Izoge, Wha Kareghẹhọ Ọnọ Ọ Ma Owhai Enẹna

“Kareghẹhọ ọnọ ọ ma owhẹ evaọ oke ọmoha ra.”—ỌTAUSI. 12:1.

1. Eme Jihova ọ ta kpahe eva nọ o fihọ idibo riẹ nọ erọ izoge?

JIHOVA o rri izoge Ileleikristi ghaghae o te je rri rai wọhọ igrigri irioke. Evaọ uzẹme, ọ ta inọ evaọ “ẹdẹ isuẹsu” Ọmọ riẹ, u re ti no izoge emezae gbe erọ emetẹ eva ze re a rọ oma rai kẹ iruo Kristi. (Ol. 110:3) Eruẹaruẹ nana i bi rugba evaọ oke mai na nọ ibuobu ahwo a jọ kare ozodhẹ Ọghẹnẹ, nọ a jo you omobọ rai, you igho, je wo udu ogaga. Rekọ, Jihova ọ riẹ inọ emoha nọ e te gọe a ti wo ohẹriẹ. Rri epanọ o fi eva họ owhai izoge emezae avọ emetẹ na te!

2. Re a kareghẹhọ Jihova, eme u dhesẹ?

² Dai roro epanọ eva e rẹ were Ọghẹnẹ te nọ ọ tẹ be ruẹ emoha nọ e be kareghẹhọ iẹe wọhọ Ọnọ ọ ma rai. (Ọtausi. 12:1) Evaọ uzẹme, re a kareghẹhọ Jihova u vi eroro nọ a re roro kpahe iẹe ọvo. O gwọlọ nnọ ma rẹ rọ uruemu dhesẹ iẹe via ẹkwoma eruo oware nọ o rẹ were iẹe, izi riẹ nọ ma re koko kẹdẹ kẹdẹ evaọ uzuazọ mai. O tẹ jẹ gwọlọ nnọ ma re fi eva họ Jihova fiki epanọ ma riẹ nnọ ọ gwọlọ ewoma mai. (Ol. 37:3; Aiz. 48:17, 18) Kọ ere whọ riẹ Ọnọ ọ ma owhẹ na?

“Rehọ Ẹroọrọsuọ Ra Kpobi Kpahe ỌNOWO”

3, 4. Eme u dhesẹ nnọ Jesu ọ rẹroso Jihova, kọ fikieme o jẹ r’oja re ma rẹroso Jihova nẹnẹ?

³ Oriruo ohwo nọ ọ mae rẹroso Ọghẹnẹ họ, Jesu Kristi. O fi ẹme Itẹ 3:5, 6 na họ iruo, onọ o ta nọ: “Rehọ ẹroọrọsuọ ra kpobi kpahe ỌNOWO na whọ rehọ eva kpahe ẹriẹ omobọ ra ha. Eva idhere ra kpobi ọ thọrọ owhẹ ẹro ho, o ve ti ruọ idhere ra kpọvi.” Nọ Jesu ọ họ-ame no, u kri hi Setan ọ tẹ rehọ oruaro gbe udu esuo akpọ na dawo iẹe. (Luk 4:3-13) Rekọ ọ sae viẹ Jesu họ họ. Jesu ọ riẹ nnọ “efe, adhẹẹ gbe uzuazọ” họ “osohwa omaurokpotọ avọ ozodhẹ ỌNOWO na.”—Itẹ 22:4.

⁴ Uvouthei gbe oriobọ e da akpọ na fia nẹnẹ. Fikiere o rrọ oware areghẹ re ma lele oriruo Jesu. Ofariẹ, kareghẹhọ inọ Setan ọ be dao idhere kpobi re ọ bẹbẹ idibo Jihova no edhere ọhwahwa nọ o re su kpohọ uzuazọ na. Ọ gwọlọ nnọ ahwo kpobi a nya evaọ edhere ọkẹkẹe na, onọ u bi su kpohọ ọraha. Ajọ ọ viẹ owhẹ họ họ! Ukpoye, gbaemu inọ whọ rẹ kareghẹhọ Ọnọ ọ ma owhẹ. Fi eva ra kpobi họ iẹe, re who je kru “uvi uzuazọ” na gaga, onọ ma bi rẹro riẹ kẹle na.—1 Tim. 6:19.

Izoge, Wha Rri Otọ Mu!

5. Ẹvẹ who roro inọ obaro akpọ o te jọ?

⁵ Izoge nọ e be kareghẹhọ Ọnọ ọ ma rai a re wo areghẹ vi ehwa rai. (Se Olezi 119:99, 100.) Fikinọ a wo eriwo Ọghẹnẹ, a riẹ nnọ oware ovo o gbẹ rrọ akpọ nana ha. Makọ evaọ umutho ikpe nọ wha rria no na, whai izoge wha ruẹ epanọ eware imuozọ gbe ebẹbẹ i vihọ te no. Evaọ isukulu, ẹsejọhọ who yo no kpahe enua nọ a be nua akpọ na, ẹroro nọ ọ rrọ ofou gbe otọ na, ewhawho nọ a bi kpe re no, gbe ebẹbẹ itieye na efa. Ahwo-akpọ a be ruawa gaga fiki eware nana, rekọ Isẹri Jihova ọvo a riẹ nnọ enana yọ abọjọ oka ọrọ urere akpọ Setan.—Evia. 11:18.

6. Oghẹrẹ vẹ a rọ viẹ izoge jọ họ no?

⁶ O da omai gaga inọ izoge jọ nọ e rrọ idibo Ọghẹnẹ a gbe bi rri otọ mu hu, o thọrọ e rai ẹro no inọ akpọ na o ti kuhọ kẹle. (2 Pita 3:3, 4) Ekpehre egbẹnyusu gbe ifoto ẹbẹba e lẹliẹ ejọ kie ruọ izieraha ilogbo no. (Itẹ 13:20) U re yoma gaga re ma kie no aruoriwo Ọghẹnẹ enẹna nọ urere na u totọ no na. Ukpoye, kareghẹhọ oware nọ o via kẹ emọ Izrẹl evaọ ukpe ọ 1473 B.C.E. nọ a jọ Otọ-Opraprara Moab, uwhru orọ Ẹkwotọ Eyaa na. Eme họ oware nọ o via?

A Dhẹ Ohrẹ na Kẹle Ukuhọ no A te Kie

7, 8. (a) Ẹghẹ vẹ Setan o ro ru iruo evaọ Otọ-Opraprara Moab? (b) Ẹghẹ vẹ Setan o bi ro ru iruo nẹnẹ?

⁷ Evaọ oke oyena, o jọ vevẹ inọ Setan ọ jẹ daoma re ọ whaha emọ Izrẹl ewo ẹkwotọ nọ Ọghẹnẹ ọ ya eyaa riẹ kẹ ae. Nọ Setan ọ ruẹ nnọ ọ sae rehọ Belam ọruẹaro na bọwo emọ Izrẹl ehao ho, ọ tẹ gbẹ edhere nọ o re ro ru ai re a ru Jihova eva dha. Kọ eyae Moab ọ rọ lẹliẹ ae, ọ tẹ rọ enẹ gele ibuobu rai kie. Emọ Izrẹl a te lele emetẹ Moab gbe-ọfariẹ jẹ gọ Ebale obọ Piọ! Dede nọ a kẹle Ẹkwotọ Eyaa nọ a be te reuku riẹ na no, ahwo idu udhegbene rai a whu kufiẹ. Kinọ oja!—Ik. 25:1-3, 9.

⁸ Nẹnẹ na, ma fou kẹle ẹkwotọ eyaa nọ o woma vi ọrọ okiẹdẹ na gaga no, oyehọ akpọ ọkpokpọ na. Setan ọ re seba ha, ọ be gbẹ rọ ọfariẹ-ogbe gele idibo Ọghẹnẹ kie. Uruemu ezi u kie kpo gaga no, te epanọ a bi ro rri ọfariẹ-ogbe wọhọ oware nọ o thọ họ gbe ezae-duezae wọhọ ẹme omobọ ohwo. Oniọvo-ọmọtẹ jọ ọ ta nọ, “Evaọ uwou mai gbe obọ Ọgwa Uvie ọvo emọ mẹ a bi jo wuhrẹ inọ o thọ evaọ aro Ọghẹnẹ re ọzae ọ rehọ ọzae hayo re imava nọ e re rọo ho a wezẹ kugbe.”

9. Eme ọ rẹ via evaọ etoke uzoge, kọ ẹvẹ izoge a sai ro fi onana kparobọ?

⁹ Emoha nọ e be kareghẹhọ Ọnọ ọ ma rai a riẹ inọ owezẹ ọzae-avọ-aye yọ okẹ nọ u no obọ Ọghẹnẹ ze, onọ uzuazọ ohwo o rẹ sai notha. Fikiere, a vuhu mu inọ ọzae avọ aye nọ a rọo no ọvo a rẹ wezẹ kugbe wọhọ epanọ Ọghẹnẹ ọ ta. (Hib. 13:4) Ghele na, ma riẹ nnọ o rẹ jọ bẹbẹ re ohwo ọ gba oma riẹ evaọ etoke ikpe uzoge, okenọ isiuru owezẹ e rẹ rọ jọ gaga jẹ sae lẹliẹ ohwo jẹ ekpehre owọ. (1 Kọr. 7:36) Kọ eme who re ru nọ ikpehre iroro e tẹ ziọ owhẹ udu? Lẹ se Jihova gaga re ọ kẹ owhẹ ẹgba nọ who re ro roro kpahe eware nọ i fo. Jihova ọ rẹ gaviezọ kẹ enọ i bo bru ei ẹsikpobi. (Se Luk 11:9-13.) Ẹmeọta kpahe eware nọ e rẹ bọ ẹrọwọ ohwo ga o rẹ sai je fi obọ họ k’omai kpọ iroro mai vi.

Riẹ Oghẹrẹ Itee nọ Who re Le!

10. Iroro iyoma vẹ u fo nọ ma rẹ whaha, kọ enọ vẹ ma rẹ sae nọ oma mai?

¹⁰ Oware jọ nọ o be lẹliẹ izoge buobu evaọ akpọ na yeri uzuazọ epanọ u je rai je bi ru lele isiuru ugboma rai ọvo họ, ẹme Ọghẹnẹ nọ ọ be kpọ ae he, yọ a wo uvi ẹruore ọvo kpahe obaro ho. (Itẹ 29:18) A wọhọ emọ Izrẹl muomu erọ edẹ Aizaya enọ i je yeri uzuazọ rai kpobi kẹ “evewerọ avọ oghọghọ, . . . erao e riọ gbe idi eda.” (Aiz. 22:13) Rekọ, ukpenọ whọ rẹ re ahwo otiọye na ihri, kọ who gbe roro kpahe uvi ẹruore nọ Jihova ọ kẹ idibo riẹ? Otẹrọnọ whẹ yọ ọmoha nọ ọ be gọ Ọghẹnẹ, kọ whọ be rọ ọwhọ hẹrẹ akpọ ọkpokpọ na? Kọ whọ be dao ẹgba ra kpobi re whọ rọ ‘uvi iroro yeri uzuazọ . . . be hẹrẹ ẹruore oghale’ nọ Jihova ọ ruẹrẹ kpahe kẹ owhẹ? (Tait. 2:12, 13) Uyo ra u ti dhesẹ itee nọ who bi le gbe eware nọ whọ rọ karo evaọ uzuazọ ra.

11. Fikieme u je fo re emoha Ileleikristi nọ e gbẹ rrọ isukulu a muẹrohọ otọ?

¹¹ Ahwo a gwọlọ nọ izoge a rehọ uzuazọ rai le itee akpọ na. U fo inọ whai enọ e gbẹ rrọ isukulu wha muẹrohọ otọ re wha sae riobe ziezi je no ekọleji nwrotọ. Rekọ kareghẹhọ inọ orọnikọ ẹjiroro ra họ re who wo emamọ iruo ọvo ho, rekọ re whọ sai w’iruo kẹ ukoko na jẹ jọ uvi ọgbodibo. Re whọ sai le utee nana t’obọ, whọ rẹ jọ ohwo nọ ọ rẹ riẹ ẹme ta ziezi, ọnọ o re roro oware te, jẹ kẹ amọfa adhẹẹ. Emoha nọ i bi wuhrẹ Ebaibol jẹ be daoma fi ehri-izi Ikereakere na họ iruo yọ isukulu nọ e mai woma kpaobọ a rrọ na, yọ a be jẹ rehọ enẹ fi otọhotọ họ kẹ uzuazọ ebẹdẹ bẹdẹ.—Se Olezi 1:1-3.a

12. Oriruo vẹ iviuwou Ileleikristi inẹnẹ a rẹ rọ aro kele?

¹² Evaọ orẹwho Izrẹl, a se ewuhrẹ nọ esẹgbini a re wuhrẹ emọ rai gboja gaga. Esẹgbini a jẹ hai wuhrẹ emọ rai kpahe kabọ kabọ uzuazọ, maero kọ epanọ a rẹ gọ Ọghẹnẹ. (Izie. 6:6, 7) Fikiere, emaha Izrẹl nọ e jẹ gaviezọ kẹ esẹgbini rai gbe ekpako efa nọ i wo ozodhẹ Ọghẹnẹ, a je wo eriariẹ, areghẹ, orimuo, gbe otoriẹ, eware nọ ewuhrẹ Ọghẹnẹ ọvo o re fi obọ họ kẹ omai wo. (Itẹ 1:2-4; 2:1-5, 11-15) U fo nọ epọvo na iviuwou Ileleikristi inẹnẹ a re se ewuhrẹ emọ rai gboja.

Gaviezọ kẹ Enọ I You Owhẹ

13. Oghẹrẹ ehrẹ vẹ a be rọ kẹ izoge jọ, kọ fikieme a je rri otọ mu?

¹³ Eghẹrẹ ahwo kpobi a be rọ ohrẹ kẹ emoha, usu rai họ ekohrẹ isukulu, a rẹ kẹ ohrẹ kpahe epanọ ohwo o re ro wo ẹnyaharo evaọ akpọ na. Iviena wha lẹ kpahe ehrẹ itieye na re wha jẹ rọ Ebaibol na avọ ebe ọrigbo nọ o wo ẹrọwọ avọ areghẹ na kiẹ ehrẹ itieye na riwi. Ẹkwoma eware nọ who wuhrẹ no Ebaibol ze no, whọ riẹ inọ izoge na gbe enọ i wo eriariẹ tere he họ enọ Setan ọ rẹ mae gwọlọ viẹ họ. Wọhọ oriruo, evaọ ọgbọ Idẹn, Ivi ọnọ o wo eriariẹ tere he, ọ gaviezọ kẹ Setan, ọnọ o ri ru oware ọvo nọ o ro dhesẹ uyoyou kẹe he. Eware e hai woma kẹe gaga o hae jọnọ ọ gaviezọ kẹ Jihova, ọnọ o you rie je ru eware ezi buobu kẹe no!—Emu. 3:1-6.

14. Fikieme ma jẹ gaviezọ kẹ Jihova gbe esẹgbini nọ e be gọ Ọghẹnẹ?

¹⁴ Ọnọ ọ ma owhẹ o you owhẹ re, yọ evaọ uzẹme, ewoma ra ọvo ọ gwọlọ. Ọ gwọlọ nnọ whọ wereva orọnikọ enẹna ọvo ho, rekọ bẹdẹ bẹdẹ! Fikiere, avọ uvi uyoyou nọ emamọ ọyewọ o re wo kẹ emọ riẹ, ọ be ta kẹ owhẹ gbe enọ e be gọe kpobi inọ: “Ọnana họ edhere na, wha nyae.” (Aiz. 30:21) Otẹrọnọ who wo esẹgbini nọ i you Jihova, yọ oghale ofa jọ nọ who wo. Gaviezọ ziezi kẹ ohrẹ rai kpahe eware nọ i wuzou nọ whọ rẹ rọ karo gbe itee nọ who re le. (Itẹ 1:8, 9) A gwọlọ nọ who wo uzuazọ, yọ uzuazọ yena o rro vi efe gbe ọkwa kpobi nọ ọ rrọ akpọ nana.—Mat. 16:26.

15, 16. (a) Eme ma re fi eva họ inọ Jihova o ti ru k’omai? (b) Oware ulogbo vẹ ma wuhrẹ no oriruo Barọk ze?

¹⁵ Enọ e be kareghẹhọ Ọnọ ọ ma rai a re si abọ họ eware buobu hu, a re fi eva họ Jihova inọ ọ te se ae ba hayo kiukeku ai vievie he. (Se Ahwo Hibru 13:5.) Fikinọ omamọ eriwo nana u wo ohẹriẹ no uzuazọ nọ a be jọ akpọ na yeri, ma re muẹrohọ otọ gaga re ẹzi akpọ na ọ siọ omai ba ewholo. (Ẹf. 2:2) Roro kpahe Barọk, okere-obe Jerimaya, ọnọ ọ jẹ rria evaọ okenọ eware e jọ gaga, kiọkọ omojọ re a te raha Jerusalẹm evaọ 607 B.C.E.

¹⁶ O sae jọnọ Barọk ọ gwọlọ le ekwakwa-efe re eware e gbẹ lọhọ kẹe. Jihova o muẹrohọ onana, yọ fikinọ o you Barọk, ọ tẹ vẹvẹ iẹe unu inọ ọ siọ “ikpeware” ba ẹgwọlọ. Barọk ọ jọ ohwo nọ o wo omaurokpotọ gbe areghẹ, keme ọ gaviezọ kẹ Jihova ọ tẹ zọ evaọ okenọ a raha Jerusalẹm. (Jeri. 45:2-5) Rekọ, ahwo nọ e jẹ gwọlọ “ikpeware” akpọ na evaọ oke oyena, enọ i se egagọ Jihova gboja ha, eware rai kpobi i vru nọ egbaẹmo Babilọn a wọ ẹmo ze. Ibuobu rai a te je whu. (2 Irv. 36:15-18) Oriruo Barọk o wuhrẹ omai inọ emamọ usu nọ ma re wo kugbe Ọghẹnẹ u wuzou vi efe gbe okpodẹ evaọ akpọ nana.

Raro Kele Iriruo nọ E Mai Woma

17. Fikieme Jesu, Pọl, gbe Timoti a jẹ rọ uvi iriruo nọ idibo Jihova nẹnẹ a rẹ rọ aro kele?

¹⁷ Iriruo emamọ ahwo buobu e rrọ Ebaibol na nọ i re fi obọ họ kẹ omai nya evaọ edhere uzuazọ na. Wọhọ oriruo, Jesu họ ohwo nọ ọ mai wo eriariẹ nọ ọ rria akpọ na no, ghele na ọ tẹrovi oware nọ ahwo a ti wo erere no ze bẹdẹ bẹdẹ—“usiuwoma uvie” na. (Luk 4:43) Re ọ sae rọ eva riẹ kpobi gọ Jihova, Pọl ukọ na ọ nya siọ okpiruo riẹ ba, ọ tẹ rehọ oke gbe ẹgba riẹ kpobi whowho emamọ usi na. Timoti, ọnọ ọ jọ ‘uvi ọmọ eva orọwọ na,’ ọ raro kele emamọ oriruo Pọl. (1 Tim. 1:2) Kọ Jesu, Pọl, gbe Timoti a vioja inọ a yeri akpọ thọ? Kakaka! Evaọ uzẹme, Pọl ọ ta nọ o rri eware nọ ọ hai ti wo evaọ akpọ na wọhọ “eware uzuahọ” nọ a tẹ rehọ ae wawo ọghọ nọ ọ rrọ ẹgọ Ọghẹnẹ.—Fil. 3:8-11.

18. Inwene ilogbo vẹ oniọvo-ọmọzae jọ o ru, kọ fikieme ọ gbẹ vioja ha?

¹⁸ Emoha Ileleikristi buobu nẹnẹ a be rọ aro kele Jesu, Pọl, gbe Timoti. Wọhọ oriruo, oniọvo-ọmọzae jọ nọ ọ jọ iruo nọ a jẹ jọ hwae okposa o kere nnọ: “Fiki epanọ mẹ jẹ rọ izi Ebaibol yeri uzuazọ mẹ, a tẹ jẹ wọ omẹ kpehru evaọ iruo na. Dede nọ a jẹ hwa omẹ igho buobu, o jọ omẹ oma wọhọ ẹsenọ me bi kielele ofou. Nọ mẹ nya bru ogbẹgwae nọ o wuzou ekọmpene na inọ mẹ gwọlọ no iruo na no re mẹ ruẹse jọ ọtausiwoma oke-kpobi, a tẹ vuẹ omẹ nnọ a re fi igho buobu họ osa mẹ re mẹ siọ iruo na ba e no. Rekọ me nwene iroro mẹ hẹ. Oware nọ o lẹliẹ omẹ no emamọ iruo yena re mẹ ruẹse jọ ọtausiwoma oke-kpobi u gbe ahwo buobu unu. Uyo nọ mẹ jẹ kae kpobi họ mẹ gwọlọ ru eyaa nọ mẹ ya kẹ Ọghẹnẹ gba evaọ okenọ mẹ roma mudhe kẹe. Fikinọ iruo Ọghẹnẹ ọvo mẹ roma kẹ enẹna, me bi wo oghọghọ gbe edẹro nọ igho gbe orro akpọ na e sae kẹ omẹ hẹ.”

19. Oware areghẹ vẹ a tudu họ izoge awọ inọ a ru?

¹⁹ Nya akpọ na wariẹ, idu emoha buobu a jowọ areghẹ otiọye na no. Fikiere whai izoge, nọ wha te bi roro oware nọ wha ti ru evaọ obaro, wha kareghẹhọ ẹdẹ Jihova. (2 Pita 3:11, 12) Wha re ahwo nọ akpọ nana o bi woma kẹ ihri hi. Ukpoye, gaviezọ kẹ enọ i gine you owhẹ. Re a koko efe họ obọ odhiwu họ oware nọ o mai woma, onọ o rẹ sae wha irere ibẹdẹ bẹdẹ ze. (Mat. 6:19, 20; se 1 Jọn 2:15-17.) Ẹhẹ, kareghẹhọ Ọnọ ọ ma owhẹ. Whọ tẹ kareghẹhọ Jihova, ọ te ghale owhẹ.

[Oruvẹ-obotọ]

Kọ Whọ Sae Kareghẹhọ?

• Ẹvẹ ma re ro dhesẹ inọ ma fi eva họ Ọghẹnẹ?

• Ewuhrẹ vẹ họ onọ o mai woma?

• Eme ma wuhrẹ no oriruo Barọk ze?

• Amono họ uvi iriruo nọ ma rẹ rọ aro kele, kọ fikieme?

[Iwoho nọ e rrọ ẹwẹ-obe avọ 13]

Jihova ọ rẹ kẹ ewuhrẹ nọ ọ mai woma

[Uwoho nọ e rrọ ẹwẹ-obe avọ 15]

Barọk ọ gaviezọ kẹ Jihova, ọ tẹ zọ evaọ okenọ a raha Jerusalẹm. Eme whọ rẹ sai wuhrẹ no oriruo nana ze?