Jihova, ‘Oria Adhẹzọ Mai Evaọ Oke Uye ’
“ỌNOWO họ usiwo enọ ikiẹrẹe, ọye họ ẹruọrọsuọ rai eva oke uye.”—OLEZI 37:39.
1, 2. (a) Eme Jesu ọ lẹ kẹ kpahe ilele riẹ? (b) Eme họ oreva Ọghẹnẹ kpahe ahwo riẹ?
JIHOVA họ erumeru. O wo ogaga nọ ọ rẹ rọ thọ idibo ẹrọwọ riẹ evaọ oghẹrẹ kpobi nọ ọ gwọlọ. Ọ rẹ sae tubẹ hẹriẹ ahwo riẹ no udevie ahwo akpọ nọ i kiọkọ je fi ai họ okegbe nọ udhedhẹ gbe ufuoma o rrọ. Dede na, Jesu ọ lẹ se Ọsẹ obọ odhiwu riẹ kpahe ilele riẹ inọ: “Mẹ lẹ nọ who si ai no eva akpọ na ha, rekọ re who siwi ai no obọ oyoma na.”—Jọn 17:15.
2 Jihova ọ jẹ iroro inọ o re si omai “no eva akpọ na ha.” Ukpoye, o rrọ oreva riẹ nọ ma lele ahwo akpọ nana rria re ma ruẹse vuẹ ai ovuẹ nọ o rẹ wha ẹruore gbe omosasọ se ahwo-akpọ. (Ahwo Rom 10:13-15) Rekọ, wọhọ epanọ Jesu o dhesẹ evaọ olẹ riẹ, fikinọ ma rrọ akpọ na, ma kpe oma fihọ kẹ “oyoma na.” Ahwo-akpọ aghẹmeeyo gbe ogaga izi imuomu e be wha edada gbe akọriọ ọgaga ze, yọ a ko Ileleikristi dhere no uye he.—1 Pita 5:9.
3. Makọ idibo ẹrọwọ Jihova eme a rẹ rẹriẹ ovao dhe, kọ omosasọ vẹ ma rẹ jọ Ẹme Ọghẹnẹ duku?
3 Wọhọ ẹkoma ohwo-akpọ, udu o rẹ gwọlọ no ohwo awọ otiẹse evaọ otọ edawọ itieye na. (Itẹ 24:10) Okerefihotọ Ebaibol o dhesẹ ikuigbe ahwo ẹrọwọ buobu nọ a ruẹ uye. Ọnọ ọ so ilezi na ọ ta nọ: “Ikpokpoma ohwo okiẹrẹe e rẹ jọ buobu; rekọ ỌNOWO ọ rẹ te thọ e no ae kpobi.” (Olezi 34:19) Ẹhẹ, eware iyoma e rẹ via kẹ “ohwo okiẹrẹe” dede. Wọhọ Devidi ọso-ilezi na, oke jọ o rẹ tubẹ jariẹ nọ ‘aro o re bi omai, ma ve je horie oma kpobi no.’ (Olezi 38:8) Ghele na, o rrọ oware omosasọ re ma riẹ nọ “ỌNOWO ọ kẹle enọ i wo eva owhrori, o je siwi enọ a nwẹ eva ẹzi.”—Olezi 34:18; 94:19.
4, 5. (a) Rọwokugbe Itẹ 18:10, eme ma re ru hrọ nọ ma tẹ gwọlọ wo uketha Ọghẹnẹ? (b) Ugogo owọ vẹ ma rẹ sae jẹ ro wo obufihọ Ọghẹnẹ?
4 Rọwokugbe olẹ Jesu na, Jihova o bi ghine siwi omai. Ọye họ “ẹruọrọsuọ [mai] eva oke uye.” (Olezi 37:39) Obe Itẹ o rehọ oghẹrẹ ẹme ọvona ru iruo nọ o ta nọ: “Odẹ ỌNOWO na họ uwou ukpehru; ohwo okiẹrẹe ọ tẹ dhẹ ruẹ ẹe ọ vẹ zọ.” (Itẹ 18:10) Ikereakere nana i dhesẹ ugogo uzẹme jọ via kpahe ọdawẹ oyoyou nọ Jihova o wo kẹ emama riẹ. Ọghẹnẹ ọ rẹ mae rehọ uketha kẹ ahwo okiẹrẹe nọ e be gwọlọ iẹe kẹse kẹse, wọhọ ẹsenọ a be dhẹ kpohọ uwou adhẹzọ ukpehru.
5 Nọ ma tẹ riẹriẹ ovao dhe ebẹbẹ jọ nọ e be k’omai idhọvẹ, oghẹrẹ vẹ ma sae rọ dhẹ bru Jihova kẹ uketha? Joma ta ẹme kpahe eware esa jọ nọ i wuzou nọ ma re ru ro wo obufihọ Jihova. Orọ ọsosuọ, ma rẹ nya bru Ọsẹ obọ odhiwu mai hrọ evaọ olẹ. Orọ avivẹ, ma rẹ nya lele ọkpọvio ẹzi ọfuafo riẹ. Gbe orọ avesa, o gbahọ nọ ma re yo ẹme kẹ ọruẹrẹfihotọ Jihova ẹkwoma usu nọ ma rẹ nya kugbe ibe Ileleikristi nọ e rẹ sae ru ebẹbẹ mai kpotọ.
Ẹgba Olẹ
6. Oghẹrẹ vẹ Ileleikristi a rri olẹ?
6 Ewena omokpokpọ jọ a dhesẹ olẹ wọhọ ifue nọ u re ru ọkora gbe awa-ọruọ kpotọ. Dede nọ uzẹme o rrọ inọ etoke nọ a rẹ rọ fọ wọhọ ẹsenọ ohwo o bi roro oware nọ ọ be te lẹ kpahe na o re ru awa-ọruọ kpotọ, oware ovona o rẹ sae via nọ ohwo o te bi yo edo urirẹ ọrọ emama hayo okenọ a tẹ be r’obọ wholo ohwo uke. Ileleikristi uzẹme a rri olẹ wọhọ oware evere he, wọhọ umu gheghe nọ u re ru awa-ọruọ kpotọ. Ma rri olẹ wọhọ usu adhẹwẹ nọ ma rẹ rọ ta ẹme kugbe Ọnọma na. Olẹ u wobọ kpahe omarọkẹ gbe eva nọ ma fihọ Ọghẹnẹ. Ẹhẹ, olẹ yọ abọjọ egagọ mai.
7. Re a lẹ avọ udufihọ eme u dhesẹ, kọ oghẹrẹ vẹ elẹ itieye na e sai ro fi obọ họ kẹ omai thihakọ ẹbẹbẹ?
7 Olẹ mai u re dhesẹ hrọ inọ ma fi udu hayo eva họ Jihova. Jọn ukọ na o kere nọ: “Whaọ onana họ eva-ifihọ nọ oma wo kpahọ iẹ, nnọ, re ma tẹ yare oware jọ wọhọ [epaọ] oreva riẹ, o re yo kẹ omai.” (1 Jọn 5:14) Jihova, Ọnọ Ọmai Kpehru, Ọghẹnẹ uzẹme ọvuọvo gbe ọnọ ọ rrọ erumeru na, ọ be ghinẹ gaviezọ ziezi kẹ elẹ unevaze egegagọ riẹ. Nọ ma tẹ riẹ ọvo inọ Ọghẹnẹ oyoyou mai na o bi yo elẹ mai eva okenọ ma tẹ ta awa-ọruọ gbe ebẹbẹ mai kẹe o rẹ kẹ omosasọ.—Ahwo Filipai 4:6.
8. Fikieme Ileleikristi ẹrọwọ a gbẹ rọ dhozọ hayo roro nọ a te vievie he nọ a tẹ gwọlọ lẹ se Jihova?
8 U fo re Ileleikristi ẹrọwọ a dhozọ họ, inọ a te he, hayo kare evaifihọ họ nọ a tẹ gwọlọ lẹ se Jihova. Uzẹme, nọ oma o tẹ lọhọ omai fiki eruo oware uyoma jọ nọ ma hai ru hu hayo nọ ebẹbẹ i te si nẹ omai, ehoo nọ ma re ro bo bru Jihova evaọ olẹ o re ru omai ẹsikpobi. Evaọ otọ iyero itieye na u fo re ma kareghẹhọ inọ Jihova ọ rẹ “reohrọ ahwo riẹ eva uye rai” gbe inọ o “re fiobọhọ kẹ erọ ọjẹfiẹ.” (Aizaya 49:13; 2 Ahwo Kọrint 7:6) Eva etoke ọyawọ gbe ẹbẹbẹ o jẹ mai fo nọ ma nya bru Ọsẹ obọ odhiwu mai avọ evaifihọ wọhọ adhẹzọ mai.
9. Abọ vẹ ẹrọwọ o wo nọ ma tẹ be lẹ se Ọghẹnẹ?
9 Re ma sai wo erere vọvọ no uvẹ ọghọ orọ olẹ ze, o gbahọ nọ ma re wo uvi ẹrọwọ. Ebaibol na e ta nọ “ohwo kpobi nọ o bikẹle Ọghẹnẹ ọ rẹ rọwo nọ Ọghẹnẹ ọ rọ, jegbe [nọ] ọ rẹ te hwosa kẹ e nọ e guọlọ e riẹ.” (Ahwo Hibru 11:6) Ẹrọwọ u vi Ọghẹnẹ nọ a rẹ rọwo ọvo inọ “ọ rọ.” Uvi ẹrọwọ o kẹre te evaifihọ egaga inọ Ọghẹnẹ o wo ogaga avọ isiuru nọ ọ te rọ hwosa kẹ omai fiki uzuazọ nọ ma yeri avọ ẹmeoyo kẹ ithubro riẹ. “Ọnowo ọ be tẹro riẹ muẹ enọ ikiẹrẹe, ezọ riẹ i rovie kẹ elẹ rai.” (1 Pita 3:12) Ovuhumuo nọ ma re wo kẹse kẹse inọ Jihova o wo ọdawẹ mai fihọ iroro avọ uyoyou, u re ru elẹ mai wo obọdẹ otofa.
10. Oghẹrẹ vẹ elẹ mai e rẹ jọ otẹrọnọ ma re rẹro obufihọ abọ-ẹzi mi Jihova?
10 Jihova ọ rẹ kezọ kẹ elẹ mai nọ ma tẹ be lẹ no eva ze. Ọso-ilezi na o kere nọ: “Eva mẹ kpobi me ro bose owhẹ; O ỌNOWO, yo kẹ omẹ!” (Olezi 119:145) Wo ohẹriẹ no elẹ ahwo egagọ buobu nọ a re dhe ẹwẹwariẹ, elẹ mai e rrọ ehruehru hayo thakpinọ ma lẹ ọvo ho. Ma tẹ rehọ “eva kpobi” lẹ se Jihova, eme olẹ mai e rẹ vọ avọ otofa gbe ẹjiroro. Nọ ma te ru olẹ utioye nọ a rẹ rehọ eva kpobi lẹ no, ma rẹ te ruẹ ufuoma nọ u re no ‘owha mai nọ ma re gbolo kẹ ỌNOWO na’ ze. Wọhọ epanọ Ebaibol na e ya eyaa riẹ, “o re ti fiobọhọ kẹ” omai.—Olezi 55:22; 1 Pita 5:6, 7.
Ẹzi Ọghẹnẹ O re Fi Obọ Họ Kẹ Omai
11. Edhere jọ vẹ Jihova ọ rẹ rọ kiyo elẹ mai nọ ma tẹ “yare” iẹe kẹ obufihọ?
11 Jihova ọ rrọ ọnọ o re Yo elẹ ọvo ho rekọ ọ rẹ jẹ Kiyo elẹ re. (Olezi 65:2) Devidi o kere nọ: “Oke uye mẹ whẹ me re bo se, keme who re yo kẹ omẹ.” (Olezi 86:7) Epọvo na re, Jesu ọ ta udu họ ilele riẹ awọ re a “yare” obufihọ Jihova keme, “Ọsẹ obọ odhiwu” ọ te “rehọ Ẹzi Ẹri kẹ enọ e yare riẹ.” (Luk 11:9-13) Ẹhẹ, ogaga iruo Ọghẹnẹ u re fi obọ họ, hayo sasa ahwo riẹ oma.—Jọn 14:16.
12. Ẹvẹ ẹzi Ọghẹnẹ ọ sai ro fi obọ họ kẹ omai o tẹ make wọhọ nọ ebẹbẹ i si nẹ omai?
12 Ma tẹ make rẹriẹ ovao dhe edawọ, ẹzi Ọghẹnẹ ọ rẹ sae kẹ omai “ogaga ulogbo nọ othesiwa.” (2 Ahwo Kọrint 4:7) Pọl ukọ na nọ o thihakọ iyero ebẹbẹ buobu, ọ ta avọ udu nọ, “mẹ rẹ sai ru eware kpobi eva ọnọ ọbe kẹ omẹ eri.” (Ahwo Filipai 4:13) Epọvo na re, Ileleikristi buobu nẹnẹ a wo omokpokpọ abọ-ẹzi gbe ọrọ iroro no evaọ uyo kẹ elẹ ayare rai. Ẹsibuobu, o rẹ wọhọ nnọ ebẹbẹ nọ e rẹ kẹ idhọvẹ vẹre e rẹ gbẹ kuye tere he nọ ma te wo obufihọ ẹzi Ọghẹnẹ no. Fiki ẹgba nana nọ Ọghẹnẹ ọ rẹ kẹ, ma rẹ sae ta wọhọ ukọ na inọ: “A bi kpokpo mai eva kabọ kabọ, yọ a sai kpe omai hi; a bi reghe omai, dede oma o rọ omai hi; a kẹ uye, dede ma seba ha, ẹtehikie; dede yọ a sai kpe he.”—2 Ahwo Kọrint 4:8, 9.
13, 14. (a) Oghẹrẹ vẹ Jihova ọ rọ rehọ ẹkwoma Ẹme riẹ rrọ adhẹzọ mai? (b) Ẹvẹ efihiruo ehri izi Ebaibol na u ro fi obọ họ kẹ owhẹ oma ra no?
13 A tẹ jẹ rehọ ẹgba ẹzi ọfuafo na kere jẹ sẹro Ẹme Ọghẹnẹ rọkẹ erere mai. Oghẹrẹ vẹ Jihova ọ rọ rrọ adhẹzọ mai evaọ oke uye ẹkwoma Ẹme riẹ? Edhere jọ họ ẹkwoma emamọ areghẹ gbe orimuo nọ ma bi wo no Ẹme riẹ ze. (Itẹ 3:21-24) Ebaibol na i bi wuhrẹ omai evaọ ẹgba iroro-ejẹ gbe eriariẹ mai. (Ahwo Rom 12:1) Ẹkwoma Ẹme Ọghẹnẹ nọ ma re se je wuhrẹ ẹsikpobi, gbe iruo nọ ma re fi ei họ, ma rẹ sai ‘wo areghẹ te epanọ ma sae rọ hẹriẹ uwoma no uyoma.’ (Ahwo Hibru 5:14) Ẹsejọhọ ehri izi Ebaibol na i fi obọ họ kẹ owhẹ oma ra no evaọ okenọ whọ rẹriẹ ovao ku ebẹbẹ jọ. Ebaibol na e rẹ kẹ omai orimuo nọ ọ rẹ sai fi obọ họ kẹ omai duku obọdẹ ifue ebẹbẹ nọ e be kẹ omai idhọvẹ.—Itẹ 1:4.
14 Ẹme Ọghẹnẹ ọ kẹ omai ehri ọbọga ọfa—ẹruore usiwo. (Ahwo Rom 15:4) Ebaibol na e vuẹ omai inọ eware iyoma e te jọ ribri hi. Ukpokpoma nọ u re te omai kpobi kẹhẹ o rrọ umuthoke. (2 Ahwo Kọrint 4:16-18) Ma wo “ẹruore uzuazọ ebẹdẹ bẹdẹ, onọ Ọghẹnẹ nọ ọ rẹ ya-erue he, ọ kpaokpa riẹ ugbanwẹdẹe.” (Taitọs 1:2) Nọ ẹruore yena ọ tẹ be kẹ omai evawere, avọ emamọ obaro nọ Jihova ọ yeyaa riẹ nọ ma re roro kpahe ẹsikpobi, ma sai thihakọ ukpokpoma.—Ahwo Rom 12:12; 1 Ahwo Tẹsalonika 1:3.
Ukoko na —Yọ Odhesẹvia Uyoyou Ọghẹnẹ
15. Ẹvẹ Ileleikristi a sai ro fi obọ họ kẹ ohwohwo?
15 Ọruẹrẹfihotọ ọfa nọ Jihova ọ kẹ nọ ọ rẹ sai fi obọ họ kẹ omai evaọ oke uye họ, omakugbe nọ ma be reawere riẹ evaọ ukoko Ileleikristi na. Ebaibol na e ta nọ: “Ogbẹnyusu ọ rọ rọkẹ eyowo ẹsikpobi, rekọ oniọvo ọ rẹ ruẹ uye oniọvo.” (Itẹ 17:17) Ẹme Ọghẹnẹ ọ ta udu họ ahwo nọ a rrọ ukoko na kpobi awọ inọ a you jẹ kẹ ohwohwo adhẹẹ. (Ahwo Rom 12:10) Pọl ukọ na o kere nọ: “Wha jọ ohwo kpobi ọ kake guọlọ ewoma ọrivẹ riẹ, re ọ tẹ guọlọ ewoma omobọ riẹ.” (1 Ahwo Kọrint 10:24) Nọ ma te wo eriwo ọyena, o rẹ sai fi obọ họ kẹ omai tẹrovi ẹgwọlọ amọfa ukpenọ ma rẹ tẹrovi edawọ nọ i bi te omai. Nọ ma tẹ be rẹrote ọdawẹ amọfa, orọnikọ oyena u ti fi obọ họ kẹ ai ọvo ho rekọ ma te jẹ wereva je wo evevọwẹ nọ u re ru ebẹbẹ mai kpotọ.—Iruẹru 20:35.
16. Ẹvẹ Oleleikristi ọvuọvo ọ sae rọ kẹ ọbọga?
16 Ezae gbe eyae nọ e kpako evaọ abọ-ẹzi a rẹ sae daoma ziezi bọ amọfa ga. Re a ruẹsi ru ere, a re ru uvẹ je ru oma rai evaọ oghẹrẹ nọ o rẹ rọ lọhọ kẹ amọfa nọ a jẹ dhẹ gbalọ ae. (2 Ahwo Kọrint 6:11-13) U re ghine woma kẹ ukoko na nọ ahwo nọ a riẹ kpobi a te bi jiri emaha na, bọ ahwo kpokpọ ga, jẹ ta udu họ ahwo nọ a rrọ ọkora awọ. (Ahwo Rom 15:7) Uyoyou inievo u re je fi obọ họ kẹ omai whaha ẹzi iviẹro nọ ma re wo kpahe ohwohwo. Ma rẹ nwane ku ei họ nọ ebẹbẹ omobọ ohwo yọ oka oyẹlẹ abọ-ẹzi hi. U fo kẹhẹ, Pọl ọ kpakpa Ileleikristi inọ, “wha ta udu họ enọ udu u re bro awọ.” (1 Ahwo Tẹsalonika 5:14) Ebaibol na i dhesẹ nọ makọ Ileleikristi nọ i wo ẹrọwọ a rẹ ruẹ uye.—Iruẹru 14:15.
17. Didi uvẹ ma wo nọ ma rẹ rọ bọ okugbe inievo Ileleikristi na ga?
17 Iwuhrẹ Ileleikristi e be kẹ omai obọdẹ uvẹ nọ ma rẹ rọ sasa jẹ ta udu họ ohwohwo awọ. (Ahwo Hibru 10:24, 25) Ẹme-ọtakugbe ọbọga nana orọnikọ evaọ iwuhrẹ ikoko na ọvo o jọ kuhọ họ. Ikpoye, ahwo Ọghẹnẹ a rẹ jẹ gwọlọ uvẹ nọ a rẹ rọ ta emamọ ẹme ọbọga kugbe evaọ oria kpobi nọ a rrọ. Nọ ebẹbẹ e tẹ roma via, ma rẹ nwane jọ ẹsiẹsiẹ fi obọ họ kẹ ohwohwo fikinọ ma bọ emamọ usu kugbe gaga no vẹre. Pọl ukọ na o kere nọ: “Ẹhẹriẹ ọ se oma na ba ẹjọ, re abọ oma na kpobi ohwo ọ sẹro ohwo. Otẹrọnọ uye u te abọ jọ yọ u te oma na kpobi, otẹrọnọ oma ofọ abọ jọ, oma na kpobi o rẹ ghọghọ kugbe.”—1 Ahwo Kọrint 12:25, 26.
18. Iroro vẹ u fo nọ ma rẹ whaha nọ udu u te bi whrehe omai?
18 Eva ẹsejọ, udu o rẹ sai whrehe omai ga te epanọ ma gbẹ rọ reawere usu kugbe ibe Ileleikristi hi. Ma rẹ daoma whaha iroro itieye na re ma se oma mai ba ebrudhe no omosasọ gbe obufihọ nọ ibe egegagọ mai a rẹ sae kẹ. Ebaibol na e vẹvẹ omai unu nọ: “Ọnọ ọ hẹriẹ oma ọ gwọlọ nọ ọye ọvo ọ rẹ jọ, rekọ o mukpahe oziẹ okiẹrẹe kpobi.” (Itẹ 18:1) Ọghẹnẹ ọ rehọ ẹkwoma ẹruọsa riẹ kẹ omai inievo emezae gbe emetẹ. Nọ ma te vuhu ọruẹrẹfihotọ oyoyou yena mu, ma re ti duku ufuoma eva oke uye.
Yọrọ Eriwo Owoma
19, 20. Oghẹrẹ vẹ Ikereakere na i re ro fi obọ họ kẹ omai whaha iroro ethọthọ?
19 Nọ ma te bi wo ọkora gbe elọhoma, o rẹ jọ lọlọhọ re ma wo iroro ethọthọ. Wọhọ oriruo, nọ eware okpẹtu e tẹ via kẹ ahwo jọ, a rẹ sai mu avro họ ewo kpahe edikihẹ abọ-ẹzi rai, ku ei họ nọ oware uyoma nọ o be via kẹ ai na yọ odhesẹvia inọ Ọghẹnẹ ọ jẹ rai rehọ họ. Dede na, kareghẹhọ inọ Jihova ọ rẹ rehọ “eyoma” dawo ohwo ọvo ho. (Jemis 1:13) Ebaibol na e ta nọ: “[Ọghẹnẹ] ọ rẹ fake kẹ emọ ahwo uye hayo ru ae eva dha ha.” (Enuobro 3:33) Ukpoye, o rẹ da Jihova gaga nọ idibo riẹ a tẹ be ruẹ uye.—Aizaya 63:8, 9; Zekaraya 2:8.
20 Jihova họ “Ọsẹ ohrọ kpobi jegbe Ọghẹnẹ omosasọ kpobi.” (2 Ahwo Kọrint 1:3) Ọ be daezọ mai, yọ ọ te kpare omai evaọ ezi riẹ. (1 Pita 5:6, 7) Nọ ma tẹ be hai roro kpahe ọdawẹ nọ Ọghẹnẹ o wo kẹ omai ẹsikpobi u ti fi obọ họ kẹ omai yọrọ emamọ eriwo, jẹ tubẹ ghọghọ. Jemis o kere nọ: “Imoni mẹ, re egheghẹrẹ edawọ i te te owhai, wha rehọ iẹe avọ evawere.” (Jemis 1:2) Fikieme? Ọ kuyo nọ: “Keme [ohwo] o te mudhe kẹ odawọ na, o re ti mi etu-uvie uzuazọ nọ Ọnowo ọ kpokpa riẹ kẹ enọ i you rie.”—Jemis 1:12.
21. Makọ oghẹrẹ ebẹbẹ nọ ma rẹriẹ ovao dhe kẹhẹ, imuẹro vẹ Ọghẹnẹ ọ kẹ ahwo nọ a fi eva họ iẹe?
21 Wọhọ epanọ Jesu ọ vẹvẹ omai unu na, evaọ akpọ na ma re ti wo ukpokpoma. (Jọn 16:33) Ebaibol na e ya eyaa nọ “ọbẹwẹ, hayo ukpokpoma, hayo ohọwo, hayo ẹbẹba, hayo imuozọ” o rẹ hẹriẹ omai no uyoyou Jihova gbe uyoyou Ọmọ riẹ hẹ. (Ahwo Rom 8:35, 39) Ẹvẹ o rrọ oware omosasọ te nọ ma rọ riẹ inọ uye kpobi nọ ma rẹriẹ ovao dhe o rrọ ubroke! Bọe oke yena, nọ ma be hẹrẹ ekuhọ uye-oruẹ ohwo-akpọ na, Jihova, Ọsẹ oyoyou mai na ọ be sẹro mai. Nọ ma tẹ dhẹ bru ei kẹ uketha, ọ te jọ “oria omofọwẹ rọ kẹ enọ a re kienyẹ; oria adhẹzọ eva oke uye.”—Olezi 9:9.
Eme Ma Wuhrẹ?
• Eme Ileleikristi a re rẹro riẹ nọ a be rria evaọ akpọ omuomu nana?
• Ẹvẹ olẹ nọ ma rẹ lẹ no eva ze o sae rọ kẹ omai ọbọga nọ ma tẹ rẹriẹ ovao dhe edawọ?
• Ẹvẹ ẹzi Ọghẹnẹ ọ rọ rrọ ofiobọhọ?
• Eme ma rẹ sai ru ro fi obọ họ kẹ ohwohwo?
[Uwoho nọ o rrọ ẹwẹ-obe avọ 10]
Ma rẹ dhẹ bru Jihova hrọ wọhọ uwou adhẹzọ ukpehru
[Iwoho nọ e rrọ ẹwẹ-obe avọ 12]
Enọ e kpako evaọ abọ-ẹzi a rẹ rehọ uvẹ kpobi jiri jẹ ta udu họ amọfa awọ