Whọ rẹ Sai Wo Uvi Ẹrọwọ

Okenọ Sarah Jayne ọ jọ ikpe 19, ọ tẹ ruẹ nọ o wo ẹyao-ọta evaọ edhede. Nọ a bẹre iẹe no, o wo uvi irẹro inọ ẹyao na o ti kpo, yọ o wo udu-ufihọ kpahe obaro na. Evaọ uzẹme, udu-ufihọ riẹ o ga te epanọ evaọ okenọ ọ jọ ikpe 20, a tẹ sa ae hotọ je muọ ọruẹrẹfihotọ họ eruo kẹ ehaa-orọo. Evaọ ukpe ovo oyena ẹyao-ọta na o te zihe ze, ọ tẹ ruẹ nọ eka jọ ọvo i kiọkọ re o te whu. Sarah Jayne o whu evaọ June 2000, taure ọ tẹ te nwani te ikpe 21.

OWARE nọ u duobọte ahwo nọ a nyaze te ruẹ Sarah Jayne evaọ ehwa ẹsipito riẹ họ evaifihọ riẹ kpahe obaro na, jegbe ẹrọwọ odidi riẹ kpahe Ọghẹnẹ gbe Ẹme riẹ, Ebaibol na. Ghelọ uye ogaga nọ ọ rẹriẹ ovao ku, o wo imuẹro ẹruore ẹkparomatha na—inọ ọ te wariẹ ruẹ egbẹnyusu riẹ kpobi. (Jọn 5:28, 29) Ọ ta nọ: “Mẹ te ruẹ owhai kpobi evaọ akpọ ọkpokpọ Ọghẹnẹ.”

Ahwo jọ a re riwi oghẹrẹ ẹrọwọ ọyena wọhọ eviẹhọ. Ludovic Kennedy ọ nọ inọ: “Kọ ẹrọwọ uzuazọ nọ u re lele uwhu o gbẹ rrọ ẹrọwọ ahwo nọ akpọ o kiethọ, inọ evaọ etoke ọgba urere na iruẹru omawere jọ e te jariẹ rọkẹ ae, inọ evaọ ogba Aparadase jọ a te riakpọ kugbe ahwo nọ e kaki whu no gbe amọfa nọ a ti whu evaọ oke ofa?” Ma rẹ nọ onọ avro jọ kpahe eme eyena. Ovẹ o mai w’iroro—re ma rọwo nọ “uzuazọ onana ọvo ma wo, re ma jariẹ riakpọ kuoma ziezi,” wọhọ epanọ Kennedy ọ be ta na, hayo re ma rọwo Ọghẹnẹ gbe eyaa ẹkparomatha riẹ? Orọ avivẹ na Sarah Jayne ọ salọ. Ẹvẹ o ro wo ẹrọwọ otiọye na?

‘Gwọlọ Ọghẹnẹ . . . re Whọ Ghinẹ Rue Riẹ’

Re whọ sae bọ ẹrọwọ gbe evaifihọ kpahe ohwo jọ, u fo nọ whọ rẹ riẹe je wuhrẹ oghẹrẹ nọ o re roro je ru eware. Udu na gbe iroro na i w’obọ kpahe onana. Epọvo na o rọ re kpahe uvi ẹrọwọ nọ a rẹ bọ fihọ Ọghẹnẹ. U fo nọ whọ rẹ riẹe, who re wuhrẹ kpahe ekwakwa gbe uruemu riẹ, whọ rẹ riẹ kpahe epanọ a rẹ sai fievahọ iẹe jẹ rẹro so iẹe te evaọ eware kpobi nọ ọ ta je ru no.—Olezi 9:10; 145:1-21.

Ahwo jọ a roro nọ onana o lọhọ họ. A ta nọ, Ọghẹnẹ o thabọ hrọ, o gbunu hrọ—otẹrọnọ ọ ghinẹ rrọ dede. Ọgbavro ọ rẹ nọ inọ: “Otẹrọnọ Ọghẹnẹ o ghine muẹro wọhọ epanọ Ileleikristi wọhọ Sarah Jayne a rehọ e riẹ na, fikieme o gbe dhesẹ omariẹ via k’omai ahwo nọ i kiọkọ họ?” Kọ Ọghẹnẹ o ghine thabọ hrọ nọ a rẹ sae gwọlọ iẹe via ha? Nọ ọ jẹ t’ẹme kẹ egbaeriariẹ evaọ Athẹns, Pọl ukọ na ọ ta nọ “Ọghẹnẹ nọ ọ ma akpọ na gbe eware nọ eriẹ eva kpobi” ọ kẹ eware kpobi nọ a gwọlọ re a sae ‘gwọlọ iẹe . . . re a ghinẹ rue riẹ.’ Evaọ uzẹme, Pọl ọ ta nọ: “Otheri omai ọvuọvo abọ họ.”—Iruẹru 17:24-27.

Fikiere, ẹvẹ whọ sae rọ ‘gwọlọ Ọghẹnẹ . . . re whọ ghinẹ rue riẹ’? Ahwo jọ a ru onana no ẹkwoma eriwi ehrugbakpọ nọ ọ wariẹ e rai họ na ọvo. Rọkẹ ibuobu, oyena ọvo o kẹ imuẹro nọ i re ru ai rọwo nnọ Ọnọma jọ ọ ghinẹ rrọ.a (Olezi 19:1; Aizaya 40:26; Iruẹru 14:16, 17) A wo iroro evona nọ Pọl ukọ na o wo na inọ “[ekwakwa Ọghẹnẹ] nọ a te ruẹ no emuhọ akpọ na ze he a be rue rẹ ai vevẹ enẹna, a tẹ rehọ eware nọ ọ ma na bi ro riwi ai muẹ, ogaga irurẹ Ọghẹnẹ.”—Ahwo Rom 1:20; Olezi 104:24.

Whọ Gwọlọ Ebaibol Na

Rekọ, re whọ bọ uvi ẹrọwọ fihọ Ọnọma na, whọ gwọlọ oware ofa jọ nọ ọ kẹ. Didi oware? Ebaibol na—Ẹme Ọghẹnẹ nọ ẹzi ọ kẹ ẹgba, onọ ọ jọ dhesẹ oreva gbe ẹjiroro riẹ via. (2 Timoti 3:16, 17) Ahwo jọ a rẹ ta nọ: “Hẹrẹ tao, ẹvẹ whọ sae rọ rọwo oware kpobi nọ Ebaibol ọ ta nọ whọ be ruẹ eware etọtọ nọ ahwo nọ a ta nọ a be nya lele Ebaibol na a bi ru na?” Uzẹme, Kristẹndọm o wo okerefihotọ imuozọ ọrọ eviẹhọ, olahiẹ, gbe ọfariẹ-ogbe. Rekọ ohwo kpobi nọ o w’iroro ọ sae ruẹ nọ eviẹhọ gheghe Kristẹndọm ọ rrọ inọ a be nya lele ehri-izi Ebaibol.—Matiu 15:8.

Evaọ uzẹme, Ebaibol na omariẹ ọ vẹvẹ unu inọ ahwo buobu a te ta nọ a be gọ Ọghẹnẹ ghele na a te “[vro] Olori na, nọ ọ dẹ rae.” Pita ukọ na ọ ta nọ: “Avẹ te rọ fiki rai, rehọ edhere uzẹme jẹ ijehwẹ.” (2 Pita 2:1, 2) Jesu Kristi ọ ta nọ ahwo nana yọ “irumuomu” enọ owojẹ emuemu rai o ti dhesẹ via vevẹ. (Matiu 7:15-23) Re a siọ Ẹme Ọghẹnẹ fiki uruemu Kristẹndọm o wọhọ ileta nọ i n’obọ ogbẹnyusu nọ a fievahọ ze nọ a re kufiẹ fikinọ ohwo nọ ọ wha ileta na ze o wo ekpehre uruemu.

Ababọ Ẹme Ọghẹnẹ o lọhọ họ re a bọ uvi ẹrọwọ. Evaọ Ebaibol na ọvo Jihova o jo gu ẹkẹ unu riẹ, wọhọ odẹme. Ọ kẹ iyo enọ nọ a rẹ nọ ẹsikpobi wọhọ oware nọ o soriẹ ze nọ ọ jẹ kuvẹ kẹ uye-oruẹ gbe edada jegbe oware nọ o ti ru kpahe uyero na. (Olezi 119:105; Ahwo Rom 15:4) Sarah Jayne ọ rọwo nnọ Ebaibol na yọ Ẹme Ọghẹnẹ nọ ẹzi ọ kẹ ẹgba. (1 Ahwo Tẹsalonika 2:13; 2 Pita 1:19-21) Evaọ oghẹrẹ vẹ? Orọnọ fikinọ ọsẹ gbe oni riẹ a ta ere kẹe ọvo ho, rekọ fikinọ ọ raha oke ro wuhrẹ ziezi kpahe imuẹro kpobi nọ i dhesẹ Ebaibol na wọhọ eviavia oghẹrẹsa nọ u n’obọ Ọghẹnẹ ze. (Ahwo Rom 12:2) Wọhọ oriruo, ọ ruẹ okpomahọ ọgaga nọ Ebaibol na o wo evaọ izuazọ ahwo nọ e be nya lele ehri-izi riẹ. Avọ obufihọ ebe wọhọ The Bible—God’s Word or Man’s?,b ọ tẹ jẹ romatotọ kiẹ imuẹro buobu nọ e rrọ eva Ebaibol na riwi nọ i dhesẹ nọ ẹgba ẹzi Ọghẹnẹ a ro kere iei.

“Epanọ Ohwo O Yo Ere Ọ rẹ rọ Rọwa”

Rekọ, u te he re a wo Ebaibol na hayo re a rọwo ọvo nọ ogaga ẹzi a ro kere iei. Pọl ukọ na o kere nọ: “Epanọ ohwo o yo ere ọ rẹ rọ rọwa.” (Ahwo Rom 10:17) Oware nọ o rẹ bọ ẹrọwọ họ eyo oware nọ Ebaibol na ọ ta, orọnikọ ewo Ebaibol ọvo ho. Who re “yo” ẹme nọ Ọghẹnẹ ọ be ta ẹkwoma ese gbe ewuhrẹ Ẹme riẹ. Makọ emaha dede a rẹ sai ru onana. Pọl ọ ta nọ oni gbe oniode Timoti a rehọ “ikere ẹri na” wuhrẹ iẹe no “oke emaha ze.” Kọ onana u dhesẹ nọ a viẹ iẹe họ rọwo? Ijo! A viẹ Timoti họ evaọ uvumọ edhere he. A ‘tẹzẹ e riẹ rọwo’ oware nọ o yo je se.—2 Timoti 1:5; 3:14, 15.

A tẹzẹ Sarah Jayne evaọ edhere ọvona re. Wọhọ ahwo Bẹria ikpe-udhusoi ọsosuọ na, “avọ oghọghọ [ọ] rọ rehọ ẹme na” mi ọsẹ gbe oni riẹ avọ iwuhrẹ efa. Ababọ avro, nọ ọ jọ ọmaha ọ rọ udu obọ riẹ fievahọ oware nọ ọsẹ gbe oni riẹ a ta kẹe. Uwhremu na, nọ ọ kpako no, orọnikọ ọ nwane rọ aro tuẹtu jẹ oware kpobi nọ a wuhrẹ i rie rehọ họ. Ọ ‘kiẹ Ikerakere na kẹse kẹse, sọ epanọ a ta kẹe na ere e ghinẹ rrọ.’—Iruẹru 17:11.

Whọ Sae Bọ Uvi Ẹrọwọ

Whọ sae jẹ bọ uvi ẹrọwọ re—oghẹrẹ ẹrọwọ nọ Pọl ukọ na o dhesẹ evaọ ileta riẹ se Ileleikristi Hibru na. Ọ ta nọ ẹrọwọ otiọye na họ “umuẹro eware kpobi nọ ma bi rẹro rai na, odhesẹvia eware nọ ma te ruẹ hẹ.” (Ahwo Hibru 11:1, ẹjẹlẹ ibiẹme na ọmai.) Who te wo ẹrọwọ otiọye na, who re wo imuẹro evọvọ inọ ẹruore gbe irẹro ra kpobi, jegbe eyaa ẹkparomatha Ọghẹnẹ, i ti rugba. Whọ te rọwo nọ ẹruore otiọye na ọ roma hwa imuẹro egaga, orọnikọ iroro isiuru gheghe he. Whọ te ruẹ nọ Jihova ọ re se eyaa riẹ ba ekoko ẹdọvo ho. (Joshua 21:45; 23:14; Aizaya 55:10, 11; Ahwo Hibru 6:18) Akpọ ọkpokpọ nọ Ọghẹnẹ ọ yeyaa riẹ na o ti muẹro k’owhẹ wọhọ ẹsenọ whọ rrọ eva riẹ no. (2 Pita 3:13) Yọ whọ te ruẹ vevẹ avọ ibiaro ẹrọwọ inọ Jihova Ọghẹnẹ, Jesu Kristi, gbe Uvie Ọghẹnẹ i muẹro, orọnikọ yọ omuroro ho.

A vu owhẹ wa ha re whẹ ọvo ọ bọ uvi ẹrọwọ. U te no Ẹme riẹ nọ ọ rọ kẹ no, Jihova ọ tẹ jẹ kẹ ukoko Ileleikristi akpọ-soso nọ u bi fiobọhọ kẹ ahwo udu-ezi re a bọ ẹrọwọ fihọ Ọghẹnẹ. (Jọn 17:20; Ahwo Rom 10:14, 15) Jẹ obufihọ kpobi nọ Jihova ọ be kẹ ẹkwoma ukoko oyena rehọ. (Iruẹru 8:30, 31) Yọ nọ orọnọ ẹrọwọ ọ rrọ ubi ẹzi ọfuafo Ọghẹnẹ na, lẹ kẹ ẹzi ọyena ẹsikpobi re o fiobọhọ k’owhẹ bọ uvi ẹrọwọ.—Ahwo Galesha 5:22.

Whọ kuvẹ hẹ re egbavro nọ e rẹ rehọ ahwo nọ a dhesẹ ẹrọwọ fihọ Ọghẹnẹ gbe Ẹme riẹ s’ẹkoko a fi idudu họ owhẹ oma. (1 Ahwo Kọrint 1:18-21; 2 Pita 3:3, 4) Evaọ uzẹme, uvi ẹrọwọ o rrọ obufihọ ulogbo evaọ ẹbọga ọtamuo ra mukpahe ọwọsuọ otiọye na. (Ahwo Ẹfẹsọs 6:16) Sarah Jayne ọ ruẹ nọ oyena yọ uzẹme, yọ ẹsikpobi ọ jẹ tuduhọ ahwo nọ a jẹ nyaze te rue riẹ evaọ ẹsipito na awọ re a bọ ẹrọwọ rai ga. Ọ jẹ hae ta nọ: “Ru uzẹme na fihọ ora. Wuhrẹ Ẹme Ọghẹnẹ. Jọ kugbe ukoko Ọghẹnẹ kpekpekpe. Lẹ kẹse kẹse. Jọ jajaja evaọ egagọ Jihova.”—Jemis 2:17, 26.

Nọ o muẹrohọ ẹrọwọ riẹ fihọ Ọghẹnẹ gbe ẹkparomatha no, enọso jọ ọ tẹ ta nọ: “Whọ ghinẹ rọwo onana, manikọ ere he?” Nọ a nọe oware nọ o kẹ riẹ eriwo udu-ufihọ utioye na ghelọ edawọ riẹ, ọ kuyo nọ: “Oware na họ ẹrọwọ ofihọ Jihova. Ọ rrọ uvi ogbẹnyusu k’omẹ, yọ me you rie gaga.”

[Oruvẹ-obotọ]

[Uwoho nọ o rrọ ẹwẹ-obe avọ 6]

Oni gbe oniode Timoti a rehọ “ikere ẹri na” wuhrẹ iẹe no “oke emaha ze”

[Uwoho nọ o rrọ ẹwẹ-obe avọ 6]

A jiri ahwo Bẹria fikinọ a jẹ kiẹ Ikereakere na riwi kẹdẹ kẹdẹ

[Ọnọ o wo uwoho]

A rehọ e riẹ no “Photo-Drama of Creation,” 1914 ze

[Iwoho nọ e rrọ ẹwẹ-obe avọ 7]

Eyo gbe ẹnya lele oware nọ Ebaibol ọ ta họ oware nọ o rẹ bọ ẹrọwọ, orọnikọ a wo riei ọvo ho

[Uwoho nọ o rrọ ẹwẹ-obe avọ 7]

“Mẹ te ruẹ owhai kpobi evaọ akpọ ọkpokpọ Ọghẹnẹ”