A Rrọ Gaga Ghelọ Ebẹbẹ

EBẸBẸ ra e rẹ sai fu owhẹ enu. E rẹ sae tamu owhẹ oma wọhọ ezozo. Whọ rẹ sai roro inọ whọ te sai fi ai kparobọ họ, hayo roro nọ ebẹbẹ na e rro vi owhẹ oma, whọ vẹ te rọ oma ra wawo amọfa je roro nọ who fioka ha. O sae jọ nọ whọ be mọ okpẹyao jọ nọ o bi mi owhẹ ẹgba gbe evawere nọ who wo evaọ uzuazọ. Oghẹrẹ nọ ẹbẹbẹ na ọ rrọ kpobi, o wọhọ ẹsenọ whọ te sai noi hi. O sae jọ owhẹ oma wọhọ Job ọnọ ọ ta kẹ Ọghẹnẹ nọ: “O, eme who gbe si omẹ no obọ Ẹriwi hi, re who si omẹ no bẹsenọ ofu ra o re hrẹ no re who fi oke họ kẹ omẹ, re whọ kareghẹhọ omẹ!”—Job 14:13.

Ẹvẹ whọ sai ro no ọkora otiọye na? Dede nọ o rẹ sae jọ bẹbẹ gaga, o gwọlọ nọ whọ rẹ kpairoro vrẹ ebẹbẹ na ẹsejọ. Wọhọ oriruo, whọ rẹ sai roro kpahe enọ nọ Jihova ọ nọ Job odibo ẹrọwọ riẹ: “Diẹse whọ jọ okenọ me fi otọhotọ akpọ na họ? Ta kẹ omẹ, otẹrọnọ who re vuhu eware muẹ? Ono o dhesẹ umuo riẹ [hayo ono họ ọnọ ọ rehọ ufi mae?]” (Job 38:4, 5) Ma te bi roro kpahe oware nọ enọ nana i dhesẹ, ma re ti vuhu ogaga gbe areghẹ okpehru Jihova mu. O wo uvi ẹjiroro nọ ọ gbẹ rọ kẹ uyerakpọ nana uvẹ.

“Edada Eva Oma”

Odibo Jihova ọfa jọ nọ o wo ẹrọwọ ọ lẹ se Jihova re o si “edada” riẹ no, ẹbẹbẹ nọ o je siotọ. Isiasa Pọl ukọ na ọ lẹ se Ọghẹnẹ re o siwi iei no uye nana. Oghẹrẹ ẹbẹbẹ nọ o jọ kpobi kẹhẹ, wọhọ unwe nọ u bi duwu ohwo, o rẹ sai mi Pọl evawere nọ ọ jẹ rọ gọ Jihova. Pọl o dhesẹ i rie wọhọ ẹsenọ a be tehe iẹe ẹsikpobi. Rekọ uyo nọ Jihova ọ kẹ riẹ họ: “Aruoriwo mẹ o te kẹ owhẹ, keme eva okuako ogaga mẹ o jẹ gbunu.” Jihova o si edada yena no Pọl oma ha. O gwọlọ nọ Pọl o re thihakọ riẹ, ọ ta nọ: “Nọ omẹ rẹ kuako, kpakiyọ ẹsiẹe mẹ gae.” (2 Kọr. 12:7-10) Eme họ otọ ẹme riẹ na?

Ẹbẹbẹ Pọl o rehọ edhere igbunu kuhọ họ. Ghele na, o ru ikpeware evaọ egagọ Jihova. Pọl ọ rẹroso Jihova, yọ ọ jẹ hae lẹ sei ẹsikpobi re o fi obọ họ kẹe. (Fil. 4:6, 7) Evaọ ubrobọ ekuhọ uzuazọ riẹ evaọ otọakpọ na Pọl ọ ta nọ: “Mẹ họre uvi ohọre na no, mẹ dhẹ ogbohrẹ na no, mẹ yọrọ orọwọ na no.”—2 Tim. 4:7.

Jihova ọ be rọ ahwo-akpọ nọ e gba ha ru oreva riẹ gba dede nọ a wo ebẹbẹ yọ eware e rẹ thọ ae obọ, onana o be wha ujiro se Ọghẹnẹ. Ọ be kẹ ae areghẹ gbe ithubro re a sai thihakọ ebẹbẹ rai, re a sai wo oghọghọ evaọ iruo riẹ. Ẹhẹ, ọ rẹ sae rehọ ahwo-akpọ nọ e gba ha ru iruo ilogbo ghelọ ethobọ rai.

Pọl o dhesẹ oware nọ Ọghẹnẹ o gbe si edada riẹ no ho, ọ ta nọ: “Re mẹ se oma ba eruo oruoro.” (2 Kọr. 12:7) “Edada” Pọl e kareghẹhọ iẹe oria nọ ọ rẹ sai ru ba, i te je fi obọ họ kẹe wo omaurokpotọ. Onana o rọwokugbe ẹme nọ Jesu ọ ta inọ: “Ohwo nọ o re ru oma riẹ ruaro, a re hrẹi kpotọ, ohwo nọ ọ rọ oma kpotọ a re ru ei rua.” (Mat. 23:12) Ebẹbẹ i re wuhrẹ idibo Jihova omaurokpotọ, je fi obọ họ kẹ ae riẹ nnọ re a sai kru ẹrọwọ rai te urere a rẹ rẹroso Jihova. Fikiere, wọhọ Pọl ukọ na, a rẹ sae “rọ Ọnowo na seha.”—1 Kọr. 1:31.

Ebẹbẹ nọ I Dhere

Ahwo jọ a rẹ sai wo ebẹbẹ jọ nọ ae omarai a re vuhumu hu hayo a rẹ kake rọwo ho. Wọhọ oriruo, ohwo ọ sai fi eva họ oma riẹ hrọ, be rẹroso eyero riẹ. (1 Kọr. 10:12) Ẹbẹbẹ jọ nọ ahwo-akpọ sebaẹgba a re wo gaga họ a rẹ gwọlọ re a riẹ ae odẹ.

Joab ọnọ ọ jọ oletu ẹmo Devidi Ovie na, ọ jọ ọgba, ohwo nọ o wo udu, gbe ọnọ ọ rẹ jowọ vẹrẹ re o ku ebẹbẹ họ. Rekọ, Joab o je ru eware iyoma gaga, enọ i dhesẹ nọ o wo ẹzi omorro, gbe isiuru ọkwa. O kpe iletu ẹmo ivẹ kufiẹ gheghe. Orọ ọsosuọ, orukele o wọ riẹ kpe Abna. Uwhremu na, ọ tẹ rọ eviẹhọ ru wọhọ ẹsenọ o bi yere Amasa ọmọ-oniọvo-oni riẹ, ọ tẹ rehọ obọze riẹ kru etuagba Amasa wọhọ ẹsenọ ọ gwọlọ viọlọ iẹe unu, kẹsena ọ tẹ rọ ọgbọdọ nọ ọ rrọ ẹkpẹlobọ riẹ duwu iei lafi. (2 Sam. 17:25; 20:8-10) Fikinọ a rehọ Amasa ro nwene Joab wọhọ oletu ẹmo, Joab o te kpei, bi roro nọ ẹsejọhọ onana u ti ru nọ a ti ro zihe iei ze ọkwa oletu na. Whọ rẹ sae ruẹ nnọ Joab ọ sai su oma riẹ hẹ, o si iroro uvouthei nọ o wo kẹ ọkwa no udu riẹ hẹ. O dhesẹ evegaga ababọ udu riẹ nọ u bru kpei. Nọ Devidi Ovie na ọ kẹle uwhu no, ọ tẹ kpokpa họ Solomọn ọmọzae riẹ obọ inọ jọ ọ ruẹ nọ Joab ọ rehọ osa umuomu riẹ.—1 Iv. 2:5, 6, 29-35.

Ma rẹ daoma gaga re isiuru ethọthọ e siọ omai ba esuthọ; ma rẹ sai fi ekpehre uruemu kparobọ. Rekọ o gwọlọ nọ ma rẹ kaki vuhu abọ nọ ma jo yoma, ma vẹ jẹ rọwo inọ ma wo ẹbẹbẹ evaọ abọ yena. Kẹsena ma vẹ daoma re ma fi ebẹbẹ itieye na kparobọ. Ma rẹ lẹ se Jihova, yare iẹe re o fi obọ họ k’omai fi ebẹbẹ itieye na kparobọ, ma re wuhrẹ Ẹme riẹ Ebaibol na, jẹ gwọlọ idhere nọ ma rẹ rọ whaha iroro iyoma. (Hib. 4:12) O rẹ sae gwọlọ nnọ ma hae daoma whaha ethobọ mai kẹse kẹse, jọ oma o lọhọ omai hi. O te gwọlọ omodawọ utiona mi omai bẹsenọ ma rẹ gba no. Pọl o muẹrohọ onana evaọ oma riẹ, o kere nọ: “Onọ me roro eruo me ru oye he, rekọ onọ me mukpahe oye me ru.” Rekọ, wọhọ epanọ whọ riẹ, Pọl o fi oma họ otọ kẹ ethobọ riẹ hẹ, wọhọ ẹsenọ ọ rẹ sai ru oware ovo kpahe ethobọ na ha. Ukpoye, ọ gbẹ jẹ daoma re o fi ẹbẹbẹ riẹ na kparobọ, yọ ọ rẹroso Ọghẹnẹ re ọ rọ ẹkwoma Jesu Kristi fi obọ họ kẹe. (Rom 7:15-25) Pọl ọ jọ oria ofa ta nọ: “Mẹ rẹ nyẹ-oma mẹ, mẹ vẹ ta hiẹ obọ, [ogbẹrọ] ere he, mẹ nọ mẹ vuẹ amọfa no na mẹ vẹ te jọ ọnọ a rẹ sia.”—1 Kọr. 9:27.

Ohwo-akpọ ọ rẹ gwọlọ gu unoma kẹ oware kpobi nọ o ru. Ma rẹ sae fi onana kparobọ ẹkwoma eriwo Jihova nọ ma rẹ daoma wo, ma ve ru lele ohrẹ nọ Pọl ọ kẹ Ileleikristi na inọ: “Mu kpahe oware nọ uyoma; wha dhẹ gbalọ oware uwoma.” (Rom 12:9) Re ma sai fi ewhrehe mai kparobọ, u fo nọ ma rẹ jọ ahwo oruọzewọ, wo ọtamuo ọgaga, jẹ ta họ oma mai obọ. Devidi ọ yare Jihova nọ: Ru “udu mẹ gbe iroro mẹ” fo. (Ol. 26:2) Ọ riẹ nnọ Ọghẹnẹ ọ rẹ sae riẹ iroro ididi obeva mai, jẹ sai fi obọ k’omai okenọ ma tẹ gwọlọ obufihọ. Ma te bi ru lele ọkpọvio nọ Jihova ọ be rọ ẹkwoma Ebaibol na gbe ẹzi ọfuafo riẹ kẹ omai, ma te daoma fi iruthọ mai kparobọ.

Ahwo jọ a rẹ sai wo idhọvẹ kpahe ebẹbẹ nọ a roro nọ a sae rọ ẹgba obọ rai ọvo fi kparobọ họ. Ekpako ukoko a rẹ sae rọ uyoyou fi obọ họ jẹ kẹ uduotahawọ. (Aiz. 32:1, 2) Rekọ o rrọ oware areghẹ re ma whaha irẹro ifue nọ e kẹle otọ họ. Ebẹbẹ jọ e riẹ nọ a rẹ sae jọ uyerakpọ nana kuhọ riẹriẹriẹ hẹ. Ghele na, ibuobu a wuhrẹ epanọ a re ro thihakọ no, yọ onana u bi fi obọ họ kẹ ai yeri uzuazọ evawere.

Imuẹro Obufihọ Jihova

Oghẹrẹ ẹbẹbẹ kpobi nọ ma rẹriẹ ovao ku kẹhẹ evaọ oke ogaga nana, o rẹ sai mu omai ẹro inọ Jihova o ti fi obọ họ k’omai. Ebaibol e tuduhọ omai awọ inọ: “Wha hrẹ oma rai kpotọ họ obọ otọ ogaga Ọghẹnẹ, re nọ uje te ezi ọvẹ kpare owhai kpehru. Fi iroro ejẹ ra kpobi kpahe iẹ keme ọye ọ be sẹro ra.”—1 Pita 5:6, 7.

Okenọ Kathy, ọnọ o be jọ Ebẹtẹle ru iruo anwọ ikpe ibuobu ọ ruẹ nọ ẹyao nọ a re se Alzheimer (ẹyao nọ o re mi ohwo iroro) o kru ọzae riẹ, o roro nọ ebẹbẹ nọ ẹyao nana ọ te wha ze e te rro vi iei oma. Ẹyao na ọ ga te epanọ o rọ gwọlọ nnọ ọ rẹ lẹ se Jihova kẹ ereghẹ gbe ẹgba kẹdẹ kẹdẹ. Nọ ẹyao na o muhọ ẹga, inievo-emezae nọ e rrọ yoyou a te mu họ ewuhrẹ kpahe epanọ a rẹ sae rọ rẹrote ohwo nọ ọ be mọ ẹyao na, evaọ oke ovona yọ inievo-emetẹ a be nyae sasa ae oma. Inievo Ileleikristi nana e jọ abọjọ obufihọ nọ Jihova ọ kẹ, yọ Kathy ọ sae rẹrote ọzae riẹ oware wọhọ ikpe 11 nọ ọ mọ re o te ti whu na. Ọ ta nọ: “Avọ irui oviẹ, mẹ jẹ hai yere Jihova gaga rọkẹ obufihọ riẹ kpobi; onana u fi obọ họ kẹ omẹ thihakọ. Me je roro nọ ohwo nọ oma riẹ o ga tere he, ọ sae gbẹ wọ owha-iruo ẹruorote otiọye na ha!”

Obufihọ re Ma Fi Ebẹbẹ nọ I Dhere Kparobọ

Nọ ohwo o te bi rri oma riẹ inọ o fioka ha, ọ rẹ sai roro nnọ Jihova ọ te gaviezọ kẹ olẹ riẹ hẹ. Evaọ oke utiọye na, u re fi obọ họ re who roro kpahe ẹme nọ Devidi ọ ta evaọ okenọ uzioraha riẹ kugbe Batshẹba o dae te ẹzi. Ọ ta nọ: “Ẹzi uweri gbe eva-efuafo whẹ Ọghẹnẹ ọ rẹ jẹfiẹ hẹ.” (Ol. 51:17) Devidi o kurẹriẹ no eva ze, ọ tẹ jẹ riẹ nọ Ọghẹnẹ o ti yo olẹ riẹ keme o wo ohrọ. Jesu o dhesẹ ọkpọ iroro ọdawẹ Jihova. Matiu omọvo enọ i kere ebe Usiuwoma na o dhesẹ nọ ẹme nọ Aizaya ọ ta ọ jọ oma Jesu rugba inọ: “O reti wiri ukpoko nọ u wiri rẹrẹ hẹ, hayo furie uwiki-ukpẹ nọ u bi kuye iwiri hi.” (Mat. 12:20; Aiz. 42:3) Okenọ Jesu ọ jọ otọakpọ, o dhesẹ ọdawẹ kẹ iyogbere gbe enọ a kienyẹ. Wọhọ odẹme, o furie umutho uzuazọ nọ u kiọkọ oma ahwo nọ o wọhọ uwiki-ukpẹ nọ u muhọ efu no ho. Ukpoye, ọ rọ uyoyou fi obọ họ kẹ enọ e jẹ ruẹ-uye re a wariẹ reawere uzuazọ. Ere Jesu ọ jọ evaọ okenọ ọ jọ otọakpọ. Kọ whọ rọwo inọ Jesu ọ gbẹ rrọ epọvo na, jegbe nọ ọ rẹ sai weri kẹ oyẹlẹ mai? Muẹrohọ inọ obe Ahwo Hibru 4:15 u dhesẹ nọ Ọ rẹ sai ‘weri kẹ oyẹlẹ mai.’

Okenọ Pọl o je kere kpahe “edada nọ e rrọ eva oma” riẹ, ọ ta nnọ ogaga Kristi o jọ wọhọ “uwou-udhu” rọ kẹe. (2 Kọr. 12:7-9, NW) Ọ ruẹ inọ Ọghẹnẹ ọ be rọ ẹkwoma Kristi sẹro riẹ, nwane wọhọ epanọ uwou-udhu u re ru nọ uvo, oso, gbe ofou i gbe ro te ohwo oma ga hrọ họ na. Wọhọ Pọl, ma re fi oma họ otọ kẹ ethobọ gbe ebẹbẹ mai hi. Re usu mai kugbe Ọghẹnẹ o jọ gaga ẹsikpobi, ma rẹ daoma wo erere no ọruẹrẹfihotọ kpobi nọ Jihova ọ be rọ ẹkwoma abọ ukoko riẹ nọ ọ rọ otọakpọ ru ze. Ma re ru oware kpobi nọ ẹgba mai o te, ma vẹ rẹroso Jihova je fi eva mai kpobi họ iẹe inọ o ti fi obọ họ k’omai. Nọ ma jẹ te ruẹ epanọ ogaga Ọghẹnẹ u re ro fi obọ họ k’omai fi oyẹlẹ mai kparobọ no, ma vẹ te raro kele Pọl ta nọ: “Nọ omẹ rẹ kuako, kpakiyọ ẹsiẹe mẹ gae.”—2 Kọr. 12:10.

[Uwoho nọ e rrọ ẹwẹ-obe avọ 3]

Pọl ọ jẹ lẹ se Jihova kẹse kẹse re o fi obọ họ kẹe ru iruo odibọgba riẹ ziezi

[Uwoho nọ e rrọ ẹwẹ-obe avọ 5]

Devidi Ovie na ọ rehọ Joab mu oletu ẹmo riẹ

[Uwoho nọ e rrọ ẹwẹ-obe avọ 5]

Joab o kpe Amasa

[Uwoho nọ e rrọ ẹwẹ-obe avọ 6]

Ekpako na a rẹ rọ uyoyou k’omai ohrẹ Ikereakere nọ u re fi obọ họ k’omai thihakọ ebẹbẹ