Enọ Ahwo nọ A s’Ebe
Kọ Jekọp o gbe ruthọ nọ ọ rọ rehọ eviẹhọ ru omariẹ wọhọ Esọ, wọhọ epanọ a kere fihọ Emuhọ 27:18, 19 na?
Ẹsejọhọ whọ riẹ iku nana ziezi. Nọ Aiziki ọ who no, ọ tẹ ta kẹ Esọ re o kpobọ ẹwọ nyai kpe arao jọ sei, inọ: “Rehọ iẹe se omẹ re mẹ re, re mẹ ghale owhẹ me te whu.” Nọ Rebeka o yo ẹme nọ ọzae riẹ ọ ta, o te there emu ọwewere, ọ tẹ ta kẹ Jekọp nọ: “Rehọ iẹe se ọsẹ ra re ọ re, re ọ ghale owhẹ re o te whu.” Kẹsena avọ iwu Esọ nọ e riẹe oma, gbe eto ọmọ-ẹwe nọ e riẹe ohọe gbe abọ, Jekọp ọ tẹ wọ emu na se ọsẹ riẹ. Nọ Aiziki ọ nọe nọ, “Whẹ ono, mọ mẹ?” Jekọp o te yo nọ: “Mẹ Esọ ọnwara ra.” Aiziki ọ rọwo ẹme riẹ na, ọ tẹ ghale iẹe.—Emuhọ 27:1-29.
Ebaibol ọ ta te oware nọ o wọ Rebeka avọ Jekọp ru oware nọ a ru na ha, rekọ ikuigbe na i dhesẹ nọ oware na o via idudhe. Muẹrohọ inọ Ebaibol e ta ha sọ oware nọ Rebeka avọ Jekọp a ru na u woma hayo u yoma, fikiere onana o rrọ oriruo eviẹhọ gbe ọrue-ọta nọ ma rẹ raro kele he. Ghele na, Ebaibol i ru oware nọ o via na vẹ.
Orọ ọsosuọ, iku na i dhesẹ vevẹ inọ Jekọp ọye o wo udu nọ o re ro mi oghale ọsẹ riẹ, orọnikọ Esọ họ. Jekọp ọ dẹ ute ọkpako na mi ejime riẹ, ọnọ o wo ovuhumuo ho na no vẹre, okenọ ọ zẹe rọ kẹe ẹkwoma emu nọ ọ kẹ riẹ nọ ohọo u je kpei. Esọ o “ku ute-ọkpako riẹ fiẹ.” (Emuhọ 25:29-34) Fikiere nọ Jekọp ọ nya bru ọsẹ riẹ re ọ ghale iẹe, oware nọ o ginẹ rrọ oriẹ ọ jẹ gwọlọ.
Orọ avivẹ, nọ Aiziki ọ ruẹ nọ kpakọ Jekọp ọ rehọ eghale na kẹ, ọ daoma re ọ wariẹ unu hu. Ẹsejọhọ ọ kareghẹhọ ẹme nọ Jihova ọ ta kẹ Rebeka re o te ti yẹ ijime na inọ: “Ọkpako ọ rẹ te ga ọrọ ọmaha.” (Emuhọ 25:23) U fo re ma muẹrohọ re inọ, okenọ Jekọp o je kpohọ obọ Heran, Aiziki o fiba eghale na.—Emuhọ 28:1-4.
Orọ urere, u fo re ma kareghẹhọ inọ Jihova o je muẹrohọ eware nọ e jẹ via na. Oghale nọ Aiziki ọ kẹ na u w’obọ kugbe eyaa nọ Ọghẹnẹ ọ yaa kẹ Abraham. (Emuhọ 12:2, 3) O gbẹ hae ruọ Ọghẹnẹ inọ Jekọp o wo oghale na ha, ọ hae rọ oghẹrẹ jọ dhomahọ ẹme na. Ikpoye, Jihova ọ tẹ lẹliẹ oghale na mu Jekọp ẹro nọ ọ ta kẹe inọ: “[Ubi] ra akpọ na kpobi a rẹ te jọ wo oghale.”—Emuhọ 28:10-15.