Jẹ Emamọ Iroro Evaọ Oke Uzoge Ra

1. Obọdẹ iruo vẹ izoge buobu a be reawere rai nẹnẹ?

MA BE rria etoke nọ ẹnyaharo ologbo ọ be jọ romavia evaọ egagọ uzẹme. Ahwo buobu a bi kurẹriẹ no erẹwho sa-sa ziọ egagọ uzẹme. (Evia. 7:9, 10) Eva e be were izoge buobu nọ a bi ro fi obọ họ kẹ amọfa riẹ uzẹme Ebaibol na nọ o rẹ kẹ uzuazọ. (Evia. 22:17) Izoge jọ a bi fi obọ họ kẹ amọfa yeri uzuazọ evawere ẹkwoma Ebaibol nọ a bi wuhrẹ kugbe ae. Efa a wuhrẹ evẹrẹ sa-sa no re a sae ta usiuwoma na evaọ ekwotọ nọ a be jọ ta evẹrẹ itieye na. (Ol. 110:3; Aiz. 52:7) Eme who re ru re whọ sai wobọ ziezi evaọ iruo evawere nana nọ idibo Jihova a bi ru na?

2. Ẹvẹ oriruo Timoti u ro dhesẹ nọ o rẹ were Jihova re ọ kẹ izoge owha-iruo? (Rri uwoho nọ o rrọ emuhọ uzoẹme na.)

² Nọ whọ rrọ uzoge na, iroro nọ whọ jẹ enẹna e sai rovie obọdẹ uvẹ sa-sa fihọ kẹ owhẹ evaọ egagọ Ọghẹnẹ nọ whọ te reawere rai. Wọhọ oriruo, Timoti ọmọzae obọ Listra na ọ jẹ emamọ iroro, onọ u ru rie te kẹ iruo imishọnare evaọ okenọ ọ jọ oware wọhọ ikpe 20. (Iruẹru 16:1-3) Nọ ozighi ọ romavia, Pọl ukọ na o te no ẹkwotọ Tẹsalonika nọ a jọ rọ ukoko okpokpọ mu. Ẹsejọhọ emerae jọ ọvo e ruemu taure Pọl o te ti vi Timoti zihe nyae bọ inievo obọ Tẹsalonika na ga. (Iruẹru 17:5-15; 1 Tẹs. 3:1, 2, 6) Dai roro epanọ eva e were Timoti te nọ a kẹe owha-iruo na.

IRORO-EJẸ RA NỌ E MAI WUZOU

3. Iroro vẹ e mai wuzou nọ whọ rẹ sae jẹ evaọ uzuazọ, kọ oke vẹ whọ rẹ rọ jẹ iroro nana?

³ Oke uzoge yọ etoke nọ a rẹ rọ jiroro sa-sa nọ i wuzou evaọ uzuazọ. Rekọ u wo iroro-ejẹ jọ nọ e mai wuzou, onọ whọ rẹ rọ salọ nọ whọ rẹ gọ Jihova. Oke vẹ u fo nọ whọ rẹ rọ jiroro yena? Jihova ọ ta nọ: “Kareghẹhọ ọnọ ọ ma owhẹ evaọ oke ọmoha ra.” (Ọtausi. 12:1) Edhere ọvo nọ ma rẹ rọ “kareghẹhọ” Jihova họ, oke mai kpobi nọ ma rẹ rọ gọe. (Izie. 10:12) Re whọ rehọ eva ra kpobi gọ Ọghẹnẹ họ iroro nọ e mai wuzou nọ whọ rẹ jẹ, keme u ti ru owhẹ yeri emamọ uzuazọ evaọ obaro.—Ol. 71:5.

4. U te no iroro nọ whọ rẹ jẹ inọ whọ gwọlọ gọ Jihova no, iroro-ejẹ efa vẹ i ti kpomahọ ajọwha ra evaọ egagọ Ọghẹnẹ?

⁴ Uzẹme, orọnikọ re whọ gọ Jihova ọvo họ iroro nọ whọ rẹ jẹ nọ e rẹ sai kpomahọ uzuazọ ra evaọ obaro ho. Wọhọ oriruo, whọ sae jiroro sọ who ti wo ọrivẹ-orọo, ohwo nọ whọ te rọo, gbe oghẹrẹ iruo nọ who ti ru. Iroro-ejẹ nana kpobi i wuzou, rekọ u fo re whọ kake jiroro epanọ whọ sae rọ rehọ eva ra kpobi gọ Jihova. (Izie. 30:19, 20) Fikieme? Fikinọ iroro-ejẹ nana i wobọ kugbe ohwohwo. Oware nọ whọ jẹ iroro riẹ kpahe orọo gbe iruo u ti kpomahọ ajọwha ra evaọ egagọ Ọghẹnẹ. (Rri Luk 14:16-20) Epọvo na re, whọ tẹ jiroro inọ whọ rẹ rọ uzuazọ ra kpobi gọ Ọghẹnẹ, u ti kpomahọ onọ whọ te salọ evaọ ẹme orọo gbe iruo. Fikiere, kake jiroro kpahe oware nọ o mai wuzou evaọ uzuazọ.—Fil. 1:10.

EME WHỌ TE REHỌ OKE UZOGE RA RU?

5, 6. Kẹ oriruo nọ o dhesẹ nọ uvẹ sa-sa u re rovie kẹ omai nọ ma tẹ jẹ emamọ iroro. (Rri uzoẹme na re “Oware nọ Mẹ Salọ Okenọ Mẹ jọ Ọmaha” nọ o rrọ uvitha nana.)

⁵ Nọ whọ tẹ salọ nọ whọ rẹ gọ Jihova no, whọ sai roro kpahe oware nọ ọ gwọlọ mi owhẹ, jẹ jiroro oghẹrẹ nọ whọ gwọlọ rọ gọe. Oniọvo-ọmọzae jọ evaọ obọ Japan o kere nọ: “Okenọ mẹ jọ ikpe 14, ọkpako ukoko jọ nọ ma gbẹ jọ usiuwoma ẹdẹjọ o muẹrohọ nọ usiuwoma ota na o be ruomẹ oma ha. Ọ tẹ rọ unu kpotọ ta kẹ omẹ nọ: ‘Nya kpo Yuichiro, who te t’obọ uwou, keria whọ romatotọ roro kpahe eware nọ Jihova o ru kẹ owhẹ no.’ Ere me gine ru. Mẹ tubẹ rọ edẹ jọ roro jẹ lẹ se Jihova kpahe onana. Ẹmẹrera na, me te ti nwene. U kri hi, me te mu evawere họ ewo evaọ egagọ Jihova. Iku imisiọnare nọ mẹ jẹ hai se e jẹ hae were omẹ gaga. U kri hi, me te je roro kpahe epanọ me re ro wobọ ziezi evaọ egagọ Jihova.”

⁶ Yuichiro ọ ta re nọ: “Mẹ tẹ jẹ salọ eware nọ e rẹ sai fi obọ họ kẹ omẹ kpohọ orẹwho ofa kẹ iruo usiuwoma ota na evaọ obaro. Wọhọ oriruo, me wuhrẹ ẹvẹrẹ Oyibo. Re mẹ sai ru iruo ọkobaro, nọ me nwrotọ no isukulu no, me te je ru iruo ubroke jọ nọ mẹ jẹ jọ wuhrẹ ahwo ẹvẹrẹ Oyibo. Nọ me te ikpe 20 no, me te mu ẹvẹrẹ Mongolia họ ewuhrẹ je weze bru utu osese iwhowho-uvie Mongolia jọ. Ikpe ivẹ nọ i lele i rie, evaọ ukpe 2007, me te kpohọ iweze evaọ obọ Mongolia. Nọ me lele ekobaro jọ kpohọ usiuwoma ota jẹ ruẹ nọ ahwo buobu a gwọlọ riẹ uzẹme na, mẹ tẹ gwọlọ nọ mẹ rẹ kwa kpohọ obei kẹ iruo usiuwoma ota na. Me te zihe kpohọ Japan nyae ruẹrẹ oma kpahe. Anwọ amara Ane ọrọ ukpe 2008 me bi ro ru iruo ọkobaro evaọ Mongolia na. Uzẹme riẹ họ, eware e lọhọ tere he evaọ obonẹ. Rekọ ahwo na a be jẹ ovuẹ Uvie na rehọ, yọ mẹ be daoma fi obọ họ kẹ ibuobu si kẹle Jihova. Mẹ ruẹ nọ oware nọ o mai woma evaọ uzuazọ mẹ salọ na.”

7. Eware vẹ jọ o gwọlọ nọ ma rẹ jiroro rai kẹ omamai, kọ oriruo vẹ Mosis o fihotọ kẹ omai?

⁷ O gwọlọ nọ Osẹri Jihova kpobi ọ rẹ jiroro oghẹrẹ nọ o ti yere uzuazọ riẹ. (Jos. 24:15) Ma rẹ sae vuẹ owhẹ hẹ inọ whọ rọo hayo whọ rọo ho, yọ ma rẹ sae fodẹ oghẹrẹ ohwo nọ whọ te rehọ kẹ owhẹ hẹ. Yọ ma sae salọ oghẹrẹ iruo nọ who re ru kẹ owhẹ gbe he. Kọ whọ te salọ iruo nọ a rẹ raha umutho oke fihọ re a tẹ riẹ epanọ a re ru ai? Whai izoge Ileleikristi jọ wha be rria iwhre nọ a rẹ jọ ruẹ ugho tere he; rekọ otu rai jọ a be rria ikpewho nọ ugho o dafia. Evaọ akpọ na soso, uruemu, otoriẹ, isiuru gbe ẹrọwọ izoge ọ rrọ epọvo na ha. Ẹsejọhọ uzuazọ rai u wo ohẹriẹ no ohwohwo gaga wọhọ epanọ o jọ kẹ Mosis avọ izoge emọ Izrẹl nọ a gbẹ jọ obọ Ijipti. Mosis ọ jọ wọhọ ọmọ ovie rekọ izoge edekọ na a jọ erigbo. (Ọny. 1:13, 14; Iruẹru 7:21, 22) Wọhọ epanọ o rrọ kẹ owhẹ na, a jẹ rria etoke nọ o gwọlọ nọ a rẹ salọ abọ nọ a rẹ jọ. (Ọny. 19:4-6) O gwọlọ nọ omomọvo rai ọ rẹ jiroro oware nọ ọ te rọ uzuazọ riẹ ru. Mosis ọ salọ emamọ oware.—Se Ahwo Hibru 11:24-27.

8. Obufihọ vẹ o rrọ kẹ izoge nọ e be jiroro kpahe eware nọ a ti ru evaọ uzuazọ?

⁸ Jihova o re fi obọ họ kẹ owhẹ jẹ emamọ iroro nọ whọ rrọ uzoge na. Ọ kẹ omai ithubro evaọ Ebaibol nọ e rẹ sai fi obọ họ kẹ owhẹ evaọ iroro-ejẹ kpobi nọ whọ rẹriẹ ovao dhe. (Ol. 32:8) U te no ere no, ọsẹgboni ra nọ a rrọ ukoko na gbe ekpako ukoko a rẹ sai fi obọ họ kẹ owhẹ jiroro kpahe oghẹrẹ nọ whọ sai ro ru lele ehrẹ Ebaibol nana. (Itẹ 1:8, 9) Joma ta kpahe ithubro Ebaibol esa jọ nọ i ti fi obọ họ kẹ owhẹ jẹ emamọ iroro nọ who ti wo erere no ze evaọ obaro.

ITHUBRO EBAIBOL ESA NỌ E RẸ SAE KPỌ IRORO-EJẸ RA

9. (a) Ẹvẹ Jihova ọ rọ rehọ uvẹ iroro-ejẹ bru ọghọ họ omai oma? (b) Uvẹ sa-sa vẹ u ti rovie fihọ kẹ owhẹ nọ ‘whọ tẹ kake gwọlọ Uvie na’?

⁹ Kake gwọlọ Uvie Ọghẹnẹ gbe ẹrẹreokie riẹ. (Se Matiu 6:19-21, 24-26, 31-34.) Jihova ọ kẹ omai uvẹ nọ ma rẹ rọ salọ oware nọ u je omai. Ọ fodẹ umuoke nọ whọ rẹ rọkẹ iruo Uvie na ha nọ whọ rrọ uzoge na. Rekọ Jesu ọ kẹ omai uthubro nọ u re fi obọ họ kẹ omai rọ iruo Uvie na karo. Who te ru lele uthubro nana, who ti wo uvẹ nọ who re ro dhesẹ nọ who you Jihova, who wo ọdawẹ kẹ erivẹ, gbe inọ ẹruore uzuazọ ebẹdẹ bẹdẹ na ọ were owhẹ. Nọ who bi roro kpahe orọo gbe oghẹrẹ iruo nọ who ti ru na, romatotọ roro sọ oware nọ whọ be salọ na o te kẹ owhẹ awa-ọruọ hayo u ti ru owhẹ wo ajọwha kẹ iruo Uvie Ọghẹnẹ gbe ẹrẹreokie riẹ.

10. Eme o ru eva were Jesu, kọ eme o ti ru eva were owhẹ re?

¹⁰ Fi obọ họ kẹ amọfa re whọ rọ ere wo evawere. (Se Iruẹru 20:20, 21, 24, 35.) Jesu o wuhrẹ omai oware nana nọ u re fi obọ họ kẹ omai evaọ uzuazọ. Eva e jẹ were iẹe gaga keme o je ru oreva Ọsẹ riẹ viukpọ orọ ọyomariẹ. Yọ eva e jẹ were iẹe gaga re nọ ahwo a te ru lele ovuẹ Uvie na. (Luk 10:21; Jọn 4:34) Ẹsejọhọ whẹ omara who fi obọ họ kẹ amọfa no yọ o be kẹ owhẹ evawere. Who te ru lele ithubro nọ Jesu ọ kẹ na evaọ etoke iroro-ejẹ ra, who ti wo evawere je ru eva were Jihova re.—Itẹ 27:11.

11. Fikieme Barọk ọ gbẹ jẹ were eva ha, kọ ohrẹ vẹ Jihova ọ kẹ riẹ?

¹¹ Ohwo ọ rẹ mai wo evawere nọ ọ tẹ be gbodibo kẹ Jihova. (Itẹ 16:20) O wọhọ nọ onana o thọrọ Barọk ẹro, ọnọ ọ jọ okere-obe Jerimaya. Evaọ oke jọ, o gbe je wo evawere he evaọ egagọ Jihova. Jihova ọ ta kẹe nọ: “Kọ whọ be gwọlọ ikpeware kẹ oma ra? Whọ gwọlọ ae he; keme, ri, mẹ be te raha ahwo kpobi, . . . rekọ mẹ rẹ te kẹ owhẹ uzuazọ ra wọhọ owhae nọ a wha ohwo nọ o no ẹmo ze eva oria kpobi nọ whọ rẹ te nya.” (Jeri. 45:3, 5) Eme who roro nọ o hae wha evawere se Barọk? Ikpeware nọ ọ jẹ gwọlọ manikọ uzuazọ nọ ọ rẹ jọ fikinọ ọ jẹ gọ Ọghẹnẹ evaọ okenọ a te raha Jerusalẹm?—Jem. 1:12.

12. Eme Ramiro ọ salọ nọ o wha evawere sei?

¹² Oniọvo-ọmọzae jọ nọ a re se Ramiro o je wo evawere fiki obọ nọ o je fihọ kẹ amọfa. Ọ ta nọ: “Uviuwou oyogbe me no ze, yọ ma jẹ rria iwhre jọ evaọ ẹkwotọ igbehru Andes. Fikiere o jọ uvẹ ulogbo kẹ omẹ okenọ oniọvo ọkpako mẹ ọ ta nọ o re wuhrẹ omẹ kpohọ isukulu ikpehru. Rekọ oke yena yọ mẹ họ-ame obọ, yọ uvẹ ofa jọ u rovie kẹ omẹ re. Ọkobaro jọ o zizie omẹ nọ me kuomagbei kwa kpohọ iwhre jọ kẹ usiuwoma ota. Me lele i rie kpohọ iwhre na, me te wuhrẹ epanọ a re bru eto, kẹsena me te wo oria nọ a rẹ jọ bru eto re mẹ sae rẹrote omamẹ. Ahwo buobu a rọwo nọ ma wuhrẹ Ebaibol kugbe ai. Uwhremu na me te kuomagbe ukoko jọ nọ a tohọ obọ, onọ o jẹ hae rọ ẹvẹrẹ ẹwho na ru iwuhrẹ. Anwọ ikpe 10 ena nọ mẹ rọ rrọ ọkobaro na. Eva e be were omẹ gaga nọ me bi fi obọ họ kẹ ahwo wuhrẹ Ebaibol na evaọ ẹvẹrẹ rai, uvumọ iruo efa e rrọ họ nọ e hae kẹ omẹ evawere te enẹ.”

13. Fikieme oke uzoge o rọ rrọ ẹruoke nọ ohwo ọ rẹ rọ roma kẹ egagọ Jihova ziezi?

¹³ Rọ evawere gọ Jihova evaọ oke uzoge ra. (Se Ọtausiuwoma Na 12:1.) Whọ ta nọ whọ gwọlọ emamọ iruo taure who te ti mu Jihova họ ẹgọ họ. Oke uzoge họ ẹruoke nọ ohwo ọ rẹ rọ roma kẹ egagọ Jihova ziezi. Izoge buobu a wo ewha-iruo uviuwou tere he, yọ a wo omokpokpọ gbe ẹgba nọ a re ro ru iruo nọ e make rrọ gaga. Eme whọ gwọlọ ru kẹ Jihova evaọ oke uzoge ra? Ẹsejọhọ whọ gwọlọ jọ ọkobaro, hayo whọ gwọlọ kpohọ usiuwoma ota evaọ ẹkwotọ nọ a rrọ ta ẹvẹrẹ ọfa. O sae jẹ jọnọ whọ ruẹ idhere efa sa-sa nọ whọ sae rọ roma kẹ egagọ Jihova ziezi evaọ ukoko nọ whọ rrọ na. Utee kpobi nọ who bi le evaọ egagọ Ọghẹnẹ kẹhẹ, o te gwọlọ nọ who ru iruo nọ whọ rẹ rọ rẹrote omara. Oghẹrẹ iruo vẹ whọ te salọ? Kọ ẹvẹ o te gwọlọ nọ who wuhrẹ haro te re whọ sai ru iruo na?

JỌ ITHUBRO EBAIBOL I FI OBỌ HỌ KẸ OWHẸ JẸ EMAMỌ IRORO

14. Eme u fo nọ whọ yọroma kẹ nọ whọ tẹ be jiroro kpahe oware nọ whọ gwọlọ ru evaọ obaro?

¹⁴ Ithubro Ebaibol esa nọ ma ta ẹme kpahe no na e sai fi obọ họ kẹ owhẹ jẹ emamọ iroro kpahe oghẹrẹ iruo nọ whọ gwọlọ ru. Otu iwuhrẹ ra a te riẹ kpahe oghẹrẹ iruo sa-sa. Yọ otu egọmeti a rẹ sae vuẹ owhẹ kpahe oghẹrẹ iruo nọ e rrọ oria nọ whọ rrọ na hayo obonọ whọ gwọlọ kpohọ kẹ iruo usiuwoma ota na. Ahwo otiọna a rẹ sae kẹ owhẹ ohrẹ nọ u re fi obọ họ kẹ owhẹ, dede na, o gwọlọ nọ whọ rẹ yọroma. Ahwo nọ a be gọ Jihova ha a sae gwọlọ ru owhẹ kielele akpọ na. (1 Jọn 2:15-17) Hae kareghẹhọ nọ udu ra o rẹ sae viẹ owhẹ họ nọ whọ tẹ be tẹrovi eware akpọ na.—Se Itẹ 14:15; Jeri. 17:9.

15, 16. Ono ọ rẹ sae kẹ owhẹ ohrẹ nọ o mai woma nọ whọ tẹ be jiroro kpahe iruo?

¹⁵ Whọ tẹ riẹ oghẹrẹ iruo sa-sa nọ e riẹ no, o te gwọlọ nọ whọ gaviezọ kẹ uthubro nọ u re fi obọ họ kẹ owhẹ salọ onọ uwoma. (Itẹ 1:5) Ono ọ rẹ sai fi obọ họ kẹ owhẹ salọ iruo nọ e rọwokugbe ithubro Ebaibol? Gaviezọ kẹ ohrẹ ahwo nọ a you Jihova gbe owhẹ, ahwo nọ a riẹ uyero ra ziezi re. A ti ru nọ whọ te rọ kiẹ omara riwi sọ whọ sai gine ru oghẹrẹ iruo itieye na. Ẹsejọhọ onana u ti fi obọ họ kẹ owhẹ wariẹ romatotọ jiroro na. Ọsẹgboni ra a tẹ rrọ Ileleikristi, onana u ti fi obọ họ kẹ owhẹ gaga. Ekpako ukoko ra a rẹ sai fi obọ họ kẹ owhẹ re, keme a wo onaa gbe orimuo ziezi evaọ egagọ Ọghẹnẹ. U te no ere no, hai lele ekobaro gbe esẹro ọnyawariẹ ta ẹme. Whọ sae nọ ae enọ wọhọ: Fikieme a rọ jiroro nọ a re ru iruo odibọgba oke-kpobi? Ẹvẹ a ro mu iruo ọkobaro họ, kọ ẹvẹ a be sae rọ rẹrote omarai? Evawere vẹ a be jọ iruo odibọgba oke-kpobi na wo?—Itẹ 15:22.

¹⁶ Ahwo nọ a ginẹ riẹ owhẹ a rẹ sae kẹ owhẹ ohrẹ nọ u re fi obọ họ kẹ owhẹ. Wọhọ oriruo, ma rehọ iẹe nọ whọ gwọlọ no isukulu re who ru iruo ọkobaro fikinọ iruo isukulu e ga hrọ. Ẹsejọhọ ohwo nọ o you owhẹ ọ te riẹ ẹjiroro nọ whọ gwọlọ ro no isukulu na, kẹsena o ve ti fi obọ họ kẹ owhẹ riẹ epanọ who re ro thihakọ nya isukulu na nwrotọ. Yọ akothiho otiọna o ti fi obọ họ kẹ owhẹ nọ whọ tẹ gwọlọ rọ uzuazọ ra kpobi gọ Jihova.—Ol. 141:5; Itẹ 6:6-10.

17. Oghẹrẹ iroro-ejẹ vẹ o gwọlọ nọ ma rẹ whaha?

¹⁷ Ohwo kpobi nọ ọ be gọ Jihova ọ te rẹriẹ ovao dhe eware nọ e rẹ sae whrehe ẹrọwọ riẹ jẹ raha usu riẹ kugbe Jihova. (1 Kọr. 15:33; Kọl. 2:8) Rekọ oghẹrẹ iruo jọ e rẹ sai fi usu ohwo kugbe Jihova họ ọza vi efa. Ẹsejọhọ whọ riẹ ahwo jọ nọ a “zue okọ [orọwọ] rai no” fiki oghẹrẹ iruo nọ a salọ. (1 Tim. 1:19) U ti woma gaga re whọ whaha iroro-ejẹ kpobi nọ e rẹ sae raha usu ra kugbe Jihova.—Itẹ 22:3.

WO EVAWERE NỌ WHỌ RRỌ UZOGE EVAỌ UKOKO NA

18, 19. Otẹrọnọ ohwo jọ o ri ti wo ajọwha tere he evaọ egagọ Jihova, eme u fo nọ o re ru?

¹⁸ Otẹrọnọ whọ ginẹ gbaemu nọ whọ rẹ gọ Jihova, rọ uvẹ kpobi nọ u rovie fihọ ruiruo ziezi nọ whọ rrọ uzoge na. Jẹ iroro nọ i ti ru owhẹ gọ Jihova avọ evawere evaọ oke nana nọ ẹnyaharo ologbo ọ be romavia evaọ egagọ uzẹme na.—Ol. 148:12, 13.

¹⁹ Evaọ abọdekọ riẹ, kọ otẹrọnọ who ri ti wo ajọwha tere he evaọ egagọ Jihova, eme u fo nọ who re ru? Whọ jọ udu u whrehe owhẹ hẹ, daoma tẹrovi epanọ ẹrọwọ ra ọ rẹ rọ ga. Nọ Pọl ukọ na ọ ta kpahe epanọ ọ daoma te re o yeri oghẹrẹ uzuazọ nọ Ọghẹnẹ ọ rẹ jẹrehọ no, ọ tẹ ta nọ: “Otẹrọnọ oware jọ orọ nọ wha wo iroro sa kpahe, Ọghẹnẹ o re ti dhesẹ ie via kẹ owhai re. Thakpinọ joma yọrọ [onọ] ma wo na eva uzẹme.” (Fil. 3:15, 16) Gbẹ hai roro kpahe uyoyou nọ Ọghẹnẹ o wo kẹ owhẹ gbe ohrẹ uwoma riẹ. Nọ whọ rrọ uzoge na, uvumọ ohwo nọ o re fi obọ họ kẹ owhẹ jẹ iroro nọ e mai woma ọ rrọ họ, u te no Jihova no.