Uwuhrẹ Ebaibol Uviuwou O Roja Kẹ Azọ Mai!

DAI roro epanọ “ẹdẹ ẹmo ologbo Ọghẹnẹ Erumeru na” o ti muozọ te! (Evia. 16:14) Maeka ọruẹaro na o dhesẹ ẹdẹ yena nọ: “Igbehru na e rẹ te gwọ . . . iko kpobi e rẹ te ghra wọhọ eko nọ a fihọ erae, wọhọ ame nọ a ku fihọ oria nọ u kuwhrẹrẹ.” (Mae. 1:4) Eme ọ te via kẹ enọ e be gọ Jihova ha? Ebaibol e ta nọ: “Enọ ỌNOWO na o kpe eva ẹdẹ ọyena a rẹte vaha ae no oka du oka akpọ na.”—Jeri. 25:33.

Fiki unuovẹvẹ nana, u re woma re enọ i wuzou uviuwou, nọ ibuobu rai e rrọ ọyewọ ọvo, a nọ oma rai kpahe emọ rai nọ e whẹro no inọ, ‘Kọ emọ mẹ a te zọ evaọ ẹmo yena?’ Ebaibol e kẹ imuẹro inọ a te zọ otẹrọnọ a bi ru utho ẹgba rai evaọ egagọ Ọghẹnẹ.—Mat. 24:21.

Epanọ U Wuzou te Re Ma Wo Oke kẹ Uwuhrẹ Ebaibol Uviuwou

Esẹgbini, wha dawo uthoma rai kpobi re wha yọrọ emọ rai “re a yo ẹme je wuhrẹ ai orọ Ọnowo na.” (Ẹf. 6:4) U wuzou gaga re wha hai wuhrẹ Ebaibol kugbe emọ rai. Ma gwọlọ re emọ mai a jọ wọhọ Ileleikristi obọ Filipai, enọ Pọl o jiri fikinọ a je yoẹme kẹ Jihova no eva ze. O kere nọ: “Iyoyou mẹ, rọwo epanọ wha re he yo ẹme kẹse kẹse na, ere re enẹna, orọnikọ iraro mẹ ọvo ho, rekọ wha ru vi ere nọ omẹ riẹ hẹ, wha rehọ ozọ-odhẹ avọ enuho ru iruo usiwo rai via.”—Fil. 2:12.

Kọ emọ ra a bi koko izi Jihova evaọ okenọ whọ rrọ kugbe ai hi? Kọ ẹvẹ okenọ a tẹ rrọ obọ isukulu? Ẹvẹ whọ sai ro fi obọ họ kẹ emọ ra riẹ inọ o rrọ oware areghẹ re a koko izi Jihova whọ gbẹ make rrọ kugbe ai hi?

Uwuhrẹ Ebaibol uviuwou u re fi obọ họ gaga bọ ẹrọwọ ọmọ ra ga re o yoẹme kẹ Jihova ẹsikpobi. Fikiere, joma ta ẹme kpahe eware esa nọ i re fi obọ họ kẹ owhai wo erere no uwuhrẹ Ebaibol uviuwou rai ze.

Hai Ru Ei Ẹsikpobi

Ebaibol i dhesẹ inọ u wo oke nọ ijẹle Ọghẹnẹ a re ro kokohọ aro riẹ. (Job 1:6) Fi oke jọ họ kẹ emọ ra re. Wo uzedhe oke jọ dẹẹ kẹ uwuhrẹ Ebaibol uviuwou ra re who lele oke na. Ofariẹ, wha wo oke ofa re oware jọ u te kie fihọ oke ọsosuọ nọ wha fihọ na, wha vẹ sai gbe ru uwuhrẹ na.

Nọ oke o be nyaharo na, whaha uruemu na inọ wha gbẹ maki ru uwuhrẹ na evaọ oka jọ họ o thọ họ. Kareghẹhọ, emọ ra họ enọ e mae rrọ emọ-uwuhrẹ Ebaibol ra. Ghele na, Setan ọ gwọlọ ru re a siọ Ọghẹnẹ ba ẹgọ. (1 Pita 5:8) Wha tẹ siọ uwuhrẹ na ba eru fikinọ wha gwọlọ rri ughe jọ evaọ etehe-ughe hayo oware ofa jọ nọ o roja ha, yọ Setan ọ kparobọ no.—Ẹf. 5:15, 16; 6:12; Fil. 1:10.

Wuhrẹ Ai Eware nọ E rẹ Kẹ Ae Erere

Orọnikọ re a wo eriariẹ ọvo a re ro ru uwuhrẹ Ebaibol uviuwou hu. Daoma wuhrẹ eware nọ e rẹ kẹ ae erere. Evaọ oghẹrẹ vẹ? Ẹsejọ whọ rẹ salọ izoeme nọ e ta ẹme te eware nọ ọmọ ra ọ te nyaku kẹle. Wọhọ oriruo, kọ wha gbe ru idhesẹvia eware nọ wha sae te nyaku evaọ usiuwoma ota? O rẹ were emaha re a ru oware nọ a be riẹ ru ziezi. Wha te bi ru idhesẹvia usiuwoma ota je roro kpahe epanọ wha rẹ kpahe ẹme kẹ ahwo nọ a nọ enọ u ti fi obọ họ kẹ ae wo udu nọ a rẹ rọ ta usiuwoma.—2 Tim. 2:15.

Wha rẹ sai je ru idhesẹvia nọ i re fi obọ họ kẹ emọ rai dadamu kẹ otunyẹ ehwa rai. A rẹ sae rehọ uzoẹme avọ 15 ọrọ obe na Questions Young People Ask—Answers That Work, Uko avọ 2, ro ru uwuhrẹ uviuwou na. Ẹkpẹti nọ ọ rrọ ẹwẹ-obe avọ 132 avọ 133, “Omaruẹrẹ Kpahe kẹ Otunyẹ Ọhwa,” o re fi obọ họ kẹ ọmọ ra riẹ ẹme nọ ọ te ta hayo oware nọ o ti ru nọ ọ tẹ rẹriẹ ovao ku otunyẹ ọhwa. Ẹme jọ nọ ọ rrọ obotọ ẹwẹ-obe avọ 133 o tuduhọ izoge na awọ nọ: “Rehọ eware nọ whọ jiroro rai lele ọsẹ hayo oni ra hayo ọkpako ọfa nọ ọ kẹle owhẹ gbiku.” N’oke ruoke, kọ wha gbe fi eme itieye na ba uwuhrẹ uviuwou rai?

Uwuhrẹ Ebaibol uviuwou yọ emamọ uvẹ nọ esẹgbini a re ro fiẹgba họ irere nọ e rrọ ewo itee abọ-ẹzi. Uzoẹme avọ 38 ọrọ obe Young People Ask, Uko avọ 2 na, onọ o ta nọ “Eme Mẹ te rọ Uzuazọ Mẹ Ru?” o sai fi obọ họ evaọ ẹme nana. Rọ uzoẹme nana fi obọ họ kẹ ọmọ ra riẹ nọ egagọ Jihova nọ ọ rẹ rọ karo họ uzuazọ nọ o mai fo eyeri. Fi obọ họ kẹ ọmọ ra wo isiuru iruo ọkobaro, iruo Ebẹtẹle, Isukulu Ewuhrẹ Odibọgba, hayo abọ ọfa ọrọ iruo odibọgba oke-kpobi na.

U fo re ma kareghẹhọ inọ esẹgbini jọ nọ e gwọlọ ewoma kẹ emọ rai a rẹ ruawa utee nọ a gwọlọ inọ ọmọ na o re le te epanọ a gbe ro jiri ọmọ na kẹ eware nọ o bi ru enẹna ha. O rrọ ziezi re wha tuduhọ emọ rai awọ re a le emamọ itee wọhọ iruo Ebẹtẹle gbe iruo imishọnare. Rekọ who te bi ru ere, yọroma keme whọ tẹ be gba ọmọ na họ re o le utee nọ who wo họ iroro, ọ vẹ te jọ ọkora. (Kọl. 3:21) Hae kareghẹhọ ẹsikpobi inọ ọmọ ra ọ rẹ rehọ udu obọ riẹ you Jihova. (Mat. 22:37) Fikiere jiri ọmọ ra kẹ eware nọ ọ be riẹ ru, orọnikọ enọ ọ be riẹ ru hu ọvo whọ rẹ tẹrovi hi. Fi obọ họ kẹe wo ovuhumuo kẹ eware kpobi nọ Jihova o ru no. Who ve muẹrohọ oghẹrẹ nọ onana u ti kpomahọ iẹe.

Ru Ei Jọ Sasasa

Oware avesa nọ o rẹ lẹliẹ omai wo erere no uwuhrẹ Ebaibol uviuwou ze họ ma re ru ei jọ sasasa. Ẹvẹ whọ sai ro ru ei? Ẹsejọ wha rẹ sae gaviezọ kẹ edrama mai jọ hayo rri ividio ukoko na jọ. Hayo wha sai se oria Ebaibol jọ kugbe, ghale isase na kẹ omomọvo uviuwou na.

Eria jọ e rrọ emagazini mai nọ a rẹ sai ro ru uwuhrẹ Ebaibol uviuwou. Wọhọ oriruo, whọ rẹ sae rehọ uzoẹme nọ o be hae jọ ẹwẹ-obe avọ 31 ọrọ Awake! na ru uwuhrẹ na, onọ uzoẹme riẹ o rrọ “Ẹvẹ Whọ te k’Uyo?” Uzoẹme ofa o be hae roma via evaọ Uwou-Eroro uvitha ẹgbede na nọ o ta nọ: “Rọkẹ Izoge Na.” Ofa o be hae roma via re nọ o ta nọ: “Wuhrẹ Emọ Ra.”

Esẹgbini nọ i wo emọ a ti wo isiuru kpahe enọ izoge na nọ e be hae roma via evaọ Awake! na wọhọ epanọ obe na Young People Ask, Uko avọ 2 o rrọ isiuru kẹ ae na. Whọ tẹ be rehọ obe na wuhrẹ kugbe emọ ra, muẹrohọ ẹkpẹti na “Ẹvẹ Who Roro” onọ o rrọ ekuhọ uzoẹme kpobi na. Ẹkpẹti yena orọnikọ a rẹ rehọ iẹe kiẹ uwuhrẹ na riwi ọvo ho. A rẹ sae rọ ẹkpẹti na ru uwuhrẹ uviuwou.

Rekọ whaha enọ nọ who re ro zere emọ ra evaọ oke uwuhrẹ na. Wọhọ oriruo, whọ gba ọmọ ra họ họ re o se eme obọ riẹ nọ o kere fihọ eria jọ nọ e rrọ obe na. Evaọ ẹwẹ-obe avọ 3, obe na o ta kẹ esẹgbini nọ: “Re emọ rai a sai kere oware nọ o ginẹ rrọ eva rai, wha rẹ jọ kugbe ai hi nọ a te bi ru onana. Oke ofa, a sae rọ eme nọ a kere na t’ẹme kugbe owhẹ.”

Wha tẹ be daoma ru uwuhrẹ uviuwou rai ẹsikpobi, o tẹ be kẹ erere, o tẹ jẹ rrọ sasasa, Jihova ọ te ghale omodawọ rai. Obọdẹ oke nana nọ wha be te raha kugbe na u ti fi obọ họ ru ahwo uviuwou ra jọ gaga evaọ abọ-ẹzi.

[Ẹkpẹti nọ ọ rrọ ẹwẹ-obe avọ 31]

Wha Roro Kpahe Eware Ekpokpọ

“T’omẹ t’ọzae mẹ gbe emetẹ mai ma tẹ be ruẹrẹ oma họ kẹ iwuhrẹ ukoko, ma vẹ ta kẹ emetẹ mai re a drọ iwoho oware nọ ma wuhrẹ na. Ẹsejọ ma re ru idhesẹvia ikuigbe Ebaibol jọ hayo oghẹrẹ nọ ma rẹ ta usiuwoma. Ma re ru uwuhrẹ na lọlọhọ wọhọ epanọ ikpe rai e rrọ, ma re ru ei sasasa, whaha eme nọ e rẹ wha omovuọ se ai.”—J.M., United States.

“Re ma fi obọ họ kẹ ọmọzae ọrọ ọmọ-uwuhrẹ Ebaibol mẹ riẹ epanọ uko-obe ikere ẹri na o jọ, ma te kere obe Aizaya na lahwe ababọ izou gbe awọ riẹ. Ma tẹ ta ewẹ-ebe na kugbe jẹ rehọ umure variẹ ae. Ọmọ na ọ tẹ daoma re o ru oware nọ Jesu ọ jọ uwou egagọ-ode ru evaọ Nazarẹt. Ikuigbe nọ e rrọ Luk 4:16-21 e ta inọ Jesu “o te rovie obe [Aizaya], ọ jẹ ruẹ oria” nọ ọ jẹ gwọlọ. (Aiz. 61:1, 2) Rekọ nọ ọmọzae na ọ daoma re o ru epanọ Jesu o ru na, o jọ bẹbẹ kẹe re ọ ruẹ Aizaya uzou avọ 61 evaọ uko-obe uthethei yena nọ u wo izou gbe awọ họ na. Akpọ o gbe ọmọ na unu kpahe ona nọ Jesu ọ jẹ rọ ruẹ oria nọ ọ jẹ gwọlọ te epanọ o ro bo nọ: ‘Mẹ kpaobọ kẹ Jesu.’”—Y.T., Japan.

[Uwoho nọ o rrọ ẹwẹ-obe avọ 30]

Idhesẹvia nọ wha re ru kugbe e rẹ sai fi obọ họ kẹ emọ rai mugba kẹ otunyẹ ọhwa

[Uwoho nọ o rrọ ẹwẹ-obe avọ 31]

Daoma ru Uwuhrẹ Ebaibol Uviuwou na jọ sasasa