Oware nọ Mẹ Salọ Okenọ Mẹ jọ Ọmaha

Evaọ ukpe 1985 nọ mẹ jọ ikpe 10, emaha jọ a no Cambodia ziọ isukulu mai evaọ Columbus, Ohio, obọ America. Omọvo emọ na jọ ọ dina riẹ Oyibo. Ọ tẹ jẹ rọ ẹkwoma iwoho dhesẹ eware nọ e be via evaọ obonọ a no ze kẹ omẹ, epanọ a bi ro kpe je gboja kẹ ahwo yọ otu jọ ọ be dhẹ vabọ. Mẹ jẹ hae viẹ evaọ aso nọ me te roro kpahe emọ nana. Mẹ gwọlọ ta kẹ ae kpahe Aparadase gbe ẹruore ẹkparomatha na, rekọ a bi yo ẹvẹrẹ mẹ hẹ. Dede nọ mẹ jọ ọmaha oke yena, me te wuhrẹ ẹvẹrẹ Cambodia re mẹ sai lele emọ-eklase mẹ ta ẹme kpahe Jihova. Oke yena mẹ riẹ nọ onana u ti fi obọ họ kẹ omẹ gaga evaọ obaro ho.

Re a wuhrẹ ẹvẹrẹ Cambodia o lọhọ họ. Isiava soso mẹ jẹ te siọ ewuhrẹ na ba, rekọ Jihova ọ tẹ rọ ẹkwoma ọsẹgboni mẹ tuduhọ omẹ awọ. Uwhremu na, iticha gbe emọ-eklase mẹ a tẹ jẹ vuẹ omẹ nọ me le utee epanọ mẹ rẹ rọ jọ okpohwo evaọ obaro. Rekọ mẹ gwọlọ jọ ọkobaro, fikiere mẹ tẹ salọ oghẹrẹ ewuhrẹ nọ ọ rẹ sai fi obọ họ kẹ omẹ ru iruo ubroke nọ mẹ sae rọ rẹrote omamẹ nọ me te no ekọleji nwrotọ no. Nọ isukulu mae e tẹ fa no, mẹ jẹ hai kuomagbe ekobaro na kpohọ usiuwoma ota. Mẹ jẹ hai wuhrẹ emọ isukulu jọ ẹvẹrẹ Oyibo ọvọvẹ, yọ onana u fi obọ họ kẹ omẹ gaga uwhremu na.

Okenọ mẹ jọ ikpe 16, me te yo nọ utu osese inievo Cambodia jọ o rrọ ẹwho nọ a re se Long Beach, California, evaọ America. Me weze nya je wuhrẹ epanọ a re se ẹvẹrẹ Cambodia. Nọ mẹ nwani nwrotọ no isukulu no, me te mu iruo ọkobaro họ, mẹ tẹ jẹ hae ta usiuwoma kẹ ahwo Cambodia nọ a jẹ rria kẹle uwou mai. Nọ mẹ kpako te ikpe 18 no, me te je roro kpahe epanọ mẹ rẹ rọ kwa kpobọ Cambodia. Orẹwho na o gbẹ jọ yoyoma wọhọ epanọ emọ na a gbiku riẹ evaọ emuhọ na, rekọ mẹ riẹ nọ umutho ahwo jọ ọvo a yo kpahe emamọ usi Uvie na no evaọ usu ahwo nọ a bu te ima ikpe (10,000,000) nọ e jọ Cambodia na. Evaọ oke yena, ukoko ovo nọ u wo iwhowho-uvie 13 o jọ orẹwho na soso. Orọ ọsosuọ nọ me ro te Cambodia họ onọ mẹ rọ nya evaọ okenọ mẹ jọ ikpe 19. Ikpe ivẹ nọ i lele i rie, mẹ tẹ kwa kpohọ obei. Mẹ ruẹ iruo ubroke jọ, mẹ jẹ hae fa je wuhrẹ ahwo ẹvẹrẹ Oyibo, re mẹ sae rẹrote omamẹ evaọ iruo ọkobaro na. Nọ omoke jọ o vrẹ no, mẹ tẹ ruẹ oniọvo-ọmọtẹ jọ nọ ma gbe wo itee evona, kẹsena ma tẹ ruọ orọo. Mai imava ma fi obọ họ kẹ ahwo Cambodia buobu kurẹriẹ ziọ ukoko na no.

Jihova o ru ‘ẹgwọlọ mẹ kpobi’ kẹ omẹ no. (Ol. 37:4) Iruo usiuwoma ota na họ iruo nọ e rẹ mae kẹ evawere. Evaọ etoke ikpe 16 nọ mẹ rọ rrọ Cambodia na, utu osese ọrọ inievo 13 nọ me dihọ obei na, u zihe ruọ ikoko 12 gbe itu esese 4 no.—Ikuigbe ọ Jason Blackwell.