Gwọlọ Ahwo nọ I Wo Eva-Ezi Via
1 Ẹjiroro iruo usiuwoma ota na jọ họ re a gwọlọ via enọ ‘i wo eva-ezi kẹ uzuazọ ebẹdẹ bẹdẹ.’ (Iruẹru 13:48) Ẹghale emagazini Uwou-Eroro gbe Awake! na i dhesẹ emamọ edhere nọ a re ro ru onana no, keme ebe mai i bi ru ahwo riẹ kpahe ẹruore Uvie na. Ma ti ru ahwo vi Uwou-Eroro na evaọ April. Oria nọ a sae jo ru ohwo vi hi, a sai fi emagazini họ ada. Ma wo irẹro, inọ oria nọ ma jọ ruẹ isiuru, ma sae mu iwuhrẹ Ebaibol ekpokpọ họ evaọ obe na Eriariẹ Nọ I Re Su Kpohọ Uzuazọ Ebẹdẹ Bẹdẹ. Iroro jọ e rọ etenẹ nọ e rẹ sai wo iruo k’owhẹ:
2 Okenọ whọ tẹ be rehọ “Uwou-Eroro,” ọrọ April 1 na ruiruo whọ sai dhesẹ uzoẹme ọ “Jiri Ovie Ebẹdẹ Bẹdẹ Na!,” nọ o riobọhọ ovuẹ ogbotu okokohọ mai nọ ukpemu na, whọ vẹ ta nọ:
◼ “Ahwo buobu nọ ma t’ẹme kugbe a wo ẹrọwọ fihọ Ọghẹnẹ. O rọ bẹbẹ kẹ amọfa re a rọwo onana. Ẹvẹ o rọ owhẹ oma? [Kuvẹ kẹ uyo.] Imuẹro buobu e wariẹ omai họ nọ i dhesẹ nọ Ọghẹnẹ ọ rọ. [Se Olezi 104:24.] Nọ ma tẹ ruẹ ekamẹra hayo kọmputa, ma rẹ ghinẹ rọwo nọ ọwena nọ o wo eriariẹ ọye o ru riei. Kọ u w’iroro re a ta nọ eware nọ i wo ona viere, wọhọ akpọ na jegbe mai ahwo, a muhọ gheghe?” Rehọ edhe-ẹme no uzoẹme na ze ro dhesẹ iroro egbagba nọ a je fi ẹrọwọ họ Ọghẹnẹ. Whọ vẹ tudu họ ai awọ re a vi emagazini na.
3 “Uwou-Eroro” ọrọ May 1 o riobọhọ uzoẹme na “Oware nọ O Soriẹ nọ Egagọ Uzẹme A je Wo Oghale Ọghẹnẹ.” Whọ sae nọ n’ikọ:
◼ “Avọ egagọ udhusoi buobu nọ e rọ akpọ na, kọ who roro nọ ae kpobi Ọghẹnẹ ọ sae jẹ rehọ? [Kuvẹ kẹ uyo.] Jesu ọ ruẹaro inọ makọ oghẹrẹ nọ ahwo egagọ buobu a se oma rai dede, a te siọ enọ i bi ru oreva Ọghẹnẹ hẹ. [Se Matiu 7:21-23.] U wuzou re ma vuhu egagọ uzẹme nọ Jesu o wuhrẹ na.” Rovie kpohọ uzoẹme na “Ibi Vẹ Egagọ Uzẹme a rẹ Mọ Hrọ?,” nọ u muhọ eva ẹwẹ-obe 16, re whọ t’ẹme kpahe oriruo ọvo ro dhesẹ ugogo ẹme na. Whọ vẹ tudu họ ai awọ re a vi emagazini na.
4 Okenọ who te bi dhesẹ uzoẹme evaọ “Awake!” ọ April 22 na, “Okenọ Emo E Gbẹ Te Jọ Họ,” whọ rẹ sae ta nọ:
◼ “Evaọ ikpe-udhusoi ọnana emo udhusoi buobu e via no, nọ i kugbe emo akpọ ivẹ. Ghele na, unwenọ isu akpọ kpobi a ta nọ a gwọlọ udhedhẹ. Erei ahwo kpobi nọ mẹ riẹ a be ta re. Otẹrọnọ ahwo kpobi a gwọlọ udhedhẹ, fikieme a gbẹ be sae woi ha? [Kuvẹ kẹ uyo.] Eme who roro nọ o gwọlọ re ma tẹ te ruẹ uvi udhedhẹ evaọ akpọ?” Okenọ ọnọ o wo uwou na ọ tẹ kẹ uyo no, rovie kpohọ ewẹ-obe 8 gbe 9 je se ikere wọhọ Olezi 46:8, 9. Nọ whọ be rehọ ifoto gbe ikereakere nọ a se fihiẹe ruiruo na, dhesẹ epanọ Uvie Ọghẹnẹ o te rọ wha udhedhẹ akpọ-soso ze nọ o te jọ bẹdẹ bẹdẹ. Eva oke nana dhesẹ epanọ a re ro vi Uwou-Eroro na. Rekọ otẹrọnọ a gbe dede onana rehọ họ, whọ sai fi emagazini họ ada who ve je ru ọruẹrẹfihọ nọ who ti ro zihe.
5 Otẹrọnọ whọ ruẹ ahwo buobu nọ a ta nọ a wo uvẹ hẹ, whọ sae dawo onana:
◼ “Ma gwọlọ fiobọhọ kẹ ahwo nọ e be rria uzuazọ nọ i wo umutho uvẹ nọ a rẹ rehọ roro kpahe abọ ẹzi evaọ uzuazọ. Ebe mai, Uwou-Eroro Na gbe Awake!, a nabe ruẹrẹ ai họ re e kẹ uzedhe evuẹ kpahe eme nọ i wuzou nọ i kpoma họ owhẹ avọ uviuwou ra. Mẹ gwọlọ nyase enana ba k’owhẹ re who se.”
6 Muẹrohọ otọ ziezi evaọ ẹgwọlọ via enọ i wo eva-ezi. Ababọ avro a ti wo erere no isase Uwou-Eroro Na gbe Awake! ze, nọ e be wha “emamọ usi uwoma ze” na.—Aiz. 52:7.