Eme Họ Uvie Ọghẹnẹ?

EME o jọ ugogo uzoẹme nọ Jesu ọ jẹ rọ ta usiuwoma? Uvie Ọghẹnẹ, ere Jesu omariẹ ọ ta. (Luk 4:43) Ababọ avro, ahwo nọ a jẹ gaviezọ kẹe a yo unuẹse buobu nọ ọ ta ẹme kpahe Uvie yena. Kọ onana u gbe rai unu hayo reghe ai aro? Kọ a nọ riẹ inọ eme họ Uvie na? Ijo. Ikuigbe Usiuwoma na e ta ere he. Kọ onana u dhesẹ nọ Uvie Ọghẹnẹ o jọ oware nọ ahwo oke yena a riẹ?

Uzẹme riẹ họ, ikere anwae nọ ahwo Ju a rri ghaghae wọhọ Ikere Ẹri na e ta kpahe Uvie yena, e rehọ eme ivevẹ dhesẹ oware nọ Uvie yena o rrọ gbe eware nọ u ti rugba. Nẹnẹ ma rẹ sai wuhrẹ eware buobu kpahe Uvie na evaọ edhere ọvona—ẹkwoma Ebaibol na nọ ma re se. Joma ta ẹme kpahe igogo eware ihrẹ jọ nọ Ebaibol i wuhrẹ omai kpahe Uvie na. Ahwo Ju oke nọ u kpemu gbe erọ oke Jesu a riẹ eware esa ọsosuọ nọ ma te ta ẹme kpahe na. Jesu gbe ikọ riẹ a dhesẹ esa edekọ via evaọ ikpe-udhusoi ọsosuọ. Oke mai orọ urere na u ro dhesẹ oma via vevẹ.

1. Uvie Ọghẹnẹ yọ egọmeti dẹẹ, onọ esuo riẹ ọ te jọ bẹdẹ. Eruẹaruẹ ọsosuọ Ebaibol na i dhesẹ inọ Ọghẹnẹ o ti vi osiwi ze nọ o ti si ahwo-akpọ nọ a wo ẹrọwọ no uye. A se rie “ubi” na, yọ o ti si uye-oruẹ kpobi nọ ọkparesuọ Adamu, Ivi, gbe Ẹdhọ ọ wha ze no otọ. (Emuhọ 3:15) Evaọ oke ofa jọ, a vuẹ Devidi Ovie na oware isiuru jọ kpahe “ubi” nana hayo Mesaya na; inọ ọ rẹ te jọ Ovie. Uvie riẹ u ti wo ohẹriẹ no isuẹsu efa kpobi. O te jọ bẹdẹ bẹdẹ.—2 Samuẹle 7:12-14.

2. Uvie Ọghẹnẹ o te raha egọmeti ahwo-akpọ kpobi. A dhesẹ eruẹaruẹ jọ kẹ Daniẹl ọruẹaro na nọ ọ jọ ruẹ egaga esuo-akpọ unọjọ utọjọ no ige anwae ze rite oke mai na. Muẹrohọ oware isiuru nọ u ti ku orugba eruẹaruẹ na họ: “Evaọ ezi ivie [urere erọ ahwo-akpọ] eyena, Ọghẹnẹ obọ odhiwu na ọ rẹte rehọ uvie nọ a rẹ raha ha muẹ, hayo a rẹte se isuẹsu riẹ ba kẹ amọfa ha. Ọ rẹte whọlọ ivie na kpobi ọ vẹte rehọ ai ze oba, ọ vẹte jọ bẹdẹ.” Koyehọ a bi ti si ivie hayo egọmeti ahwo-akpọ kpobi—avọ ẹmo, okienyẹ, gbe ogbekuo rai kpobi no otọ bẹdẹ bẹdẹ. Wọhọ epanọ eruẹaruẹ Daniẹl i dhesẹ, kẹlena Uvie Ọghẹnẹ u ti su otọakpọ na soso. (Daniẹl 2:44, 45) Uvie nana u muẹro, oye o be te jọ egọmeti ọvo nọ o ti su ehrugbakpọ na.a

3. Uvie Ọghẹnẹ u ti si ẹmo, ẹyao, ohọwo, makọ uwhu dede no otọ. Eruẹaruẹ isiuru buobu nọ e rrọ Ebaibol na i dhesẹ eware nọ Uvie Ọghẹnẹ u ti ru evaọ otọakpọ na. Uvie yena u ti ru eware nọ esuo ahwo-akpọ a rẹ sai ru vievie he. Dai roro iei—a be te raha ekwakwa-ẹmo kpobi riẹriẹriẹ! “Ọye o [bi ti] ru akpọ na kpobi nọ ẹmo o je serihọ ri te oka akpọ.” (Olezi 46:9) Ẹyao gbe esipito e gbẹ te jọ họ, yọ ma gbe ti du gwọlọ edọkita ha. “Ohwo ọvo nọ ọ be ria eva riẹ nọ ọ rẹte ta no, ‘Mẹ be mọ,’ ọ rọ họ.” (Aizaya 33:24) Ohọo hayo uvuhu o te gbẹ jọ họ. “Ibi [hayo, emuore o ti] vihọ eva otọ na.” (Olezi 72:16) A gbẹ te ruẹ emọshuare, uki hayo uwhori hi, edada nọ enana e rẹ wha ze e te gbẹ jọ họ. A ti si uwhu, ọwegrẹ mai nọ obọ o rẹ rrọ họ na no otọ. Ọghẹnẹ ọ te “lọ uwhu no ri bẹdẹ, Ọnowo na ỌGHẸNẸ o veti ririe irui oviẹ no aro rai.”—Aizaya 25:8.

4. Ọghẹnẹ ọvo ọ salọ Ovie Uvie riẹ. Orọnikọ Mesaya na ọvo hayo ahwo-akpọ sebaẹgba a rehọ e riẹ mu ovie he. Jihova Ọghẹnẹ ọvo ọ salọ e riẹ. Edẹ-ova na Mesaya gbe Kristi i dhesẹ onana via. Otofa edẹ-ova ivẹ na họ “Ọnọ A Wholo.” Fikiere Jihova họ ọnọ ọ salọ hayo rehọ ẹzi riẹ wholo Ovie nana kẹ obọdẹ ọkwa nana. Ọghẹnẹ ọ ta kpahe iẹe nọ: “Ri odibo mẹ, ọnọ ome kru dikihẹ, [ọsanọ] mẹ, ọnọ ọ were ẹzi mẹ hrọ; mẹ rehọ ẹzi mẹ kẹe, ọ rẹte jọ erẹwho bru uvioziẹ.” (Aizaya 42:1; Matiu 12:17, 18) Ono ọ rẹ sae riẹ oghẹrẹ Osu nọ ma gwọlọ vi Ọnọ ọ ma omai?

5. Osu Uvie Ọghẹnẹ na o dhesẹ kẹ ahwo-akpọ kpobi no inọ o gine te ọkwa na. A ruẹ imuẹro nọ i dhesẹ nọ Jesu obọ Nazarẹt họ Mesaya nọ a ruẹaro riẹ na. A yẹ riẹ evaọ uviuwou nọ Ọghẹnẹ ọ ta nọ ọnana o ti no ze. (Emuhọ 22:18; 1 Iruẹru-Ivie 17:11; Matiu 1:1) Nọ ọ jọ otọakpọ, eruẹaruẹ buobu nọ a ruẹ kpahe Mesaya na ikpe buobu nọ i kpemu e jọ omariẹ rugba. A te je wo imuẹro no obọ odhiwu ze inọ ọye họ Mesaya na. Evaọ oghẹrẹ vẹ? Ọghẹnẹ ọ ta ẹme no obọ odhiwu ze ro dhesẹ nọ ọye họ Ọmọ Riẹ; ikọ-odhiwu i dhesẹ via kẹ ahwo inọ Jesu họ Mesaya nọ a ruẹaro riẹ na; yọ Jesu ọ jẹ rehọ ẹkwoma ogaga Ọghẹnẹ ru eware igbunu—ẹsibuobu evaọ iraro ogbotu.b Jesu ọ rehọ ẹkwoma eware nọ o je ru dhesẹ oghẹrẹ Osu nọ ọ te jọ. Orọnikọ ogaga nọ o re ro fi obọ họ kẹ ahwo ọvo o wo ho, rekọ o rrọ isiuru riẹ re o ru ere. (Matiu 8:1-3) Ọ kare oriobọ, o wo uduowha, ororokẹ, gbe omaurokpotọ. A kere ikuigbe oghẹrẹ uzuazọ nọ o yeri evaọ otọakpọ họ Ebaibol nọ ohwo kpobi ọ rẹ sai se.

6. Jesu o wo ahwo 144,000 nọ a ti lele iei su evaọ Uvie Ọghẹnẹ. Jesu ọ ta inọ amọfa, kugbe ikọ riẹ, a ti lele iei su evaọ obọ odhiwu. O se utu ahwo nana “uthuru okakao.” (Luk 12:32) A vuẹ Jọn ukọ na uwhremu na inọ ahwo nana a bu te 144,000. A bi ti wo obọdẹ iruo evaọ obọ odhiwu, onọ a ti ro lele Jesu su wọhọ ivie je ru iruo wọhọ izerẹ.—Eviavia 5:9, 10; 14:1, 3.

7. Uvie Ọghẹnẹ nọ u muhọ esuo no enẹna evaọ obọ odhiwu, o be te rehọ esuo na te otọakpọ soso. Oware avọ ihrẹ nana nọ ma jọ Ebaibol wuhrẹ kpahe Uvie na họ onọ o mai siuru. Ma rẹ jọ Ebaibol na ruẹ imuẹro buobu nọ i dhesẹ nọ a ginẹ rehọ Jesu mu Ovie no evaọ obọ odhiwu. O bi su evaọ obọ odhiwu enẹna, yọ ọ be te rehọ esuo na te otọakpọ soso kẹlena je ru eruẹaruẹ iwoma nọ ma ta ẹme te na gba. Rekọ ẹvẹ o sai ro mu omai ẹro inọ Uvie Ọghẹnẹ u muhọ esuo no enẹna? Kọ oke vẹ esuo riẹ o ti ro te otọakpọ obonẹ?

[Oruvẹ-obotọ]