A Rri Ileta Riẹ Ghaghae

Brooke yọ Osẹri Jihova jọ nọ ọ be rria United States. Evaọ etoke okpẹyao COVID-19 na, ileta o je kere rọ ta usi uwoma. Evaọ oke yena, Brooke ọ jẹ hai kere ileta buobu koka koka. Rekọ nọ o kere ileta te ukpe gbe emerae ezeza no, ọ gbẹ gwọlọ nọ o re kere he. Ri bọo oke yena, omọvo ọvo họ ohwo nọ ọ za zihe ze no, yọ ohwo na ọ vẹvẹ e riẹ unu inọ ọ gbẹ dawo iẹe kere ileta sei ofa ha. Brooke o je roro nọ ileta riẹ i bi fiobọhọ kẹ ahwo ho.

Nọ oke o be nya na, Osẹri Jihova ọfa jọ nọ a re se Kim nọ o bi ru iruo evaọ ebanke, ọ tẹ vuẹ Brooke kpahe ẹme nọ ohwo jọ nọ ọ nyaziọ obọ ebanke rai ọ ta. Ohwo na ọ vuẹ Kim kpahe ileta nọ Osẹri Jihova jọ o kere sei, yọ obọ a ro kere ileta na. Uwhremu na, ọ tẹ te riẹ nọ Brooke họ ohwo nọ o kere ileta na! Oka nọ u lele i rie, ohwo na ọ tẹ wariẹ ziọ ebanke na. Nọ avọ Kim a je gbiku, ohwo na ọ tẹ nọ Kim sọ ọ sae ziọ ewuhrẹ ukoko Isẹri Jihova. Yọ evaọ oke yena, ividio a jẹ hai ro thuru kugbe ohwohwo ru ewuhrẹ.

Uwhremu na, Osẹri Jihova ọfa jọ nọ a re se David, ọ tẹ vuẹ Brooke kpahe ileta riẹ jọ nọ o kere se ohwo nọ a gbe bi ru iruo. Ileta na o duobọte ohwo na keme obọ a ro kere iei. Ọ ta nọ: “U fo nọ ahwo buobu a re dhesẹ nọ a wo isiuru kpahe amọfa wọhọ ohwo nana.” David ọ tẹ rọ uvẹ yena rọ Ebaibol ta usi uwoma kẹe. Ọ tẹ jẹ ta kẹe nọ ọ te hae rehọ ebe ukoko na se ei, yọ eva e were ohwo iruo riẹ na gaga.

Isẹri Jihova a riẹ nọ evaọ odibọgba rai, ibi Uvie na jọ nọ a kọ fihọ idu ahwo i re woma. Rekọ orọnọ ẹsikpobi a rẹ riẹ hẹ nọ ibi na e tẹ be dhẹ ze. (Ọtausiuwoma Na 11:5, 6) Ghele na, eware nọ e via na e lẹliẹ eva were Brooke je fiobọhọ kẹe ruẹ nọ usi uwoma ota riẹ o rrọ uvrẹvru hu.—1 Ahwo Kọrint 3:6.