Ọ Ta Eware nọ Ọ Rọwo kẹ Ibe Emọ-Eklase Riẹ

KỌ O te were owhẹ re who fi obọ họ kẹ ibe emọ-eklase ra wo otoriẹ eware nọ whọ rọwo no Ebaibol ze? Magdalena, ọmọtẹ ikpe 18 nọ ọ rrọ ekọleji evaọ Poland, ọ rẹ ta eware nọ ọ rọwo wọhọ omọvo Isẹri Jihova kẹ emọ eklase riẹ. Fikiere, ẹsikpobi a rẹ nọe enọ wọhọ, ‘Eme u dhesẹ re a jọ omọvo Isẹri Jihova?’ gbe ‘Kọ wha rọwo Jesu Kristi?’ Ẹvẹ ọ sai ti ro fi obọ họ kẹ ibe emọ-eklase riẹ? Magdalena ọ lẹ se Jihova kẹ obufihọ o te je ru lele olẹ riẹ.—Jemis 1:5.

Ẹdẹjọ, Magdalena ọ tẹ ta kẹ iticha jọ nọ ọ rẹ riẹe ru ziezi inọ ọ gwọlọ dhesẹ ividio jọ kẹ eklase na, ividio na họ Jehovah’s Witnesses—The Organization Behind the Name.a Iticha na ọ se he. Magdalena ọ tẹ ta kẹ ibe emọ-eklase riẹ nọ: “Mẹ be ta kẹ ogbẹnyusu mẹ jọ re ọ kẹ owhai ovuẹ auwa ọvo gbe ubro. O ti dhesẹ ividio jọ kẹ owhai, ọ vẹ jẹ ta kẹ owhai kpahe Isẹri Jihova. Kọ wha te jariẹ?” Aikpobi a te yo nọ Ee. Magdalena avọ Wojciech, ọgbodibo oke-kpobi nọ o wo ona ziezi, a te mu oma họ ẹruẹrẹ họ.

Oghẹrẹ nọ a momaa na họ, a te kake rehọ iminiti 20 ta ẹme kpahe ibroshọ na Isẹri Jihova—Oghẹrẹ Ahwo Vẹ A Rrọ? Eme A Rọwo?,* a vẹ te kuvẹ re ohwo nọ o wo enọ ọ nọ, a vẹ jẹ kẹ uyo rai. Kẹsena, a ve ti dhesẹ ividio na evaọ uwou-ebe isukulu na. A te kẹ emọ eklase na kpobi okẹ—ẹnvẹlopu ologbo nọ ibroshọ e rrọ eva, obe na Questions Young People Ask—Answers That Work,* gbe emebe-evẹvẹ jọ gbe emagazini.

Nọ ẹdẹ na o te, ibe emọ-eklase 14 erọ Magdalena a jariẹ, iticha na, gbe imane efa nọ a nyaku evaọ uwou-ebe na. Wojciech ọ kake ta nnọ ikere-ebe gbe eketa erọ Poland buobu a kere odẹ Ọghẹnẹ, Jihova, họ ebe rai. Ọ tẹ jẹ fodẹ ebe anwae erọ iwuhrẹ ahwo Kathọlik jọ nọ odẹ na, Jihova, o rrọ. Nọ ọ jẹ ta kpahe iruẹru ọgbọna erọ Isẹri Jihova, o dhesẹ iwoho erọ iwou ogha sa-sa gbe iwoho Egwa Okokohọ jọ.

Ẹme na ọ tẹ te da ruọ ahwo kpobi oma. Magdalena avọ Wojciech a tẹ jẹ rehọ Ebaibol na za enọ rai. Onana o were ogbotu na gaga, u te mu ai ẹro inọ Isẹri Jihova a bi wuhrẹ orọ obọ rai hi. Didi enọ jọ a nọ, kọ ẹvẹ a rọ kẹ iyo rai?

Onọ: Eme buobu e rrọ Ebaibol na nọ i vẹ tere he, etadhesẹ e tẹ jẹ vọe re, yọ idhere buobu e riẹ nọ a rẹ rọ fa otọ rai. Kọ ẹvẹ ohwo ọ sae rọ rria lele oware nọ Ebaibol na o wuhrẹ?

Uyo: Ahwo jọ a rẹ ta nnọ Ebaibol ọ wọhọ akpata, obonọ u je owhẹ who re kporo iei no ze. Rekọ dai roro: Whọ tẹ gwọlọ riẹ oware nọ okere-obe jọ o wo họ iroro, kọ u gbe woma re whọ nọe? Wo ohẹriẹ no ikere-ebe ahwo-akpọ nọ e rẹ kpako a ve whu, Ọnoweme Ebaibol na, Jihova Ọghẹnẹ, ọ rrọ uzuazọ. (Ahwo Rom 1:20; 1 Ahwo Kọrint 8:5, 6) Eme nọ e wariẹ ikereakere jọ họ e rẹ sai dhesẹ otofa ogbagba orọ ẹme na. Ofariẹ, Ebaibol e rẹ ta ẹme ọvo na evaọ eria buobu, fikiere whọ tẹ be rehọ ai wawo ohwohwo u re fi obọ họ. Fikiere ma rẹ sae kẹ Ọghẹnẹ uvẹ re ọ kpọ iroro mai, epaọ ẹsenọ ọye ọvo ọ be fa otọ ikereakere na kẹ omai. Ma te bi ru ere, ma te sae riẹ jẹ rria lele oreva riẹ nọ a kere fihọ Ebaibol na, ogbẹrọ ere?

Onọ: Didi ohẹriẹ o rrọ Ileleikristi avọ Isẹri Jihova?

Uyo: Mai yọ Ileleikristi! Rekọ ukpenọ ma rẹ rehọ unu ọvo ta nnọ mai yọ Ileleikristi, Isẹri Jihova a be daoma rria lele eware nọ a rọwo gbe oware nọ Ọghẹnẹ bi wuhrẹ ai rọkẹ erere rai. (Aizaya 48:17, 18) Nọ o rọnọ iwuhrẹ rai kpobi i no Ebaibol ze na, a riẹ inọ a wo uzẹme na.—Matiu 7:13, 14, 21-23.

Onọ: Fikieme wha jẹ nya bru ahwo nọ wha riẹ ẹdọvo ho jẹ daoma kpobi re wha ruẹsi lele ai ta ẹme? Kọ oyena o gbẹ rọnọ ẹrọwọ rai wha be do họ amọfa na?

Uyo: Kọ who roro nnọ o thọ otẹrọnọ ohwo jọ evaọ iyẹrẹ ọ rọ ẹwo ta ẹme kẹ owhẹ, jẹ gwọlọ riẹ ẹjiroro ra kpahe oware jọ? (Jerimaya 5:1; Zefanaya 2:2, 3) (Wojciech avọ Magdalena a te dhesẹ epanọ a rọ nọ ahwo jọ nọ a nyaku sọ Ọghẹnẹ ọ be daezọ otu nọ uye o be bẹ fiki ẹvo nọ o ku kẹle na evaọ Poland.) Nọ ohwo na ọ tẹ ta eva riẹ no, ma ve dhesẹ oria jọ Ebaibol na kẹe. Otẹrọnọ ohwo jọ ọ gwọlọ lele omai ta ẹme he, ma re yere iei nọ kodẹ, ma vẹ nyabru omọfa. (Matiu 10:11-14) Kọ whọ sae ta nnọ onana yọ ọgbahọ ma be gba ahwo họ na? Manikọ ahwo a gbe lele amọfa ta ẹme ofa ha?

Onọ: Fikieme wha gbe ro ru ehaa-eriosehọ họ?

Uyo: Ehaa nọ ma re ru kpobi họ onọ Ebaibol ọ ta kẹ omai nọ ma ru—Ekareghẹhọ uwhu Jesu Kristi. (1 Ahwo Kọrint 11:23-26) Rọkẹ ehaa-eriosehọ, wha sae nyae jọ obe ofeme-ulogbo gbe ebe efa nọ a re fievahọ se kpahe epanọ i ro muhọ. Who te ru ere, whọ te ruẹ oware nọ ma gbe bi ro ru ehaa itieye na ha.—2 Ahwo Kọrint 6:14-18.

A nọ enọ efa buobu, ma tẹ jẹ kiyo rai. Enọ gbe iyo na e rehọ oke te epanọ ma rọ va edhesẹ ividio na.

Ẹvẹ emọ-isukulu na a rehọ ẹmeọta na? Jọ Magdalena ọ ta kẹ omai: “U gbomẹ unu inọ emọ-isukulu na jọ nọ a re thuethu je se amọfa ẹkoko vẹre a nọ emamọ enọ. Dede nọ a rẹ ta nnọ Ọghẹnẹ ọ rrọ họ, evaọ ẹmeọta na a dhesẹ nọ a wo ẹrọwọ kpahe Ọghẹnẹ!” Ahwo nọ a jariẹ a rehọ abava dede ekẹ na rehọ—ebe 35, ibroshọ 63, gbe emagazini 34 a fihọ ada kẹ ai.

Ẹmeọta isukulu nana ọ wha erere ze gaga! Orọnikọ u fi obọ họ kẹ ibe emọ-eklase Magdalena riẹ je wo otoriẹ Isẹri Jihova viere ọvo ho rekọ o ta udu họ emoha na buobu awọ re a roro kpahe ẹjiroro uzuazọ. Kọ eme whọ gbẹ daoma fi obọ họ kẹ ibe emọ-eklase ra ha re a wuhrẹ viere kpahe eware nọ whọ rọwo?

[Oruvẹ-obotọ]

[Uwoho nọ o rrọ ẹwẹ-obe avọ 31]

Okenọ Magdalena avọ Wojciech a jẹ ruẹrẹ oma kpahe kẹ ẹmeọta na