“Eva E Were Owhẹ Eva Ọnowo” Na

“Eva e were owhẹ eva ỌNOWO, ọ te kẹ owhẹ ẹgwọlọ ra kpobi.”—OLEZI 37:4.

1, 2. Ono họ Ehri uvi evawere, kọ ẹvẹ Devidi Ovie na o ro si iroro kpohọ onana?

“AHWO nọ a wo ẹzi iwhrori, eva e were ae, . . . ahwo nọ a wo ohrọ eva e were ae, . . . ahwo nọ a rẹ ruẹrẹ ahwo họ eva e were ae.” Enana avọ edhesẹ eware ezeza efa erọ ahwo nọ a rẹ wereva, eme nana họ eme emuhọ nọ e viodẹ evaọ Ovuẹ obọ Ugbehru Jesu nọ a riẹ gaga na, wọhọ epanọ Matiu okere Usiuwoma na o kere. (Matiu 5:3-11) Eme Jesu e kẹ imuẹro inọ o lọhọ re ma wo evawere.

² Ole urirẹ jọ nọ Devidi Ovie ọrọ Izrẹl anwae o kere u si iroro kpohọ Ehri uvi evawere na, Jihova. Devidi ọ ta nọ: “Eva e were owhẹ eva ỌNOWO, ọ te kẹ owhẹ ẹgwọlọ ra kpobi.” (Olezi 37:4) Rekọ eme o rẹ lẹliẹ ẹriẹ Jihova gbe ẹriẹ abọ sa-sa erọ ekwakwa riẹ jọ oware ‘evawere’? Ẹvẹ eroro kpahe eware nọ o ru vrẹ no gbe enọ o ti gbe ru evaọ orugba ẹjiroro riẹ e rẹ rọ k’owhẹ irẹro ewo “ẹgwọlọ ra”? Oma nọ ma re ro totọ rri Olezi 37, owọ 1 rite 11 o te kẹ iyo na.

‘Whọ Re Ihri Hi’

3, 4. Wọhọ epanọ a kere fihọ Olezi 37:1 na, didi ohrẹ Devidi ọ kẹ, kọ fikieme eyo ohrẹ na u ro kiehọ nẹnẹ?

³ Ma be rria “oke ẹbẹbẹ,” yọ emuemu ọ d’otọ fia. Ma ruẹ orugba eme Pọl ukọ na no: “Ahwo omuomu [gbe] otu eviẹhọ a re ti no eyoma ruọ onọ o mai yoma, eviẹwẹ [gbe] enọ a viẹhọ.” (2 Timoti 3:1, 13) O lọhọ gaga re obokparọ okafe gbe ọruẹriọ ahwo muomu o kpomahọ omai. Enana kpobi e sai reghe omai, raha eriwo abọ-ẹzi mai. Muẹrohọ epanọ eme emuhọ ọrọ Olezi 37 e rọ jaja omai aro vi kpahe ọza nana: “Udu u bru owhẹ fiki iru-umuomu hu, enọ i re ru ugberuo, whọ re ae ihri gbehe.”

⁴ Eria ẹgba-iyẹrẹnẹ akpọ na e be rehọ usi okienyẹ fa omai ovao kẹdẹ kẹdẹ. Eware i bi woma kẹ ethueki ofruriọ ababọ obọ nọ u bi te ai. Otu igbulegbu a bi gboja kẹ imiwhrori na. Enọ i bi kpe ahwo a be vabọ. Iriruo itieye na kpobi erọ ẹvẹtu uvi-ẹdhoguo na e sae kpare ofu mai hayo raha udhedhẹ iroro mai. Obokparọ okafe ọrọ irumuomu o sae tubẹ lẹliẹ omai re ai ihri dede. Kọ eva e tẹ make dha omai o te kpọ eware vi? Kọ ihri kpahe erere okafe nọ irumuomu a be reawere riẹ o sai nwene oware nọ o te jọ obaro te ai? Vievie! Yọ u tube fo nnọ “udu u bru” omai hi. Eme jabọ?

5. Fikieme a rọ rehọ irumuomu dhesẹ ẹbe?

⁵ Ọso-ilezi na ọ kuyo nọ: “Keme u ti krẹ hẹ nọ a ti yolo wọhọ ẹbe, a ve je lo wọhọ ẹbe ọrọrọ.” (Olezi 37:2) Ẹbe ọkpokpọ ọ sae jọ bọbọbọ, rekọ u ri kri hi na i ve yolo je whu no. Nwanọ ere o rrọ kẹ irumuomu. Eware i ti kiehọ kẹ ae bẹdẹ bẹdẹ hẹ. A te whu no, igho nọ a rehọ ofruriọ wo na i gbe ti fi obọ họ kẹ ae ofa ha. Ohwo kpobi o ve ti vu oware nọ ọ kọ. Pọl o kere nọ: “Uwhu họ osa eware uyoma.” (Ahwo Rom 6:23) Irumuomu gbe enọ i kiẹrẹe he kpobi a ve ti wo “osa” rai, a gbẹ te jọ họ. Uvumọ erere o rrọ edhere uzuazọ utioye na ha.—Olezi 37:35, 36; 49:16, 17.

6. Didi oware ma rẹ sai wuhrẹ no Olezi 37:1, 2 na ze?

⁶ Kọ ma rẹ kuvẹ re efe ubroke irumuomu o k’omai uye? Oware nọ ma jọ awọ ivẹ ọsosuọ ọrọ Olezi avọ 37 na wuhrẹ ona: Whọ kuvẹ hẹ re obokparọ rai o lẹliẹ owhẹ kieno ẹgọ Jihova. Ukpoye, tẹro ra vi eghale gbe itee abọ-ẹzi.—Itẹ 23:17.

‘Rọ Ẹroso ỌNOWO na re Who Ru Ewoma’

7. Fikieme ma je fi eva họ Jihova?

⁷ Ọso-ilezi na ọ tuduhọ omai awọ nọ: ‘Rọ ẹroso ỌNOWO na re who ru ewoma.’ (Olezi 37:3a) Okenọ awa-ọruọ hayo makọ avro i te zere omai, u re woma re ma fi eva mai kpobi họ Jihova. Ọye họ Ọnọ ọ rẹ kẹ uvi omofọwẹ abọ-ẹzi. Mosis o kere nọ: “Ọnọ ọ be ria oria Oride na, ọ rẹ te jọ otọ uwoho Erumeru na.” (Olezi 91:1) Okenọ ubu emuemu evaọ uyerakpọ nana u te bi kpokpo omai, o gwọlọ re ma rẹro so Jihova viere. Ma te kpowọ h’otọ, o rẹ were omai otẹrọnọ ogbẹnyusu jọ ọ rẹ jariẹ nọ ma rẹ r’oma da. Epọvo na re, ma tẹ be daoma nya evaọ ẹgbakiete, ma gwọlọ obufihọ Jihova.—Aizaya 50:10.

8. Ẹvẹ obọ nọ ma re wo evaọ odibọgba Ileleikristi na o sai ro fi obọ họ k’omai whaha udu nọ u re kpoho omai vrẹta fiki ọruẹriọ irumuomu na?

⁸ Ifue jọ ọrọ udu nọ u re kpoho omai fiki ọruẹriọ irumuomu na họ iruo buobu nọ ma re wo evaọ ẹgwọlọ via gbe obufihọ kẹ enọ e wọhọ igodẹ re a ti wo eriariẹ egbagba erọ ẹjiroro Jihova. Nọ emuemu o bi bu viere na, u fo nọ ma re ruiruo vọvọ evaọ obufihọ kẹ amọfa. Pọl ukọ na ọ ta nọ: “Wha se oware uwoma gbe ọghoruo ba ha, keme iwẹgọ [itieye na] e rẹ were Ọghẹnẹ gaga.” Oware “uwoma” nọ o mae rro nọ ma rẹ sai ru họ usiuwoma oruaro Uvie Ọghẹnẹ nọ ma rẹ ta kẹ amọfa. Usiuwoma ota ẹgbede mai ghinọ “iwẹegọ ejiro.”—Ahwo Hibru 13:15, 16; Ahwo Galesha 6:10.

9. Dhesẹ otofa ohrẹ Devidi na inọ “rria otọakpọ na.”

⁹ Devidi ọ ta haro nọ: “Rria otọakpọ na, jẹ rọ oruọzewọ yeri.” (Olezi 37:3b, NW ) Evaọ edẹ Devidi, “otọakpọ na” họ ẹkwotọ nọ Jihova ọ rọ kẹ Izrẹl, Ẹkwotọ Eyaa na. Evaọ etoke esuo Solomọn, iwhru riẹ e kẹre no Dan evaọ ofẹ ẹkpẹlobọ ovatha-ọre rite Biẹsheba evaọ ofẹ obọze ovatha-ọre. Onana o jọ ẹkwotọ Izrẹl. (1 Ivie 4:25) Nẹnẹ, oria nọ ma be rria kpobi evaọ otọakpọ na, ma bi rẹro okenọ otọakpọ na kpobi u ti ro zihe ruọ aparadase evaọ akpọ ọkpokpọ ọrọ ẹrẹreokie. Bọo oke oyena, ma be rria evaọ omofọwẹ abọ-ẹzi.—Aizaya 65:13, 14.

10. Eme o re noi ze nọ ma tẹ “rọ oruọzewọ yeri”?

¹⁰ Eme o ti noi ze ma tẹ “rọ oruọzewọ yeri”? Itẹ nọ a rọ ẹzi kere na e kareghẹhọ omai nọ: “Ohwo nọ o kiẹrẹe o re wo eghale buobu.” (Itẹ 28:20) Oruọzewọ nọ ma re ro tilẹmu ewhowho emamọ usi na evaọ oria kpobi nọ ma be rria jẹ rọ kẹ ohwo nọ o te omai obọ kpobi o rẹ ghinẹ wha osohwa no obọ Jihova ze. Wọhọ oriruo, Frank avọ aye riẹ, Rose, a ruọ iruo ọkobaro na ikpe 40 nọ e vrẹ evaọ ẹwho jọ nọ ọ rrọ ofẹ ẹkpẹlobọ ovatha-ọre ọ Scotland. Umutho ahwo nọ a jọ obei dhesẹ isiuru kpahe uzẹme na no vẹre a zihe kpemu no. Avọ odiri, ọzae avọ aye nana nọ e rrọ ekobaro na a tẹ rọ udu dhe iruo usiuwoma ota gbe ilele-iruo na. Obọnana ukoko nọ o be nyaharo o rrọ ẹwho ọyena. Jihova ọ ghinẹ ghale ithihakọ ọzae avọ aye nana no. Frank ọ rehọ omarokpotọ ta nọ: “Oghale nọ o mae rro kpobi họ, ma gbẹ rrọ ukoko na yọ Jihova ọ gbẹ be r’omai ruiruo.” Ẹhẹ, okenọ ma tẹ “rọ oruọzewọ yeri,” ma re wo je duku eghale buobu.

“Eva E Were Owhẹ Eva ỌNOWO” Na

11, 12. (a) Ẹvẹ ma sai ro ‘wo evawere eva ỌNOWO na’? (b) Didi ute whọ rẹ sai fihọ kpahe ewuhrẹ omobọ ra, kọ avọ iyẹrẹ vẹ?

¹¹ Re ma bọ usu mai ga kugbe Jihova jẹ yọrọ eva nọ ma fihọ iẹe, o gbahọ nnọ ma rẹ ‘wereva eva ỌNOWO na.’ (Olezi 37:4a) Ẹvẹ ma re ro ru ere? Ukpenọ ma rova fiki uyero jọ nọ ma rrọ, dede nọ o sae jọ bẹbẹ, ma re rri bru Jihova kẹ obufihọ. Edhere jọ nọ ma sai ro ru onana họ oke nọ ma re fihọ ro se Ẹme riẹ. (Olezi 1:1, 2) Kọ isase Ebaibol ra e be wha evawere se owhẹ? O te jọ ere otẹrọnọ ute ra họ re who wuhrẹ viere kpahe Jihova. Okenọ who te se oria jọ no, eme who gbe dhizu hu re whọ nọ oma ra nọ, ‘Eme oria nana u wuhrẹ omẹ kpahe Jihova?’ Whọ te ruẹ nnọ u ti fi obọ họ re omobe nọ who re kere eware fihọ ọ jọ kẹle owhẹ okenọ who te bi se Ebaibol na. Oke kpobi nọ whọ fọ re who roro kpahe eme nọ who se na, kere eme jọ nọ e kareghẹhọ owhẹ kpahe okwakwa isiuru Ọghẹnẹ jọ fihọ otọ. Evaọ olezi ọfa, Devidi ọ so nọ: “Ru re ẹme unu mẹ gbe iroro eva mẹ e hẹ were owhẹ, O ỌNOWO, eri mẹ gbe ọta [mẹ].” (Olezi 19:14) Re ma roma totọ roro kpahe Ẹme Ọghẹnẹ enẹ o rẹ “were” Jihova gaga jẹ k’omai evawere re.

¹² Ẹvẹ ma sai ro wo evawere no ewuhrẹ gbe eroro mai ze? Ma rẹ sai ru ei họ ute mai re ma wuhrẹ gaga kpahe Jihova gbe idhere riẹ. Ebe wọhọ Ọzae nọ Ọ Mae Rro nọ Ọ Rria No gbe Si Kẹle Jihovaa e k’omai eware buobu nọ ma rẹ sai roro kpahe avọ igbunu. Ere oruo, Devidi ọ kẹ okiẹrẹe imuẹro na inọ Jihova “ọ te kẹ owhẹ ẹgwọlọ ra kpobi.” (Olezi 37:4b) O sae jọnọ evaifihọ itienana e wọ Jọn ukọ na kere eme na: “Whaọ onana họ eva-ifihọ nọ oma wo kpahọ iẹ, nnọ, re ma tẹ yare oware jọ wọhọ [epaọ] oreva riẹ, o re yo kẹ omai. Ma tẹ riẹ nọ oware kpobi nọ oma yare o re yo kẹ omai, ma riẹ nọ ayare riẹ o te omai obọ no.”—1 Jọn 5:14, 15.

13. Evaọ umutho ikpe nọ e vrẹ na, ẹnyaharo vẹ evaọ iruo usiuwoma ota Uvie na a ruẹ no evaọ ekwotọ buobu?

¹³ Wọhọ enọ e be yọrọ ẹgbakiete, isiuru ọsosuọ mai họ re ma ruẹ ẹkpare kpehru esuo Jihova. (Itẹ 27:11) Kọ oma u gbe bi mu omai okenọ ma te yo kpahe ẹnyaharo usiuwoma nọ inievo mai a be ta evaọ ekwotọ nọ e jọ otọ esuo ọgbahọ vẹre? Ma be rọ ọwhọ rẹro ufuoma ọfa nọ o te roma via taure uyerakpọ nana u te ti kuhọ. Idibo Jihova buobu nọ e be rria ewho Iyibo a bi w’obọ gaga evaọ usiuwoma ota kẹ emọ-isukulu, enọ e dhẹ ohrẹ ẹmo, gbe amọfa nọ e dhẹ ze te roma da ewho rai jẹ be reawere ufuoma egagọ. O rrọ ẹgwọlọ mai gaga inọ, nọ ahwo nana a bi zihe kpo na, a te kuvẹ re elo uzẹme na o lo makọ eva ebi ọlala.—Matiu 5:14-16.

“Rọ Oma Ra Kpobi kẹ ỌNOWO”

14. Didi imuẹro e riẹ inọ ma rẹ sai fievahọ Jihova?

¹⁴ Ẹvẹ o rrọ ududhomẹno te re ma riẹ nnọ ma rẹ sai ru awa-ọruọ gbe ehwa nọ ma roro nọ ma sae wọ họ vori! Oghẹrẹ vẹ? “Rọ oma ra kpobi kẹ ỌNOWO, fievahọ iẹ,” ere Devidi ọ ta, je fibae nnọ, “o ti ru gba kẹ owhẹ.” (Olezi 37:5) Evaọ ikoko mai ma wo imuẹro buobu inọ Jihova yọ ọthuke nọ a re fi eva họ. (Olezi 55:22) Enọ e rrọ iruo odibọgba oke-kpobi na, makọ wọhọ ekobaro, esẹro ọnyawariẹ, imishọnare, hayo ahwo unevaze nọ i bi ruiruo evaọ Ebẹtẹle, a sae r’obọ s’udu inọ a sae ghinẹ rẹro so ẹruọsa Jihova. Kọ who gbe lele enọ whọ riẹ t’ẹme jẹ nọ epanọ Jihova o ro fi obọ họ kẹ ae no? Who ti yo iku buobu enọ i ti dhesẹ nnọ makọ evaọ etoke ọbẹwẹ, Jihova ọ rẹ dhogbo. Ọ rẹ kẹ eware nọ e roja evaọ uzuazọ.—Olezi 37:25; Matiu 6:25-34.

15. Ẹvẹ ẹrẹreokie ahwo Ọghẹnẹ o bi ro lo via?

¹⁵ Ma te ru Jihova họ ẹrorọsuọ mai je fi eva kpobi họ iẹe, ma rẹ sae ruẹ orugba eme nọ ọso-ilezi na ọ ta haro: “O reti dhesẹ owhẹ via wọhọ elo, jegbe ewoma ra wọhọ udevie-uvo.” (Olezi 37:6) Wọhọ Isẹri Jihova, ẹsikpobi ahwo a rẹ ta eme iyoma fihọ omai uzou. Rekọ Jihova o re rovie ibiaro enọ i wo udu oruọzewọ re u fi obọ họ kẹ ae vuhumu inọ uyoyou kẹ Jihova gbe erivẹ họ oware nọ o be wọ omai kpohọ usiuwoma. Eva oke ovona, uruemu ezi mai, dede nnọ ahwo buobu a bi rri rie thọ, o rẹ seba ẹva via ha. Jihova ọ be thọ omai no oghẹrẹ ọkparesuọ gbe ukpokpoma kpobi. Fikiere, ẹrẹreokie ọrọ ahwo Ọghẹnẹ u bi lo via wọhọ ọre udevie uvo.—1 Pita 2:12.

‘Hẹrẹ . . . Hẹrẹ avọ Odiri’

16, 17. Rọwo kugbe Olezi 37:7, oke eme u te no, kọ fikieme?

¹⁶ Eme ọso-ilezi na nọ i lele i rie họ: “Hẹrẹ ỌNOWO, whọ hẹrẹ iẹe avọ odiri, whọ jọ udu u bru owhẹ fiki ọnọ ọ be ruẹ ria eva edhere riẹ hẹ, fiki ohwo nọ ọ rẹ wha iroro iyoma nya!” (Olezi 37:7) Devidi ọ jọ etenẹ fi ẹgba họ ẹgwọlọ nọ ma rẹ rọ rehọ odiri hẹrẹ Jihova re ọ j’owọ. Dede nọ urere uyerakpọ nana u ri te he, onana o rọ oware nọ ma re ro gu inoma ha. Kọ ma gbẹ re ruẹ nnọ ohrọ gbe odiri Jihova e rro vi epanọ ma roro vẹre? Kọ ma sai dhesẹ enẹna inọ ma be rọ odiri hẹrẹ, inọ ma bi dhomahọ usiuwoma ota na bẹsenọ urere na u re te? (Mak 13:10) Enẹna họ oke nọ ma rẹ rọ whaha uruemu okpakpa nọ o rẹ sae raha oghọghọ gbe ufuoma abọ-ẹzi mai. Enẹna họ oke nọ ma rẹ rọ whaha okpomahọ ogbekuo erọ akpọ Setan viere. Yọ enẹna họ oke nọ ma rẹ rọ yọrọ ẹfuọ uruemu orọnikọ ma rẹ raha edikihẹ okiẹrẹe mai evaọ aro Jihova ha. Joma gbolo iroro ọfariẹ kpobi thabọ jẹ whaha uruemu otọtọ nọ ma re wo kpahe ezae hayo eyae.—Ahwo Kọlọsi 3:5.

¹⁷ “Se ofuomuo ba,” ere Devidi ọ hrẹ omai. “Whọ rova ha, keme ofuomuo ọ rẹ wha umuomu tha. A ti kpe iru-umuomu na kufiẹ; rekọ enọ e be hẹrẹ ỌNOWO kpobi, a rẹ te rehọ otọ na reuku.” (Olezi 37:8, 9) Ẹhẹ, ma rẹ sae rehọ udu kpobi rẹro inọ kẹle na Jihova o ti si egbogbo gbe enọ i bi ru ai kpobi no otọakpọ na.

“Omoke Kakao”

18, 19. Didi uduotahawọ ma wo no Olezi 37:10 ze?

¹⁸ “Omoke kakao, iru-umuomu e gbẹ te jọ họ; dede nọ wha bi ri oria riẹ ziezi na, ọ rẹ te jọ etẹe he.” (Olezi 37:10) Ẹvẹ eme eyena e tuduhọ omai awọ te nọ ma be kẹle ekuhọ uyerakpọ nana gbe ekuhọ mẹrẹjọmẹsa no Jihova nọ ọ wha okpẹtu ze no na! Oghẹrẹ egọmeti hayo udu-esuo nọ ahwo a roro ku no kpobi u kie wariama no. Yọ obọnana ma kẹle oke nọ ma ti ro zihe kpohọ esuo Ọghẹnẹ no, Uvie Jihova evaọ obọ Jesu Kristi. Ọ te kpọ iruẹru akpọ na je si enọ e be wọso Uvie Ọghẹnẹ no.—Daniẹl 2:44.

¹⁹ Evaọ akpọ kpokpọ na, eva otọ Uvie Ọghẹnẹ, whọ tẹ make gwọlọ kẹhẹ, whọ te sae ruẹ uvumọ ‘orumuomu’ hu. Evaọ uzẹme, ohwo nọ ọ wọso Jihova evaọ oke oyena kpobi a re ti kpei no ovovẹrẹ. Uvumọ ohwo nọ ọ be wọso esuo riẹ hayo bi veghe uzou kẹ udu-esuo Ọghẹnẹ ọ te jọ etẹe he. Erivẹ ra kpobi a te jọ ahwo nọ a wo isiuru nọ a re ro ru eva were Jihova. Dai roro omofọwẹ nọ oyena o te wha ze—isiavẹ gbe ikeleku e gbẹ te jariẹ hẹ, uvumọ oware nọ o ti fi ọzadhe họ evaifihọ gbe evawere o te jariẹ hẹ.—Aizaya 65:20; Maeka 4:4; 2 Pita 3:13.

20, 21. (a) Amono họ “enọ e rọ oma kpotọ” erọ Olezi 37:11 na, kọ fikieme eva e be rọ “were ae evaọ omofọwẹ”? (b) Didi eghale i ti t’omai nọ ma tẹ raro kele Devidi Ologbo na?

²⁰ Eva oke oyena, “enọ e rọ oma kpotọ, e rẹ te rọ otọ na reuku.” (Olezi 37:11a) Rekọ amono họ enana nọ e “rọ oma kpotọ” na? Ẹhẹ, “enọ e rọ oma kpotọ” na họ enọ e be rehọ odiri hẹrẹ Jihova re ọ kpọ okienyẹ nọ a kienyẹ ai na kpobi họ. “Oma o rẹ te were ae evaọ omofọwẹ.” (Olezi 37:11b) Makọ enẹna ma be ruẹ omofọwẹ evaọ aparadase abọ-ẹzi nọ o rrọ ukoko Ileleikristi uzẹme na.

²¹ Dede nọ ma ri wo ufuoma no olahiẹ hẹ, ma be tha ohwohwo uke jẹ be sasa enọ e rrọ ọkora oma. Fikiere, ma be wha uvi evevọwẹ haro evaọ udevie ahwo Jihova. Inievo nọ a ro mu wọhọ ithuru-igodẹ a be rehọ uyoyou gbodibo kẹ ẹgwọlọ abọ-ẹzi mai—yọ evaọ ẹsejọ ẹgwọlọ abọ-iwo mai dede—onọ u bi fi obọ họ k’omai thihakọ uye fiki ẹrẹreokie. (1 Ahwo Tẹsalonika 2:7, 11; 1 Pita 5:2, 3) Ẹvẹ udhedhẹ nana o ghare te! Ma te je wo ẹruore uzuazọ ebẹdẹ bẹdẹ evaọ Aparadase udhedhẹ nọ ọ kẹlino na. Fikiere joma raro kele Devidi Ologbo na, Kristi Jesu, ọnọ ọwhọ kẹ Jihova ọ wọ riẹ gọ avọ ẹrọwọ rite uwhu. (1 Pita 2:21) Ẹkwoma ere oruo, ma te gbẹ wereva, jiri ọnọ ma be wereva kpahe na, Ọghẹnẹ mai, Jihova.

[Oruvẹ-obotọ]

Kọ Whọ Sae k’Uyo?

• Eme who wuhrẹ no Olezi 37:1, 2 na ze?

• Ẹvẹ eva e sae rọ “were owhẹ eva ỌNOWO [na]”?

• Didi imuẹro e riẹ inọ ma rẹ sai fievahọ Jihova?

[Uwoho nọ o rrọ ẹwẹ-obe avọ 21]

Ileleikristi e rẹ ‘re irumuomu ihri hi’

[Uwoho nọ o rrọ ẹwẹ-obe avọ 22]

“Rọ ẹroso ỌNOWO [na] who ru ewoma”

[Uwoho nọ o rrọ ẹwẹ-obe avọ 23]

Wo evawere kpahe Jihova ẹkwoma eware buobu nọ who re wuhrẹ kpahe iẹe

[Uwoho nọ o rrọ ẹwẹ-obe avọ 24]

“Enọ e rọ oma kpotọ, e rẹ te rọ otọ na reuku”