Fikieme Who Je Kru Ẹgbakiete Ra?

“Bruoziẹ mẹ, O ỌNOWO, wọhọ epaọ ẹrẹreokie mẹ.”—Ol. 7:8.

1, 2. Iyero jọ vẹ a jọ gwọlọ ẹgbakiete mi Oleleikristi?

REHỌ iriruo esa nana: Ibe emọ-isukulu ọmọzae jọ a bi sei ẹkoko. A be gwọlọ ru ei eva dha, ẹsejọhọ re ọ la ohwo jọ eka hayo re ọ họre ohwo jọ. Kọ ọ te ginẹ la ohwo jọ eka hayo họre ohwo jọ, manikọ o ti kru oma riẹ re ọ nya se ai ba? Ọzae uwou-orọo jọ ọvo ọ rrọ uwou be gwọlọ oware jọ evaọ Itanẹte. Ẹkpẹti jọ ọ tẹ roma via nọ o bi dhesẹ oria nọ a rẹ sai rovie kpohọ nọ a rẹ jọ ruẹ ahwo nọ a ba fihọ. Kọ o ti rovie kpohọ oria yena, manikọ ọ te daoma whaha iẹe? Aye jọ nọ ọ rrọ Oleleikristi o bi lele inievo-emetẹ efa gbiku, iku na i te ti zihe ruọ iguẹgu, be ta ẹme oyoma kpahe oniọvo-ọmọtẹ jọ nọ ọ rrọ ukoko na. Kọ o ti kuomagbe ai evaọ iguẹgu na, manikọ ọ te daoma nwene ẹme na?

² Dede nọ iriruo esa nana i wo ohẹriẹ, oware ovo jọ o riẹ nọ o lẹliẹ e rai thoma. Iriruo nana kpobi e gwọlọ inọ ma rẹ daoma kru ẹgbakiete wọhọ Oleleikristi. Kọ whọ be hai roro kpahe ẹgbakiete ra evaọ okenọ whọ tẹ rẹriẹ ovao ku ẹbẹbẹ, okenọ whọ tẹ gwọlọ ru oware jọ, gbe okenọ who te bi le itee nọ who fihọ evaọ uzuazọ? Kẹdẹ kẹdẹ, ahwo a bi roro kpahe ẹgọ rai, epanọ a re ro wo omokpokpọ, epanọ a rẹ rọ rẹrote uviuwou rai, epanọ a re ro ru egbẹnyusu rai eva were, gbe epanọ a re ro wo ọzae hayo aye. Ma rẹ sae raha oke gaga roro kpahe eware itieye na. Rekọ eme o mae rrọ Jihova oja nọ ọ be kiẹ udu mai riwi na? (Ol. 139:23, 24) Ẹgbakiete mai.

3. Didi oghẹrẹ uvẹ Jihova ọ k’omai, kọ eme ma te ta kpahe evaọ uzoẹme nana?

³ Jihova, Ọnọ ọ rẹ kẹ “kokẹ uwoma kokẹ uwoma avọ okẹ nọ o gba kiete kpobi” na ọ kẹ omomọvo mai oghẹrẹ ekẹ sa-sa. (Jem. 1:17) Ma rẹ kẹe uyere inọ ọ k’omai ugboma, iroro, omokpokpọ, gbe oghoghẹrẹ ona. (1 Kọr. 4:7) Rekọ, Jihova ọ rẹ gba omai họ họ re ma wo ẹgbakiete. Ọ k’omai uvẹ re ma salọ sọ ma re wo ẹgbakiete. (Izie. 30:19) Fikiere, u fo re ma t’ẹme te oware nọ ẹgbakiete o rrọ. Ma te jẹ ta kpahe eware esa nọ ẹgbakiete u ro wuzou.

Eme Họ Ẹgbakiete?

4. Ono a rẹ sai dhesẹ inọ ọ gba kiete, kọ eme ma rẹ sai wuhrẹ no uzi Jihova ze kpahe idhe nọ a rẹ rehọ erao dhe?

⁴ Ahwo buobu a riẹ oware nọ ẹgbakiete o rrọ ziezi hi. Oruọzewọ avọ ẹgbakiete i thoma. Rekọ oruọzewọ yọ abọ jọ gheghe ọrọ ẹgbakiete. Wọhọ epanọ a rehọ e riẹ t’ẹme evaọ Ebaibol na, ohwo nọ ọ kare epe a rẹ sai dhesẹ inọ ọ gba kiete. Otofa eme ọ Hibru nọ i tho “ẹgbakiete” họ oware nọ o rrọ gbagba, onọ o gbunu gbọka, hayo onọ o kare epe. A rẹ rehọ ẹme nana jọ evaọ ẹvẹrẹ Hibru ro dhesẹ oware nọ a re ro dheidhe kẹ Jihova. Arao nọ a ro dheidhe nọ Ọghẹnẹ ọ rẹ jẹrehọ họ ọnọ ọ kare epe. (Se Iruo-Izerẹ 22:19, 20.) Jihova o brukpe ahwo nọ e la uzi riẹ na vrẹ, enọ i keke aro fihọ jẹ rehọ erao nọ e ko, enọ e jẹ mọ, hayo enọ i tuaro dheidhe.—Mal. 1:6-8.

5, 6. (a) Iriruo vẹ i dhesẹ inọ oware nọ o rrọ gbagba o rẹ were omai? (b) Kọ ẹgbakiete o gwọlọ inọ ahwo-akpọ a rẹ jọ gbagba? Ru ei vẹ.

⁵ Re ohwo o wo isiuru kpahe oware nọ o rrọ ososo, onọ o gbunu gbọka, o rrọ oware okpokpọ họ. Joma rehọ oriruo ọmọ-isukulu nọ ọ be gwọlọ obe jọ dẹ anwẹdẹ, nọ ọ rehọ udugaga ruẹ obe na evaọ uwou-eki jọ, ọ tẹ ruẹ inọ ewẹ-ebe nọ e t’ẹme te oware nọ ọ mae gwọlọ na e rrọ obe na ha. O rẹ sae kẹe uye, o ve fi obe na h’otọ. Hayo roro kpahe oriruo aye nọ o kpobọ eki nyae dẹ eka. Eka na e were riẹ gaga fikinọ e kpokpọ ziezi. Kọ oghẹrẹ eka vẹ ọ be te salọ? Enọ e gba ziezi. Epọvo na re, Ọghẹnẹ ọ be gwọlọ ahwo nọ e gba kiete.—2 Irv. 16:9.

⁶ Rekọ o rẹ sai gb’owhẹ unu sọ ẹgbakiete o gwọlọ inọ ohwo ọ jọ gbagba. Fiki uzioraha gbe sebaẹgba, ma rẹ sae rri oma mai wọhọ obe nọ ewẹ-ebe jọ i no eva riẹ no hayo ọka nọ ọ gba ha. Kọ whọ be hai rri oma ra ere ẹsejọ? Jọ u mu owhẹ ẹro inọ orọnikọ Jihova o bi rẹro nọ ma ti ru eware kpobi gbagba wọhọ ọye omariẹ hẹ. O re rẹro oware nọ ma rẹ sai ru hu mi omai hi.a (Ol. 103:14; Jem. 3:2) Dede na, ọ gwọlọ inọ ma re kru ẹgbakiete. Kọ ẹgbagba u wo ohẹriẹ no ẹgbakiete? Ee. Wọhọ oriruo: Ọmọzae o you ọmọtẹ nọ ọ be te rehọ. Ọ rẹ sai roro ho inọ ọmọtẹ na yọ ohwo gbagba. Ghele na, o rẹ jọ oware areghẹ re o rẹro inọ ọmọtẹ na ọ te rehọ eva riẹ kpobi you rie. Evaọ edhere ọvona, Jihova yọ “Ọghẹnẹ ọre-ihri,” koyehọ ọ gwọlọ inọ ma rọ eva mai kpobi gọe. (Ọny. 20:5) Orọnikọ o rẹro ẹgbagba mi omai hi, rekọ ọ gwọlọ re ma rehọ eva mai kpobi you rie, jegbe nnọ ọye ọvo ma rẹ gọ.

7, 8. (a) Didi oriruo orọ ẹgbakiete Jesu o fihọ otọ? (b) Eme ẹgbakiete nọ a t’ẹme te evaọ Ikereakere na u gine dhesẹ?

⁷ Ma rẹ sae kareghẹhọ uyo nọ Jesu ọ kẹ okenọ a nọe kpahe uzi nọ o mae rro kpaobọ. (Se Mak 12:28-30.) Orọnikọ Jesu ọ kẹ uyo na ọvo ho; o ru lele uyo nọ ọ kẹ. O fi oriruo nọ o mai woma h’otọ orọ epanọ a rẹ rọ rehọ eva kpobi, ẹzi kpobi, iroro kpobi, gbe ogaga kpobi ro you Jihova. O dhesẹ inọ orọnikọ ẹmeunu ọvo a re ro dhesẹ ẹgbakiete he, rekọ iruo nọ i re no eva efuafo ze. Re ma kru ẹgbakiete o gwọlọ inọ ma rẹ rọ kpahe ithihi Jesu.—1 Pita 2:21.

⁸ Oware nọ ẹgbakiete nọ a t’ẹme te evaọ Ikereakere na u gine dhesẹ ona: re ohwo ọ rehọ eva riẹ kpobi gọ Jihova Ọghẹnẹ, re o je ru oreva riẹ gbe ẹjiroro riẹ. Re ma kru ẹgbakiete o gwọlọ inọ evaọ uzuazọ mai kpobi, ma rẹ gwọlọ epanọ ma re ro ru eva were Jihova Ọghẹnẹ. U fo inọ eware nọ e mae riẹe oja ma rẹ rọ karo. Joma ta kpahe eware esa nọ onana o rọ roja tere.

1. Ẹgbakiete Mai gbe Avro Esuo-Ehrugbakpọ

9. Ẹvẹ ẹgbakiete nọ ma re kru u ro w’obọ kpahe avro esuo ehrugbakpọ na?

⁹ Esuo-okpehru Jihova o rehọ oma hwa ẹgbakiete mai hi. Esuo riẹ o kiete, o rrọ bẹdẹ, o te je no odhiwu te akpọ na kpobi. Enẹ ọvo esuo Jihova ọ te jọ makọ ẹme nọ ohwo jọ kpobi ọ ta hayo oware nọ o ru. Rekọ, a rọ unu raha esuo Ọghẹnẹ gaga no evaọ obọ odhiwu gbe otọakpọ. Fikiere o gwọlọ inọ a re ru emama kpobi riẹ nnọ esuo riẹ o kiete, o rrọ wowoma, jẹ rrọ yoyou. O rẹ were omai Isẹri Jihova re ma t’ẹme kpahe esuo ehrugbakpọ Ọghẹnẹ kẹ ohwo kpobi nọ ọ gwọlọ gaviezọ. Rekọ ẹvẹ ma sai ro dhesẹ abọ nọ ma rrọ evaọ ẹme avro na? Ẹvẹ ma re ro dhesẹ inọ Jihova họ ọnọ ma salọ wọhọ Osu mai? Ma re kru ẹgbakiete mai.

10. Eme Setan ọ ta kpahe ẹgbakiete ahwo-akpọ, kọ eme who ti ru kpahe onana?

¹⁰ Roro kpahe oghẹrẹ nọ ẹgbakiete ra u ro w’obọ kpahe avro esuo ehrugbakpọ na. Setan o seha nnọ uvumọ ohwo-akpọ ọ rẹ sae salọ esuo Ọghẹnẹ hẹ, inọ uvumọ ohwo ọ te rehọ eva efuafo gọ Jihova ha. Ẹdhọ ọ jọ iraro ikọ-odhiwu gbidi gbidi ta kẹ Jihova nọ: “Ohọroma [avọ] ohọroma! Eware kpobi nọ ohwo o wo o re ro nwene uzuazọ riẹ.” (Job 2:4) Muẹrohọ inọ orọnikọ Job ọzae okiẹrẹe na ọvo Setan ọ ta eme nana kpahe he, rekọ inọ ere ahwo-akpọ kpobi a rrọ. Oye jabọ nọ Ebaibol i ro dhesẹ Setan wọhọ “oguiguẹgu imoni mai.” (Evia. 12:10) O seha kẹ Jihova inọ Ileleikristi—te owhẹ omara te—a ti kru ẹrọwọ rai hi. Setan ọ ta inọ who ti ru oma vo Jihova re whọ ruẹse siwi uzuazọ ra. Eme who re ru otẹrọnọ Setan ọ ta eme itieye na kpahe owhẹ? Kọ whọ gbẹ te gwọlọ uvẹ nọ who re ro dhesẹ Setan fihọ ọtọrue? Whọ rẹ sai dhesẹ iẹe fihọ ọtọrue otẹrọnọ who kru ẹgbakiete ra.

11, 12. (a) Iriruo vẹ i dhesẹ inọ iroro nọ ma be jẹ kẹdẹ kẹdẹ i w’obọ kpahe ẹgbakiete mai? (b) Fikieme ẹgbakiete nọ ma re kru o rọ rrọ uvẹ-ọghọ?

¹¹ Ẹme ẹgbakiete ra o wha riẹ ze nọ uruemu gbe iroro nọ whọ rẹ jẹ kẹdẹ kẹdẹ i ro wuzou gaga. Wariẹ roro kpahe iriruo esa nọ ma ro mu uzoẹme nana họ na. Eme ahwo nana a re ru ro dhesẹ inọ a bi kru ẹgbakiete rai? Iroro ọmọzae nọ a je se ẹkoko na e sae ta kẹe inọ o ru ibe emọ-isukulu riẹ na kele, rekọ ọ tẹ kareghẹhọ uthubro nana: “Iyoyou, whai ọvo a kioja kẹ oma rai hi, rekọ wha vueiwa kẹ ofu Ọghẹnẹ; keme a kere nọ, ‘Orukele na ọmẹ, me re ru kele, ere Ọnowo ọ tare.’” (Rom 12:19) Ọ tẹ nya se ai ba. Uvẹ u rovie fihọ kẹ ọzae nọ ọ be jọ Itanẹte gwọlọ oware jọ na re o rri ifoto ẹbẹba, rekọ ọ tẹ kareghẹhọ eme ọ Job nana: “Me duwu aro mẹ iyeri no, kẹvẹ ọmọtẹ o gbe ro si omẹ uru?” (Job 31:1) Epọvo na re, ọzae na o rovie kpohọ oria nọ ọ rẹ jọ ruẹ ifoto ẹbẹba na ha, o rri rai wọhọ enua. Aye nọ o bi lele eyae efa gbiku na o kuomagbe eme iyoma nọ a jẹ ta kpahe ohwo jọ họ keme ọ kareghẹhọ uthubro nana: “Wha jo mai kohwo kohwo o ru ọrivẹ riẹ evawere kẹ ewoma riẹ re o ru ei ro.” (Rom 15:2) Ọ riẹ inọ iguẹgu itieye e rrọ eme ọbọga ha. Ọ riẹ inọ eme itieye na e te raha odẹ oniọvo riẹ; i ve je ru eva dha Ọsẹ obọ odhiwu riẹ. Fikiere o dhunu họ iguẹgu na ha, o te fi ẹme ọfa h’otọ.

¹² Evaọ iriruo esa nana, o wọhọ ẹsenọ omomọvo Ileleikristi esa nana a be ta nọ: ‘Jihova họ Osu mẹ. Mẹ rẹ daoma re me ru oware nọ o rẹ were iẹe.’ Kọ ere who bi rri eware nọ who bi ru gbe iroro nọ whọ be jẹ? Who te bi ru ere, kiyọ who bi ru lele eme omosasọ nọ e rrọ Itẹ 27:11 na: “Ọmọzae mẹ, wo areghẹ, re who ru omẹ eva were, re mẹ sae kẹ ọnọ ọ poviẹ omẹ uyo.” Ọghọ riẹ o rro kẹhẹ inọ ma rẹ sai ru Ọghẹnẹ eva were. Kọ onana o gbẹ lẹliẹ omai dao utho ẹgba mai kpobi re ma kru ẹgbakiete mai?

2. Ẹgbakiete Mai Jihova O Ti ro Bruoziẹ Mai

13. Ẹvẹ eme ọ Job gbe Devidi i ro dhesẹ inọ ẹgbakiete mai Jihova o re ro bruoziẹ mai?

¹³ Ma ruẹ no inọ ẹgbakiete u re fi obọ họ k’omai dhesẹ inọ abọ Jihova ma rrọ. Fikiere oye Jihova o ti rri ro bruoziẹ mai. Job ọ riẹ onana ziezi. (Se Job 31:6.) Job ọ riẹ inọ Ọghẹnẹ ọ be rehọ “owawọ nọ ogbakiete” rọ wawo ahwo-akpọ kpobi, ọ be rehọ utee ẹdhoguo okiẹrẹe riẹ rọ riẹ sọ ma bi kru ẹgbakiete mai. Devidi omariẹ ọ ta nọ: “ỌNOWO nọ ọ rọ obruoziẹ ahwo kpobi; bruoziẹ mẹ, O ỌNOWO, wọhọ epaọ ẹrẹreokie mẹ, jegbe epanọ mẹ fo u te. . . . Whẹ họ Ọghẹnẹ okiẹrẹe nọ ọ rẹ kiẹ eva gbe iroro ahwo kpobi.” (Ol. 7:8, 9) Ma riẹ inọ Ọghẹnẹ ọ rẹ sae riẹ oghẹrẹ ohwo nọ ma rrọ, o wọhọ ẹsenọ ọ rẹ kiẹ “eva gbe iroro” mai riwi. Rekọ u fo re ma kareghẹhọ oware nọ ọ be kiẹ gwọlọ. Wọhọ epanọ Devidi ọ ta na, Jihova o re bruoziẹ mai wọhọ epaọ ẹrẹreokie mai hayo epanọ ma fo te.

14. Fikieme ma gbẹ rọ nwani ku ei họ họ inọ ma rẹ sai kru ẹgbakiete he fiki uzioraha nọ ma reuku riẹ?

¹⁴ Jihova Ọghẹnẹ ọ be kiẹ idu ahwo-akpọ nọ i bu te ima-idu buobu riwi nẹnẹ. (1 Irv. 28:9) Bro ahwo ọ be ruẹ nnọ e be rọ ẹgbakiete ru oreva riẹ? A tulo ho! Rekọ ma rẹ nwani ku ei họ họ inọ ma yoma vi epanọ ma sai ro kru ẹgbakiete. Evaọ abọdekọ riẹ, wọhọ Devidi avọ Job, ma rẹ sai wo imuẹro inọ Jihova ọ te ruẹ nnọ ma bi kru ẹgbakiete mai dede nọ ma gba ha. Kareghẹhọ inọ orọnọ fiki ẹgbagba ohwo ọ sai ro kru ẹgbakiete he. Imasa ọvo nọ e rrọ gbagba e rria otọakpọ na no, rekọ ivẹ evaọ usu rai, Adamu avọ Ivi, a sai kru ẹgbakiete he. Rekọ ima ahwo buobu nọ e gba ha a kru ẹgbakiete rai no. Whọ rẹ sai ru epọvo na re.

3. Ababọ Ẹgbakiete Ma re Wo Ẹruore He

15. Ẹvẹ Devidi o ro dhesẹ inọ re ma sai wo ẹruore ma re kru ẹgbakiete mai?

¹⁵ Ababọ ẹgbakiete ma re wo ẹruore he keme oye Jihova o ti rri ro bruoziẹ mai. Devidi ọ riẹ inọ ere o ginẹ rrọ. (Se Olezi 41:12.) O jariẹ oja re o wo aruoriwo Ọghẹnẹ bẹdẹ bẹdẹ. Wọhọ epanọ o rrọ kẹ uvi Ileleikristi nẹnẹ, Devidi o wo ẹruore uzuazọ ebẹdẹ bẹdẹ, yọ ọ gwọlọ inọ nọ oke o be nyaharo na, usu riẹ kugbe Jihova Ọghẹnẹ u re dhe ẹgẹga. Devidi ọ riẹ inọ ẹgbakiete riẹ o roja otẹrọnọ ọ rẹ ruẹ orugba ẹruore yena. Epọvo na re, Jihova ọ be thọ omai uke, bi wuhrẹ omai, sẹro mai, jẹ ghale omai nọ ma bi kru ẹgbakiete na.

16, 17. (a) Fikieme whọ rọ gbaemu inọ who re kru ẹgbakiete ra ẹsikpobi? (b) Didi enọ ma te ta kpahe evaọ uzoẹme nọ o rrọ aro na?

¹⁶ Re ma sai wo evawere nẹnẹ, ma gwọlọ ẹruore. O rẹ sae lẹliẹ omai wo evawere nọ ma re ro thihakọ evaọ oke ẹbẹbẹ. Ẹruore o rẹ jẹ thọ iroro mai. Kareghẹhọ, Ebaibol e rehọ ẹruore dhesẹ etu. (1 Tẹs. 5:8) Wọhọ epanọ etu ọ rẹ thọ uzou alakpa evaọ oke ẹmo na, ere ẹruore ọ rẹ thọ omai no iroro iyoma, iroro ababọ ẹruore nọ Setan o bi fihọ idu ahwo nẹnẹ. Uzuazọ u re w’otọ họ ma gbe wo ẹruore he. U fo inọ ma rẹ kiẹ oma mai riwi ziezi, roro gaga kpahe ẹgbakiete mai gbe ẹruore mai. Jọ o thọrọ owhẹ ẹro ho inọ who te bi kru ẹgbakiete yọ whọ be kpare esuo Jihova kpehru jẹ yọrọ emamọ ẹruore nọ who wo na. Daoma kru ẹgbakiete ra rite urere!

¹⁷ Nọ ẹgbakiete o roja tere na, u fo re ma roro kpahe enọ efa jọ. Ẹvẹ ma re ro wo ẹgbakiete? Ẹvẹ ma sae rọ yọrọ iẹe? Kọ eme ohwo o re ru otẹrọnọ o kru ẹgbakiete riẹ hẹ evaọ etoke jọ? Ma te jọ uzoẹme nọ o rrọ aro na kiyo enọ nana.

[Oruvẹ-obotọ]

Ẹvẹ Whọ te k’Uyo?

• Eme họ ẹgbakiete?

• Didi obọ ẹgbakiete o wo kugbe ẹme avro esuo-ehrugbakpọ na?

• Ẹvẹ ẹruore mai o rọ roma hwa ẹgbakiete mai?

[Iwoho nọ e rrọ ẹwẹ-obe avọ 5]

Kẹdẹ kẹdẹ ma be rẹriẹ ovao dhe eware nọ e be dawo ẹgbakiete mai