‘Yọrọ Ẹme Ọghẹnẹ Gbagba’

‘Dawo oma re whọ sai ru oma ra wọhọ ọnọ a jẹrehọ no, obọ aro Ọghẹnẹ jẹ wọhọ oruiruo ọnọ ọ kare omaovuọ, nọ rẹ yọrọ ẹme uzẹme na gbagba.’—2 TIMOTI 2:15.

1, 2. (a) Fikieme iruiruo a jẹ gwọlọ ekwakwa iruo? (b) Iruo vẹ Ileleikristi a bi ru, kọ ẹvẹ a bi ro dhesẹ nnọ a be kake gwọlọ Uvie na?

IRUIRUO e gwọlọ ekwakwa nọ a sai ro ru iruo rai. Dede na, o nwane rọnọ okwakwa kpobi nọ u te rai obọ a re gb’obọ họ họ. Oruiruo ọ gwọlọ uzedhe okwakwa nọ u kiehọ iruo na, yọ o gbahọ nọ ọ rẹ rehọ iẹe ruiruo evaọ oghẹrẹ nọ u fo. Wọhọ oriruo, otẹrọnọ whọ gwọlọ tehe ire ivẹ kugbe eva okenọ whọ be bọ umuwou-eki jọ, orọnikọ ibubẹ gbe ehama ọvo whọ gwọlọ họ. Whọ rẹ riẹ epanọ a sae rọ tehe ububẹ fihọ ure ababọ ẹgẹle. Whọ tẹ gwọlọ tehe ububẹ fihọ ure yọ whọ riẹ epanọ a rẹ rehọ ehama tehe iẹe he o rẹ bẹ gaga, tubẹ kẹ idhọvẹ dede. Rekọ okwakwa nọ a riẹ ro ruiruo ziezi, u re fi obọ họ kẹ omai ru iruo mai gbunu avọ evawere.

² Wọhọ Ileleikristi, ma wo iruo nọ e rrọ omai obọ. O rrọ iruo nọ e mai w’uzou. Jesu Kristi ọ ta udu họ ilele riẹ awọ nnọ a ‘kake gwọlọ uvie na.’ (Matiu 6:33) Ẹvẹ ma sai ro ru ere? Edhere jọ họ ẹkwoma ọwhọ nọ ma re ro w’obọ evaọ iruo usiuwoma ota Uvie gbe ilele-iruo na. Re ẹme nọ ma be ta kpobi evaọ odibọgba mai o no Ẹme Ọghẹnẹ ze yọ edhere ọfa. Orọ avesa họ emamọ uruemu. (Matiu 24:14; 28:19, 20; Iruẹru 8:25; 1 Pita 2:12) Re iruo Ileleikristi nana e ruẹsi w’ẹgba jẹ k’omai evawere, ma gwọlọ emamọ ekwakwa iruo jẹ riẹ epanọ ma rẹ rọ rehọ ai ruiruo ziezi. Rọ kpahe onana, Pọl ukọ na o fi uvi oriruo h’otọ wọhọ oruiruo Oleleikristi yọ ọ ta udu họ ibe egegagọ riẹ awọ re a rọ aro kele iei. (1 Ahwo Kọrint 11:1; 15:10) Nọ o rrọ ere na, eme ma rẹ sai wuhrẹ mi Pọl, ibe oruiruo mai?

Pọl—Owhowho Uvie Ajọwha

3. Fikieme a sae rọ ta nọ Pọl ukọ na ọ jọ oruiruo ajọwha Uvie na?

³ Didi oghẹrẹ oruiruo Pọl ọ jọ? Ọ jọ oruiruo ajọwha. Pọl ọ ya gaga jẹ rehọ emamọ usi na te ekwotọ buobu nọ e wariẹ Mediterenia họ. Bi dhesẹ ẹjiroro nọ ọ be rọ ta usiuwoma Uvie na jaka jaka, ukọ ajọwha nana ọ ta nọ: “Keme otẹrọnọ mẹ ta usiuwoma o rẹ sae kẹ omẹ eha-ise he. Keme ohwa-omẹ ohọre. Ure yoma kẹ omẹ mẹ gbẹ ta usiuwoma ha!” (1 Ahwo Kọrint 9:16) Kọ re o siwi uzuazọ obọriẹ ọvo o jọ Pọl oja? Ijo. Ọ jọ ohwo oriobọ họ. Ukpoye, o jọ isiuru riẹ re amọfa a wo erere no emamọ usi na ze re. O kere nọ: “Fiki usiuwoma na me ro ru eware enana kpobi re mẹ sai ru ẹkẹ abọ mẹ eva eva riẹ.”—1 Ahwo Kọrint 9:23.

4. Okwakwa vẹ Ileleikristi a mai rri ghare evaọ iruo rai?

⁴ Pọl ukọ na ọ jọ oruiruo nọ ọ riẹ ọnyaba riẹ, ọnọ o vuhumu inọ ọ sae rẹro so ona obọ riẹ ọvo ho. Wọhọ epanọ ọwena ọ gwọlọ ehama na, Pọl ọ gwọlọ emamọ okwakwa iruo nọ ọ rẹ rọ kọ uzẹme nọ o rrọ ẹme Ọghẹnẹ fihọ udu otu nọ e jẹ gaviezọ kẹe. Okwakwa vẹ ọ mai ro ruiruo? Ẹme Ọghẹnẹ, Ikereakere Efuafo na. Epọvo na re, Ebaibol na họ uzedhe okwakwa nọ u re fi obọ họ k’omai ru ilele.

5. Re ma ruẹse jọ uvi egbodibo, eme u fo nọ ma re ru u te no ikereakere na nọ ma re se no ze no?

⁵ Pọl ọ riẹ inọ re a yọrọ Ẹme Ọghẹnẹ gbagba u vi ese nọ a re se noi ze ọvo. Ọ rehọ ẹtẹzẹ ta ẹme ‘ruọ ahwo oma.’ (Iruẹru 28:23) Evaọ oghẹrẹ vẹ? Pọl ọ rehọ Ikereakere na tẹzẹ ahwo buobu re a jẹ uzẹme Uvie na rehọ. O lele i rai jẹ iroro. Pọl ọ raha emerae esa jẹ jọ uwou-egagọ evaọ obọ Ẹfẹsọs ‘ta ẹme do ae họ rọwo eware uvie Ọghẹnẹ.’ Dedenọ “ejọ i [je dhesẹ] eva egaga gbe ọjẹfiẹ,” efa e jẹ gaviezọ. Fiki odibọgba Pọl evaọ Ẹfẹsọs, “ẹme Ọnowo na ọ tẹ ro whawha avọ obọ okparọ.”—Iruẹru 19:8, 9, 20.

6, 7. Oghẹrẹ vẹ Pọl ọ rọ do orro họ odibọgba riẹ, kọ ẹvẹ ma sai ro ru epọvo na?

⁶ Wọhọ owhowho Uvie ajọwha, Pọl ọ ‘do oro họ odibo-ọgba riẹ.’ (Ahwo Rom 11:13) Evaọ oghẹrẹ vẹ? O dhesẹ omorro ho; yọ oma o vo riẹ hẹ re a riẹe eva ẹgbede wọhọ omọvo ibe iruiruo Ọghẹnẹ. Ukpoye, o rri odibọgba riẹ wọhọ ọghọ nọ ọ mae rro kpobi. Pọl ọ rọ ona avọ ẹgba rehọ Ẹme Ọghẹnẹ ruiruo. Iruo riẹ nọ i wo ẹvi e kẹ amọfa ajọwha, onọ o wọ rai ru odibọgba rai vọ viere. Onana o do orro họ odibọgba riẹ re.

⁷ Wọhọ Pọl, ma rẹ sae rehọ ẹkwoma Ẹme Ọghẹnẹ nọ ma re ro ruiruo ziezi kẹse kẹse do orro họ odibọgba mai re. Evaọ kabọ kabọ odibọgba mai, ute mai o rẹ jọ re ma rehọ oware jọ no Ikereakere na ze rọ ta ẹme kugbe ahwo nọ ma nyaku kpobi. Ẹvẹ ma sai ro ru onana avọ ẹtẹzẹ? Roro kpahe idhere esa jọ nọ i wuzou: (1) Kpọ iroro ahwo rri Ẹme Ọghẹnẹ evaọ edhere nọ o re fi adhẹẹ họ Ẹme na. (2) Rehọ ona ru oware nọ Ebaibol na e ta vẹ gbe epanọ u ro kie kpahe ẹme nọ whọ be ta na. (3) Rehọ Ikereakere na lele ohwo na jiroro evaọ edhere nọ o rẹ lẹliẹ ohwo na rọwo ẹme na.

8. Ekwakwa usiuwoma ota Uvie na vẹ ma wo nẹnẹ, kọ oghẹrẹ vẹ whọ rọ rehọ ai ruiruo no?

⁸ Iwhowho Uvie ọgbọna a wo ekwakwa jọ nọ Pọl o wo ho evaọ etoke odibọgba riẹ. Usu enana jọ họ ebe, emagazini, ibroshọ, ebe-uzizie, emebe-evẹvẹ, gbe evuẹ nọ a kporo fihọ itepu avọ ividio. Evaọ ikpe-udhusoi nọ u kpemu na, a jẹ rehọ ekade nọ a kere ovuẹ usiuwoma họ, erekọdo, imoto nọ a fi egba họ, gbe irediyo ro whowho ovuẹ na re. Dede na, Ebaibol na họ ugogo okwakwa mai, yọ u fo re ma rehọ okwakwa onana nọ a rẹ ruẹ obọ riẹ hẹ na ro ruiruo ziezi.

Odibọgba Mai O re Wo Owọ no Ẹme Ọghẹnẹ ze Hrọ

9, 10. Rọ kpahe Ẹme Ọghẹnẹ nọ a re ro ruiruo, eme ma rẹ sai wuhrẹ no ohrẹ nọ Pọl ọ kẹ Timoti ze?

⁹ Ẹvẹ ma sae rọ rehọ Ẹme Ọghẹnẹ ruiruo ziezi? Ẹkwoma eru lele eme nana nọ Pọl o kere se Timoti, ibe-oruiruo riẹ na: ‘Dawo oma re whọ sai ru oma ra wọhọ ọnọ a jẹrehọ no, obọ aro Ọghẹnẹ jẹ wọhọ oruiruo ọnọ ọ kare omaovuọ, nọ rẹ yọrọ ẹme uzẹme na gbagba.’ (2 Timoti 2:15) Eme o gwọlọ re a ‘yọrọ ẹme uzẹme na gbagba’?

¹⁰ Ubiẹme Griki nọ a fa fihọ ‘yọrọ gbagba’ na u wo otofa “epanọ a rẹ nyawo oware liọ” hayo “epanọ a rẹ gbẹre edhere liọliọ.” Evaọ ohrẹ Pọl se Timoti na ọvo a jọ rehọ ẹme ọyena ruiruo evaọ Ikereakere Griki Ileleikristi na. A sae rehọ ẹme ọvona dhesẹ epanọ a rẹ tọ okame oliọliọ fihọ udhu. O rẹ sae jọ omovuọ kẹ uvi ọwhẹrẹ nọ ọ tẹ tọ okame whọhọ whọhọ. Re ọ sae jọ “oruiruo ọnọ ọ kare omaovuọ,” a kareghẹhọ Timoti inọ o reghe no iwuhrẹ uzẹme erọ Ẹme Ọghẹnẹ hẹ. Timoti ọ rẹ kuvẹ re eriwo obọ riẹ e kpọ ewuhrẹ riẹ hẹ. Ikereakere na e rẹ jọ ehri usiuwoma ota gbe iwuhrẹ riẹ kpobi. (2 Timoti 4:2-4) Evaọ edhere ọnana, a vẹ sae kpọ ahwo udu oruọzewọ re a wo eriwo Jihova, o gbẹ jọ nọ orọ eriariẹ-ikpehru akpọ na ha. (Ahwo Kọlọsi 2:4, 8) Epọvo na o rrọ nẹnẹ re.

Ma re Dhesẹ Uruemu Ezi Hrọ

11, 12. Oghẹrẹ vẹ Ẹme Ọghẹnẹ nọ ma rẹ yọrọ gbagba u re ro kpomahọ uruemu mai?

¹¹ Ma re ru vi Ẹme Ọghẹnẹ nọ ma re ro ruiruo gbagba ẹkwoma uzẹme na nọ ma re whowho ọvo. Ma re ru lele iei hrọ. ‘Mai yọ ibe iruiruo Ọghẹnẹ,’ fikiere ma rẹ jọ iruiruo eviẹwẹ vievie he. (1 Ahwo Kọrint 3:9) Ẹme Ọghẹnẹ ọ ta nọ: “Fikiere whẹ owhuhrẹ amọfa, kọ whọ gbẹ sai wuhrẹ oma obọ ra re? Kọ whẹ ọnọ ọ rẹ ta kẹ omọfa nọ, who tho uji hi, kọ who re tho [uji] re? Kọ whẹ nọ ọ be takẹ ohwo nọ o bru ẹhwae he na, who re bruẹhwae? Kọ whẹ nọ ọ rẹ ghọ eware iwẹegọ na, whọ rẹ sae lẹlẹ ruọ eva uwou ẹdhọ e ria eware nọ a rọ gọ iwẹ?” (Ahwo Rom 2:21, 22) Fikiere, wọhọ iruiruo Ọghẹnẹ nẹnẹ, edhere jọ nọ ma rẹ rọ yọrọ Ẹme Ọghẹnẹ gbagba họ ẹkwoma ohrẹ nana nọ ma rẹ nya lele: “Rehọ ẹroọrọsuọ ra kpobi kpahe ỌNOWO na whọ rehọ eva kpahe ẹriẹ omobọ ra ha. Eva idhere ra kpobi ọ thọrọ owhẹ ẹro ho, o ve ti ruọ idhere ra kpọvi.”—Itẹ 3:5, 6.

¹² Eme ma re rẹro riẹ nọ ma tẹ be yọrọ Ẹme Ọghẹnẹ gbagba? Roro kpahe ẹgba Ẹme Ọghẹnẹ nọ ọ sai ro nwene uzuazọ ahwo oruọzewọ.

Ẹme Ọghẹnẹ O Wo Ẹgba nọ O re ro Nwene Ohwo

13. Ẹvẹ Ẹme Ọghẹnẹ nọ a re fihọ iruo ọ sai ro ruiruo evaọ oma ohwo?

¹³ Nọ a tẹ jẹe rehọ wọhọ ẹme nọ o wo udu, ovuẹ nọ o rrọ Ẹme Ọghẹnẹ u wo ẹgba ologbo nọ u re ro fi obọ họ kẹ ahwo ru obọdẹ inwene evaọ uzuazọ rai. Pọl ọ ruẹ ẹgba nọ ọ rrọ ẹme Ọghẹnẹ jẹ ruẹ epanọ o ro nwene uzuazọ ahwo nọ a zihe ruọ Ileleikristi evaọ Tẹsalonika anwae. Fikiere ọ ta kẹ ai nọ: “Kẹse kẹse ma bi yere Ọghẹnẹ fiki onana, keme anhwọ okenọ wha rọ rehọ ẹme Ọghẹnẹ nọ owha jọ unu mai yo na; wha rehọ e riẹ wọhọ ẹme ahwo ho, rekọ wọhọ epanọ o ghinẹ rọ, ẹme Ọghẹnẹ nọ ọ rọ eva rai otu nọ ọrọwo na ru iruo.” (1 Ahwo Tẹsalonika 2:13) Rọkẹ Ileleikristi eyena—ẹhẹ, rọkẹ uvi ilele ọ Kristi kpobi—a rẹ sai kele eriariẹ evere ohwo-akpọ dhe ereghẹ ikpehru Ọghẹnẹ hẹ. (Aizaya 55:9) Ahwo Tẹsalonika a ‘rehọ ẹme na eva uye obẹbẹ, avọ oghọghọ nọ Ẹzi Ẹri na ọ kẹ rai’ a tẹ rehọ ere jọ oriruo kẹ ibe enọ e rọwo.—1 Ahwo Tẹsalonika 1:5-7.

14, 15. Ẹvẹ ovuẹ nọ o rrọ Ẹme Ọghẹnẹ u wo ẹgba te, kọ fikieme?

¹⁴ Ẹme Ọghẹnẹ o wo ẹgba, wọhọ epanọ Jihova, Ọnọ o wo rie, o wo ẹgba na. O no obọ “Ọghẹnẹ uzuazọ na” ze, ọnọ ọ rehọ ẹme riẹ “ma idhiwu na,” yọ ẹsikpobi ẹme ọyena ‘o re ru oware nọ a rehọ fiki riẹ vi ei gba.’ (Ahwo Hibru 3:12; Olezi 33:6; Aizaya 55:11) Ọgba-eriariẹ Ebaibol jọ ọ ta nọ: “Ọghẹnẹ ọ rẹ hẹrioma no Ẹme riẹ hẹ. Ọ rẹ vro riẹ hẹ epaọ ẹsenọ o wo obọ kpahe iẹe he. . . . Fikiere ọ rẹ seba erugba ha, ẹme na ọ rẹ fọ kpoko ho; keme Ọghẹnẹ nọ ọ rrọ uzuazọ na ọ ta riẹ.”

¹⁵ Ẹvẹ ovuẹ nọ u no Ẹme Ọghẹnẹ ze u wo ẹgba te? Ẹgba riẹ o wo umuo ho. Nwani fo, Pọl o kere nọ: “Ẹme Ọghẹnẹ ọ rẹjọ bẹdẹ, avọ iruo, ọ da vi ọpia akọava, nọ o re duwu lafiẹ udevie ẹwẹ gbe ẹzi te ezo-oma, gbe eriare ighogho obọ enwa, gbe eva ekiẹ jẹ riẹ ẹjiroro obọ eva.”—Ahwo Hibru 4:12.

16. Ẹvẹ Ẹme Ọghẹnẹ ọ rẹ sai nwene ohwo ga te?

¹⁶ Ovuẹ nọ o rrọ Ikereakere na o “da vi ọpia akọava.” Fikiere u wo ẹgba gaga nọ ọ rẹ rọ nya ro ohwo oma vi okwakwa kpobi nọ ohwo-akpọ o wo. Ẹme Ọghẹnẹ o re duwu lafi edidi eva ohwo-akpọ yọ ọ rẹ sai nwene eva ohwo, kpomahọ oghẹrẹ nọ o re roro gbe oware nọ o re you, ru ei fihọ oruiruo Ọghẹnẹ nọ a rẹ jẹrehọ. Okwakwa na u wo ẹgba kẹhẹ!

17. Ru ei vẹ epanọ Ẹme Ọghẹnẹ o ro wo ẹgba nọ o sai ro nwene ohwo.

¹⁷ Ẹme Ọghẹnẹ o re dhesẹ oghẹrẹ nọ ohwo ọ ghinẹ rrọ lafi nọ a tẹ rehọ iẹe wawo oghẹrẹ nọ ohwo o re roro omariẹ hayo oghẹrẹ nọ o re ru amọfa roro nọ ọ rrọ. (1 Samuẹle 16:7) Makọ ohwo omuomu dede eva ẹsejọ o re ru ewoma hayo kru oma ga evaọ egagọ rọ ko oghẹrẹ ohwo nọ ọ ghinẹ rrọ evaọ obeva dhere. Ahwo muomu a rẹ rehọ oma ọviẹwẹ karo re a ruẹsi ru eyoma. Otu omoya a rẹ rehọ omaurokpotọ eviehọ dhe aro re ahwo-akpọ a ruẹsi jiri ai. Dede na, ẹkwoma ẹferevia oware nọ o ghinẹ rrọ ubiudu ohwo, Ẹme Ọghẹnẹ ọ rẹ sae wọ udu ohwo omaurokpotọ nọ o je fi ohwo anwae na h’otọ jẹ “wha ohwo ọkpokpọ na họ oma, ọnọ a ma tho Ọghẹnẹ eva uvi ẹrẹreokie gbe ẹfuọ.” (Ahwo Ẹfẹsọs 4:22-24) Iwuhrẹ Ẹme Ọghẹnẹ e rẹ sai nwene otu edhozọ zihe ruọ Isẹri aruọwha erọ Jihova gbe iwhowho Uvie ajọwha.—Jerimaya 1:6-9.

18, 19. Ro no idhe-ẹme enana ze hayo eware nọ e via kẹ owhẹ no eva usiuwoma ota, dhesẹ epanọ uzẹme Ikereakere na o sai ro nwene uruemu ohwo.

¹⁸ Ẹgba Ẹme Ọghẹnẹ nọ o re ro nwene ohwo ọ be jọ oma ahwo ruiruo iwoma eva eria kpobi. Wọhọ oriruo, iwhowho Uvie nọ i no obọ Phnom Penh, Cambodia ze, a jẹ hae ta usiuwoma evaọ ubrotọ Kompong Cham isiava eva amara. Nọ epastọ jọ evaọ ẹwho na ọ ruẹ nọ ibe isu-egagọ riẹ a be ta eme iyoma kpahe Isẹri Jihova, ọ tẹ gwọlọ Isẹri na via je lele ai t’ẹme eva oke ofa nọ a weze ziọ ubrotọ na. Ọ nọ enọ na kiti kiti fihotọ kpahe ekoko edẹ-eriosehọ, ọ tẹ roma totọ gaviezọ nọ a be rehọ Ikereakere na lele iei jiroro na. Kẹsena o te bo nọ: “Enẹna me vuhumu no inọ eme nọ ibe epastọ mẹ a be hae ta kpahe owhai na kpakọ uzẹme he! A be hae ta nọ wha re se Ebaibol ho, rekọ ohiohiẹ nana Ebaibol na ọvo wha se no ze!”

¹⁹ Aye ọnana o gbe je lele Isẹri na t’ẹme kpahe Ebaibol yọ ọ k’uvẹ kẹ ozọ inọ a ti si ei no epastọ re o whaha iẹe he. Ọ ta eware nọ o bi wuhrẹ no Ikereakere na ze kẹ ogbẹnyusu riẹ jọ, uwhremu na Isẹri na a te mu uwuhrẹ Ebaibol họ kugbe ogbẹnyusu riẹ na re. Ọwhọ eware nọ o je wuhrẹ na e da ruọ ogbẹnyusu riẹ na oma te epanọ ọ rọ ta ẹdẹjọ nọ a jọ uwuhrẹ evaọ obọ ichọche inọ, “Wha nyaze re Isẹri Jihova a wuhrẹ Ebaibol na kugbe owhai!” U lehie he, Isẹri Jihova a te je wuhrẹ Ebaibol na kugbe aye nana nọ ọ jọ epastọ vẹre na, gbe amọfa.

20. Ẹvẹ oware nọ o via kẹ aye jọ evaọ obọ Ghana u ro dhesẹ ẹgba Ẹme Ọghẹnẹ?

²⁰ A sae jẹ jọ oware nọ o via kẹ Paulina, aye jọ evaọ obọ Ghana ruẹ ẹgba nọ Ẹme Ọghẹnẹ o wo. Owhowho Uvie jọ nọ ọ rrọ ọkobaro oke-kpobi ọ jẹ rehọ obe Eriariẹ Nọ I Re Su Kpohọ Uzuazọ Ebẹdẹ Bẹdẹ a na ru uwuhrẹ Ebaibol kugbei. Paulina ọ jọ orọo ivruvrẹ, ọ tẹ te ruẹ nọ u fo re o ru inwene rekọ ọzae riẹ gbe imoni riẹ kpobi a wọso iẹe gaga. Ọsẹ-ologbo riẹ, oguẹdhọ okọto ukpehru gbe osu ichọche rai, a daoma tẹzẹ iẹe bẹ ẹkwoma ẹme ọ Matiu 19:4-6 nọ a jẹ gẹle otofa riẹ. Oguẹdhọ na ọ jẹ ta ẹme ududu, rekọ Paulina ọ tẹ nwani vuhumu vẹrẹ inọ onana u tho oghẹrẹ nọ Setan ọ rọ gẹle Ikereakere na eva okenọ ọ jẹ dawo Jesu Kristi. (Matiu 4:5-7) Ọ kareghẹhọ ẹme ivevẹ Jesu kpahe orọo, nọ ọ ta nnọ Ọghẹnẹ ọ ma ahwo-akpọ ọzae gbe aye, orọnikọ ọzae gbe eyae he, gbe inọ aimava na orọnikọ aimasa ha, a rẹ te jọ uwo ọvo. Ọ dadamu ẹjiroro riẹ, yọ eva ukuhọ riẹ a tẹ kẹe uvẹ orọo-ofa no orọo ivruvrẹ nọ ọ jọ na. U lehie he, o te zihe ruọ owhowho Uvie evawere nọ ọ họ-ame no.

Gbẹ Hae Yọrọ Ẹme Ọghẹnẹ Gbagba

21, 22. (a) Ọtamuo vẹ ma gwọlọ wo wọhọ iwhowho Uvie? (b) Eme ma te ta ẹme kpahe evaọ uzoẹme n’otha na?

²¹ Ebaibol na ghinọ okwakwa nọ u wo ẹgba gaga nọ ma re ro fi obọ họ kẹ amọfa ru inwene evaọ uzuazọ rai re a ruẹsi si kẹle Jihova. (Jemis 4:8) Wọhọ epanọ iruiruo ona a rẹ rehọ ekwakwa iruo ru emamọ eware na, jọ o jọ ọtamuo mai re ma daoma kpobi rehọ Ẹme Ọghẹnẹ, Ebaibol na, ruiruo avọ ona evaọ iruo nọ Ọghẹnẹ o muhọ omai obọ wọhọ iwhowho Uvie na.

²² Ẹvẹ ma sae rọ rehọ Ikereakere na ruiruo ziezi evaọ iruo mai ọrọ ilele-iruo na? Edhere jọ họ ẹkwoma ona ẹtẹzẹ nọ ma rẹ bọ wọhọ iwuhrẹ. Iviena kpọ iroro ra rri uzoẹme n’otha na keme o fodẹ idhere jọ nọ ma re ro wuhrẹ je fi obọ họ kẹ amọfa nọ a jẹ jẹ uvuẹ Uvie na rehọ.

[Oruvẹ-obotọ]

Kọ Whọ Kareghẹhọ?

• Ekwakwa vẹ iwhowho Uvie a bi ro ruiruo?

• Idhere vẹ Pọl o ro fi oriruo h’otọ wọhọ owhowho Uvie?

• Eme o gwọlọ re a yọrọ Ẹme Ọghẹnẹ gbagba?

• Ẹvẹ Ẹme Ọghẹnẹ o wo ẹgba te?

[Iwoho nọ e rrọ ẹwẹ-obe avọ 6]

Ekwakwa jọ nọ Ileleikristi a bi ro whowho ovuẹ Uvie na