“Ẹkparomatha Ọsosuọ Na”—Ọ Be Rọ Oma Via Enẹna!
‘Enọ i whu eva Kristi na e te kake kparoma.’—1 AHWO TẸSALONIKA 4:16.
1, 2. (a) Didi ẹruore ọ rrọ kẹ enọ i whu no? (b) Eme ọ lẹliẹ owhẹ rọwo ẹkparomatha na? (Rri oruvẹ-obotọ na.)
“ENỌ e rọ uzuazọ a riẹ nọ a reti whuẹ.” Anwẹnọ Adamu ọ rọ thuzi, enẹ ọvo uzuazọ o rrọ. N’otọ avọ otọ ze, ohwo nọ a yẹ kpobi ọ riẹ nọ o ti whu ẹdẹjọ, yọ ibuobu a re roro inọ: ‘Kọ ohwo o te whu no, yọ u re no ye? Uyero vẹ iwhuowhu na e rrọ?’ Ebaibol e kuyo nọ: “Iwhuowhu e riẹ oware ovo ho.”—Ọtausiwoma Na 9:5.
2 Kọ ẹruore jọ ọ riẹ rọkẹ enọ i whu no? Ee. Evaọ uzẹme, ẹruore ọ rẹ jariẹ otẹrọnọ ẹjiroro ọsosuọ Ọghẹnẹ kẹ ahwo-akpọ o re rugba. Evaọ ikpe na kpobi ze na, idibo omarokpotọ Ọghẹnẹ a fi ẹrọwọ họ eyaa Jihova no ọrọ Ubi nọ o ti kpe Setan je si ọraha nọ ọ wha ze na no. (Emuhọ 3:15) Ibuobu rai a whu no. Otẹrọnọ a rẹ ruẹ orugba eyaa yena gbe eyaa efa nọ Jihova ọ yaa no, kiyọ a rẹ kpare ai no iwhuowhu ze. (Ahwo Hibru 11:13) Kọ oware utioye na o lọhọ? Ee, o lọhọ. Pọl ukọ na ọ ta nọ: “Ẹkparomatha enọ ikiete avọ enọ ikiete he e rẹ te jarọ.” (Iruẹru 24:15) Okejọ o jariẹ nọ Pọl ọ kpare ẹghele ọzae jọ nọ a re se Yutikọs no uwhu ze, ọnọ o kie no edhe avọ esa uwou-ehru fihọ otọ. Evaọ ekparomatha izii nọ a kere fihọ Ebaibol na, onana họ ọrọ urere.—Iruẹru 20:7-12.a
3. Didi omosasọ who wo no eme ọ Jesu nọ a kere fihọ Jọn 5:28, 29 na ze, kọ fikieme?
3 Ekparomatha izii nana e lẹliẹ omai fi ẹrọwọ họ eme ọ Pọl na. I ru eva nọ ma fihọ eyaa Jesu na ga viere: “Oke o be tha nọ enọ e rọ eva [uki] kpobi i je ti yo uru [Jesu], a vẹ te nya via.” (Jọn 5:28, 29) Eme nana e sasa oma kẹhẹ. Yọ ẹvẹ o rrọ omosasọ te kẹ ima ahwo buobu enọ ahwo rai i whu seba!
4, 5. Ekparomatha sa-sa vẹ Ebaibol na e fodẹ, kọ ovẹ ma te ta kpahe evaọ uzoẹme nana?
4 Ibuobu enọ e te kparoma ze na a ti zihe ziọ otọakpọ nọ udhedhẹ o rrọ no evaọ otọ Uvie Ọghẹnẹ. (Olezi 37:10, 11, 29; Aizaya 11:6-9; 35:5, 6; 65:21-23) Rekọ, ekparomatha efa e te via no re oyena o tẹ te rọ oma via. Orọ ọsosuọ, Jesu Kristi ọ rẹ kparoma re ọ rehọ aghare idhe riẹ ro bru Ọghẹnẹ fiki mai. Jesu o whu ọ tẹ jẹ kparoma evaọ 33 C.E.
5 Orọ avivẹ, otu nọ a wholo na erọ ‘Izrẹl Ọghẹnẹ’ a ve ti kuomagbe Olori na Jesu Kristi evaọ oruaro obọ odhiwu, oria nọ a ti jo “lele Ọnowo na ria bẹdẹ.” (Ahwo Galesha 6:16; 1 Ahwo Tẹsalonika 4:17) A se onana “ẹkparomatha ọsosuọ na.” (Eviavia 20:6) Nọ ẹkparomatha yena o te kuhọ no, koyehọ oke u te no nọ ima ahwo buobu a rẹ rọ kparoma ziọ otọakpọ avọ irẹro uzuazọ ebẹdẹ bẹdẹ evaọ Aparadase. Fikiere, ẹruore mai ọ tẹ make rrọ obọ odhiwu hayo otọakpọ, ma wo isiuru gaga kpahe “ẹkparomatha ọsosuọ na.” Oghẹrẹ ẹkparomatha vẹ o rrọ? Okevẹ o te rọ via?
“Oghẹrẹ Oma Vẹ?”
6, 7. (a) Re Ileleikristi nọ a wholo a te kpohọ odhiwu, eme ọ rẹ via hrọ tao? (b) Oghẹrẹ ugboma vẹ a te rọ kparoma?
6 Evaọ ileta ọsosuọ riẹ se ahwo Kọrint, Pọl ọ nọ enọ jọ kpahe ẹkparomatha ọsosuọ na: “Ẹvẹ a rẹ kpare iwhuowhu? Oghẹrẹ oma vẹ a ti ro zihe tha?” Ọ tẹ kuyo enọ na: “Ubi nọ whọ kọe o rẹ zọ họ ajokpa nọ u whu no . . . rekọ Ọghẹnẹ ọ kẹ riẹ oghẹrẹ oma nọ ọ guọlọ . . . Oro o rọ ehru sa, oro o rọ akpọ na oghẹrẹ ofa.”—1 Ahwo Kọrint 15:35-40.
7 Eme ọ Pọl i dhesẹ nọ Ileleikristi nọ a rehọ ẹzi ọfuafo wholo a re whu re a te ti wo osohwa obọ odhiwu rai. A te whu no, ugboma uwo rai u ve zihe ruọ ẹkpẹ. (Emuhọ 3:19) Evaọ oke nọ Ọghẹnẹ o fihọ, a vẹ rehọ oghẹrẹ oma nọ u fo ẹria evaọ obọ odhiwu rọ kpare ai ze. (1 Jọn 3:2) Ọghẹnẹ ọ vẹ kẹ ae uzuazọ sebaewhuo. Orọnikọ uzuazọ utionana a ro yẹ ai hi. Pọl ọ ta nọ: “Oma onana nọ u re whẹ na o rẹ te whẹ oma nọ u re whẹ hẹ họ.” Uzuazọ sebaewhuo yọ okẹ nọ u no obọ Ọghẹnẹ ze, onọ enọ i wo obọ evaọ ẹkparomatha ọsosuọ na a te “whẹ” họ.—1 Ahwo Kọrint 15:50, 53; Emuhọ 2:7; 2 Ahwo Kọrint 5:1, 2, 8.
8. Ẹvẹ ma rọ riẹ nnọ Ọghẹnẹ ọ rẹ salọ ahwo 144,000 na no egagọ sa-sa ze he?
8 Ahwo 144,000 ọvo a ti wo obọ evaọ ẹkparomatha ọsosuọ na. Jihova o mu rai họ ẹsalọ eva Pẹntikọst 33 C.E., umutho edẹ jọ nọ Jesu ọ kparoma ze no. “A kere odẹ [Jesu] gbe odẹ Ọsẹ riẹ fihọ aruezo rai” kpobi. (Eviavia 14:1, 3) Fikiere, a salọ e rai no egagọ sa-sa ze he. Aikpobi yọ ilele Jesu, yọ oware ọghọ o rrọ rọ kẹ ae inọ a se odẹ Ọsẹ na, Jihova, fihọ ai kpobi uzou. A tẹ kpare ai ze no, a vẹ kẹ ai iruo evaọ obọ odhiwu. Ẹruore na inọ a te gọ Ọghẹnẹ evaọ obọ odhiwu o rrọ isiuru ologbo kẹ ai.
Kọ O be Via Enẹna?
9. Ẹvẹ Eviavia 12:7 gbe Eviavia 17:14 i ro fi obọ họ kẹ omai riẹ etoke nọ ẹkparomatha ọsosuọ na u ro muhọ?
9 Okevẹ ẹkparomatha ọsosuọ na o ti ro muhọ? Imuẹro e riẹ gaga inọ o be via enẹna. Wọhọ oriruo, roro kpahe izou ivẹ jọ evaọ obe Eviavia. Orọ ọsosuọ, rri Eviavia uzou avọ 12. Ma jọ etẹe se nnọ Jesu Kristi nọ a ro mu ovie obọ na, avọ ijẹle efuafo riẹ, a lele Setan avọ idhivẹri riẹ fiẹmo. (Eviavia 12:7-9) Wọhọ epanọ emagazini nana o ta no unuẹse buobu na, ẹmo yena o muhọ evaọ 1914.b Rekọ muẹrohọ inọ evaọ usu ilele Jesu nọ a wholo na, ọvuọvo o lele i rie fiẹmo obọ odhiwu na ha. Whaọ, rri Eviavia uzou avọ 17. Ma jọ etẹe se nnọ nọ a tẹ raha “Babilọn ologbo na” no, Omogodẹ na o ve ti fi erẹwho na kparobọ. Ebaibol na i te fibae nọ: “[Te] enọ aviẹe a gbẹrọ enọ ọ hae nọ i wo orọwọ.” (Eviavia 17:5, 14) Oke yena “enọ aviẹe a gbẹrọ enọ ọ hae nọ i wo orọwọ” na yọ a kparoma no otẹrọnọ a te jọ kugbe Jesu rọ kẹ ohọre nọ a ti ro fi akpọ Setan kparobọ. Fikiere u fo re ma ta nnọ enọ a wholo na nọ i whu taure Amagẹdọn o te ti te a te kparoma no, no umuo 1914 rite oke Amagẹdọn.
10, 11. (a) Amono họ ekpako 24 na, kọ eme omọvo rai jọ o dhesẹ kẹ Jọn? (b) Eme ma rẹ sae jọ onana wuhrẹ?
10 Kọ ma rẹ sae fodẹ okenọ ẹkparomatha ọsosuọ na u ro muhọ dẹẹ? Ma rẹ jọ Eviavia 7:9-15 ruẹ oware nọ u re fi obọ họ kẹ omai, oria nọ Jọn ukọ na o jo dhesẹ eruẹaruẹ ọrọ “otu obuobu jọ, nọ ohwo ọvo ọ sai kele he.” Ohwo nọ o dhesẹ otu obuobu yena via kẹ Jọn họ omọvo ekpako 24 na, yọ ekpako nana a dikihẹ kẹ ahwo 144,000 na, ibe ereuku Kristi evaọ oruaro obọ odhiwu rai.c (Luk 22:28-30; Eviavia 4:4) Jọn omariẹ o wo ẹruore obọ odhiwu; rekọ nọ ọ gbẹ jọ ohwo nọ o wo ugboma iwo evaọ otọakpọ okenọ ọkpako na ọ ta ẹme kẹe na, Jọn ọ jọ eruẹaruẹ na dikihẹ kẹ enọ a wholo nọ e gbẹ rrọ otọakpọ enọ i ri wo osohwa obọ odhiwu rai hi.
11 Eme ma rẹ sai wuhrẹ no onana ze, inọ omọvo ekpako 24 na jọ họ ọnọ o dhesẹ otu obuobu na via kẹ Jọn? O wọhọ nọ enọ e kparoma no evaọ usu otu ekpako 24 na a bi fi obọ họ kpeze uzẹme nọ u no obọ Ọghẹnẹ ze se ahwo nẹnẹ. Fikieme ovuẹ oyena o rrọ roja? Keme a dhesẹ otu obuobu na via vevẹ kẹ idibo Ọghẹnẹ nọ a wholo eva otọakpọ evaọ 1935. Otẹrọnọ omọvo ekpako 24 na jọ a ro kpeze obọdẹ uzẹme nana ze, yọ u dhesẹ nọ a kpare riẹ kpohọ odhiwu no, u te lehie kẹhẹ evaọ 1935. Koyehọ oyena u re dhesẹ nọ ẹkparomatha ọsosuọ na u muhọ no, no umuọ 1914 avọ 1935. Kọ ma sae gbẹ rọ ẹme na ziotọ viere?
12. Dhesẹ oware nọ ma sae rọ ta nnọ okpakpọ 1918 ẹkparomatha ọsosuọ na u ro muhọ.
12 Obọnana, u re fo re ma ta kpahe oria Ebaibol jọ nọ ọ sai ti fi obọ họ kẹ omai evaọ ẹme nana. A wholo Jesu Kristi wọhọ ọnọ ọ be te jọ Ovie ọrọ Uvie Ọghẹnẹ evaọ ubrobọ ekuhọ ukpe 29 C.E. Ikpe esa gbe ubro e ruọ emu no, evaọ okpakpọ 33 C.E., a tẹ kpare iẹe ze wọhọ omama ẹzi nọ o wo ẹgba. Kọ ma sai roro nnọ, nọ o rọnọ a rehọ Jesu mu ovie evaọ ubrobọ ekuhọ 1914 na, ẹkparomatha ilele riẹ nọ i wo ẹrọwọ nọ a rrọ ẹzi wholo u muhọ ikpe esa gbe ubro nọ i lele i rie, evaọ okpakpọ 1918? O tẹ rrọ ere kiyọ u siuru gaga. Dede nọ Ebaibol o dhesẹ onana vevẹ hẹ, eriwo nana o rọwo kugbe ikereakere efa nọ i dhesẹ inọ ẹkparomatha ọsosuọ na u muhọ nọ ọzino Kristi ọ nwani muhọ no.
13. Edhere vẹ 1 Ahwo Tẹsalonika 4:15-17 o ro dhesẹ nọ ẹkparomatha ọsosuọ na o muhọ evaọ emuhọ ọzino Kristi?
13 Wọhọ oriruo, Pọl o kere nọ: “Mai enọ e gbẹrọ uzuazọ na, nọ a seba bọo ẹtha Ọnowo na [orọnikọ, rite ekuhọ ọzino riẹ hẹ], ma te sai miẹ enọ i kieruọ owezẹ aro vievie he. Keme Ọnowo omariẹ ọvo o re ti mu no obọ odhiwu tha, avọ edo gbe uru ukọ-odhiwu oride, gbe edo ọgba Ọghẹnẹ. Kẹsena iri nọ i whu eva Kristi na, kọ eye, e rẹ kake kparoma. kẹsena mai enọ e rọ uzuazọ, nọ a seba, a re mu omai avọ ae ugbadede eva igho nya i zere Ọnowo na eva idedeghe; whaọ ere ma re ti ro lele Ọnowo na ria bẹdẹ.” (1 Ahwo Tẹsalonika 4:15-17) Fikiere, Ileleikristi nọ a wholo enọ i whu taure ọzino Kristi u te ti muhọ a te kpare ai kpohọ uzuazọ obọ odhiwu, bẹsenọ enọ e gbẹ rrọ uzuazọ evaọ ọzino Kristi i ti kuomagbe ai. Onana u dhesẹ nnọ ẹkparomatha ọsosuọ na u muhọ nọ ọzino Kristi o nwani muhọ obọ, yọ o gbẹ rrọ otọ evaọ etoke “ezihetha riẹ” na. (1 Ahwo Kọrint 15:23) Ukpenọ ọ rẹ rọ oma via ẹsiẹvo, ẹkparomatha ọsosuọ na ọ rẹ rọ oma via evaọ etoke thethei.
A “Rehọ Ewu Ọfuafo kẹ Ae Omomọvo”
14. (a) Okevẹ eruẹaruẹ nọ a kere fihọ obe Eviavia uzou avọ 6 na i ro rugba? (b) Eme a dhesẹ via eva Eviavia 6:9?
14 Je roro kpahe imuẹro nọ e rrọ Eviavia uzou avọ 6. Ma jọ etẹe se nnọ Jesu ọ be dhẹ anyenya wọhọ Ovie nọ o bi fi kparobọ. (Eviavia 6:2) Erẹwho na a rrọ ẹmo nọ a bi jo kpe omoma rai no. (Eviavia 6:4) Ohọo o da oria kpobi fia. (Eviavia 6:5, 6) Ikpehre eyao e be lahiẹ ahwo-akpọ. (Eviavia 6:8) Uvumọ ohwo ọ rẹ vro ho sọ eware nana nọ a ruẹaro rai na e be via anwọ 1914 ze. Rekọ oware ofa jọ o via. A si iroro mai kpohọ agbada-idhe jọ. “Izi enọ a kpe fiki ẹme Ọghẹnẹ gbe fiki isẹri nọ a sei” e rrọ obotọ agbada-idhe na. (Eviavia 6:9) Nọ o rọnọ “eva azẹ uzuazọ ohwo o rọ” na, oware nọ o ginẹ rrọ obotọ agbada-idhe na họ azẹ idibo Jesu nọ i wo ẹrọwọ enọ a kpe fiki isẹri-ise aruọwha gbe ajọwha rai.—Iruo-Izerẹ 17:11.
15, 16. Dhesẹ oware nọ o lẹliẹ eme ọ obe Eviavia 6:10, 11 kie kpahe ẹkparomatha ọsosuọ na.
15 Wọhọ azẹ Ebẹle ohwo okiẹrẹe na, azẹ Ileleikristi nana nọ a kpe fiki ẹrọwọ rai na o bi bo via inọ a kioja rai. (Emuhọ 4:10) “A te bo whawha, annọ, ‘O Ọnowo Ọrẹri ọ rọ uzẹme na, ẹvẹ u re kri te re who te bruoziẹ ahwo akpọ na jẹ kioja azẹ mai?’ ” Eme u lele i rie? “A tẹ rehọ ewu ọfuafo kẹ ae omomọvo jẹ ta kẹ ae re a serihọ omoke jọ, bẹsenọ unu ibe idibo gbe imoni rai e nọ a ti kpe wọhọ ae oma rai e rẹ gba no.”—Eviavia 6:10, 11.
16 Kọ azẹ nọ ọ rrọ obotọ agbada-idhe a rehọ iwu efuafo na kẹ? Vievie! A rehọ iwu na rọ kẹ ahwo nọ azẹ rai o hwẹ fihọ obotọ agbada-idhe na, wọhọ odẹme. A rehọ uzuazọ rai dheidhe evaọ odẹ Jesu, a tẹ kpare ai ze wọhọ emama ẹzi. Ẹvẹ ma rọ riẹ ere? Ma kake jọ obe Eviavia se no nọ: “Ohwo nọ ọ kpare obọ a rẹ te rehọ iwu efuafo gọ e ẹgọ, me re ti voro odẹ riẹ no obe uzuazọ na ha.” Kareghẹhọ re inọ ekpako 24 na “a gẹgọ iwu efuafo, yọ itu-uvie igoru e rọ ae uzou.” (Eviavia 3:5; 4:4) Fikiere nọ ẹmo, ohọo, gbe ẹyao e be lahiẹ akpọ na, enọ e jọ usu 144,000 na whu no, onọ a rehọ azẹ nọ ọ rrọ obotọ agbada-idhe na dhesẹ na, a vẹ te kparoma kpohọ uzuazọ obọ odhiwu, a vẹ te rehọ iwu efuafo ẹwoho rọ gọ ae ẹgọ.
17. Edhere vẹ enọ a kẹ iwu efuafo na a ti ro “serihọ”?
17 Enọ e kparoma ze obọ na a re ti “serihọ.” A rẹ rehọ odiri hẹrẹ ẹdẹ nọ Ọghẹnẹ ọ te kioja rai hrọ. “Ibe idibo” rai, Ileleikristi nọ a wholo nọ e gbẹ rrọ otọakpọ, a ri dhesẹ ẹgbakiete rai evaọ otọ odawọ rite urere he. Nọ oke ẹdhoguo Ọghẹnẹ u te te no, yọ oke ‘eriosehọ’ na u kuhọ no. (Eviavia 7:3) Eva oke yena, enọ e kparoma no na a ve ti kuobọgbe Olori na Jesu Kristi re a kpe irumuomu na, onọ u kugbe enọ i kpe uvi Ileleikristi.—2 Ahwo Tẹsalonika 1:7-10.
Otofa nọ U wo kẹ Omai
18, 19. (a) Fikieme ma sae rọ ta nnọ ẹkparomatha ọsosuọ na ọ be rọ oma via enẹna? (b) Oghọghọ vẹ who wo no otoriẹ ra ọrọ ẹkparomatha ọsosuọ na ze?
18 Ebaibol e fodẹ ugogo ẹdẹ ọ ẹkparomatha ọsosuọ na ha, rekọ u dhesẹ inọ o via eva etoke thethei, evaọ etoke ọzino Kristi na. Enọ a te kake kpare ze họ Ileleikristi nọ a wholo enọ i whu taure ọzino Kristi u te ti muhọ. Nọ ọzino Kristi o be nyaharo na, “eva ẹro ọmahọ ọvo,” a ve ti nwene Ileleikristi nọ a wholo, enọ i thihakọ te urere evaọ otọakpọ kpohọ emama ẹzi nọ i wo ogaga. (1 Ahwo Kọrint 15:52) Kọ enọ a wholo na kpobi a ti wo osohwa obọ odhiwu rai no taure ẹmo Amagẹdọn o te ti muhọ? Ma riẹ hẹ. Rekọ oware nọ ma riẹ họ evaọ oke nọ Ọghẹnẹ o fihọ, ahwo 144,000 na kpobi a bi ti dikihẹ Ugbehru Zayọn evaọ obọ odhiwu.
19 Ma tẹ jẹ riẹ nnọ ibuobu 144,000 na a kuomagbe Kristi no evaọ obọ odhiwu. Umutho rai gheghe ọvo o kiọkọ otọakpọ. Onana yọ imuẹro ovevẹ inọ oke ọ ẹdhoguo Ọghẹnẹ o kẹle gaga no. Kẹle na, a be te raha uyerakpọ Setan kpobi no. A ve ti fi Setan omariẹ họ ọgọdọ odidi na. Ẹkparomatha ahwo-akpọ u ve ti muhọ, kẹsena, fiki idhe ẹtanigbo Jesu, ahwo-akpọ nọ i wo ẹrọwọ a ve ti te ẹgbagba wọhọ oghẹrẹ ọnọ Adamu o kufiẹ na. Eruẹaruẹ Jihova nọ ọ rrọ Emuhọ 3:15 o be rehọ edhere igbunu rugba. A rẹ ruẹ obọ ọghọ riẹ hẹ re ma jọ uzuazọ evaọ oke nana.
[Oruvẹ-obotọ]
a Rọkẹ eree nọ ikiọkọ, rri 1 Ivie 17:21-23; 2 Ivie 4:32-37; 13:21; Mak 5:35, 41-43; Luk 7:11-17; 24:34; Jọn 11:43-45; Iruẹru 9:36-42.
b Rọkẹ imuẹro Ikereakere inọ ọzino Kristi o muhọ evaọ 1914, rri obe na Eme Ebaibol na O Gine Wuhrẹ? ẹwẹ-obe avọ 215-218, onọ Isẹri Jihova a kere.
c Rọkẹ ovuẹ kpahe epanọ ma rọ riẹ nnọ ekpako 24 na a dikihẹ kẹ Ileleikristi nọ a wholo na evaọ ọkwa obọ odhiwu rai, rri obe na, Revelation—Its Grand Climax At Hand! ẹwẹ-obe avọ 77, onọ Isẹri Jihova a kere.
Kọ Whọ Sae k’Iyo Nana Vevẹ?
Ẹvẹ Ikereakere nọ e rrọ obotọ na i ro fi obọ họ kẹ omai riẹ oke ọ “ẹkparomatha ọsosuọ na”?
• 1 Ahwo Kọrint 15:23; 1 Ahwo Tẹsalonika 4:15-17
[Iwoho nọ e rrọ ẹwẹ-obe avọ 28]
Taure a tẹ te kpare ahwo-akpọ no iwhuowhu ze, ẹkparomatha vẹ ọ te roma via?