Iwhowho Uvie A n’Iyẹrẹ

Ọghẹnẹ O Ririe Irui-Oviẹ Riẹ No

AHWO nọ a nwene edhere uzuazọ rai rọwo kugbe izi gbe ehri-izi Jihova a re wo eghale buobu. Dede nọ eruo inwene nọ i fo o lọhọ ẹsikpobi hi, obufihọ gbe uduotahawọ o riẹ. (Olezi 84:11) Ikuigbe obotọ na kpahe oware nọ o via evaọ Obọze-Ovatha-Ọre Esia u dhesẹ onana via.

Okenọ Osẹri jọ nọ o no France ze o kpohọ erẹ-eriosehọ, o te lele ohwo jọ nọ o wo uwou-eki nọ a re se Kima t’ẹme kpahe ẹjiroro Jihova rọkẹ otọakpọ na. O te je fi obe na Whọ Sae Ria Bẹdẹ Bẹdẹ eva Aparadase ọ Otọakpọ h’ada kẹ Kim. Nọ o je rovie obe na rri, Kim o te rovie ku eme na, “o ve ti ririe irui kpobi no aro rai.” (Eviavia 21:4) Kim ọ kareghẹhọ nọ: “Owọ Ebaibol nana u ghine duobọte omẹ. Nọ a be ruẹ omẹ nọ mẹ be hwẹ jẹ t’ẹme ẹdẹ okikpo evaọ uwou-eki na, ono ọ rẹ sae riẹ nọ me te t’uwou no evaọ owọwọ, mẹ rẹ viẹ ruọ owezẹ?” Nọ o je dhesẹ ehri uweri riẹ, ọ ta nọ: “Me bi lele ọzae jọ rria anwọ ikpe 18 yọ mẹ jọ ọkora fikinọ ọ se nọ ọ rẹ rọo omẹ. Mẹ gwọlọ nyasiọ edhere uzuazọ nana ba, rekọ fikinọ me lele i riei rria krẹkri no na, me wo udu nọ me re ro ru ere he.”

U kri hi, omọvo Isẹri Jihova jọ nọ a re se Linh o te muọ uwuhrẹ Ebaibol họ kugbe Kim. Kim ọ ta nọ: “Oma o jẹ kpakpa omẹ re me fi iwuhrẹ Ebaibol na h’iruo. Wọhọ oriruo, me siobọno egagọ esemọ mẹ, dede nọ onana o wha ọwọsuọ n’obọ uviuwou mẹ ze. Ofariẹ, mẹ daoma re me ru usu mẹ kugbe ọzae na rọwo kugbe uzi, rekọ ọrivẹ mẹ ọ se. Evaọ etoke ẹbẹbẹ ọnana, Osẹri na nọ o no France ze na ọ jẹ hai vi ebe nọ a kporo no Ebaibol ze s’omẹ, yọ Linh ọ jọ uduotahawọ k’omẹ gaga. Odiri gbe obufihọ uyoyou inievo-emetẹ ivẹ nana i fiobọhọ k’omẹ thihakọ bẹsenọ me ti ro vuhu oghẹrẹ ohwo nọ ọrivẹ mẹ na ọ ghinẹ rrọ mu. Mẹ tẹ te ruẹ nọ o wo ‘eyae’ 5 gbe emọ 25 no! Onana o tẹ k’omẹ udu nọ mẹ rọ nya se iẹe ba.

“Re mẹ kwa no uwou ulogbo nọ u kiehọ omẹ oma kpohọ uwou osese o lọhọ họ. Fibae, ọrivẹ mẹ vẹre na o te je kpokpo omẹ re me zihe ze ti lele iei rria, tube bi guegue omẹ nọ mẹ tẹ se ọ te kpare asidi ku omẹ oma. Avọ obufihọ Jihova, mẹ sai ru oware nọ u kiehọ.” Kim ọ ruabọhọ ẹnyaharo nọ uwhremu na ọ tẹ te họ-ame evaọ April 1998. Fibae, inievo ivẹ riẹ gbe ọmọzae ikpe-ikpegbọ riẹ a te mu Ebaibol na họ ewuhrẹ kugbe Isẹri Jihova.

Kim ọ ta nọ: “Mẹ jẹ hai roro nọ uzuazọ mẹ o te kare ẹruore bẹdẹ bẹdẹ. Rekọ, nẹnẹ na, mẹ be wereva, yọ mẹ gbẹ be viẹ evaọ aso ho. Jihova o ririe irui-oviẹ no ibiaro mẹ no.”

[Oruvẹ-obotọ]