Eware Nọ E Rẹ Wha Evawere Ze Uviuwou

Ẹwhọkuo Emọ

John:a Nọ mẹ jọ ọmaha, taure ọsẹgboni mẹ a tẹ te kẹ omẹ uye fiki oware nọ me ru thọ, a jẹ hae daoma wo otoriẹ uyero na gbe oware nọ o lẹliẹ omẹ ru oware na. Mẹ be daoma raro kele oriruo rai nọ mẹ tẹ be whọku emetẹ mẹ. Uviuwou nọ a jọ yọrọ aye mẹ, Alison, u wo ohẹriẹ. Ọsẹgboni riẹ a tẹ nwane ruẹ nọ ọmọ o ru thọ, nwanọ ọwhọkuo ẹsiẹvo. O wọhọ nọ a jẹ hai roro kpahe uyero nọ o lẹliẹ ọmọ ru oware taure a tẹ whọku ei hi. Ẹsejọ, o be hae jọ omẹ oma inọ oghẹrẹ obọ ogaga ovo yena aye mẹ o bi ro yeri kugbe emọ mai.

Carol: Ọsẹ mẹ ọ dhẹ siọ omai avọ oni mai ba nọ mẹ jọ ikpe isoi ọvo. Ọ daezọ mẹ avọ inievo esa mẹ nọ i kiọkọ họ. Oni mẹ ọ jẹ hai ru iruo gaga re ọ sae rọ ẹro te omai, yọ ọmọziọ iruo mẹ jẹ hai ru hu evaọ ẹruorote inievo-emetẹ emaha mẹ. Mẹ sae reawere uzuazọ ọmaha vievie he fikiọ owha-iruo ọyewọ nọ mẹ jẹ wọ. Onana o soriẹ ze nọ rite inẹnẹ dede, me gbe ro wo ẹzi aroza hayo akiehwẹ hẹ, ajokpa epanọ me re ro ru oware nọ o roja ọvo. Nọ emọ mẹ a te ru oware jọ thọ nọ o gwọlọ ọwhọkuo, mẹ rẹ raha oke krẹkri roro kpahe oware nọ a ru thọ na. Mẹ rẹ gwọlọ kiẹ omoware kpobi nọ o wha riẹ ze nọ ọmọ o ro ru oware gbe ẹjiroro nọ o wo họ eva ru ei. Wo ohẹriẹ, Mark, ọzae mẹ, ọ rẹ lahiẹ oma riẹ roro lelehie kpahe oware nọ o via ha. Ọsẹ riẹ ọ jọ wowou, dede nọ o re mu rolo obọ kẹ ọmọ họ yọ ọ jẹ hae rẹrote oni rai ẹsikpobi. Nọ emetẹ mai a te ru oware thọ, o rẹ vẹrẹ ọzae mẹ obọ re o ku ẹbẹbẹ na họ. Ọ rẹ roma totọ roro kpahe uyero na, jowọ nọ ọ rẹ rọ kpọe họ, jẹ kpairoro vrẹe.

WỌHỌ EPANỌ eme John gbe Carol i dhesẹ na, oghẹrẹ nọ a rọ yọrọ owhẹ o rẹ sai kpomahọ oghẹrẹ nọ whọ rẹ rọ yọrọ jẹ whọku emọ ra. Nọ ọzae gbe aye a te no iviuwou nọ i wo ọvuọ oghẹrẹ uruemu riẹ ze, o rẹ sai ru nọ a je wo ọvuọ eriwo riẹ kpahe oghẹrẹ nọ a re ro wuhrẹ emọ rai. Ẹsejọ, ọvuọ eriwo riẹ nana o rẹ wha idhọvẹ fihọ orọo.

Ẹbẹbẹ na ọ rẹ sae rro viere nọ oma o tẹ lọhọ imava orọo na no. U re kri hi re imava-orọo nọ i yẹ ọmọ ọsosuọ rai a te ti vuhumu inọ kpakọ ewuhrẹ ọmọ yọ okpiruo nọ e rẹ lọhọ oma jẹ rehọ oke rai kpobi. Joan, ọnọ avọ ọzae riẹ Darren a yọrọ emetẹ ivẹ rai whẹro, ọ ta nọ: “Me you emetẹ mẹ, rekọ o rẹ kake ruọ ai re a nyai kiẹzẹ okenọ mẹ gwọlọ họ. A rẹ kpama no owezẹ ze evaọ oke nọ u fo ho. A rẹ nya ze ti kpokpo omai nọ ma tẹ be ta ẹme. A rẹ nyasiọ eviẹ, iwu, gbe eware arozaha rai ba otọ, yọ a rẹ wọ emu nọ a re kiọkọ no otọ họ.”

Jack, ọnọ aye riẹ o wo ẹyao-iroro, nọ ọ nwani yẹ ọmọ avivẹ rai no, ọ ta nọ: “Oma o jẹ hae lọhọ omẹ no iruo ze ẹsibuobu, yọ mẹ jẹ hai riaro enwenọ aso okioke be rẹrote ọmọ na. Onana u ru nọ ma gbẹ jẹ sae ruẹ oke rọ kẹ ọmọtẹ ọkpako mai uthubro ẹsikpobi hi. O jẹ da ọmọtẹ mai gaga inọ ma bi wo uvẹ kẹe he, ajokpaọ oniọvo ọsese riẹ ọvo.”

Nọ imava-orọo nọ oma o rrọ no a te wo eriwo sa kpahe ẹyọrọ ọmọ rai, oware nọ u tulo ho o sae so ẹwhọ ologbo ze. Imava-orọo a gbe bi ku ẹwhọ fihọ họ o rẹ sai ru ai si oma no ohwohwo, onọ o rẹ kẹ ọmọ uvẹ whoma họ ọjọ wọso ọdekọ ro wo oware nọ ọ gwọlọ t’obọ. Ehri-izi Ebaibol vẹ i re fi obọ họ kẹ imava-orọo yọrọ ọgbakugbe orọo rai kpekpekpe jẹ kparobọ evaọ ewuhrẹ emọ rai?

Raha Oke Kugbe Ohwohwo

O gwọlọ nọ imava-orọo a re se ọwhẹgbe orọo rai gboja re a te yẹ emọ, yọ a rẹ gbẹ yọrọ onana ribri nọ emọ e tẹ maki no uwou no. Ebaibol e ta kpahe ọwhẹgbe orọo nọ: “Onọ Ọghẹnẹ o kugbe no, a jọ ohwo ọvo ọ hẹriẹ e he.” (Matiu 19:6) Evaọ abọdekọ riẹ, oria ikere ovo nana u dhesẹ nọ o rrọ ẹjiroro Ọghẹnẹ inọ ọmọ o te te ohwo no ọ rẹ “se ọsẹ gbe oni riẹ ba.” (Matiu 19:5) Evaọ uzẹme, emọ iyẹ yọ amabọ jọ gheghe evaọ orọo, orọnikọ oye họ ugogo oware nọ o rẹ gba orọo kugbe he. Uzẹme, o gwọlọ nọ esẹgbini a rẹ raha oke ro wuhrẹ emọ rai, rekọ u fo re a kareghẹhọ nọ ọwhẹgbe ọgaga evaọ orọo họ uvi otọhotọ kẹ obokparọ evaọ ewuhrẹ emọ.

Edhere jọ vẹ imava-orọo a sai ro ru ọwhẹgbe orọo rai ga evaọ etoke ẹyọrọ emọ rai? Otẹrọnọ o rẹ sae lọhọ, whai imava wha ruẹrẹ oke jọ họ nọ wha rẹ raha kugbe ohwohwo ẹsikpobi ababọ emọ na. Ere oruo u ti fi obọ họ kẹ owhai ta kpahe eware nọ i wuzou evaọ uviuwou na jẹ reawere usu ohwohwo. Uzẹme, o nwane lọhọ tere he re imava-orọo a ruẹ oke nọ a rẹ rọ jọ kugbe ohwohwo. Alison, oni nọ ma jọ obehru fodẹ na ọ ta nọ, “Okenọ mẹ avọ ọzae mẹ ma gwọlọ j’imiroro, ẹsiẹ ọmọtẹ ọmaha mai ọ rẹ gwọlọ nọ a wọe, hayo ẹsiẹ ọmọtẹ ikpe ezeza mai o re ‘bo ubo,’ ẹsejọhọ fikiọ epẹsoro riẹ nọ ọ be sae ruẹ hẹ.”

Joan gbe Darren nọ ma jọ obehru fodẹ na, a fi oke họ kẹ emetẹ rai nọ a re riaro te, re aimava a sae ruẹ oke ta ẹme. Joan ọ ta nọ: “Ma fi oke họ kẹ emọ mai nọ a rẹ rọ ruọ ehwa, ma ve ‘furie ikpẹ’ no re a wezẹ.” Ọ tẹ jẹ ta nọ: “Oyena o jẹ hae kẹ omẹ avọ ọzae mẹ uvẹ riotọ kugbe jẹ jiroro.”

Nọ imava-orọo a te fi oke họ kẹ emọ rai nọ a re ro kiẹzẹ, onana o rẹ lẹliẹ aimava ruẹ oke raha kugbe ohwohwo je fi obọ họ ru nọ ọmọ o gbe ro “roro oma riẹ kpehru vi epanọ i te rie eroro ho.” (Ahwo Rom 12:3) Uwhremu riẹ, emọ itiena nọ a wuhrẹ no otọ ze re a rọ adhẹẹ kẹ uzi kpahe oke nọ a re ro kiẹzẹ na, a ve ti vuhumu inọ dede nọ a wo ẹkabọ rai evaọ uwou na, orọnikọ ae a wuzou uviuwou na ha—o gba rai họ nọ a re lele ọruẹrẹfihotọ uviuwou na ukpenọ uviuwou na u re ru lele onọ a gwọlọ.

DAO ONANA: Wha fi oke họ kẹ emọ rai nọ a re ro kiẹzẹ jẹ ruẹ nọ a nya lele iei owowa. Otẹrọnọ ọmọ ọ ta nọ ọ gwọlọ gbe riaro omojọ fiki oware jọ, ẹsejọhọ ọ gwọlọ da ame, whọ rẹ sae kẹe uvẹ re o ru ere. Rekọ whọ kẹ ọmọ uvẹ yare eware unọjọ utọjọ họ nọ oke ekiẹzẹ riẹ u te te no. Otẹrọnọ ọmọ ọ lẹ owhẹ nọ whọ kẹe iminiti isoi re ọ gbẹ riotọ omojọ yọ whọ ginẹ gwọlọ kẹe uvẹ, thahe ughọjọ ra epanọ u re ro kporo nọ iminiti isoi na i te te no. Ughọjọ na u te kporo, ta kẹ ọmọ na nọ ọ nyai kiẹzẹ ababọ inoma efa nọ o re gu. Jọ ‘Ee ra, e jọ Ee, re Ijo ra, e jọ Ijo.’—Matiu 5:37.

Wha Jọ Ọvo

“Ọmọ mẹ, yo oghrẹ ọsẹ ra, whọ jẹ uwuhrẹ oni ra fiẹ hẹ,” ere itẹ jọ e ta. (Itẹ 1:8) Owọ Ebaibol nana u dhesẹ nọ te ọsẹ te oni a wo udu nọ a rẹ rọ kpọ emọ rai họ. Dede na, o tẹ make rọnọ oghẹrẹ nọ a rọ yọrọ imava-orọo no otọ ze i tho, a rẹ sai wo amavro ẹsejọ ghele kpahe oghẹrẹ nọ a rẹ whọku ọmọ gbe uzi nọ u fo evaọ uyero jọ. Eme ọsẹgboni a re ru nọ onana o gbẹ wha ẹbẹbẹ ze he?

John, nọ ma fodẹ no vẹre na, ọ ta nọ: “Me roro nọ u woma ha re ọzae-avọ-aye a lele ohwohwo sikẹ evaọ iraro emọ.” Dede na, o vuhumu inọ re aimava na a sobọhọ ẹme ọvo o lọhọ tere he. John ọ ta nọ: “Emaha a rẹ kaki muẹrohọ oware gaga.” Ọ ta re nọ: “Ma gbẹ maki sikẹ via ha, ọmọtẹ mai ọ rẹ sai vuhumu ghele inọ oware jọ o be thọ evaọ udevie mẹ avọ oni riẹ.”

Ẹvẹ John gbe aye riẹ a ro fi use-abọ nana kparobọ? Alison, aye na ọ ta nọ: “Oghẹrẹ nọ ọzae mẹ ọ rọ whọku ọmọtẹ mai o gbẹ were omẹ hẹ, mẹ rẹ hẹrẹ bẹsenọ mẹ aviẹe ọvo ma rrọ oria, mẹ vẹ tẹ ta orọ iroro mẹ kẹ ọzae mẹ. Mẹ gwọlọ re ọmọ na o roro ho inọ ọ tẹ maki ruthọ dede, mẹ hayo ọsẹ riẹ ọ te ‘jọ abọ’ riẹ fikinọ mẹ avọ ọsẹ riẹ ma rọwo kugbe ohwohwo ẹsejọ họ. Mẹ tẹ ruẹ nọ ọmọ na o muẹrohọ nọ oware jọ nọ ọsẹ riẹ o ru o dina were omẹ hẹ rekọ mẹ rọwo kugbei ghele, mẹ rẹ rọ uvẹ yena vuẹe inọ ohwo kpobi ọ rẹ nya lele ọruẹrẹfihotọ Jihova kpahe uzou-uwo evaọ uviuwou, gbe nnọ mẹ be rọ unevaze romakpotọ kẹ uzou-uwo ọsẹ riẹ nwane wọhọ epanọ u fo nọ ọyomariẹ ọmọ na ọ rẹ romakpotọ kẹ udu-esuo mai wọhọ ọsẹgboni riẹ na.” (1 Ahwo Kọrint 11:3; Ahwo Ẹfẹsọs 6:1-3) John ọ ta nọ: “Okenọ ma tẹ rrọ kugbe wọhọ uviuwou, mẹ họ ọnọ ọ rẹ kake jowọ ẹwhọkuo emetẹ mai. Rekọ otẹrọnọ aye mẹ Alison ọ mae riẹ kpahe oware nọ emọ na a ruthọ, mẹ rẹ kẹe uvẹ re ọ kake jowọ ọwhọkuo na, kẹsena mẹ vẹ jariẹe emu. Otẹrọnọ oghẹrẹ nọ ọ rọ whọku emọ na o were omẹ hẹ, mẹ vẹ vuẹe okiofa.”

Nọ whọ gbẹ rọwokugbe oghẹrẹ nọ ọrivẹ ra ọ rọ whọku ọmọ họ, ẹvẹ whọ sai ro ru nọ onana u gbe ro fi ẹgo họ udevie ra avọ ọrivẹ-orọo ra ha—onọ o rẹ sae raha adhẹẹ nọ emọ rai a wo kẹ owhai?

DAO ONANA: Wha fi oke họ koka koka nọ wha rẹ rọ ta ẹme kpahe epanọ u fo nọ wha rẹ yọrọ emọ rai, jẹ ta kpahe ebẹbẹ hayo avro nọ wha rẹ sai wo. Daoma wo otoriẹ eriwo ọrivẹ-orọo ra, je vuhumu inọ ọrivẹ-orọo ra o you ọmọ na wọhọ epanọ who you rie na.

Jọ Ẹyọrọ Emọ O Ru Owhai Kpekpe

Avro ọ riẹ hẹ, re a yọrọ emọ yọ okpiruo. Ẹsejọ, onana o rẹ sai mi ohwo ẹgba kpobi no. Nọ oke o be nyaharo na, emọ na a ve ti no uwou kpohọ orobọ rai, whẹ avọ ọrivẹ-orọo ra wha vẹ te wariẹ jọ wọhọ ẹsenọ wha rọo obọ. Kọ eware nọ wha rọ ẹro ruẹ evaọ etoke ẹyọrọ emọ i ti ru ọwhẹgbe orọo rai ga manikọ e te wha ẹbẹbẹ fihọ iẹe? Uyo na o roma wha oghẹrẹ nọ wha fi ehri-uzi nọ o rrọ Ọtausiuwoma Na 4:9, 10 na họ iruo te, nọ o ta nọ: “Imava i woma vi omọvo, keme a wo emamọ osaohwa rọkẹ iruo rai. Keme a te kie, ọjọ ọ rẹ kpare ọrivẹ riẹ.”

Nọ ọsẹgboni a te bi ru eware kugbe o rẹ wha emamọ iyẹrẹ ze. Carol, ọnọ ma jọ obehru tẹme te na ọ ta nọ: “No emuhọ ze, mẹ riẹ nọ ọzae mẹ o wo obọdẹ iruemu, rekọ mẹ wariẹ ruẹ uvi iruemu efa nọ o wo evaọ etoke nọ mai imava ma jẹ rọ yọrọ emọ mai. Adhẹẹ gbe uyoyou nọ me wo kẹe o rro vi epaọ ọsosuọ nọ mẹ ruẹ oghẹrẹ nọ ọ jẹ rọ uyoyou kuobọgbe omẹ yọrọ emetẹ mai.” John ọ ta kpahe aye riẹ, Alison, inọ: “Nọ mẹ ruẹ oghẹrẹ nọ aye mẹ ọ be rọ wọ owha-iruo oni avọ uyoyou, o tẹ lẹliẹ uyoyou nọ me wo kẹe diwi viere je ru nọ ọ rọ ghare omẹ obọ vi epaọ ọsosuọ.”

Whọ tẹ be raha oke kugbe ọrivẹ-orọo ra je bi ru iruo kugbei evaọ ẹyọrọ emọ rai, ọwhẹgbe orọo rai ọ te ga vi epaọ ọsosuọ nọ emọ rai e be kpako na. A rẹ ruẹ obọ oriruo nọ o woma vi onana ha nọ emọ a rẹ sae rọ aro kele!

[Oruvẹ-obotọ]

NỌ OMARA NỌ . . .

▪ Ẹvẹ mẹ be raha oke kugbe ọrivẹ-orọo mẹ te koka koka ababọ emọ mai nọ e rẹ jariẹ?

▪ Oghẹrẹ vẹ mẹ be rọ tha ọrivẹ-orọo mẹ uke nọ ọ tẹ be whọku emọ mai?