemu gbe eriariẹ-ifofe Griki i vivie ro iwuhrẹ egagọ ahwo Ju na no. Uzi nọ Ọghẹnẹ ọ kẹ rae ẹkwoma Mosis na a gbe rie ku no, u gbe tube w’iruo ho, fiki erọwọ gbe iruemu-anwae ahwo-akpọ. (Matiu 15:6) Avọ isu egagọ egeva rai nọ e kare ohrọ nọ i su rai thọ no, ibuobu a gbẹ jẹ gọ Ọghẹnẹ evaọ edhere nọ ọ jẹrehọ họ. (Jemis 1:27) U fo re a kurẹriẹ no izieraha rai wọso Ọghẹnẹ jẹ wọso ọvọ Uzi na.

Eva oke oyena, ahwo Ju buobu a je rẹro ẹtha Mesaya nọ a yeyaa riẹ, hayo Kristi na, yọ ejọ i je roro kpahe Jọn nọ: “Sọ ọye họ Kristi na.” Rekọ Jọn ọ ta nọ ọye họ Kristi hi ikpoye ọ kpọ ae bru omọfa, ọnọ ọ ta kpahe nọ: “Me te epanọ mẹ rẹ rọ ra ifi eviẹ riẹ hẹ.” (Luk 3:15, 16) Nọ o je dhesẹ Jesu kẹ ilele riẹ, Jọn o whowho nọ: “Ri Omogodẹ Ọghẹnẹ, ọ nọ ọ wha izieraha akpọ na vrẹ!”—Jọn 1:29.

Oyena ghinọ emamọ usi, keme Jọn o je dhesẹ edhere nọ o re su kpohọ uzuazọ gbe evawere kẹ ahwo—Jesu, ọnọ “ọ wha izieraha akpọ na vrẹ.” Wọhọ emọ Adamu avọ Ivi, a yẹ ahwo-akpọ kpobi evaọ otọ olahiẹ uzioraha gbe uwhu. Ahwo Rom 5:19 u ru rie vẹ nọ: “Wọhọ epanọ a rọ fiki ẹme-ọsibeyo omọvo [Adamu] ru ibuobu erahauzi na, nwanọ ere ẹmeoyo omọvo [Jesu] ibuobu iro wo ẹrẹreokie re.” Jesu, wọhọ omogodẹ idheidhe, ọ ‘te rehọ vrẹ’ hayo ku uyero oja ahwo-akpọ rẹriẹ. Ebaibol na o ru rie vevẹ nọ: “Uwhu họ osa eware uyoma; rekọ okẹ Ọghẹnẹ họ uzuazọ ebẹdẹ bẹdẹ, fiki Jesu Kristi Ọnowo mai.”—Ahwo Rom 6:23.

Wọhọ ohwo-akpọ ọgbagba—evaọ uzẹme, ọzae nọ ọ mae rro nọ ọ rria no—Jesu o whowho emamọ usi na. Ikuigbe Ebaibol na eva Mak 1:14, 15 e ta k’omai nọ: “Whaọ nọ a mu Jọn no, Jesu ọ tẹ ze Galili, jẹ vuẹovuẹ usiuwoma Ọghẹnẹ, anọ, ‘Oke u te [no], uvie Ọghẹnẹ o kẹle ino: Wha kuevarẹriẹ, wha rọwo usiuwoma na.’ ”

Ahwo nọ a j’owọ kẹ ovuẹ Jesu je fi ẹrọwọ họ emamọ usi na a wo eghale buobu. Jọn 1:12 o ta nọ: “U tho kpobi nọ i kru [Jesu] rehọ, jẹ rọ ẹroso odẹ riẹ, eye ọ kẹ ogaga re a jọ emọ Ọghẹnẹ.” Fiki nọ a rọ emọ Ọghẹnẹ, a ruọ edhere nọ a re ro wo osohwa uzuazọ ebẹdẹ bẹdẹ.—1 Jọn 2:25.

Rekọ uvẹ-ọghọ ewo eghale Uvie na o nya mu ahwo ikpe-udhusoi ọsosuọ na ọvo ho. Wọhọ epanọ ma kake fodẹ na, a bi whowho je wuhrẹ kpahe emamọ usi Uvie Ọghẹnẹ evaọ otọakpọ na kpobi. Fikiere eghale Uvie e gbẹ riẹ. Eme who re ru hrọ re who wo eghale itieye na? Uzoẹme n’otha na u ti ru ei vẹ.