Enọ Ahwo Nọ A s’Ebe

Eme họ otofa ẹme Jesu nọ ọ ta inọ odibo riẹ nọ o wo ẹrọwọ na o ti wo “areghẹ”?

Jesu ọ nọ inọ: “Ono họ odibo oruọzewọ, nọ o wo areghẹ nọ olori riẹ o fihọ, nọ o riwi uwou riẹ, re nọ oke u te ọ rehọ emu kẹ ae?” (Matiu 24:45) “Odibo” nọ ọ be kẹ omai “emu” abọ-ẹzi họ utu Ileleikristi nọ a rọ ẹzi wholo na. Fikieme Jesu ọ rọ ta nọ a wo areghẹ?a

Ma rẹ sae jọ iwuhrẹ Jesu wo otoriẹ uvevẹ orọ oware nọ o wo họ iroro nọ ọ fodẹ ẹme na “areghẹ.” Wọhọ oriruo, okenọ Jesu ọ ta ẹme fodẹ “odibo oruọzewọ, nọ o wo areghẹ” na, ọ kẹ ọtadhesẹ ọrọ emetẹ-kọkọ ikpe nọ e jẹ hẹrẹ ẹtha ọva. Ikuigbe emetẹ-kọkọ na e kareghẹhọ omai uyero nọ Ileleikristi nọ a rọ ẹzi wholo na a jọ taure 1914 o te ti te, nọ a jẹ rehọ ọwhọ hẹrẹ ẹtha Ọva ologbo na, Jesu Kristi. Evaọ usu emetẹ-kọkọ ikpe na, ewhri ọ emetẹ-kọkọ isoi o re taure ọva na ọ tẹ te nya ze, fikiere a gbẹ sai dede ọva na ruọ ehaa orọo na ha. Emetẹ-kọkọ isoi nọ i kiọkọ a wo areghẹ. A wha ewhri rọ thoma re ikpẹ rai e ruẹsi gbe lo evaọ oke nọ ọva na ọ te tha, a tẹ kẹ ae uvẹ rueva ehaa na.—Matiu 25:10-12.

Okenọ a rọ Jesu mu ovie evaọ 1914, ibuobu Ileleikristi nọ a rọ ẹzi wholo na a je rẹro nọ a te nwani ku oma gbei evaọ obọ odhiwu. Rekọ iruo buobu e gbẹ jọ kẹ ai nọ a re ru evaọ otọakpọ, yọ ejọ e ruẹrẹ oma kpahe kẹ oyena ha. Wọhọ emetẹ-kọkọ nọ i wo areghẹ hẹ na, Ileleikristi nana a thọ oma vẹrẹ he evaọ abọ-ẹzi, fikiere elo rai o te fu no. Dede na, ibuobu Ileleikristi nọ a rọ ẹzi wholo na a jowọ areghẹ avọ orimuo—a thoma vẹrẹ evaọ abọ-ẹzi. Nọ a riẹ nọ iruo buobu e gbẹ rrọ obaro kẹ ae, a te duomahọ iruo nana avọ evawere. A rọ ere dhesẹ nọ ae họ “odibo oruọzewọ, nọ o wo areghẹ” na.

Muẹrohọ oghẹrẹ nọ Jesu ọ rọ rehọ ẹme na “areghẹ” ba ẹme ta eva Matiu 7:24 re. Jesu ọ ta nọ: “Kohwo kohwo nọ o yo eme mẹ nana o te ru ai ọ rẹ te jọ wọhọ ohwo owareghẹ nọ ọ bọ uwou riẹ họ ehru utho.” Ohwo nọ o wo areghẹ ọ bọ uwou riẹ gaga avọ iroro inọ ẹsejọhọ okpofou ọ sai fou. Wo ohẹriẹ, ohwo ogheghẹ ọ bọ uwou riẹ họ uwẹkpẹ, uwou riẹ u te kporo kuotọ. Fikiere, olele Jesu nọ ọ kparo ruẹ enwoma nọ i re no elele areghẹ ohwo-akpọ ze họ ọnọ o wo areghẹ. Areghẹ gbe orimuo riẹ u re ru nọ o je fi ẹrọwọ họ Jesu je ru lele iwuhrẹ riẹ. Epọvo na “odibo oruọzewọ, nọ o wo areghẹ” na o bi ru.

Je muẹrohọ oghẹrẹ nọ a rọ rehọ ẹme nọ a fa “areghẹ” na ru iruo evaọ eria jọ Ikereakere Hibru na. Wọhọ oriruo, Fẹro ọ rọ Josẹf mu ohwo nọ o wuzou emuore evaọ Ijipti. Onana o jọ abọjọ ọruẹrẹfihotọ Jihova nọ ọ rẹ rọ rehọ emu kẹ idibo riẹ. Fikieme a rọ salọ Josẹf ? Fikinọ ọ jọ “ohwo nọ o wo areghẹ.” (Emuhọ 41:33-39; 45:5) Epọvo na re, Ebaibol i dhesẹ Abigẹle wọhọ “ohwo orimuo.” Ọ rehọ emu kẹ Devidi, ọnọ Jihova o wholo avọ ahwo riẹ. (1 Samuẹle 25:3, 11, 18) A se Josẹf avọ Abigẹle ahwo nọ a wo areghẹ fikinọ a vuhu oreva Ọghẹnẹ mu jẹ jowọ avọ otoriẹ gbe orimuo.

Fikiere, nọ Jesu o dhesẹ odibo nọ o wo ẹrọwọ na inọ o wo areghẹ, oware nọ Jesu o wo họ iroro họ ahwo nọ a ru utu odibo yena via a re ti dhesẹ otoriẹ, ẹromuhotọ gbe orimuo keme ẹrọwọ rai, te iwuhrẹ gbe iruẹru rai kpobi e roma hwa Ẹme Ọghẹnẹ.

[Oruvẹ-obotọ]