Kọ Whọ be Yọrọ Ẹme Ọghẹnẹ Ziezi?
1 Jesu Kristi họ owuhrẹ nọ ọ mae rro nọ o tu rria otọakpọ. Ọ jẹ hẹ t’ẹme evaọ edhere nọ u re duobọ te idu ahwo, kẹ ai ajọwha, jẹ wọ ai kpohọ eruo iruo iwoma. (Mat. 7:28, 29) Ọ jẹ hẹ rehọ Ẹme Ọghẹnẹ ruiruo ẹsikpobi wọhọ ehri iwuhrẹ riẹ. (Luk 24:44, 45) Ọ jẹ hẹ rehọ orro kẹ Jihova Ọghẹnẹ evaọ eware nọ ọ riẹ gbe enọ ọ jẹ sai wuhrẹ. (Jọn 7:16) Jesu o fi oriruo obọdẹ h’otọ kẹ ilele riẹ ẹkwoma Ẹme Ọghẹnẹ nọ ọ yọrọ gbagba.—2 Tim. 2:15.
2 Pọl ukọ na ọ jọ emamọ oriruo re ẹkwoma ẹgba nọ ọ rọ yọrọ Ẹme Ọghẹnẹ. O ru vi ese Ikereakere na ọvo kẹ amọfa; o je roro kpahe eware nọ o bi se na je ru ai vevẹ, jẹ kẹ imuẹro no Ẹme Ọghẹnẹ ze inọ Jesu họ Kristi na. (Iruẹru 17:2-4) Epọvo na re, Apọlọs, olele nọ unu riẹ u muẹme na, “ọ jẹ gaga evaọ ikerakere na,” yọ ọ jẹ yọrọ ai ziezi evaọ odhesẹvia uzẹme na.—Iruẹru 18:24, 28.
3 Jọ Owuhrẹ Ẹme Ọghẹnẹ: Iwhowho Uvie oke mai nana a reawere obokparọ buobu no evaọ ewuhrẹ ahwo udu-oruọzewọ ẹkwoma ovao rai nọ a be kpọ bru Ebaibol na jẹ jiroro noi ze. Evaọ oria jọ, oniọvo jọ ọ sai fi obe Izikiẹl 18:4 kugbe ikere efa họ iruo rọ jiroro kugbe orikogho jọ gbe imasa efa riẹ kpahe oria ẹria ahwo omuomu gbe ikiẹrẹe. Ukuhọ riẹ, ahwo jọ evaọ ichọche na a te muhọ ewuhrẹ, ọvo rai jọ ọ tẹ te ruọ ukoko na. Evaọ oria ọfa, a nọ mi oniọvo-ọmọtẹ jọ re ọ ta kẹ ọzae aye jọ nọ o wo isiuru kpahe oware nọ o soriẹ nọ Isẹri Jihova a gbe bi ru Kresimesi gbe ẹdẹ-eyẹ hẹ. Nọ o je se iyo Ikereakere na ovavo no obe ọ Reasoning na ze no, ẹme na o te vẹ ọzae na ẹro. Onana o tẹ were aye riẹ eva gaga nọ ọ rọ ta nọ: “Ma te nyaze ewuhrẹ rai.” Ọzae na ọ tẹ ghinẹ rọwo!
4 Fi Obufihọ nọ O Riẹ họ Iruo: Odibọgba Uvie Mai gbe ọruẹrẹfihotọ Ewuhrẹ Odibọgba na e rẹ k’omai emamọ ọkpọvio re i fiobọhọ k’omai yọrọ Ẹme Ọghẹnẹ ziezi. Iwhowho-uvie buobu a dhesẹ ovuhumuo no kpahe ẹjiroro sa-sa nọ a bi kporo je dhesẹvia rọkẹ erere mai, enọ i fokẹ oke mai na je wo ẹgba. Reasoning From the Scriptures o wo ezọhọfihọ buobu erọ epanọ a rẹ rọ t’ẹme ziezi kpahe izoeme 70 nọ a sino Ẹme Ọghẹnẹ ze. Eriariẹ Nọ I Re Su Kpohọ Uzuazọ Ebẹdẹ Bẹdẹ ọ kẹ orukpẹre ehri iwuhrẹ Ebaibol kpobi nọ u fo nọ ahwo kpokpọ a re wo otoriẹ rai. Iwuhrẹ avọ 24 gbe 25 ọrọ Theocratic Ministry School Guidebook i dhesẹ k’omai epanọ uvi iwuhrẹ a re ro muhọ, se, je fi ikereakere na họ iruo. Ma re fi obufihọ enana kpobi nọ e kẹle omai na họ emamọ iruo.
5 Nọ ma tẹ yọrọ Ẹme Ọghẹnẹ ziezi, ma te ruẹ nọ ọ ‘rọ uzuazọ avọ ogaga . . . yọ ọ rẹ riẹ iroro gbe ẹjiroro obọ eva’ ahwo nọ ma be ta usiuwoma kẹ. (Hib. 4:12) Obokparọ nọ ma wo noi ze o rẹ wọ omai nya e ta uzẹme na avọ ududu viere!—Iruẹru 4:31.