Omọvo Utu Ẹruorote Nọ A Ro Mu Obọ

EVAỌ ohiohiẹ Edesa-Oka, Ọvo 24, 2018, a whowho kẹ ahwo uviuwou Ebẹtẹle obọ America gbe Canada inọ a rehọ Brọda Kenneth Cook, Jr. mu omọvo Utu Ẹruorote Isẹri Jihova no.

Obọ Pennsylvania, evaọ America a jọ yẹi yọ obei ọ jọ whẹro. Ọmọ eklase riẹ jọ ọ ta usi uwoma kẹe nọ u ru nọ o ro kurẹriẹ taure o te ti nwrotọ no ekọleji, yọ ọ họ-ame evaọ Azeza 7, 1980. O mu iruo ọkobaro oke-kpobi họ evaọ Azie 1, 1982. Nọ o ru iruo ọkobaro te ikpe ivẹ no, a te zizie ei kpohọ iruo Ebẹtẹle evaọ obọ Wallkill, New York, evaọ Akpe 12, 1984.

Evaọ ikpe udhegbisoi nọ i lele i rie, Brọda Cook o ru iruo sa-sa evaọ oria nọ a re jo printi ebe gbe ọfisi nọ ọ rẹ rẹrote iruẹru Ebẹtẹle. Ọ rọo oniọvo-ọmọtẹ nọ a re se, Jamie evaọ 1996, o te kuomagbei evaọ iruo Ebẹtẹle obọ Wallkill. Evaọ Akpegbivẹ 2009, a te dhe Brọda Cook avọ aye riẹ kpohọ Watchtower Educational Center evaọ Patterson, New York, re o ru iruo kugbe utu Ẹko-Iruo Ileta-Ikere. Evaọ Ane 2016, Brọda Cook avọ aye riẹ a wariẹ zihe kpobọ Wallkill nyai ru iruo ubroke, kẹsena a tẹ wariẹ dhe ai kpobọ Brooklyn, New York. Nọ emerae isoi e vrẹ no, a tẹ kwa kpohọ oria nọ o rrọ ehri ukoko Isẹri Jihova evaọ obọ Warwick, New York. Evaọ Ọvo 2017, a tẹ rọ Brọda Cook mu ofiobọhọ kẹ Ogbẹgwae Ebe-Ikere orọ Utu Ẹruorote Na.