Enọ Ahwo nọ A s’Ebe
Eme họ ame-ọhọ fiki iwhuowhu?
Okenọ o je kere kpahe ẹkparomatha obọ odhiwu, Pọl ukọ na o kere eme jọ nọ i siuru gaga. Ma jọ Ebaibol Isoko se nọ: “Ogbẹrọ erehe fiki eme a jẹ be họ ahwo ame fiki iwhuowhu? Otẹrọnọ a rẹ kpare iwhuowhu vievie he, kọ fiki eme a jẹ be họ ahwo ame fiki rai?”—1 Ahwo Kọrint 15:29.
Kọ Pọl ọ be jọ etenẹ ta nnọ a rẹ họ ahwo nọ e rrọ uzuazọ ame fiki enọ i whu no nọ e họ ame he? Ere ẹme na o re do ma tẹ jọ Ebaibol Isoko gbe Ebaibol efa jọ sei. Dede na, ma te muẹrohọ Ikereakere na gbe eme Griki ọsosuọ nọ Pọl ọ rọ t’ẹme na ziezi, u dhesẹ ẹme na fihọ oghẹrẹ ofa. Ẹme nọ Pọl ọ be ta na họ a họ Ileleikristi nọ a wholo na ame fihọ eyero uzuazọ nọ u ti su kpohọ uwhu ẹgbakiete wọhọ orọ Kristi. Kẹsena, a vẹ te kpare ae kpohọ uzuazọ ẹzi wọhọ epanọ a kpare Jesu na.
Ikereakere na e rọwo kugbe edhesẹ ọnana. Evaọ ileta riẹ se ahwo Rom, Pọl o kere nọ: “Kọ owha gbẹ riẹ hẹ, nnọ ibuobu nọ a họame eva Jesu Kristi no na, a họame fihọ eva uwhu riẹ?” (Ahwo Rom 6:3) Evaọ ileta riẹ se ahwo Filipai, Pọl ọ ta kpahe oma riẹ nnọ: “Me wo ẹkẹ eva uye [Kristi], re mẹ jọ wọhọ iẹ eva uwhu riẹ. Re u te kiehọ me ve wo ẹkparomatha no iwhuowhu.” (Ahwo Filipai 3:10, 11) Pọl o je dhesẹ nnọ uzuazọ olele ọ Kristi nọ a wholo o gwọlọ ẹgbakiete evaọ otọ ẹdawọ, uwhu nọ a rẹ rẹriẹ ovao dhe kẹdẹ kẹdẹ, ukuhọ riẹ kọ uwhu orọ ẹgbakiete, avọ ẹkparomatha kpohọ obọ odhiwu.
O rrọ oware nọ a re muẹrohọ inọ evaọ ikereakere enana gbe efa nọ e fodẹ uwhu kpahe enọ a họ-ame na, e ta kpahe ahwo nọ e rrọ uzuazọ enọ e họ ame no, orọnikọ enọ i whu no ho. Pọl ọ tẹ jẹ ta kẹ ibe Ileleikristi nọ a wholo nọ: “A ki owhai kugbe i eva ame-ọhọ, onọ a jẹ kpare owhai kugbe i re fiki orọwọ eva iruẹru Ọghẹnẹ ọnọ ọ kpare riẹ no uwhu.”—Ahwo Kọlọsi 2:12.
Ubiẹme Griki na hy·perʹ, onọ a fa “fiki” evaọ Ebaibol sa-sa eva 1 Ahwo Kọrint 15:29 na o sai je dhesẹ “re a ruẹse jọ.” Rọwo kugbe eria efa Ebaibol na, Ebaibol ọ New World Translation of the Holy Scriptures na o kere eme na gbagba nnọ: “Ẹvẹ enọ a be họ-ame re a ruẹse jọ iwhuowhu na a re ru? O tẹ rrọ nọ a te kpare iwhuowhu na vievie he, fikieme a jẹ be họ ae ame re a ruẹse jọ itieye?”