Eghale Jihova I Re Ru Omai Fe

“Oghale ỌNOWO na u re ru ohwo họ ọdafe, o re ku enuobro kugbe ei hi.”—ITẸ 10:22.

1, 2. Fikieme evawere i gbe ro no ekwakwa efe ze he?

ILALE ekwakwa efe o be kpọ izuazọ ima ahwo buobu nẹnẹ na. Kọ ekwakwa efe i bi ru ai wereva? “Mẹ sae kareghẹhọ oke ovuovo ho nọ ahwo a ro bruenu enẹ kpahe uyero uzuazọ rai,” ere obe-usi na, The Australian Women’s Weekly, o ta. U fibae nọ: “U gbunu gaga. A ta k’omai nọ igho e vọ Australia, inọ uzuazọ u ti woma enẹ okeovo ho. . . . Ghele na enuobro ọ da orẹwho na soso fia. T’ezae t’eyae a jọ oma rai riẹ nọ oware jọ o kare izuazọ rai rekọ a be sae riotọ oware oyena ha.” Ẹvẹ eme Ikereakere na e rrọ uzẹme te inọ evawere hayo uzuazọ u re no eware nọ ma wo ze he!—Ọtausiwoma Na 5:10; Luk 12:15.

² Ebaibol na o wuhrẹ nọ oghale Ọghẹnẹ evawere nọ e mae rro kpobi i re no ze. Rọ kpahe onana, Itẹ 10:22 o ta nọ: “Oghale ỌNOWO na u re ru ohwo họ ọdafe, o re ku enuobro kugbe ei hi.” Ẹsibuobu edada i re no uvo-uthei orọ ewo ekwakwa efe ze. Nwani fo, Pọl ukọ na ọ vẹvẹ unu nọ: “Ahwo nọ a re siuru efe a re kie ruọ ẹdawọ, je kie ẹta, je kie ruọ urusio eware igheghẹ avọ oma-onhwa buobu nọ i re suẹ ahwo ruọ ekie gbe ẹraha. Keme uyoyou kpahe igho oye họ owọ imuomu kpobi; fiki eguọlaguọlọ na oye o lẹliẹ otu jọ vru siọ orọwọ na ba a jẹ rehọ inwe buobu duwu eva rai.”—1 Timoti 6:9, 10.

3. Fikieme edawọ i je te idibo Ọghẹnẹ?

³ Evaọ abọdekọ riẹ, eghale nọ e kare edada i re te enọ e “ruabọhọ ezọgaviẹ kẹ urru Jihova.” (Iziewariẹ 28:2, NW ) Ghele na, ahwo jọ a sae nọ nnọ, ‘Otẹrọnọ edada i re lele oghale Jihova ha, fikieme idibo Ọghẹnẹ buobu a jẹ be ruẹ-uye?’ Ebaibol na o dhesẹ nọ Ọghẹnẹ ọ rẹ kuvẹ kẹ edawọ re i te omai rekọ Setan, eyero omuomu riẹ, gbe oma ọ sebaẹgba mai họ enọ e be ghinẹ wha edawọ na ze. (Emuhọ 6:5; Iziewariẹ 32:4, 5; Jọn 15:19; Jemis 1:14, 15) Jihova họ ehri ọ “kokẹ uwoma kokẹ uwoma avọ okẹ nọ o gba kiete kpobi.” (Jemis 1:17) Fikiere, eghale riẹ e rẹ wha edada ze vievie he. Nọ o rrọ ere na, j’oma t’ẹme kpahe ejọ evaọ ekẹ Ọghẹnẹ nọ e gba kiete na.

Ẹme Ọghẹnẹ—Okẹ Oghaghae

4. Didi oghale gbe okẹ oghẹrẹsa ahwo Jihova a be reawere rai evaọ “oke urere” nana?

⁴ Rọ kpahe “oke urere” na, eruẹaruẹ Daniẹl e ta nọ: “Eriariẹ i veti vihọ.” Rekọ, a rehọ eme nana dhesẹ umuo nọ eriariẹ na i ti te: “Orumuomu ọvo o reti vuhu muẹ hẹ; rekọ enọ i wo areghẹ a reti vuhu muẹ.” (Daniẹl 12:4, 10) Dai roro oyena! Areghẹ odidi Ọghẹnẹ ọye a ro dhesẹ Ẹme Ọghẹnẹ via—maero kọ eruẹaruẹ na—nọ u ru rie nọ irumuomu na a gbẹ sai ro wo uvi otoriẹ riẹ hẹ, dede na ahwo Jihova a re wo otoriẹ riẹ. Ọmọ Ọghẹnẹ ọ lẹ nọ: “Ọsẹ Ọnowo Odhiwu gbe akpọ, me yere owhẹ epanọ [whọ ko] eware enana dhere iwoareghẹ gbe erieriariẹ, whọ tẹ rehọ ae via kẹ emọ-efofa.” (Luk 10:21) Ẹvẹ oghale riẹ o rro te nọ ma ro wo okẹ oghaghae orọ Ẹme Ọghẹnẹ nọ a kere, Ebaibol na, jẹ rrọ usu ahwo nọ Jihova ọ rehọ orimuo abọ-ẹzi kẹ!—1 Ahwo Kọrint 1:21, 27, 28; 2:14, 15.

5. Eme họ areghẹ, kọ ẹvẹ ma sai ro woi?

⁵ Ma hai wo orimuo abọ-ẹzi vievie he ogbẹrọ fiki “areghẹ nọ o nehru ze” he. (Jemis 3:17) Areghẹ họ ẹgba nọ a rẹ rọ rehọ eriariẹ gbe otoriẹ ruiruo ro ku ebẹbẹ họ, whaha hayo tu okpẹtu n’oma, le itee t’obọ, hayo kẹ uvi ohrẹ. Ẹvẹ ma re ro wo areghẹ Ọghẹnẹ? Itẹ 2:6 o ta nọ: “ỌNOWO na ọ rẹ kẹ areghẹ, evaọ unu riẹ eriariẹ gbe otoriẹ i re no tha.” Ẹhẹ, otẹrọnọ ma ruabọhọ olẹ kẹ areghẹ, Jihova ọ te rọ areghẹ ghale omai, nwane wọhọ epanọ ọ kẹ Solomọn Ovie na “areghẹ gbe iroro otọ-oriẹ” na. (1 Ivie 3:11, 12; Jemis 1:5-8) Re ma wo areghẹ, ma rẹ jẹ ruabọhọ ezọgaviẹ kẹ Jihova ẹkwoma ewuhrẹ gbe efihiruo Ẹme riẹ ẹsikpobi.

6. Fikieme o jẹ rọ oware areghẹ re ma fi izi gbe ehri-izi Ọghẹnẹ h’iruo evaọ uzuazọ mai?

⁶ Iriruo areghẹ Ọghẹnẹ nọ e viodẹ i dhesẹ oma via evaọ izi gbe ehri-izi Ebaibol na. Enana e rẹ k’omai erere evaọ edhere kpobi—evaọ ugboma, iroro, gbe evaọ abọ-ẹzi. Nwani fo, ọso-ilezi na ọ so nọ: “Uzi ỌNOWO o gbakiete, o rẹ jaja ẹzi aro; isẹri-ise ỌNOWO umuẹro, o rẹ rọ areghẹ kẹ iwewe; iruo ỌNOWO i kiete, e rẹ ghariẹ eva; ujaje ỌNOWO o rẹ fuafo, o rẹ lẹliẹ aro ruẹ ude; ozodhẹ kẹ ỌNOWO u re vevẹ, o rẹ jọ bẹdẹ bẹdẹ; iziẹibro ỌNOWO uvi oziẹ, ai kpobi e gbobọ kiẹrẹe. I fo ẹguọlọ vi idọloro, vi idọloro ezi eghaghae na.”—Olezi 19:7-10; 119:72.

7. Iyẹrẹ vẹ i re no erivo itee ikiẹrẹe Ọghẹnẹ ze?

⁷ Evaọ abọdekọ riẹ, ahwo nọ a rri itee ikiẹrẹe Ọghẹnẹ vo a re duku evawere gbe ufuoma nọ a gwọlọ họ. U ti kri hi, a te ruẹ nọ a rẹ rọ Ọghẹnẹ jehwẹ hẹ, keme ohwo o re vu oware nọ ọ kọ. (Ahwo Galesha 6:7) Ima ahwo buobu nọ a rri ehri-izi Ebaibol vo a bi vu iyẹrẹ iyoma wọhọ udihọ nọ a gwọlọ họ, eyao etọtọ, hayo uruemu nọ o reria obọ no nọ u re kpe oma na. Ajokpanọ a kurẹriẹ je nwene edhere uzuazọ rai, ukuhọ riẹ edhere rai o ti su ai kpohọ uwhu gbe ẹsejọhọ ọraha n’obọ Ọghẹnẹ ze.—Matiu 7:13, 14.

8. Fikieme enọ i you Ẹme Ọghẹnẹ a jẹ be wereva?

⁸ Rekọ, eghale buobu i ti te ahwo nọ a you Ẹme Ọghẹnẹ je bi fi ei h’iruo enẹna gbe evaọ obaro na. A ghine wo ufuoma fiki uzi Ọghẹnẹ, be ghinẹ wereva, yọ a be rọ ọwhọ hẹrẹ oke nọ a ti ro wo ufuoma no uzioraha gbe ikpomahọ uwhu riẹ. (Ahwo Rom 8:20, 21; Jemis 1:25) Ẹruore ọnana o muẹro keme ọ roma hwa okẹ uyoyou Ọghẹnẹ nọ o mae rro kpobi kẹ ahwo-akpọ—idhe ẹtanigbo ọrọ Ọmọ ọvo riẹ, Jesu Kristi. (Matiu 20:28; Jọn 3:16; Ahwo Rom 6:23) Okẹ obọdẹ utioye na o kẹ imuẹro edidi uyoyou Ọghẹnẹ kẹ ahwo-akpọ jẹ kẹ imuẹro eghale nọ i wo umuo ho rọkẹ ahwo kpobi nọ e ruabọhọ ezọgaviẹ kẹ Jihova.—Ahwo Rom 8:32.

Ma rẹ Kẹ Uyere Fiki Okẹ Ẹzi Ọfuafo Na

9, 10. Ẹvẹ ma re ro wo erere no okẹ Jihova orọ ẹzi ọfuafo na ze? Kẹ oriruo jọ.

⁹ Okẹ uyoyou Ọghẹnẹ ofa nọ ma rẹ kẹ uyere fiki riẹ họ ẹzi ọfuafo riẹ. Evaọ ẹdẹ Pẹntikọst 33 C.E., Pita ukọ na ọ tuduhọ ogbotu nọ ọ jọ evaọ Jerusalẹm awọ nọ: “Wha kuevarẹriẹ re a họ owhai omomọvo ame fihọ evaọ odẹ Jesu Kristi re a rehọ izieraha rai vrẹ owhai; wha veti wo okẹ Ẹzi Ẹri na.” (Iruẹru 2:38) Nẹnẹ, Jihova ọ rẹ rehọ ẹzi ọfuafo kẹ idibo riẹ nọ e rehọ oma mudhe no nọ e lẹ kẹe jẹ gwọlọ ru oreva riẹ. (Luk 11:9-13) Evaọ oke anwae, ẹgba ọgaga nana nọ ọ mae rro evaọ ehrugbakpọ na—ẹzi ọfuafo, hayo ogaga iruo Ọghẹnẹ—o kẹ ezae gbe eyae ẹrọwọ, jegbe Ileleikristi ọsosuọ na ogaga. (Zekaraya 4:6; Iruẹru 4:31) O rẹ sai ru ere k’omai re, dedenọ ma sae rẹriẹ ovao ku ezadhe hayo use-abọ imuozọ wọhọ ahwo Jihova.—Joẹl 2:28, 29.

¹⁰ Roro kpahe oriruo Laurel, ọnọ okie o kie nọ o kiẹzẹ emashini nọ o re fiobọhọ k’owho wẹ evaọ ikpe 37.a Ghelọ uyero ẹdawọ ọgaga riẹ, ọ gọ Ọghẹnẹ avọ ọwhọ rite oke uwhu riẹ. Evaọ ikpe na kpobi, eghale Jihova i te Laurel. Wọhọ oriruo, ọ sai fiobọhọ kẹ ahwo 17 re a wo eriariẹ egbagba uzẹme Ebaibol na, dede nọ ọ jọ evaọ emashini riẹ na euwa 24 evaọ kẹdẹ kẹdẹ! Uyero riẹ o kareghẹhọ omai eme ọ Pọl ukọ na: “Nọ omẹ rẹ kuako, kpakiyọ ẹsiẹe mẹ gae.” (2 Ahwo Kọrint 12:10) Ẹhẹ, obokparọ kpobi nọ ma sai wo evaọ ewhowho emamọ usi na u no, orọnikọ ẹgba gbe ogaga omobọ mai ze he, rekọ u no obufihọ Ọghẹnẹ ẹkwoma ẹzi ọfuafo ze, onọ ọ rẹ rọ kẹ ahwo nọ e ruabọhọ ezọgaviẹ kẹ urru riẹ.—Aizaya 40:29-31.

11. Didi ekwakwa ẹzi Ọghẹnẹ ọ rẹ jọ oma ahwo nọ e whẹ “ohwo ọkpokpọ na” họ oma no mọ?

¹¹ Ma tẹ be rọ ẹmeoyo gaviezọ kẹ Ọghẹnẹ, ẹzi riẹ ọ rẹ j’oma mai mọ ekwakwa wọhọ uyoyou, oghọghọ, udhedhẹ, uye-oruẹ-krẹkri, ẹwo, ewoma, ẹrọwọ, omarokpotọ, gbe oma-oriẹsuo. (Ahwo Galesha 5:22, 23) “Ubi ẹzi” nana yọ abọjọ “ohwo ọkpokpọ na” nọ Ileleikristi e rẹ whẹhọ oma ro nwene iruemu ozighi, orọ erao nọ a je dhesẹ vẹre na. (Ahwo Ẹfẹsọs 4:20-24; Aizaya 11:6-9) Abọ nọ ọ mae wuzou evaọ ubi nana họ uyoyou, “ọwhẹgbe eware kpobi.”—Ahwo Kọlọsi 3:14.

Uyoyou Ileleikristi—Okẹ nọ A re Riwi Ghaghae

12. Ẹvẹ Tabita gbe Ileleikristi ikpe-udhusoi ọsosuọ efa a ro dhesẹ uyoyou?

¹² Uyoyou Ileleikristi yọ okẹ oghale ofa nọ u n’obọ Jihova ze—onọ ma re riwi ghaghae ziezi. Ehri-uzi họ oware nọ o be kpọe, rekọ o vọ avọ arodawẹ te epanọ u re ro si enọ e rọwo kugbe kpekpekpe tube vi inievo uwo dede. (Jọn 15:12, 13; 1 Pita 1:22) Wọhọ oriruo, roro kpahe Tabita, uvi aye Oleleikristi ọrọ ikpe-udhusoi ọsosuọ na jọ. “Iruo iwoma iruo gbe ọghọ-ohrọ e dariẹ oma fia,” maero rọkẹ eyae-uku nọ e rọ ukoko na. (Iruẹru 9:36) Ẹsejọhọ eyae enana i wo imoni orua, rekọ Tabita ọ gwọlọ ru oware nọ ọ rẹ sai ru re o fiobọhọ jẹ tuduhọ ae awọ. (1 Jọn 3:18) Ẹvẹ oriruo nọ Tabita o fihọ otọ o woma te! Uyoyou inievo o wọ Priska avọ Akwila “siobọno uzuazọ rai” fiki Pọl. Uyoyou o tẹ jẹ wọ Ẹpafras, Luk, Ọnesifọrọs, gbe amọfa fiobọhọ kẹ ukọ na evaọ okenọ ọ jọ uwou-odi evaọ Rom. (Ahwo Rom 16:3, 4; 2 Timoti 1:16; 4:11; Filimọn 23, 24) Ẹhẹ, oghẹrẹ Ileleikristi eyena nẹnẹ a ‘wo uyoyou evaọ udevie rai,’ okẹ oghale nọ u n’obọ Ọghẹnẹ ze nọ u re dhesẹ ae via wọhọ ilele uzẹme Jesu.—Jọn 13:34, 35.

13. Ẹvẹ ma sai ro dhesẹ nọ ma riwi okugbe-inievo Ileleikristi mai ghaghae?

¹³ Kọ who bi riwi uyoyou nọ a bi dhesẹ via evaọ ukoko Ileleikristi na ghaghae? Kọ whọ be kẹ uyere fiki okugbe-inievo abọ-ẹzi mai na, onọ o wariẹ akpọ na họ na? Enana re yọ ekẹ eghale nọ i no ehru ze nọ i re ru omai fe. Ẹvẹ ma sai ro dhesẹ nọ ma riwi rai ghaghae? Ẹkwoma iruo efuafo nọ ma re ru kẹ Ọghẹnẹ, ẹkwoma abọ-owo evaọ iwuhrẹ Ileleikristi, gbe ẹkwoma edhesẹ uyoyou gbe ibi ẹzi Ọghẹnẹ efa.—Ahwo Filipai 1:9; Ahwo Hibru 10:24, 25.

‘Ekẹ Ahwo’

14. Eme a gwọlọ mi Oleleikristi otẹrọnọ o re ruiruo wọhọ ọkpako hayo odibo oruiruo?

¹⁴ Ezae Ileleikristi nọ i wo isiuru re a ga ibe egegagọ rai wọhọ ekpako hayo idibo iruiruo a wo emamọ ute. (1 Timoti 3:1, 8) Re o te kẹ uvẹ-ọghọ nana, oniọvo-ọmọzae ọ rẹ jọ ohwo abọ-ẹzi, nọ ọ riẹ Ikereakere na ziezi je wo ọwhọ kẹ iruo odibọgba na. (Iruẹru 18:24; 1 Timoti 4:15; 2 Timoti 4:5) O re dhesẹ omarokpotọ, ababọ-omorro, gbe odiri, keme eghale Ọghẹnẹ i re te ahwo nọ a re dhesẹ omorro, omoya, je siuru-ọkwa okpehru hu. (Itẹ 11:2; Ahwo Hibru 6:15; 3 Jọn 9, 10) Otẹrọnọ ọ rọo no, ọ rẹ jọ ọnọ o w’uzou uviuwou oyoyou nọ o re su uviuwou riẹ kpobi ziezi. (1 Timoti 3:4, 5, 12) Fikinọ o riwi efe abọ-ẹzi ghaghae, ohwo otiọye na o re wo oghale Jihova.—Matiu 6:19-21.

15, 16. Amono a dhesẹ nọ a rrọ ‘ekẹ ahwo’? Kẹ iriruo.

¹⁵ Okenọ enọ i bi ruiruo wọhọ ekpako evaọ ukoko na a tẹ daoma rai gaga wọhọ etausiuwoma, esẹro, gbe iwuhrẹ, a rẹ k’omai uvi ẹjiroro nọ ma re ro wo ovuhumuo kẹ ‘ekẹ ahwo’ itieye na. (Ahwo Ẹfẹsọs 4:8, 11) Ẹsejọhọ ahwo nọ a bi wo erere no iruo iyoyou rai ze a re dhesẹ ovuhumuo rai ẹsikpobi hi, rekọ Jihova ọ be ruẹ eware kpobi nọ ekpako ẹrọwọ i bi ru. Uyoyou nọ a dhesẹ kẹ odẹ riẹ ẹkwoma odibọgba kẹ ahwo riẹ o te thọrọ iẹe ẹro ho.—1 Timoti 5:17; Ahwo Hibru 6:10.

¹⁶ Roro kpahe oriruo ọkpako jọ nọ o re ruiruo gaga nọ o weze bru ọmọtẹ Oleleikristi jọ nọ a bi ti ru obẹrọ ẹvori kẹ. Ogbẹnyusu uviuwou na jọ o kere nọ: “Ọ jọ wowou gaga, avọ obufihọ, avọ oma ẹruọsa. O mi uvẹ re ọ lẹ se Jihova kugbe omai. Nọ ọ jẹ lẹ, ọsẹ ọmọtẹ na [ọnọ ọ rrọ omọvo Isẹri Jihova ha] ọ viẹ, irui-oviẹ i no ibiaro ahwo kpobi nọ a jọ ubrukpẹ ẹsipito na ze. Ẹvẹ olẹ ọkpako yena u wolẹ te, yọ ẹvẹ o rọ oware uyoyou te nọ Jihova o ro vi ei ze evaọ uzedhe oke utioye na!” Osẹri ọfa jọ nọ ọ jẹ mọ ọ ta kpahe ekpako nọ i weze bru ei ze inọ: “Nọ a nyaze oria ehwa mẹ evaọ oria usiwo obọdẹ na, mẹ riẹ nọ makọ oware nọ o via kpobi no umuo okeoye vrẹ, mẹ te sai thihakọ riẹ. Mẹ tẹ jọ gaga jẹ kpomamu.” Kọ ohwo jọ ọ riẹ nọ ọ rẹ sae dẹ ọdawẹ oyoyou otiọye na? Vievie! O rrọ okẹ nọ u n’obọ Ọghẹnẹ ze, nọ ma re wo ẹkwoma ukoko Ileleikristi na.—Aizaya 32:1, 2.

Okẹ Iruo Odibọgba Na

17, 18. (a) Didi okẹ iruo egagọ Jihova ọ rọ kẹ ahwo riẹ kpobi? (b) Didi obufihọ Ọghẹnẹ ọ kẹ re ma sai ru odibọgba mai gba?

¹⁷ Ọghọ nọ ọ mae rro kpobi nọ a rẹ sae kẹ ahwo-akpọ họ ọrọ ẹgọ Jihova, Ọnọ Ọ Mae Rro na. (Aizaya 43:10; 2 Ahwo Kọrint 4:7; 1 Pita 2:9) Ghele na, uvẹ-ọghọ nọ a re ro w’obọ evaọ odibọgba ẹgbede na u rovie kẹ ahwo kpobi—emaha gbe ekpako, ezae gbe eyae—enọ i wo uvi isiuru re a gọ Ọghẹnẹ. Kọ whọ be rehọ okẹ oghaghae onana ro ruiruo? Ejọ e rẹ sai sioma h’emu fikinọ a roro nọ a te he, rekọ kareghẹhọ nọ Jihova ọ rẹ kẹ enọ e be gọe ẹzi ọfuafo, yọ obufihọ riẹ u re ruru oware kpobi nọ o kare omai.—Jerimaya 1:6-8; 20:11.

¹⁸ Jihova ọ rehọ iruo usiuwoma ota Uvie na kẹ idibo omarokpotọ riẹ, orọnikọ rọkẹ ahwo nọ a rẹ gwọlọ heri jẹ rẹroso ẹgba omobọ rai hi. (1 Ahwo Kọrint 1:20, 26-29) Ahwo omarokpotọ, nọ e kare omorro a re vuhu ọnyaba rai mu jẹ rẹroso obufihọ Ọghẹnẹ nọ a bi w’obọ evaọ iruo odibọgba na. A re je wo ovuhumuo kẹ obufihọ abọ-ẹzi nọ ọ be kẹ ẹkwoma “odibo oruọzewọ” na.—Luk 12:42-44; Itẹ 22:4.

Uzuazọ Uviuwou Evawere—Emamọ Okẹ

19. Eware vẹ i re su kpohọ obokparọ evaọ ẹyọrọ emọ?

¹⁹ Orọo gbe uzuazọ uviuwou evawere yọ ekẹ nọ i n’obọ Ọghẹnẹ ze. (Rut 1:9; Ahwo Ẹfẹsọs 3:14, 15) Emọ yọ ‘ukuoriọ oghaghae nọ u n’obọ ỌNOWO ze,’ onọ o rẹ wha oghọghọ se eyewọ nọ i wuhrẹ i rai ekwakwa edhere Ọghẹnẹ avọ obokparọ. (Olezi 127:3) Whọ tẹ rọ ọyewọ, ruabọhọ ezọgaviẹ kẹ urru Jihova ẹkwoma emọ ra nọ who re wuhrẹ nya lele epanọ Ẹme riẹ ọ ta. Ahwo nọ a ru ere a rẹ ghinẹ ruẹ obufihọ gbe eghale ibuobu Jihova.—Itẹ 3:5, 6; 22:6; Ahwo Ẹfẹsọs 6:1-4.

20. Eme ọ rẹ sai fiobọhọ kẹ eyewọ nọ emọ rai e nya no egagọ uzẹme na no?

²⁰ Ghelọ omodawọ ogaga orọ eyewọ eg’Ọghẹnẹ, ẹsejọhọ emọ rai jọ e rẹ nya no egagọ uzẹme na evaọ okenọ a tẹ kpako no. (Emuhọ 26:34, 35) Onana o sae wha ọkora se esẹ gbe ini na. (Itẹ 17:21, 25) Rekọ, viukpenọ a re ku ẹruore kpobi fiẹ, o rẹ sai fiobọhọ kẹ ae re a kareghẹhọ ọtadhesẹ Jesu ọrọ ọmọ ogbọfariẹ na. Dede nọ ọmọ ọyena ọ kwa no uwou je le edhere ogbekuo, uwhremu na ọ wariẹ zihe ziọ uwou ọsẹ riẹ, ọnọ ọ rehọ oghọghọ gbe uyoyou dede iei rehọ. (Luk 15:11-32) Makọ oware nọ o rẹ via kpobi, eyewọ Ileleikristi ẹrọwọ a rẹ sai wo imuẹro inọ Jihova o wo otoriẹ uyero rai, je wo ọdawẹ oyoyou kẹ ae, jẹ te kẹ ae ukeotha riẹ nọ u re kie he.—Olezi 145:14.

21. Ono u fo nọ ma rẹ gaviezọ kẹ, kọ fikieme?

²¹ Fikiere, jọ omomọvo mai o vuhu oware nọ u ghine wuzou evaọ uzuazọ mai mu. Kọ ma be rehọ ọwhọ le ekwakwa efe ibuobu, enọ e rẹ sae wha edada se omai gbe iviuwou mai? Manikọ ma bi le ‘ekẹ iwoma gbe ekẹ nọ e gba kiete’ nọ i n’obọ “Ọsẹ ilo” na ze? (Jemis 1:17) Setan, ‘ọsẹ ọrue na,’ ọ gwọlọ nọ ma ruẹ-uye le ekwakwa efe je ku evawere gbe uzuazọ fiẹ. (Jọn 8:44; Luk 12:15) Dede na, Jihova o wo isiuru obọdẹ mai họ iroro. (Aizaya 48:17, 18) Fikiere, j’oma ruabọhọ ezọgaviẹ kẹ Ọsẹ oyoyou obọ odhiwu mai jẹ ‘wereva’ kpahe iẹe ẹsikpobi. (Olezi 37:4) Ma te le edhere otiọye na, ekẹ eghaghae gbe eghale ibuobu Jihova i ti ru omai fe—ababọ edada nọ i re lele iei.

[Oruvẹ-obotọ]

Kọ Whọ Kareghẹhọ?

• Diẹse ma sai jo duku evawere nọ e mae rro kpobi?

• Evẹ họ ekẹ jọ nọ Jihova ọ kẹ ahwo riẹ?

• Fikieme iruo odibọgba na e jẹ rọ okẹ?

• Eme eyewọ e rẹ sai ru re a wo oghale Ọghẹnẹ nọ a be yọrọ emọ rai na?

[Uwoho nọ o rrọ ẹwẹ-obe avọ 14]

Kọ who bi dhesẹ ovuhumuo kẹ okẹ Ọghẹnẹ orọ Ẹme riẹ nọ a kere na?

[Uwoho nọ o rrọ ẹwẹ-obe avọ 15]

Ghelọ uyero obẹbẹ, Laurẹl Nisbet ọ gọ Ọghẹnẹ avọ ọwhọ

[Iwoho nọ e rrọ ẹwẹ-obe avọ 16]

Wọhọ Tabita, a riẹ Ileleikristi ọgbọna rọkẹ iruẹru uyoyou rai

[Uwoho nọ o rrọ ẹwẹ-obe avọ 17]

Ekpako Ileleikristi a wo ọdawẹ oyoyou rọkẹ ibe enọ e rọwo