Izoge, Kọ Wha Be Bọ Kẹ Obaro?
“Keme mẹ riẹ oma nọ me wo kpahe kẹ owhai, . . . [omaa] ewoma, orọnọ eyoma ha, re mẹ kẹ owhai ẹruore obaro.”—JERIMAYA 29:11.
1, 2. Idhere sa-sa vẹ a rẹ sai rri ikpe uzoge?
EKPAKO buobu a re rri oke uzoge wọhọ obọdẹ etoke uzuazọ. A rẹ kareghẹhọ ẹgba gbe ọwhọ nọ a wo evaọ oke nọ a jọ emaha. A re roro kpahe oke nọ eware i bu rai uzou te ere he, oke nọ a jẹ riakpọ kuoma gbe ikpe buobu erọ omawere nọ a rẹriẹ ovao ku.
2 O sae jọ nọ whai enọ e rrọ emaha wha bi rri oma rai enẹ hẹ. Wha sai wo ẹbẹbẹ ọrọ eyerikugbe inwene iroro gbe ugboma erọ uzoge. Eva isukulu, wha rẹ sae rẹriẹ ovao ku otunyẹ ọhwa ọgaga. O sae jọ nọ wha be daoma gaga re wha whaha ogbẹlọ imu, idieda, gbe ọfariẹ-ogbe. Ibuobu rai e be jẹ rẹriẹ ovao ku ẹme seomaba-edhehọ hayo use-abọ efa nọ i wo obọ kpahe ẹrọwọ rai. Ẹhẹ, oke uzoge o sae jọ oke obẹbẹ. Ghele na, o rrọ oke uvẹ obọdẹ. Onọ na họ, Oghẹrẹ vẹ whọ te rehọ oke uvẹ obọdẹ na ru iruo?
Reawere Etoke Uzoge Ra
3. Didi ohrẹ gbe unuovẹvẹ Solomọn ọ kẹ izoge?
3 Ahwo nọ e kpako no a rẹ ta k’owhẹ nọ etoke uzoge o rẹ tọ họ, yọ a ta gba. Evaọ umutho ikpe jọ gheghe, yọ oke uzoge ra o vrẹ no. Fikiere reawere riẹ nọ whọ gbẹ rrọ uzoge na! Oye họ ohrẹ Solomọn Ovie na, ọnọ o kere nọ: “Ghọghọ, O whẹ ọmoha na, evaọ oke upelẹ ra, jọ eva ra e vọ avọ oghọghọ evaọ edẹ upelẹ ra kpobi; ru orọ eva ra gbe epanọ ukiehọ evaọ aro ra.” Ghele na, Solomọn ọ vẹvẹ izoge na unu nọ: “Si eva-edha no evaọ udu ra no, who si edada kpobi no oma ra no.” Ofariẹ, ọ ta nọ: “Ọmoha avọ emuhọ uzuazọ riẹ, ai kpobi ifofe.”—Ọtausiwoma Na 11:9, 10.
4, 5. Fikieme o jẹ rrọ oware areghẹ re izoge a ruẹrẹ oma họ kẹ obaro? Dhesẹ iẹe.
4 Kọ who wo otoriẹ eme Solomọn na? Re ma dhesẹ iẹe, dai roro ọmoha nọ a kẹ okẹ oghaghae jọ, ma rehọ iẹe nnọ ukuoriọ. Eme ọ rẹ rehọ iẹe ru? Ọ rẹ sae raha igho na kpobi kufiẹ rọ riakpọ—wọhọ ọmọ ogbọfariẹ ọrọ ọtadhesẹ Jesu na. (Luk 15:11-23) Rekọ eme o rẹ via okenọ igho na kpobi i te re no? Ababọ avro ọ rẹ vioja nnọ ọ raha igho riẹ kufiẹ! Evaọ abọdekọ riẹ, ma rehọ iẹe nnọ ọ rehọ igho na koko obaro akpọ riẹ họ, rehọ ai mu eki họ. Evaọ obaro, nọ o bi ti wo erere no eki na ze, kọ who roro nnọ ọ te vioja nnọ ọ rehọ igho na riakpọ họ evaọ oke uzoge riẹ? Vievie!
5 Rehọ ikpe uzoge ra wọhọ okẹ nọ Ọghẹnẹ ọ k’owhẹ, keme ere o ghinẹ rrọ. Ẹvẹ whọ te rehọ ai ro ru iruo? Whọ rẹ sae raha ẹgba gbe ọwhọ ra kpobi ro le akpọriọ, le omaweromẹ ababọ eroro kpahe obaro. Rekọ who te ru ere, rọ kẹ owhẹ “ọmoha avọ emuhọ uzuazọ” ra e rẹ te ghinẹ jọ “ifofe.” Ẹvẹ o rẹ mai woma te re whọ rehọ uvẹ uzoge ra rọ ruẹrẹ obaro akpọ ra họ!
6. (a) Ohrẹ Solomọn vẹ o rrọ ọkpọvio kẹ izoge? (b) Eme Jihova ọ gwọlọ ru kẹ emoha, kọ ẹvẹ ọmoha ọ sai ro wo erere no onana ze?
6 Solomọn ọ fodẹ ehri-uzi jọ nọ o rẹ sai fi obọ họ k’owhẹ rehọ ikpe uzoge ra ruiruo ziezi. Ọ ta nọ: “Kareghẹhọ ọnọ ọ ma owhẹ evaọ oke ọmoha ra.” (Ọtausiwoma Na 12:1) Oye họ usiavẹ obokparọ—gaviezọ kẹ Jihova, je ru oreva riẹ. Jihova ọ ta kẹ emọ Izrẹl anwae oware nọ ọ gwọlọ ru kẹ ai: “Keme mẹ riẹ oma nọ me wo kpahe kẹ owhai, . . . [omaa] ewoma, orọnọ eyoma ha, re mẹ kẹ owhai ẹruore obaro.” (Jerimaya 29:11) Jihova ọ gwọlọ k’owhẹ “ẹruore obaro” re. Whọ tẹ kareghẹhọ iẹe evaọ owojẹ gbe iroro-ejẹ ra, ẹruore obaro yena o re ti rugba.—Eviavia 7:16, 17; 21:3, 4.
‘Si Kẹle Ọghẹnẹ’
7, 8. Ẹvẹ ọmoha ọ sai ro si kẹle Ọghẹnẹ?
7 Jemis ọ ta udu họ omai awọ inọ ma kareghẹhọ Jihova nọ ọ ta nọ: ‘Si kẹle Ọghẹnẹ o re ti si kẹle owhẹ.’ (Jemis 4:8) Jihova họ Ọnọma na, Osu nọ ọ rrọ obọ odhiwu, ọnọ o fo nọ a rẹ gọ jẹ kẹ ujiro kpobi. (Eviavia 4:11) Ghele na, ma te si kẹle iẹe, o re ti si kẹle omai. Kọ isiuru uyoyou utioye na o gbẹ sasa owhẹ oma?—Matiu 22:37.
8 Ma re si kẹle Jihova evaọ idhere buobu. Wọhọ oriruo, Pọl ukọ na ọ ta nọ: “Wha ruẹrẹ abọ họ olẹ olẹ, wha ve je he roro avọ akpẹwẹ-okẹ.” (Ahwo Kọlọsi 4:2) Ẹme na họ, wo uruemu olẹ. U te k’owhẹ ọvo ho re whọ hai yo ami okenọ ọsẹ ra hayo ibe Oleleikristi evaọ ukoko na ọ tẹ lẹ. Kọ who horie eva ra kẹ Jihova no ẹdẹjọ jẹ ta kẹe oware nọ who bi roro, ozọ nọ whọ be dhẹ, gbe use-abọ nọ whọ rẹriẹ ovao ku? Kọ whọ ta eme jọ nọ whọ rẹ sae ta kẹ uvumọ ohwo ho fiki omovuọ kẹe no? Elẹ oruọzewọ nọ i no udu ze e rẹ lẹliẹ udu kie ohwo vi. (Ahwo Filipai 4:6, 7) I re fi obọ họ k’omai si kẹle Jihova jẹ riẹ nnọ o bi si kẹle omai.
9. Ẹvẹ uzoge ọ sae rọ gaviezọ kẹ Jihova?
9 Ma jọ eme nana nọ a rehọ ẹgba ẹzi kere na ruẹ edhere ọfa nọ ma re ro si kẹle Jihova: “Gaviezọ rọkẹ ohrẹ re whọ rehọ uwuhrẹ riẹ, re who wo areghẹ ẹdẹfa.” (Itẹ 19:20) Ẹhẹ, whọ tẹ gaviezọ kẹ Jihova je yoẹme kẹe, yọ whọ be bọ kẹ obaro. Ẹvẹ whọ sai ro dhesẹ nọ whọ be gaviezọ kẹ Jihova? Ababọ avro, who bi kpohọ iwuhrẹ Ileleikristi ẹsikpobi jẹ gaviezọ kẹ eme nọ a bi wuhrẹ. Ofariẹ, nọ whọ tẹ be jọ eva uwuhrẹ Ebaibol uviuwou yọ whọ be “dhẹ ọsẹ ra avọ oni ra.” (Ahwo Ẹfẹsọs 6:1, 2; Ahwo Hibru 10:24, 25) Oyena u kiehọ gaga. Fibae, kọ whọ be ‘dẹ oke’ rọ ruẹrẹ oma kpahe kẹ iwuhrẹ, ro se Ebaibol na ẹsikpobi, je ru ekiakiẹ? Kọ whọ be daoma fi eware nọ who bi se họ iruo, re whọ sae nya wọhọ ‘ohwo owareghẹ’? (Ahwo Ẹfẹsọs 5:15-17; Olezi 1:1-3) Who te ru ere, yọ who bi si kẹle Jihova.
10, 11. Irere logbo vẹ i re te emoha nọ a tẹ gaviezọ kẹ Jihova?
10 Evaọ eme emuhọ ọrọ Itẹ, ọnọ ọ rọ ẹgba ẹzi kere na ọ fodẹ ẹjiroro obe Ebaibol nana. Wọhọ epanọ ọ ta, ẹjiroro na họ, “re ahwo a ruẹse riẹ areghẹ gbe uwuhrẹ jẹ riẹ otọ eme nọ ikodo, rehọ ohrẹ evaọ iruẹru areghẹ, gbe ẹrẹreokie, te oruọzewọ avọ uvi oziẹbro; re a ruẹse rehọ ọtẹruo kẹ igbori, jegbe eriariẹ avọ ẹjiroro nọ okiete rọ kẹ oge na.” (Itẹ 1:1-4) Fikiere, nọ who bi se je fi eme Itẹ h’iruo na—jegbe eme oma Ebaibol na soso—whọ te bọ ẹrẹreokie gbe ewoma, yọ o te were Jihova eva re o ru owhẹ si kẹle iẹe. (Olezi 15:1-5) Epanọ whọ bọ areghẹ, eriariẹ, gbe orimuo te, ere iroro-ejẹ ra i ti woma te re.
11 Kọ o kare iroro re a rẹro nnọ ọmoha o ti dhesẹ areghẹ evaọ edhere nana? Ijo, keme emoha Ileleikristi buobu a bi ru ere. Fikiere, amọfa a be kẹ ai adhẹẹ, ‘a bi rri rai fihọ emaha ha.’ (1 Timoti 4:12) Esẹgbini rai a be rehọ ai seha, yọ Jihova ọ ta nnọ a bi ru udu riẹ ghọghọ. (Itẹ 27:11) Dede nnọ a rrọ emaha, a rẹ sai wo udu inọ eme nana nọ a rọ ẹgba ẹzi kere na i kie kpahe ai: “Fiẹrohọ ohwo nọ okiete, jẹ nabi ri ọrọ uzẹme, urere ohwo ọyena udhedhẹ.”—Olezi 37:37.
Salọ Ziezi
12. Ovẹ họ ẹsalọ ologbo jọ nọ emoha a rẹ salọ, kọ fikieme ẹsalọ yena u re ro kpomahọ ohwo krẹkri?
12 Etoke uzoge yọ oke ẹsalọ, yọ eware jọ nọ whọ salọ i re kpomahọ owhẹ krẹkri. Eware jọ nọ whọ salọ nẹnẹ e rẹ sai kpomahọ owhẹ evaọ ikpe buobu nọ e tha. Emamọ ẹsalọ o re fiba uzuazọ evawere, ọrọ obokparọ. Ẹsalọ oyoma o rẹ sae raha uzuazọ ra muotọ. Roro epanọ oyena o rrọ uzẹme te evaọ esalọ ivẹ nọ who re ru. Orọ ọsosuọ: Ono whọ rẹ salọ wọhọ ogbẹnyusu? Fikieme onana u ro wuzou? Whaọ, itẹ nọ a rehọ ẹgba ẹzi kere na o ta nọ: “Ọnọ ọ nya lele ahwo owareghẹ o re wo areghẹ, rekọ usu igheghẹ o rẹ nwa ohwo oma.” (Itẹ 13:20) Ẹme na họ, ujerekrẹ, ma ti zihe ruọ ọnọ ma bi lele nya usu—owareghẹ hayo ogheghẹ. Ọvẹ ma gwọlọ jọ?
13, 14. (a) U te no ahwo nọ whọ rẹ jọ kugbe no, eme usu o kẹre te? (b) Didi iroro ethọthọ emoha a rẹ whaha?
13 A tẹ t’ẹme kpahe usu, ẹsejọhọ iroro ra e rẹ dhẹ kpohọ ahwo nọ whọ rẹ jọ kugbe. Whọ riẹ roro, rekọ etẹe o jọ kuhọ họ. Who te bi rri ughe etẹlivisiọno, gaviezọ kẹ ile, se obe, kpohọ isinima, hayo kiẹ kpohọ eria jọ evaọ Itanẹte, yọ usu whọ be nya na. Otẹrọnọ ẹjiroro usu oyena họ re o kẹ omaweromẹ ozighi gbe ọfariẹ-ogbe hayo be ta udu họ ogbẹlọ imu, idieda-thomawa, hayo oware ofa jọ nọ u mukpahe ehri-izi Ebaibol, yọ who bi lele ohwo “ogheghẹ” nya usu, enọ i bi ru wọhọ ẹsenọ Jihova ọ rrọ họ.—Olezi 14:1.
14 Ẹsejọhọ who roro nnọ, nọ who bi kpohọ iwuhrẹ Ileleikristi jẹ rrọ jajaja evaọ ukoko na, whọ ga te epanọ ighe ozighi hayo ile nọ a riẹ kporo rekọ enọ eme rai i fo ho i re kpomahọ owhẹ hẹ. Ẹsejọhọ who roro nọ uvumọ oware o te via k’owhẹ hẹ nọ whọ tẹ dina rri iwoho ẹbẹba evaọ Evie evuẹ ọ Itanẹte. Pọl ukọ na ọ ta k’owhẹ nnọ who roro thọ! Ọ ta nọ: “Usu uyoma o rẹ raha uruemu ezi.” (1 Ahwo Kọrint 15:33) U yoma gaga, uvi Ileleikristi buobu nọ e rrọ emoha a raha uruemu ezi rai no fiki usu ugheghẹ. Fikiere, gbaemu nnọ whọ rẹ whaha usu utioye na. Who te ru ere, who ti lele ohrẹ Pọl: “Wha kielele akpọ nana ha; rekọ jọ ẹjiroro ọkpokpọ rai o rẹriẹ owhai, re wha dhesẹ oreva Ọghẹnẹ via, o nọ uwoma nọ a jẹrehọ nọ ojẹ gbunu.”—Ahwo Rom 12:2.
15. Eme họ ẹsalọ avivẹ nọ emoha a re ru, kọ edhere vẹ a be rọ rẹriẹ ovao dhe itunyẹ evaọ abọ nana?
15 Ẹsalọ avivẹ nọ whọ rẹriẹ ovao ku ona. Oke u ti te nọ whọ te rọ jiroro kpahe oware nọ who re ru nọ who te nwrotọ no isukulu. Whọ tẹ be rria orẹwho nọ a rẹ kake jọ ruẹ iruo ho, oma o te kpakpa owhẹ v’abọ tu emamọ iruo nọ whọ nya ku kpobi. Whọ tẹ be rria orẹwho nọ efe ọ rrọ, iruo sa-sa e rẹ sai rovie fihọ k’owhẹ, ejọ rai avọ igho gbidi gbidi nọ a rẹ hwa. Avọ iroro oruọzewọ, iticha hayo ọsẹgboni ra a sae ta udu họ owhẹ awọ nnọ whọ gwọlọ iruo nọ who re jo wo igho buobu. Dede na, re who wuhrẹ te epanọ whọ rẹ rọ ruọ iruo itieye na o sai mi owhẹ oke buobu nọ whọ hae rọ gọ Jihova.
16, 17. Dhesẹ epanọ ikereakere sa-sa e sai ro fi obọ họ kẹ ọmoha wo eriwo owowa kpahe iruo.
16 Kareghẹhọ rri Ebaibol na taure whọ tẹ te jiroro. Ebaibol na e ta udu họ omai awọ inọ ma re ruiruo re ma sae ko unu mai. (2 Ahwo Tẹsalonika 3:10-12) Ghele na, o gbẹ gwọlọ eware efa. Ma ta udu họ owhẹ awọ nnọ who se ikereakere nọ e rrọ obotọ na, je roro epanọ e sai ro fi obọ họ kẹ uzoge jọ owowa evaọ ẹme ọ ẹsalọ iruo: Itẹ 30:8, 9; Ọtausiwoma Na 7:11, 12; Matiu 6:33; 1 Ahwo Kọrint 7:31; 1 Timoti 6:9, 10. Nọ who se eria Ebaibol nana no na, kọ whọ ruẹ eriwo Jihova no evaọ ẹme na?
17 Ma re rri iruo nọ ma rẹ rọ ko oma mai kpehru te epanọ i re ro mi ẹgọ Jihova aro ho. Otẹrọnọ a sae rehọ owhẹ fihọ umuo iruo fiki isukulu ikpehru nọ whọ nya, kiyọ u woma. Whọ tẹ gwọlọ uwuhrẹ efa nọ who nwrotọ no isukulu ikpehru ze no, whọ rẹ rehọ iẹe jiroro kugbe ọsẹ gbe oni ra. Dede na, ‘eware nọ e mae r’oja,’ eware abọ-ẹzi, e thọrọ owhẹ ẹro ho. (Ahwo Filipai 1:9, 10) Who ru ethobọ nọ Barọk, okere-obe Jerimaya, o ru hu. O ku uvẹ ọghọ-iruo riẹ fiẹ ọ tẹ jẹ ‘gwọlọ ikpeware kẹ oma riẹ.’ (Jerimaya 45:5) O dina thọ riẹ ẹro inọ “ikpeware” evuevo e riẹ hẹ nọ e rẹ rehọ iẹe kẹle Jihova je fi obọ họ kẹe zọ vrẹ ọraha Jerusalẹm. A rẹ sae ta ọkpọ ẹme ọvo na kpahe omai nẹnẹ re.
Rri Eware Abọ-Ẹzi Ghaghae
18, 19. (a) Uye vẹ o be bẹ erivẹ ra buobu, kọ ẹvẹ oma u re ru owhẹ kpahe ae? (b) Fikieme ibuobu a gbẹ be rọ riẹ nnọ ohọwo abọ-ẹzi u bi kpe ai hi?
18 Kọ whọ jọ etẹlivisiọno hayo ebe ruẹ ifoto emọ nọ e dọ fihọ no evaọ erẹwho nọ ohọwo u bi jo mu? Whọ tẹ ruẹ no, ohrọ emọ na o re owhẹ. Kọ who wo ohrọ-oriọ otiọye na kẹ ahwo nọ e rrọ okegbe ra? Eme ohrọ rai o jẹ re owhẹ? Keme ohọwo u bi kpe ibuobu rai re. Ohọwo nọ Emọs ọ ruẹaro riẹ na o be lahiẹ ae: “ ’Riri edẹ e be tha,’ ere Ọnowo ỌGHẸNẸ [na] ọ tae, ‘nọ me re ti ro vi ohọo ze otọ na; orọnọ ohọo emuore, hayo o rọ uru-ame he, rekọ o rọ ẹme ỌNOWO na o yo.’ ”—Emọs 8:11.
19 Uzẹme, ibuobu enọ ohọwo abọ-ẹzi nana u bi kpe a “se ẹgwọlọ abọ-ẹzi rai gboja” ha. (Matiu 5:3, NW ) Ibuobu a riẹ nnọ ohọwo abọ-ẹzi u bi kpe ai hi. Ejọ i re tube roro nọ a be re eva vọ. Rekọ a te roro ere, kiyọ fikinọ a be rehọ “areghẹ akpọ ọnana” ko oma, onọ o kẹre te efe-ole, omuroro otọkiẹ-eriariẹ, iroro sa-sa kpahe ẹfuọ, gbe eware itieye na efa. Ahwo jọ a re roro nnọ “areghẹ” ọgbọna i mi iwuhrẹ Ebaibol aro no. Dede na, “akpọ na ọ sae rọ areghẹ riẹ vuhu Ọghẹnẹ hẹ.” Areghẹ akpọ na o ti fi obọ họ k’owhẹ si kẹle Ọghẹnẹ hẹ. O rrọ ‘ugheghẹ evaọ obọ Ọghẹnẹ.’—1 Ahwo Kọrint 1:20, 21; 3:19.
20. Fikieme o jẹ kare iroro re ma gwọlọ raro kele ahwo nọ e be gọ Jihova ha?
20 Who te rri ifoto emaha nọ ohọwo u bi kpe, kọ whọ gwọlọ jọ epanọ a rrọ na? Vievie! Ghele na, izoge jọ nọ e rrọ iviuwou Ileleikristi a dhesẹ isiuru rai no inọ a gwọlọ jọ wọhọ ahwo nọ ohọwo abọ-ẹzi u bi kpe nọ e wariẹ e rai họ na. Ẹsejọhọ, emoha eyena jọ a roro nnọ izoge obọ akpọ a wo uvẹ buobu, a be riakpọ kuoma. O thọ rai ẹro inọ izoge eyena a kẹnoma siọ Jihova ba no. (Ahwo Ẹfẹsọs 4:17, 18) Eware iyoma nọ i re no ohọwo abọ-ẹzi ze e be thọrọ ae ẹro re. Ejọ rai họ udihọ emoha nọ a gwọlọ họ gbe uye nọ u re te ohwo nọ o bi gbe ọfariẹ, vovo isigareti, da idi vrẹ oma, jẹ lọ imu egaga. Ohọwo abọ-ẹzi u re ru ohwo wo ẹzi ọkparesuọ, ababọ ẹruore, gbe uzuazọ ofogori.
21. Ẹvẹ ma sae rọ thọ oma mai no ewo uruemu othọthọ ọrọ enọ e be gọ Jihova ha?
21 Fikiere, whọ tẹ rrọ isukulu kugbe enọ e be gọ Jihova ha, whọ jọ uruemu rai u ku owhẹ rẹriẹ hẹ. (2 Ahwo Kọrint 4:18) Otujọ e te rehọ eware abọ-ẹzi se ẹkoko. Fibae, egba-iyẹrẹnẹ a rẹ ta eme ẹghẹ jọ, bi dhesẹ nnọ o thọ họ re a gbe ọfariẹ, re a da idi vrẹ oma, hayo re a ta eme izuehọ. Who kie kẹ iruemu itieye na ha. Gbẹ hae nya usu kugbe enọ i ‘kru ẹrọwọ rai avọ iroro ezi.’ Hae “jọ owhreze iruo Ọnowo na” ẹsikpobi. (1 Timoti 1:19; 1 Ahwo Kọrint 15:58) Jọ iruo e jọ owhẹ abọ buobu evaọ obọ Ọgwa Uvie gbe usiuwoma ota na. Evaọ etoke ikpe isukulu ra, hai ru iruo ọkobaro obufihọ na n’oke ruoke. Rehọ enẹ bọ eriwo abọ-ẹzi ra ga, who ti zoruẹ hẹ.—2 Timoti 4:5.
22, 23. (a) Fikieme Oleleikristi ọmoha ọ jẹ j’iroro ẹsibuobu nọ u re vẹ amọfa ẹro ho? (b) Eme a ta udu họ izoge awọ nọ a ru?
22 Eriwo abọ-ẹzi nọ who re wo kpahe eware ọ rẹ sae lẹliẹ owhẹ jẹ iroro nọ u re vẹ amọfa ẹro ho. Wọhọ oriruo, ọmọzae Oleleikristi jọ ọ riẹ kpahe ile-ikporo ziezi jẹ be riẹ ru evaọ iwuhrẹ efa kpobi evaọ obọ isukulu. Okenọ o no isukulu nwrotọ, o te ku oma gbe ọsẹ riẹ evaọ iruo inwido iririe re ọ ruẹse wo uvẹ kẹ iruo ọkobaro. Oware nọ ọ rrọ jẹ iroro itieye na i vẹ iticha riẹ ẹro ho, rekọ otẹrọnọ who si kẹle Jihova no, u mu omai ẹro nnọ whọ riẹ oware nọ o soriẹ.
23 Nọ who bi roro kpahe epanọ whọ rẹ rehọ ekwakwa eghaghae erọ uzoge ra ru iruo na, ‘fi otọhotọ uwoma họ kẹ oma ra hẹrẹ obaro, re uzuazọ nọ o ghinẹ rrọ uvi uzuazọ o ruẹse te owhẹ obọ.’ (1 Timoti 6:19) Gbae mu inọ whọ rẹ “kareghẹhọ ọnọ ọ ma owhẹ evaọ oke uzoge ra”—jegbe eva oke uzuazọ ra kpobi. Onana họ edhere ọvuọvo nọ whọ rẹ rọ bọ kẹ obaro obokparọ, obaro nọ o ti wo oba ha.
Ẹvẹ Who Roro?
• Ohrẹ vẹ nọ a rehọ ẹgba ẹzi kere u re fi obọ họ kẹ emoha evaọ omaa nọ a rẹ ma kpahe kẹ obaro?
• Evẹ họ idhere jọ nọ uzoge ọ sai ro ‘si kẹle Ọghẹnẹ’?
• Evẹ họ iroro jọ nọ ọmoha ọ rẹ sae jẹ nọ i re kpomahọ obaro riẹ?
[Iwoho nọ e rrọ ẹwẹ-obe avọ 23]
Kọ whọ te kẹ ilale omobọ ra uvẹ re i mi owhẹ ẹgba gbe ọwhọ oke uzoge ra kpobi?
[Uwoho nọ o rrọ ẹwẹ-obe avọ 24, 25]
Emoha Ileleikristi nọ i wo areghẹ a re mu ẹro h’otọ evaọ abọ-ẹzi