Nọ Okpẹtu Ọ tẹ Romavia

“Ma je roro nọ u re kẹ omai no. Owhe avọ ọloho e raha eware nọ ma wo kpobi muotọ.”—Andrew, Sierra Leone.

“Nọ ọwhibo na o fou vrẹ no, ma te zihe kpobọ uwou mai. Oware ovo u kiọkọ họ. Ma kpenu fihọ ọvo. Ọmọtẹ mẹ o te kie fihọ otọ je muhọ ẹviẹ.”—David, Virgin Islands.

OTẸRỌNỌ eware okpẹtu e via kẹ owhẹ no ẹdẹjọ, whọ rẹ riẹ oghẹrẹ nọ o rẹ jọ ohwo nọ o via kẹ no oma. Ohwo o re whu dikihẹ ọvo, reghe no, ruawa, wezẹ ikpehre ewezẹ, je tube roro nọ oware na o ginẹ via ha. Udu u re whrehe ibuobu no, a ve roro nọ o mai woma re a whu.

Otẹrọnọ eware okpẹtu e raha eyero ra no ẹdẹjọ, ẹsejọhọ o jọ owhẹ oma inọ whọ te sai thihakọ riẹ hẹ. Whọ sai tube roro nọ o mai woma re who whu. Ghele na, Ebaibol na ọ ta oware nọ uzuazọ u ro fo ẹrria gbe ẹjiroro nọ whọ sai ro rẹro emamọ uzuazọ evaọ obaro.

UZẸME EBAIBOL NA O RẸ KẸ OWHẸ ẸRUORE

Ọtausiuwoma Na 7:8 o ta nọ: “Ekuhọ ẹme o wuzou vi emuhọ riẹ.” Nọ okpẹtu ọ tẹ via vrẹ no obọ, o rẹ sae jọ owhẹ oma wọhọ nọ akpọ o re kẹ owhẹ no. Rekọ nọ who bi koko oma ra họ ẹmẹrera na, eware i ve ti muhọ ewoma.

Ebaibol na ọ ta kpahe okenọ a gbe ti “yo edo oviẹ hayo ubo uye ofa ha.” (Aizaya 65:19) Onana u ti rugba nọ Ọghẹnẹ ọ tẹ rọ Uvie riẹ zihe otọakpọ na soso ruọ aparadase no. (Olezi 37:11, 29) Okpẹtu ọ te jọ oware anwae nọ o vrẹ no. Ahwo a gbẹ te kareghẹhọ edada hayo uye nọ eware nana e wha ze he keme Ọghẹnẹ Erumeru na ọ ya eyaa nọ: “A gbẹ te kareghẹhọ eware anwae na ha, yọ e te gbẹ ruọ udu na gbe he.”—Aizaya 65:17.

Dai roro kpahe onana: Ọnọma na o ti “ru eware woma kẹ [owhẹ] evaọ obaro, [who] ve je wo ẹruore” evaọ otọ esuo ọgbagba riẹ. (Jerimaya 29:11) Kọ uzẹme nana nọ whọ riẹ na o sai fiobọhọ kẹ owhẹ evaọ uzuazọ? Sally nọ ma fodẹ evaọ uzoẹme ọsosuọ na ọ ta nọ: “Whọ tẹ be hae kareghẹhọ omara emamọ eware nọ Uvie Ọghẹnẹ u ti ru kẹ omai evaọ obaro, o sai fiobọhọ kẹ owhẹ kpairoro vrẹ eware nọ e via vrẹ no je thihakọ uyero ra.”

Ma be tuduhọ owhẹ awọ re who gbe wuhrẹ kpahe eware nọ Uvie Ọghẹnẹ u ti ru kẹ ahwo-akpọ kẹle na. Who te ru ere, u ti fiobọhọ kẹ owhẹ yeri uzuazọ ra vrẹ ghelọ eware okpẹtu nọ e via kẹ owhẹ no kẹhẹ. Yọ whọ te rọ ọwhọ rẹro okenọ okpẹtu ọ gbẹ te romavia ha. Bọo oke yena, Ebaibol ọ fodẹ eware sa-sa nọ e rẹ sai fiobọhọ kẹ owhẹ thihakọ nọ okpẹtu ọ tẹ nwane via vrẹ no. Joma ta kpahe iriruo jọ.

Eria Ikere nọ E rẹ Sai Fiobọhọ

Hae wezẹ ziezi.

“Umutho eriosehọ u woma vi iruo egaga nọ e wọhọ ofou nọ a bi le.”—Ọtausiuwoma Na 4:6.

Egba-eriariẹ e ta nọ okenọ oware uyoma o tẹ via kẹ ohwo no, “ohwo ọ gbẹ be wezẹ ziezi hi, . . . o rẹ sai ru nọ edada na e rẹ rọ ga viere jẹ lẹliẹe ruawa gaga.” Fikiere u wuzou gaga re ohwo ọ hae wezẹ ziezi.

Vuẹ omọfa epanọ o rrọ owhẹ oma.

“Awaọruọ nọ ọ rrọ udu ohwo u re mi ei ẹgba [hayo “u re ru ei jọ ọkora,” ẹme-oruvẹ], rekọ emamọ ẹme ọ rẹ sasa iẹe oma.”—Itẹ 12:25.

Vuẹ ohwo uviuwou ra hayo ogbẹnyusu ra jọ nọ who fievahọ epanọ o rrọ owhẹ oma. Ọ te nabe gaviezọ kẹ owhẹ, yọ ọ rẹ sae jẹ tuduhọ owhẹ awọ je fiobọhọ kẹ owhẹ.a

Roro kpahe akpọ ọkpokpọ na.

“Idhiwu ekpokpọ gbe otọakpọ ọkpokpọ e riẹ nọ ma be hẹrẹ wọhọ epaọ eyaa [Ọghẹnẹ], yọ ẹrẹreokie ọ te jọ eva rai.”—2 Pita 3:13.

a Nọ ohwo ọ tẹ be ruawa gaga evaọ oke lelehie hayo nọ edada riẹ i gbe bi kpotọ họ, o sae gwọlọ nọ o re kpohọ ẹsipito.