Kọ Who Ti Kru Ẹgbakiete Ra?
“Bẹsenọ me re ti whuẹ na mẹ sae ti siobọ no oruọzewọ mẹ hẹ.”—JOB 27:5.
1, 2. Iruo ebabọ vẹ i fo nọ ma re ru, kọ enọ vẹ ma te tẹme kpahe?
MA REHỌ iẹe nnọ who bi rri omaa nọ a gwọlọ rọ bọ uwou. U bi gb’owhẹ unu oghẹrẹ nọ uwou na o be te jọ. Oma u bi mu owhẹ nọ who bi roro epanọ whẹ avọ uviuwou ra a te rọ rria uwou na. Omaa uwou na gbe iroro nọ who wo kpahe iẹe na i ti fioka ha ajokpanọ whọ ginẹ bọ uwou na, kwa ruọ iẹe, jẹ rẹrote ei.
2 Epọvo na re, ma rẹ sai rri ẹgbakiete wọhọ oware nọ o te wha ewoma se omai gbe enọ ma you. Rekọ re ma roro ọvo inọ ẹgbakiete u ti fi obọ họ k’omai u re fioka ha ajokpanọ ma ginẹ daoma re ma woi jẹ yọrọ iẹe ga. Re ohwo ọ bọ uwou evaọ akpọ inẹnẹ, o gwọlọ igho buobu. (Luk 14:28, 29) Re a wo ẹgbakiete o gwọlọ oke gbe omodawọ, rekọ oyena o rrọ uvrẹvru hu. Fikiere joma tẹme kpahe enọ esa: Ẹvẹ ma sae rọ jọ ahwo nọ a wo ẹgbakiete? Ẹvẹ ma sae rọ yọrọ iẹe? Kọ eme ohwo o re ru otẹrọnọ o kru ẹgbakiete riẹ hẹ evaọ etoke jọ?
Ẹvẹ Ma Sae rọ jọ Ahwo nọ A Wo Ẹgbakiete?
3, 4. (a) Idhere vẹ Jihova o bi ro fi obọ họ kẹ omai wo ẹgbakiete? (b) Ẹvẹ ma sai ro wo ẹgbakiete wọhọ epanọ Jesu o fi oriruo riẹ hotọ?
3 Ma jọ uzoẹme nọ ma wuhrẹ no na ruẹ nnọ Jihova ọ k’omai uvẹ-ọghọ nọ ma rẹ rọ salọ sọ ma rẹ jọ ahwo ẹgbakiete. Rekọ, o rrọ oware evawere inọ o vu omai wa ha evaọ ẹme nana. O bi wuhrẹ omai epanọ ma re ro wo okwakwa-aghae nana, yọ ọ be kẹ omai ẹzi ọfuafo riẹ ziezi re ma sai fi eware nọ o bi wuhrẹ omai họ iruo. (Luk 11:13) Ọ be tubẹ thọ enọ e be daoma kru ẹgbakiete rai evaọ abọ-ẹzi dede.—Itẹ 2:7.
4 Ẹvẹ Jihova o ro wuhrẹ omai no re ma sae jọ enọ i bi kru ẹgbakiete? Edhere nọ ọ mai ro ru ere họ ẹkwoma Ọmọ riẹ, Jesu, nọ o vi ziọ otọakpọ. Jesu o yeri uzuazọ ẹmeoyo. “O hrẹ oma riẹ kpotọ ọ tẹ rọwo whu.” (Fil. 2:8) Evaọ eware nọ o ru kpobi, Jesu o yoẹme kẹ Ọsẹ obọ odhiwu riẹ, makọ evaọ okenọ ere oruo o jọ bẹbẹ gaga. Ọ lẹ se Jihova nọ: “Orọ eva mẹ hẹ, rekọ orọ eva ra, a re ruẹ.” (Luk 22:42) U fo re mai omọmọvo ọ nọ omariẹ nọ, ‘Kọ me wo ọkpọ ẹzi ẹmeoyo otiọye na?’ Ma te bi yọeme no eva ze, ma rẹ te jọ ahwo nọ i bi kru ẹgbakiete. Joma tẹme kpahe eria jọ nọ ẹmeoyo o jẹ mae rrọ oja.
5, 6. (a) Ẹvẹ Devidi o ro dhesẹ epanọ o roja te re ma kru ẹgbakiete o tẹ make rọnọ uvumọ ohwo ọ rrọ gbe omai hi? (b) Didi use-abọ Ileleikristi nẹnẹ a rẹriẹ ovao ku nọ ae ọvo a tẹ rrọ?
5 U fo re ma yoẹme kẹ Jihova nọ ma tẹ maki roro nnọ mai ọvo ma rrọ oria. Devidi ọso-ilezi na o muẹrohọ epanọ o roja te re ma kru ẹgbakiete evaọ okenọ ọye ọvo ọ jọ oria. (Se Olezi 101:2.) Fikinọ ọ jọ ovie, ahwo a jẹ hai no akotọ Devidi hi. Ababọ avro, ẹsibuobu ahwo nọ a rẹ jọ kugbei a re tube bu te idu buobu. (Wawo Olezi 26:12.) O jọ oja re o kru ẹgbakiete evaọ etoke yena keme u fo re ovie na o fi emamọ oriruo h’otọ kẹ ahwo riẹ. (Izie. 17:18, 19) Ghele na, Devidi ọ ruẹ inọ ọye ọvo ọ tẹ make rrọ—‘eva uwou riẹ’—ọ rẹ gbẹ nya evaọ ẹgbakiete. Kọ ere ma rrọ?
6 Eva Olezi 101:3, Devidi ọ ta nọ: “Me re fi oware uyoma ovo họ aro mẹ hẹ.” Uvẹ buobu o rrọ nẹnẹ nọ ma re ro fi oware uyoma họ aro mai, maero nọ mai ọvo ma tẹ rrọ oria. Evaọ ẹme nana, Itanẹte o rrọ ẹbẹbẹ kẹ ibuobu. O re lọlọhọ re ohwo o rri eware nọ i fo ho, makọ ifoto ẹbẹba. Kọ ma te bi ru ere, ma rẹ sae ta nnọ ma bi yoẹme kẹ Ọghẹnẹ nọ ọ kẹ Devidi ẹgba kere eme yena? Ifoto ẹbẹba e vọ avọ enwoma, keme e rẹ kpare ekpehre isiuru, raha obroziẹ-iroro, raha erọo, je ru enọ i bi rri rai kpobi kuẹku.—Itẹ 4:23; 2 Kọr. 7:1; 1 Tẹs. 4:3-5.
7. Oria Ebaibol vẹ u re fi obọ họ kẹ omai yọrọ ẹgbakiete nọ mai ọvo a tẹ rrọ?
7 Evaọ uzẹme odibo Jihova ọvuọvo nọ ọye ọvo ọ rrọ ọ riẹ hẹ. Avọ uyoyou, Ọsẹ mai o bi muẹrohọ omai. (Se Olezi 11:4.) O rẹ were Jihova gaga nọ ọ tẹ ruẹ nnọ who bi mugba kẹ odawọ. Who te ru ere, kiyọ who bi yo unuovẹvẹ Jesu nọ o rrọ Matiu 5:28 na. Fikiere, gbaemu inọ whọ rẹ whaha eriwo iwoho nọ i re gele owhẹ fihọ oware uyoma uruo. Whọ raha ẹgbakiete ra no ho fiki uruemu otọtọ orọ eriwo ifoto ẹbẹba hayo ese eme oworu!
8, 9. (a) Use-abọ vẹ Daniẹl avọ egbẹnyusu riẹ a rẹriẹ ovao ku? (b) Ẹvẹ emoha Ileleikristi nẹnẹ a sai ro ru eva were Jihova gbe ibe Ileleikristi rai?
8 Ma rẹ sai je kru ẹgbakiete ẹkwoma ẹme nọ ma re yo kẹ Jihova nọ ma tẹ rrọ kugbe enọ e rrọ ukoko ho. Kareghẹhọ Daniẹl avọ egbẹnyusu esa riẹ. A mu rai kpobọ Babilọn evaọ okenọ a jọ izoge. Fikinọ a jẹ rria udevie egedhọ enọ e riẹ Jihova ha hayo enọ i yo kpahe iẹe no ọvo, a jẹ gba emezae Hibru ene na họ re a re emu nọ Ọghẹnẹ o j’uzi nnọ a re he. O hae jọ lọlọhọ re emezae na a roro inọ a tẹ re emu na o te nwani yoma tere he. Whaọ, esẹgbini rai, ekpako na, gbe izerẹ na a be ruẹ oware nọ a bi ru hu. Ono ọ te riẹ? Jihova. Fikiere a dikihẹ ga je yoẹme kẹ Jihova ghelọ otunyẹ gbe oware nọ u ti noi ze.—Dan. 1:3-9.
9 Evaọ akpọ na soso, emoha Isẹri Jihova a bi ru epọvo na, bi koko izi nọ Ọghẹnẹ o jie kẹ Ileleikristi je bi mugba kẹ otunyẹ ehwa rai. Whai emaha na wha tẹ se nnọ wha rẹ lọ imu egaga ha, ru ozighi hi, la eka ha, bruẹnwae he, je ru eware iyoma efa ha, yọ wha bi yoẹme kẹ Jihova. Wha bi ru ere na, yọ wha bi kru ẹgbakiete rai. Onana o te wha erere se owhẹ, ru Jihova gbe ibe Ileleikristi ra eva were!—Ol. 110:3.
10. (a) Iroro ethọthọ vẹ kpahe ọfariẹ-ogbe o lẹliẹ izoge jọ ku ẹgbakiete rai fiẹ no? (b) Ẹvẹ ẹgbakiete u re ro fi obọ họ kẹ omai whaha ọfariẹ-ogbe?
10 Ma tẹ rrọ emezae, ma re dhesẹ ẹmeoyo okenọ ma tẹ rrọ kugbe emetẹ, yọ ere ọvo na re nọ emetẹ a tẹ rrọ kugbe emezae. Ma riẹ nọ Ebaibol e ghọ igberedha. Rekọ ma gbẹ yọroma ha, ukpenọ ma yoẹme ma ve ti mu oma họ edhehọ eware iyoma. Wọhọ oriruo, emetẹ jọ a rẹ wọ ẹba ọzae fihọ unu vi, emezae jọ a ve je dhe ẹba rai họ uvinẹ ọmọtẹ hayo rehọ abọ whrawhra ẹba ohwohwo, bi roro nnọ uruemu nana o nwani yoma tere he keme evaọ iroro rai a “du uvio” ho. Ẹsejọhọ izogẹ itieye na a riẹ hẹ, hayo a riẹ rekọ a daezọ họ, inọ oware nọ Ebaibol i se igberedha na o kẹre te iruemu nana kpobi, ekpehre uruemu nọ a sai ro si ohwo no ukoko.a Mai yoma na, a se ẹgbakiete gboja ha. Nọ ma be daoma kru ẹgbakiete mai na, ma rẹ gwọlọ oware jọ rọ foma ru eyoma ha. Ma rẹ daoma nya kẹle uzioraha ha, bi roro inọ thakpinọ ma ru oware nọ a rẹ rọ rehọ omai guẹdhọ họ. Orọnikọ fiki ẹdhọ nọ a te rọ omai gu ma rẹ rọ whaha oware uyoma ha. Ukpoye, ma re roro kpahe oware nọ o rẹ were Jihova jẹ whaha oware nọ o rẹ dhae eva. Ukpenọ ma rẹ daoma nya kẹle uzioraha, ma rẹ kẹnoma noi thethabọ je ‘si oma no egbegbe.’ (1 Kọr. 6:18) Ere ma re ro dhesẹ inọ ma ginẹ rrọ ahwo nọ i bi kru ẹgbakiete.
Ẹvẹ Ma Sae rọ Yọrọ Ẹgbakiete Mai?
11. Fikieme ẹmeoyo evaọ eware esese o rọ roja? Kẹ oriruo.
11 Re ma wo ẹgbakiete ma re yoẹme, fikiere ma rẹ ruabọhọ ẹmeoyo re ma sae yọrọ ẹgbakiete. Ma rẹ sai rri rie kakao re ma yoẹme evaọ oware ovo jọ. Rekọ ẹmeoyo otiọye na ahwo a rẹ rọ riẹ ohwo nọ o bi kru ẹgbakiete riẹ. Wọhọ oriruo: Oblọko ọvo o tẹ rrọ oria, a rẹ sai rri rie vo, rekọ nọ a tẹ ma ibuobu rai kugbe, e rẹ sai zihe ruọ emamọ uwou. Fikiere nọ ma te bi yoẹme ẹsikpobi, yọ ma be yọrọ ẹgbakiete mai.—Luk 16:10.
12. Ẹvẹ Devidi ọ rọ rrọ oriruo ohwo nọ ọ yọrọ ẹgbakiete evaọ okenọ ọ jẹ ruẹ uye?
12 Ẹgbakiete mai o rẹ mai dhesẹ oma via nọ ma te thihakọ ọbẹwẹ, olahiẹ, hayo oziẹbro-okienyẹ. Roro kpahe oriruo Devidi. Okenọ ọ jọ ọmoha, o thihakọ ukpokpoma evaọ obọ ovie nọ Jihova o ro mu. Evaọ oke yena yọ Jihova ọ siọ Sọl Ovie na no, fikiere Sọl ọ tẹ jẹ re Devidi ihri gaga, ọnọ Ọghẹnẹ ọ salọ. Ghele na, Sọl ọ gbẹ jọ ọkwa ovie na, ọ tẹ jẹ rehọ egbaẹmo Izrẹl gwọlọ Devidi. Jihova ọ kẹ Devidi uvẹ ruẹ uye te ikpe jọ. Kọ Devidi ọ dheva kẹ Ọghẹnẹ? Kọ o ku rie họ nnọ u fioka ha re o thihakọ? Ijo. Ọ rehọ adhẹẹ kẹ Sọl wọhọ ohwo nọ Ọghẹnẹ o ro mu, o kpe rie he nọ uvẹ u rovie fihọ kẹe.—1 Sam. 24:2-7.
13. Ẹvẹ ma sae rọ yọrọ ẹgbakiete nọ a te ru omai thọ?
13 Devidi yọ emamọ oriruo kẹ omai nẹnẹ. Ma bi kuomagbe amọfa nọ e gba ha wọhọ omai gọ Ọghẹnẹ, ọjọ ọ rẹ sai ru omai thọ hayo tubẹ nya thọ. U woma gaga inọ ma be rria etoke nọ ahwo Jihova kpobi a sai ro kie he evaọ oke ovona. (Aiz. 54:17) Ghele na, eme ma re ru otẹrọnọ oniọvo jọ o ru omai thọ? Ma te wo ẹgo kpahe ibe Oleleikristi mai jọ, ma rẹ sae raha ẹgbakiete mai. Ma rẹ rọ fiki uruemu amọfa dheva kẹ Ọghẹnẹ vievie he hayo kieno egagọ riẹ. (Ol. 119:165) Ma te bi thihakọ evaọ otọ edawọ u ti fi obọ họ kẹ omai yọrọ ẹgbakiete.
14. Eme ahwo nọ a bi kru ẹgbakiete a re ru otẹrọnọ ma ru inwene jọ evaọ ukoko na hayo evaọ iwuhrẹ mai?
14 Edhere ọfa nọ ma rẹ rọ yọrọ ẹgbakiete họ ma rẹ whaha afuẹwẹ nọ ma rẹ jọ oma amọfa gwọlọ. Onana u dhesẹ inọ ma rẹ roma kpotọ kẹ Jihova. Ọ be ghale ahwo riẹ enẹna vi epaọ anwẹdẹ kpobi. No anwọ emuhọ akpọ na ze, egagọ uzẹme e re kẹre te epanọ o rrọ nẹnẹ na ha. (Aiz. 2:2-4) A te nwene otoriẹ mai kpahe oria Ebaibol jọ hayo nọ a te nwene oghẹrẹ nọ ma je ru eware vẹre, ma rẹ roma kpotọ. Eva e rẹ were omai inọ elo abọ-ẹzi na o gbe bi vẹhọ. (Itẹ 4:18) O tẹ rrọ bẹbẹ k’omai re ma wo otoriẹ enwene jọ, ma rẹ yare Jihova re o fi obọ họ kẹ omai wo otoriẹ enwene na. Bọwo oke yena, ma rẹ ruabọhọ ẹmoeyo, yọrọ ẹgbakiete mai.
Kọ Otẹrọnọ Ohwo Jọ O Gbe Kru Ẹgbakiete Riẹ Hẹ?
15. Ono ọvo ọ rẹ sae raha ẹgbakiete ra?
15 Onọ yena o rẹ lẹliẹ ohwo roro, ogbẹrọ ere? Wọhọ epanọ ma wuhrẹ evaọ uzoẹme nọ o vrẹ na, ẹgbakiete o roja gaga. Ababọ riẹ, ma re wo usu kugbe Jihova ha, yọ ma re wo uvi ẹruore he. Kareghẹhọ onana: Omọvo ọvo ọ rrọ akpọ na soso nọ ọ rẹ sae raha ẹgbakiete ra. Whẹ họ ohwo yena. Job ọ riẹ onana vevẹ. Ọ ta nọ: “Bẹsenọ me re ti whuẹ na mẹ sae ti siobọ no oruọzewọ mẹ hẹ.” (Job 27:5) Who te wo ọtamuo ọvo na je sikẹle Jihova, whọ sai ti kie no ẹgbakiete ra ha.—Jem. 4:8.
16, 17. (a) Ohwo ọ tẹ raha uzi ulogbo jọ, eme u fo inọ o re ru hu? (b) Eme u fo inọ o re ru?
16 Ghele na, ahwo jọ a be sae yọrọ ẹgbakiete rai hi. Wọhọ epanọ o via evaọ okenọ ikọ na e gbẹ jọ akpọ na, ahwo jọ a bi ru eware nọ i yoma gaga. Kọ o tẹ via k’owhẹ ere, o nwani dhesẹ nnọ u re k’owhẹ no? O nwane rrọ ere he. Eme whọ rẹ sai ru? Joma kake ta kpahe oware nọ who re ru hu. Ahwo-akpọ a rẹ gwọlọ ko uzioraha dhere no esẹgbini, ibe Ileleikristi, hayo ekpako na. Rekọ Ebaibol e kareghẹhọ omai nọ: “Ọnọ ọ kuọ oruthọ riẹ dhere ọ rẹ nyahọ aro ho, rekọ ọnọ ọ ta iruthọ riẹ via, nọ o je sioma no ai o re wo ohrọ-oriọ.” (Itẹ 28:13) Ahwo nọ a be ko izieraha rai dhere a bi roro thọ gaga, keme ma rẹ sae ko oware ovo dhere Ọghẹnẹ hẹ. (Se Ahwo Hibru 4:13.) Ejọ a rẹ tubẹ gwọlọ yeri uzuazọ agbava, lẹliẹ ahwo họ roro inọ a be gọ Jihova kpakiyọ a ruabọhọ uzioraha. Ohwo nọ o bi yeri uzuazọ agbava o ku ẹgbakiete riẹ fiẹ no. Ahwo nọ e be ko izieraha ilogbo dhere, Jihova ọ rẹ jẹ egagọ rai rehọ họ. Wo ohẹriẹ, eviẹhọ itieye na e rẹ dhae eva.—Itẹ 21:27; Aiz. 1:11-16.
17 Nọ Oleleikristi ọ tẹ raha uzi ulogbo jọ, oware nọ o re ru o rrọ vevẹ. Ọ rẹ gwọlọ obufihọ ekpako ukoko. Jihova o wo ọruẹrẹfihotọ nọ a sae rọ jọ ukoko na fi obọ họ kẹ enọ e be mọ ẹyao abọ-ẹzi. (Se Jemis 5:14.) Whọ jọ ozọ ọwhọkuo hayo ọkpọvio u ru owhẹ gbabọkẹ usu ra kugbe Ọghẹnẹ hẹ. Kọ ohwo nọ o wo areghẹ ọ rẹ dhozọ edada uduwo hayo obẹrọ ọ vẹ keria obọ uwou dede nọ ọ be mọ okpẹyao jọ?—Hib. 12:11.
18, 19. (a) Ẹvẹ oriruo Devidi o ro dhesẹ inọ ohwo ọ rẹ sae wariẹ wo ẹgbakiete riẹ? (b) Eme họ ọtamuo ra kpahe ẹgbakiete?
18 Kọ ohwo otiọye na ọ sae wariẹ wo emamọ usu kugbe Ọghẹnẹ? Kọ ohwo ọ rẹ sae wariẹ wo ẹgbakiete nọ o te ku ei fiẹ no? Wariẹ roro kpahe oriruo Devidi. Ọ raha uzi ulogbo. Ọ rehọ ẹro oyoma rri aye omọfa, o bruẹnwae, jẹ gb’edhere re a ruẹsi kpe ọzae aye na. Evaọ oke yena, ohwo ọvo ọ rẹ sai dhesẹ Devidi wọhọ ohwo nọ o kru ẹgbakiete he, manikọ ere he? Kọ onana u dhesẹ nnọ oriẹ u re no? U fo nnọ a rẹ whọku Devidi gaga, yọ ere o ginẹ via. Rekọ Jihova ọ re ohrọ riẹ fikinọ o kurẹriẹ no eva ze. Ọwhọkuo na u fi obọ họ kẹ Devidi ọ tẹ wariẹ muhọ ẹnya evaọ ẹgbakiete jẹ ruabọhọ ẹmeoyo kẹ Ọghẹnẹ. Uzuazọ Devidi u gine dhesẹ ẹgbagba eme nọ ma se evaọ Itẹ 24:16: “Ohwo okiẹrẹe o te kie isiahrẹ, ọ rẹ kparoma.” Eme u no rie ze? Roro kpahe eme nọ Jihova ọ ta kẹ Solomọn kpahe Devidi evaọ okenọ Devidi o whu no. (Se 1 Ivie 9:4.) Ọghẹnẹ ọ kareghẹhọ Devidi wọhọ ohwo nọ o kru ẹgbakiete. Jihova ọ rẹ sae rehọ izieraha ilogbo rọ vrẹ erahaizi nọ i kurẹriẹ.—Aiz. 1:18.
19 Ẹhẹ, whọ tẹ ruabọhọ ẹmeoyo whọ rẹ sae jọ ohwo nọ o bi kru ẹgbakiete. Ruabọhọ ẹmeoyo kẹ Ọghẹnẹ, yọ whọ tẹ thọ uzi ulogbo, kurẹriẹ no eva ze. A rẹ ruẹ oware nọ u woma te ẹgbakiete he! Jọ mai omomọvo o wo ọkpọ ọtamuo Devidi na, ọnọ ọ ta nọ: “Rọ kẹ omẹ, eva ẹgbakiete mẹ rẹ jọ nya.”—Ol. 26:11.
[Oruvẹ-obotọ]
a Rri Uwou-Eroro Na ọrọ March 1, 2004, ẹwẹ-obe avọ 11, edhe-ẹme avọ 15.
Ẹvẹ Whọ te k’Uyo?
• Ẹvẹ whọ sae rọ jọ ohwo nọ o bi kru ẹgbakiete?
• Idhere vẹ whọ sae rọ yọrọ ẹgbakiete ra?
• Ẹvẹ ohwo ọ sae rọ wariẹ wo ẹgbakiete riẹ?
[Etehe nọ e rrọ ẹwẹ-obe avọ 8]
“Oware U Re Woma Vienẹ Hẹ”
Aye jọ nọ ọ jọ eva emerae isoi ọye ọ ta eme yena fiki ẹwo gbe oruọzewọ ọrara jọ. O kpohọ uwou-eki jọ, rekọ nọ o kpo te euwa jọ no, ọ tẹ ruẹ nnọ ẹmẹkpa nọ o fi ugho họ o thọrọ e riẹ ẹro fihọ uwou-eki na. Ugho nọ o jọ ẹmẹkpa na u bu te isisoi udhusoi akuakpe gbe isisoi udhoree gbe ikpe (₦234,000.00), ugho na u bu gaga vi ugho nọ ọ jẹ hae wha lele oma vẹre. Uwhremu na ọ tẹ ta kẹ ohwo nọ o re kere eme fihọ obe-usi inọ: “Me je ti whu no.” Rekọ uvovo aye jọ ọ ruẹ ẹmẹkpa na ọ tẹ nwani mu ohwo nọ o wo rie họ ẹgwọlọ. Fikinọ ọ ruẹ ohwo nọ o wo rie he, ọ tẹ rehọ iẹe bru iporisi, iporisi a te duku aye nọ o dihọ na. Avọ evawere, aye na ọ tẹ ta nọ: “Oware u re woma vienẹ hẹ.” Eme o lẹliẹ uvovo aye na lahiẹ oma riẹ tere re o zihe ugho na? Obe-usi na o ta inọ wọhọ omọvo Isẹri Jihova, “aye na o dhesẹ oruọzewọ otiọye fiki egagọ nọ a jọ yọrọ iẹe.”
[Uwoho nọ e rrọ ẹwẹ-obe avọ 9]
Izoge a rẹ sae yọrọ ẹgbakiete nọ a tẹ rẹriẹ ovao dhe ẹdawọ
[Uwoho nọ e rrọ ẹwẹ-obe avọ 10]
Devidi ọ raha ẹgbakiete riẹ evaọ etoke jọ, rekọ o kurẹriẹ