Kẹ avọ Unu-Ofiẹ

“WHỌ sai s’omẹ ọyareware; oyena o d’omẹ hẹ. Mẹ be yare kẹ Jesu.” Eme ọ ọgbodibo Protẹstant eyena nọ e kẹ otoriẹ na i dhesẹ ikẹ-isio nọ e r’otọ gidigba kpahe epanọ ichọche i bi ro wo igho rai. O wọhọ nọ ugho ubuobu ọvo họ oware nọ u bi kru ẹko egagọ dikihẹ. O gwọlọ nọ a rẹ hwa ahwo esa, bọ iwou egagọ jẹ sẹro rai, jẹ rehọ igho wha ewhowho usiuwoma na h’aro. Ẹvẹ a sae rọ ruẹ igho nọ i re te ru eware enana?

Rọkẹ ichọche buobu, abọvo-abakpe họ uyo na. “Ẹhwa abọvo-abakpe họ edhere nọ Ọghẹnẹ ọ be rọ tha uvie Riẹ uke eva otọakpọ na. Oye họ oghẹrẹ nọ Ọ be rọ wha ewhowho Usiuwoma na h’aro,” ere ọtausiwoma na Norman Roberson ọ ta. Ọ rọ unu họ akotọ họ nọ ọ jẹ kareghẹhọ ilele riẹ kpahe owha-iruo rai nọ a rẹ rọ kẹ, ọ ta avọ udu nọ: ‘Ẹhwa abọvo-abakpe o rọnọ oware nọ who re ru fikinọ whọ rẹ sai ru ei hi. Ukpoye o rrọ edhesẹ ẹmeoyo. Whọ gbẹ hwa abọvo-abakpe he yọ aghẹmeeyo kẹ ujaje Ọghẹnẹ. O wọhọ ugho omọfa nọ whọ gbaviẹ rehọ.’—Tithing—God’s Financial Plan.

Ababọ avro whọ rẹ rọwo nnọ ẹkẹ yọ abọjọ egagọ Ileleikristi. Ghele na, kọ o rẹ voho owhẹ oma evaọ okenọ a te bi dhe eweworo nnọ a rọ ugho ze? Owuhrẹ-egagọ obọ Brazil na Inácio Strieder ọ fo ichọche fikinọ a rẹriẹ ova ku abọvo-abakpe wọhọ edhere nọ a bi ro ku “ebẹbẹ iruẹru egagọ rai họ,” o se iruemu itieye na “iruemu ethọthọ, erọ okienyẹ, enọ i thabọ no uruemu egagọ.” Wọhọ epanọ o mu ẹro họ, uruemu utioye na o wha riẹ ze nọ “otu nọ o wo iruo ho, eyae-uku, enọ e be r’akọ kpena, gbe enọ e sai roro ẹme na fiotọ họ a je ku ei họ nnọ Ọghẹnẹ o kiemu ku ai no, inọ a gba rai họ re a rehọ omoware nọ a wo kpobi kẹ ‘ọtausiuwoma na’ yọ ohọo u bi kpe iviuwou rai.”

O sai gb’owhẹ unu nọ: ‘Kọ ichọche nọ i ru abọvo-abakpe fihọ ọgbahọ a bi ghine lele Ikereakere na? Manikọ egagọ jọ e be rehọ iguegue ọ uye nọ u ti no obọ Ọghẹnẹ ze fru uthuru na ria? Kọ Ọghẹnẹ ọ ghinẹ gwọlọ nọ ma kẹ yọ ma be fiẹ unu, wọhọ epanọ otujọ a rẹ ta na?’